الموضوع: تقرير كامل عن فيكترا بي بعد عشرة سنتين

موضوع جميل وتسلم ايد عليه
انا طبعا مش هاقدر اضيف على الكلام الحلو بتاع الزملاء والغزل فى الفكترا اللى تستحقه عن جداره
العربيه ما شاء الله تحفه ومهما عدى عليها من زمن بتفضل ليها شكل بين الموديلات والعربيات التانيه .. ليها طله حلوه وده بصراحه بيخلى ( نجمها خفيف ) وانا بعانى من الموضوع ده بجد
الحمد لله عربيتى موديل ٢٠٠٢ لون اسود .. وطبعا حضراتكو شفتوا صورها هنا على المنتدى وحاله العربيه ما شاء الله .. بس كل اما اغسل العربيه وامشى بيها وهى بتلمع كده لازم يحصل فيها حاجه !!!
كنت الاول مش حاطط موضوع العين ده فى دماغى بس لما ركزت لقيتها كده للأسف .. كل غسله بحوار .. بس الحمد لله بتيجى فى حاجات بسيطه

الفكترا زى ما قلتوا جميعا طلتها حلوه وبتشد النظر ومش كل الناس بصراحه نفوسها حلوه

مكان تخزين الموبايل زى ما قال محمود عندنا فى البى ٢ مكان مثالى فى السقف امام نور الصالون بياخد الموبايل نضاره الشمس

تعديل الدركسيون موجود برضو فى البى ٢

الموتور الاسود سهل جدا فى صيانته وقليل الاعطال .. بس خنيق شويه فى التجميع .. بس بيجرى حلو بعد سرعه ١٠٠ والعربيه بتكون مرتاحه
تحياتى

المشاركة الأصلية كتبت بواسطة maam

ياعم هشام ، الموتور أي نعم زي ماقولت صيانته سهلة وأعطاله قليلة بس مش معاك في موضوع انه حلو بعد 100 ديه خالص
وانا على 100 في طريق الأوتو ستراد ومازلت بزود ، بي ام طلع من ورايا بسهولة
وفي طريق مطار سوهاج الدولي ، كنت وبن عمي بنشد مع بعض "بيجو 504" عدى منى بكل سهولة وفضل يفضحني في البلد ويقولي الفرنساوي غلب الألماني ، طاب افهمه بقى موضوع الحصان والعزم ازاي !!

وفي طريق شرم عدى جانبي لاند كروز وطار ، فقولت افرجه الفرق بيني وبينه في المنحنيات وما ادراكم ومنحنيات شرم
الباشا طار 180/190 وانا عمال أعافر مع العربية والحمد لله لأول مرة جابت الـ 160 :) من ساعة اما اشتريت العربية
وعقبال اما وصلت لمنحنين ، ما الاقتش اللاند كروز ، خلاص بح تقريبا وصل كمين شرم :)

وفي زفة كل العربيات طارت من ورايا في صلاح سالم بعد كوبري نادي الجلاء وعقبال ما جيت احصلهم كانت العربيات كلها هدت عشان كمين جيش ساعة الحظر

المعاناة ديه ماكنتش بحس بيها ولا بشوفها مع الأسترا
فيه أكتر من اني كنت بجنن الفيكترا سي والفيكترا بي1 على الدائري ! وكنت بشد مع أي عربية وكلي ثقة
دا غير كورنيش اسكندرية اللي عبارة عن فرامل وبنزين كل دقيقة ، وباردوا عديت كورولا ولانسر كنا بنشد مع بعض بالليل والكورنيش اسفلته حلو وخطر في نفس الوقت من كثرة المنحنيات ، وساعتها عرفت قيمة الموتور اللي معايا في العربية


انا عارف يعني ايه مواتير لاند كروز وبي إم ، لكن لما الأفيو تعافر وتعديني والكورولا تعديني وغيرها وغيرها ، دا انا راكب عربية كاروا بقى على كدا

صدقوني الموتور الإسود ده زي ما قولت قبل كدا ، موتور مخصص لكبار السن :)

للعلم: نفس الموتور اللي في الأسترا هو اللي في الفيكترا 2000-2003 اوتو 1.6 ، بس فرق الوزن لصالح الأسترا
يعني الخلاصة الفيكترا عشان تجري وتشد بيها عايزة الموتور الـ 136 حصان اللي هو 2.0 ايكوتيك

محمود بعد كل اللى قلته ده انت عندك مشكله فى سحب عربيتك وتجميعها .. انا شديت مع عربيات كتير وهاديك امثله

سكودا ٢٠٠٣ كان ماشى ورايا وانا ما بحبش حد يبقى قريب منى .. جريت قدامه وكنت ساعتها رايق وبدأت آخد غرز قدامه وهو طبعا جرى وعشان يجيبنى دخل على المطب ويعتبر أكل المطب ووقف بعدها وقاللى يا باشا العربيه دى نوعها ايه وكام سى سى
سبرانزا تيجو بتاعه واحد صاحبى روحنا مشوار ٨٠ كيلو ما عدانيش فيهم !!!!
رينو كانت بتجرى معايا على الصحراوى وواخدينه كله ١٦٠ ومش عارفه تعدينى وماشيه فى ضهرى كل الغرز اللى اخدناها
تويوتا عديته على الصحراوى ١٤٠ واتضايق جه يعدينى دوست لغايه ١٦٠ وماعداش برضو

امثله كتير .. بس عاوزك لما تقارن عربيتك قارنها بنفس الفئه بتاعتها وماتروحش تقارنها بلاند كروزر ٤٥٠٠ سى سى او بى ام من اول ١٨٠٠ سى سى ولو حتى ٣١٦ بموتورها ١٦٠٠ سى سى افضل من موتور الاوبل فى الجرى ومعلش لما ٥٠٤ تعمل معاك كده يبقى اكيد عندك مشكله

انت نزلت من اتوماتيك لمانوال وانا قلتلك كده اول ما اشتريت لو تفتكر .. انا اول ما ركبت الاوبل جبت الموتور الاسود المانوال ومش حاسس بمشاكل فى سحب وجرى العربيه الحمد لله
تحياتى