الموضوع: عايز أسافر تركيا أعيش هناك .. حد يفيدني ؟

كنوع من الدعم لحضرتك و باقي اخوتنا في المنتدى المحترم ؛ فيما يلي تكلفة تكوين عمل خاص و نقل المعيشة لامارة راس الخيمة بدولة الامارات طبقا لزيارات عديدة و عن تجربة شخصية و ان كان العبد لله لم ينفذ اجراءات الانتقال حتى تاريخه لامور شخصية عديدة :

١- امارة راس الخيمة تبعد ١٠٠ كم من وسط دبي على طريق سريع جدا بمعنى ٤٥ دقيقة يمكنك الاقامة في راس الخيمة و التواصل مع دبي حيث التسويق لشغلك و ممكن الشغل نفسه لو حبيت و تروح يوميا. الناس محترمة و الدنيا منظمة و كل واحد في حاله و تخيل ان عندهم اشارات مرور في الشوارع - ههههه - و في كمان ٤ مولات كبيرة للترفيه و مدينة العاب مائية و مدارس متنوعة من العادي للهندي وصولا للمدارس الدولية . باختصار جودة حياة كويسة جدا و هدوء اعصاب بدون ضغط و الاهم قانون يطبق على المواطن قبل المقيم و دي معروفة عن الامارات تحديدا غير باقي الخليج خالص.

٢- تكلفة انشاء مؤسسة فردية يمتلكها شخص واحد بالمنطقة الحرة لنشاط خدمي زي طبيعة شغل حضرتك في تصميمات الانترنت هي ٣٠٠٠٠ درهم اول سنة تنخفض الى ٢٠٠٠٠ درهم من السنة الثانية و حتى استمرار النشاط الى جانب ٤٠٠٠ درهم قيمة فيزا اقامة لمدة ٣ سنوات و تشمل رخصة نشاط خدمي لمدة سنة مع مكتب مشترك شامل الانترنت مع فيزا اقامة ٣ سنين للمالك الاصلي فقط بدون عمال طبعا. رأس المال المطلوب ايداعه بالبنك لاستكمال الاجراءات قدره ١٠٠٠٠٠ درهم لو منشأة فردية و ممكن تسحبه طبعا بعد ختم الاقامة على الباسبور.
الدرهم حاليا بحدود ٢ جنيه بالصرافة. شغل المنطقة الحرة لا يسمح بالبيع المباشر داخل الدولة لاي شركة منطقة حرة و لكن ممكن البيع بفواتير لاي وكيل محلي داخل الدولة. طبعا رسوم الرخصة بتتدفع سنويا كاملة و لازم تكون جاهزة معاك. كده بمعدل شهري فبند الترخيص يعادل ٢٥٠٠ درهم شهري اول سنة تنخفض الى ١٧٠٠درهم شهري بعد اول سنة و الاقامة تجدد كل ٣ سنين كمستثمر.

٣- تكلفة المعيشة لاسرة من اب و ام و ٣ اطفال في حدود ٥٠٠٠ درهم في المتوسط شهريا لو مستوى معقول و ممكن اقل لو هاتضغط نفقاتك الاساسية من اكل و شرب و خلافه. تكلفة الايجار لشقة غرفتين في منطقة كويسة بحدود ٣٠-٤٠ الف درهم سنوي لان العقود هنا بالسنة بمعنى شهريا من ٢٥٠٠ الى ٣٠٠٠ درهم. قسط عربية صغيرة مع صيانتها و بنزينها و بند الترفيه للاسرة ممكن تضيف ٢٠٠٠ درهم كمان. مدارس الاولاد في ابتدائي طبعا مدارس خاصة لان الحكومية للمواطنين فقط - عدا رجال القضاء العاملين بالحكومة - تكلفة الطفل الواحد في مدرسة كويسة ٥٠٠٠ درهم سنوي بدون الباص طبعا يعني لطفلين ١٠٠٠٠ درهم سنوي او شهريا حوالي ١٠٠٠ درهم كمان و طبعا في مدارس بمستويات اعلى و تتدرج ماديا من ٥٠٠٠ درهم سنوي كما قلت وصولا الى ٣٠٠٠٠ درهم للمدارس الدولية.
كده متوسط تكلفة المعيشة شهريا لاسرة من ٥ افراد مستوى متوسط و كويس مع سيارة صغيرة في حدود ١٥٠٠٠ درهم شهري و طبعا ممكن اقل من كده بس على حساب مستوى السكن او على حساب عدم وجود اسرتك معاك.

طبقا للبندين ٢ و ٣ فحضرتك محتاج يكون عندك دخل شهري من ١٥٠٠٠ - ٢٠٠٠٠ درهم من شغلك الخاص في التصميمات بما يضمن تغطية النفقات كلها شاملة المؤسسة الخاصة بك مع اسرتك. و طبعا ده مش مبلغ كبير قوي بالنسبة للشغل في الامارات عموما بالذات لو عمل خاص و ممكن لو متميز في مجالك تعمل مبلغ كويس يضمن لك تعمل مدخرات شخصية كمان.

طبعا لو حضرتك هاتشتغل في شركة خاصة بمجالك و عايز اسرتك معاك و الشركة دي مش هاتوفر لك سكن او مدارس للولاد يبقى لازم دخلك الشهري لا يقل عن ١٥٠٠٠ درهم و كده اتلغى البند ١ بتاع تأسيس شركة خاصة و راس المال.

ارجو ان اكون قد افدت قدر طاقتي و اعتذر للاطالة بس حبيت اتشارك الخبرات معاكم و تحت الامر في اي استفسار لاني عارف الكثيرين ممن نفذوا فعلا نقل معيشتهم لهناك و الاكثر ممن يخططون لذلك الان اما الحيتان الكبيرة في مصر و الكثير من اصحاب المصانع و البيزنس فبرضه اعرف الكثيرين ممن صفوا اعمالهم و راحوا دبي طبعا مش راس الخيمة و كل واحد حسب سعته المادية و ربنا ييسر الحال للجميع من المصريين و خاصة المحترمين منهم ممن لا يستطيعوا الرد على البلطجة في الشوارع او المعاملات اليومية بالمثل و هم بالملايين في مصر.

اخيرا لم اكن اتمنى ان يصل الحال بهذا البلد و اهله ان يضطر الملتحي تطبيقا للسنة الشريفة الى حلق لحيته هربا من سخرية الاوباش من المصريين من مدعي التدين الظاهري بينما هم في المعاملات اهل الفهلوة كلها - الا من رحم الله منعا للتعميم طبعا.

خالص احترامي للجميع.

اخيرا لم اكن اتمنى ان يصل الحال بهذا البلد و اهله ان يضطر الملتحي تطبيقا للسنة الشريفة الى حلق لحيته هربا من سخرية الاوباش من المصريين من مدعي التدين الظاهري بينما هم في المعاملات اهل الفهلوة كلها - الا من رحم الله منعا للتعميم طبعا.

خالص احترامي للجميع.

ما هو التدين الظاهري (التمسك بالمظاهر فقط دون الأعمال و الأفعال ) هو اللي ودانا في داهية و خلى بعض الناس (قليلي الايمان يسخر من الملتحين ) مش يسخر من السنة .
فبرضه بلاش تشتم الناس يا أستاذ محمد .و ادعليهم بالهداية و ربنا يهديك و يهدينا جميعا .

المشاركة الأصلية كتبت بواسطة أبو بودي وعمر

أما بخصوص الإخوة اللي اقترحوا دولة عربية برده زي السعودية أو الإمارات فأنا ما زلت عند رأيي إن صورة المصريين بشكل عام مشوهة عند إخوانا العرب والخلايجة بالذات لأن السيئة تعم وهيبقى موضوع صعب جدا إني أحاول أثبت إني مش زي المصريين اللي انتوا واخدين عنهم انطباع سيء زائد إن المعيشة في الدول دي أظنها مكلفة جدا عن مثلها في تركيا أو سنغافورة زي ما بسمع في حين يقال إن السفر إلى تركيا للسياحة أرخص من السفر إلى الأقصر ! مما يدل على أن المعيشة سهلة وغير معقدة ، لكن على كل حال فهو اقتراح برده جدير بالتفكير وأنا ليا صديق بيشتغل دلوقتي في قطر وعرض عليا المساعدة لو حبيت أسافر هناك فهيبقى ده اقتراح جدير بإعادة النظر فيه برده
أخيرا بخصوص الأخ الكريم اللي بيقول إن السفر لبلاد الكفر الآن يعتبر من الضرورات فأنا فكرت في كده برده وقلت على الأقل عندهم إسلام بلا مسلمين واحنا عندنا مسلمين بلا إسلام ! لكن أرجع وأقول دع ما يريبك إلى ما لا يريبك والمشكلة في البلاد دي إن الحريات عندهم مفتوحة بلا أي قيود لدرجة إن الزنا والشذوذ والخمرة والكلام ده كله عادي جدا عندهم ويبقى أنا كده هدمت أولادي بدل ما أصلحهم ويا فرحتي إنهم يطلعوا محترمين ومنفتحين ولكن اعتادوا مشاهدة الزنا والشذوذ وشرب الخمر والقمار إلى آخره بدون أي إنكار ودي الكارثة بعينها

أرجو استكمال النقاش لأنه على ما يبدو يوجد كتير من الإخوة بيفكروا نفس تفكيري وعايزين نوصل لحل مرضي يفيد الجميع

1) تركيا الحياة هناك غالية مش رخيصة. ابن خالتى عايش هناك فى أنقرة مع مراته وعياله ولولا انه شغالة فى شركة كبيرة ودخله ماشاء الله كويس مكنش قدر على المصاريف هناك.
2) موضوع الهجرة لبلاد غير المسلمين. رأى الشرع منتهى فى الموضوع ده والفتوى اللى محطوط اللينك بتاعها فيها الكفاية.
ربنا يوفقك

المشاركة الأصلية كتبت بواسطة mohamed_hamid

موضوع الهجرة لبلاد غير المسلمين. رأى الشرع منتهى فى الموضوع ده والفتوى اللى محطوط اللينك بتاعها فيها الكفاية.
ربنا يوفقك

طيب فيها أيه الهجرة لبلاد غير المسلمين إذا لم تعود بأي أذى للمسلم ... و نفعت الأسلام بوجود المسلمين في هذه الدول ؟

و ما هو حكم الشرع للفئات المسلمة التي تعيش أقلية في بلاد غير المسلمين
مثل المسلمين في الصين ؟ المسلمين في الهند ؟؟ المسلمين في سنغافورة ؟؟؟

و ما حكم الشرع في التجار العرب المسلمين الذي أستقروا في اندونيسيا و ماليزيا و أنتشر الأسلام على أيديهم (بسبب الهجرة )
يا جماعة لازم تكون عقولنا متفتحة شوية على العالم و على العلم الحديث و على الظروف المختلفة اللي بيعيشها المسلمين و العالم على مر العصور .

الدين مش قص و لصق ........ Copy and paste

المشاركة الأصلية كتبت بواسطة janagabr

ومين قالك اصلا ان الملتحين اللي بنشوفهم في مصر مش الاوباش وهما بتوع التدين الظاهري الا من رحم ربي

يا أخي الفاضل أنا لم اقصد التعميم نهائي و قلت الا من رحم الله انما لما ألاقي صديق عمري و لا هو اخوان و لا سلفي و حتى انما مربي لحيته عادي بشكل معتدل و مش متسابة بدون تهذيب و يضطر يحلقها علشان بلطجية محميين من الداخلية بتاع بلدك يعملوا حفلة عليه لمجرد انه مربي دقنه يبقى كلام فارغ و تهريج و الفئة دي تحديدا هي من قصدت بالأوباش و اللي هما برضوا منغصين علينا حياتنا لأنهم عارفين محميين من مين. كفاية توضيح لغاية كده علشان مخرجش من الموضوع و نقلب على أحوال الشارع المصري و تبقى شغلانة تانية خالص.

احترامي للجميع.

المشاركة الأصلية كتبت بواسطة janagabr

طاب ما المربين دقنهم مرطرين في الشوارع مافيش حد كلمهم يعني وبعدين عادي لما بلطجيه يتخانقوا مع ارهابيين

احتراما لصاحب الموضوع لن أتطرق لأي جدال سياسي خارج عن سياق الموضوع نفسه و الا مش هاننتهي أما بخصوص تصنيفك لكل اللي مربي دقنه انه ارهابي فهو منطق المخطوفين ذهنيا اليومين دول للأسف و سلامي لباسم يوسف ياباشا أصل غيبته طولت قوي من بعد 3-7.