المشاركة الأصلية كتبت بواسطة تامر.محمد
عذرا بس انا لا شأن لي بتقييمك الشخصي للي بتعمله الانظمة دي دلوقت , انا ليا بس المنهج المعلن و مدى اتفاق الفعل مع المنهج ده
و بالمناسبة نقطة انجلترا بتقدر و فرنسا ما بتقدرش دي برة الموضوع خالص ده بفرض انها صحيحة, كل كلامنا عن مبدأ و مدى اتفاق التطبيق معاه و ده مربط الفرس اللي باحاول نفضل فيه , بس حضرتك بتخرجينا منه على اساس ان ده نشأ عن ظروف مش اكتر
في الاول قلتي ان الممنوع النقاب بس و بعدين نفيتي اللي هما اعلنوه بنفسهم انهم عملوا كده بناء على المبدأ العلماني , و بعدين في البوست اللي بعده بتبرريه بظروفهم , و بعد كده قلتي لا ده للي يشتغلوا في مصالح حكومية و مدارس حكومية معينة بس
و احيلك لتقرير الجارديان ده بخصوص نقطة زي دي
France's headscarf war: 'It's an attack on freedom' | World news | The Guardian
مش عارف ليه بصراحة اصرارك على مبدأ (ما تقولش كده انت حد جميل) معاهم رغم ان هما جايبين من الآخر خالص
في نفس الوقت قلتي ان العلمانية لها اكتر من شكل , و ده مقبول و مفهوم بالنسبة لي
لكنك اعتبرتي ان كل الاشكال دي علمانية برده رغم ان بعضها زي الفرنسي و التركي كسر مبدأ حرية ممارسة الشعائر و ضيق عليها , و بررتي ده للفرنسيين زي ما قلت , و بررتي ده للعسكر الاتراك انهم كانوا خارجين من دولة فاشية , مع العلم ان دولة العسكر الاتراك نفسها فاشية عسكرية دكتاتورية مش محتاجة ده كله , و رغم ده كله ما نفيتيش العلمانية عنها
رغم اني ممكن اقبل ببساطة ان الاجرائات دي اتعملت مثلا تحت بند سياسي بحت و تم الصاقها بالعلمانية قسرا , لكن ده لازم يبقى معاه في package واحدة تأكيد على ان هما كسروا بند اساسي في العلمانية بكده , او ان ده مش بند اساسي
لكن مافيش حاجة اسمها العلمانية بتدعم الحرية الدينية لكن العلمانيين دول قرروا يفرضوا على الناس تعريفهم للحرية الدينية بالعافية حتى لو هو مخالف لتعريف الشعائر الدينية في اديان الناس دي , و نرجع نقول اصل ظروفهم
و الحقيقة ان العلمانية في النماذج اللي ذكرناها (الفرنسي و التركي تحديدا) , و في الكلام اللي ذكرتيه , اتصرفت كأنها حكم ديني فعلا (بتعريف العلمانية نفسها) و فرضت قيود على معتنقي الاديان الاخرى و لغت اي احتمال ان اي دين تاني يبقى في الحكم ,
و في الحالات اللي ذكرتيها لو فرضنا اضافة طائفة علمانية للطائفتين الشيعية و السنية فمش هانبقى عملنا اكتر من اننا اضفنا طائفة تالتة هتتقاتل معاهم عادي جدا و لو انتصرت عليهم هاتلغيهم سياسيا برده عادي جدا حسب تعريف العلمانية عند معتنقيها في البلد دي و ده من كلامك بالمناسبة , و ده برده حصل في تركيا بنفس الطريقة بالظبط , الكلام في الحتة دي مجال تاني يتعلق بالديمقراطية و الاستبداد و بموازين القوى , ثم لما طائفة منهم تحكم , و تلتزم كمااااااااااان بالمنهج اللي هي اعلنته ساعتها نقول ان ده عمله المنهج الفلاني
اما نقطة هل ممكن السني و الشيعي يتحالفوا لاسقاط حكم مش تبع حد فيهم , بتفكرني بسؤال "هل ممكن الاخواني و الثوري يتحالفوا لاسقاط نظام مش تبع حد فيهم؟" :))))))))
و الحقيقة ان مش المشكلة هما ممكن يتحالفوا ولا لأ
احتمال تحالفهم هو نفس احتمال تحالف طائفتين مسيحية و يهودية على اسقاط حكم اسلامي , او طائفتين اسلامية و مسيحية على اسقاط حكم يهودي (فلسطين مثال ) , او طائفتين اسلامية و يهودية على اسقاط حكم مسيحي ......... و دي جزئية خاضعة لحسابات السياسة اكتر من حسابات الايديولوجية
عشان كده سالتك بخصوص الليبرالية , لأن الليبرالية ضالعة في نقطة الحريات و اساسها مبني عليها , غير العلمانية اللي اساسها مبني على الدين
ملحوظة جانبية
طبقا للي قلتيه فالفرنسيين و الاتراك التزموا بالديمقراطية و بالعلمانية , و بالمناسبة كلامك ده بيصب في مصلحة مناهضي الديمقراطية بصورة مباشرة لأنك قدمتي مثال حي انها مش الحرية اللي بيتروج لها , لكن مازال ده مفهومك لها , مش هي نفسها لأنها برده فيها مدارس طبعا
المفضلات