الموضوع: تقرير كامل عن فيكترا بي بعد عشرة سنتين

السلام عليكم
انا حبيت اعمل تقرير عن عربيتي الاوبل فيكترا بي1 بعد عشرة سنتين ولله الحمد مشتكتش منها خالص
اولا العربية انا شاريها مستعملة موديل 1996(تقفيل اوروبي)الطابلوه الاسود

المواصفات:1600 ايكوتك التجار بسموه موتور تيجرا ش عارف ليه بس هو عمتا علي ابوها مش تسقيط
جير مانيوال

الكماليات:
1-مرايات كهرباء وضم مع السنتر
2-تكيف وشغال الحمد لله
3-تعديل كرسي السائق في 6 اتجاهات
4-شاشة توضح التاريخ واسلعة ودرجة الحرارة (بس بايظة عندي عشان مش مركب كاسيت الفابريكة)
5-لتحكم في اضائة الطابلوه
6-شوابير امامي وخلفي

وسائل الامان:
فراملabs
2 ايرباج

نيجي بقي للميزات

1-صوت ماتوور ناعم وهادي وله زنة كدة مميزة لما تقرص عليييه بشهادة كل الي بيركب معايا
2-تكيييف بيسقع حلو جدا لما يتزبط مع انه قرفني لحد ما اتظبط وبحسه احسن م اللانسر
3-ثبات محترم جدا علي سرعات وفي الملففات وكورنيش اسكندرية يشهد علي كدة وحسييت بنعمة الاوبل لما ركبت النوبيرا بتاعت صاحبي واخدت بيها ملفات الكورنيش
4-تصميم انيق وجميييل ولحد النهاردة لما العربية بتكون نضيفة ومش مهملة ومشدودة دايما تحس بشياكتها وخصوصا سحبة المراية وتصميمها الرائع
5-عربية حمالة اسية ماشاء الله عليها وخصوصا اننا بنهلكها ومش مهتمين اوي بصيانتها والحمد لله عمرها ما قلت معانا ربنا يديمها نعمة ويجعل كلامنا خفيف عليها
6-قطع غيارر موجودة في كل مكان جديد واستيراد اسعار كويسة جدا ومش غالية مقارنة بالانسر البومة
7-الموتور الي فيها انا شايفه كويس جدا وجراية وحلوة مش تقيلة
8- تقفيل محترم وخامات جودتها محترمة
9-باورالدركسيون خفيف وجميل وموزون
10-عفشة معمرة جدا لدرجة انا لسة مغير مساعد بتاع العربية من شهريين واكتشفت ان المساعد الي كان فيها هو الاصلي بتاع الفابريكا


العيوب:
1-ااصحابي لما بيركبوا معايا بيقولو ان العربية من ورا ضيقة وانا مش مصدقهم بصراحة اصل عمري ما ركبت فيها ورا خالص
2-للاسف عربيتي الزجاج فيها يدوي مش كهربااء
3-المراية الجانبية علي ان تصميمها رائع بس للاسف كانت محتاجة تبقي اكبر شوية خصوصا ان ابعاد العربية صعبة شوية بس مع التعود تمام وفيش اي مشكلة بالنسبالي الحمد لله
4-اماكن التخزين فيها مش كتيير وكانت محتاجة مكان تحت الكاسيت عشان اسيب فيه الموبايل والمفاتيح وكدة عشان مش بحب اسيب الموبايل في جيبي وانا سايق
6-حاجة انا بحس فيها مش عارف انا كدة لوحدي ولا في حد تاني معايا بحس ان الغيار االخمس بعييد شوية بضطر اعمل حركة اطول عشان احط الغيار الخامس دن عن باقي الغيارات
7-كان نفسي يكون الدريكسيون قابل للتعديل فوق وتحت زي اللانسر كدة
8-كان نفسي يبقي في لون فاتح كدة في الكنسولة او في الطابلوه بدل ما هو كله اسود في اسود كدة

وفي الاخر العربية دي بحس ان ليها عندي عش خاص كدة دون عن اي عربية ركبتها او نمتلكها ودايما بفضلها عن اللانسر البومة في الركوب مش باركب اللانسر غير لما اكون مضطر

وان شاء الله مش هنزل من الاوبل غير علي بي ام دابليو e36 او اعلي رربنا يرزق

وفي الاخر اتمني ان التقرير يكون افاد او هيفيد الناس الي بتفكر في العربية دي

ودي صورة متواضعة للعربية

المشاركة الأصلية كتبت بواسطة romiobasha

الله ينور يا باشا تقرير جميل
تقريبا معظم العيوب دى محلوله لو ركبت ال gls منها

اظن الglsهتفرق عن الي عندي الزجاج الكهربائ بس
وتسلم علي المرور

المشاركة الأصلية كتبت بواسطة m i d o

العربية دي انا بحترمها جدا وكل مبشوفها في الشارع بفضل اتفرج عليها ... ربنا يحفظهالك يا باشا

ربنا يباركلك يا باشا وتسلم علي زقك العالي

المشاركة الأصلية كتبت بواسطة hossamalsadik

تقرير محترم لعربيه محترمه

بالتوفيق ان شاء الله

نورت الموضوع يا باشا