يا جماعه انا معايا الهوندا سيفيك 2008 من شهر مايو و الحمد لله ممكن اقولكوا على كل حاجه فيها مع العلم انى مالك ايضا لتويوتا كورولا 2007 و الحمد لله
أولا : المميزات :-
1- قوة موتور مالهاش حل و يمكن ان تصل لـ 100 فى اقل من 9 ثوان و ذلك بطريه خاصه و هى انك تجيب الفتيس على 1 هينطر العربيه 20 متر قدام و بعدين وانت سايقها و تاخد سرعتها اللى هى 40 تنقل بسرعه على دى
2- طبعا الشبات على الطريق لا يقارن بالكورولا و الجيتا و الأوكتافيا و الكلام الهجص ده و ده نابع من انخفاض مستوى السياره قانون الحركه بيقول انه كل ما انخفض ارتفاع اى جسم كلما كان مركز ثقله قريب من الأرض كلما زاد اتزانه و العكس صحيح ونفس الكلام يطبق على البنايات و كل شئ فى الكون يعنى و انت سايق على 180 زى حالاتى متحسش بالعربيه الا لما يكون هناك هبوط مفاجئ على الطريق او صعود كما هو الحال على الدائرى الملعون لكن على المحور مستحيل حد يجيبك اقول مستحيل
3- بالنسبه للتكييف ممكن تعمله على الماكس يبقى تلاجه و تعالى قابلنى لو كملته ربع ساعه
4- الشكل حلو ولكن الشكل ده ازواق يختلف من شخص لآخر
5- الكماليات انتو عايزين ايه من الكماليات غير زجاج كهربا و سنتر لوك و مثبت سرعه و تكييف و كاسيت مش فاهم انا عاوزين ايه
6- طبعا السياره من جوه واسعه جدا يعنى تحس انك قاعد فى طياره بدون مبالغه
ثانيا : العيوب :-
1- بالنسبه للتوكيل صيانة الف مفيش مشكله ممكن تروح فى اى وقت و عادى لكن صيانة 5000 او اكثر لازم تحجز قبلها بأسبوعين او اكثر انا حاجز من 23 سبتمبر و معادى 11 اكتوبر و يرجع ذلك الى انه مكان واحد للصيانه بالتجمع الخامس و هما بيقولوا انهم بيفتحوا واحد بأبو رواش يا مسهل و للعلم هما كانوش متوقعين حجم مبيعات المهوله لهوندا
2- بالنسبه لارتفاعها عن سطح الآرض بصراحه بتحك كتير لو مركب 4 او 5 انتوا طبعا عارفين المطبات المصريه كل واحد حاطط قدام بيته جبل و بيسميه مطب ربنا ينتقم منهم ده مش عيب فى السياره لاكن عيب فى المطبات مش على المقاييس العالميه لاكن لو كنت ساكن فى روض الفرج او امبابه او حلوان مثلا مش هتنفعك العربيه دى ممكن تنفعك لو فى الزمالك كما هو الحال فعلا اكبر نسبه هندا سيفيك فى الزمالك
3- بالنسبه للبودى الخارجى حاسس انه خفيف شويه و الاكصدامات ضعيفه و ممكن الأمامى يتخلع جزء منه مع اى خبطه
4 - طبعا ابعاد السياره كبيره مقارنة بجميع السيارات من فئتها و هو مما يسبب ازعاج فى وجود ركنه لها يعنى لو معاك ماتريكس يكون احسن فى الركنه طبعا
5- بالنسبه لآعاده بيعها انا حاسس انه صعب شويه لاكنى مفكرتش ابيعها
المفضلات