الموضوع: تقرير ال 1000 كيلو - سيفيك 2008

السلام عليكم
وعدتكم بتقرير عن سيارتي السيفيك 2008 بعد الالف كيلو الاولى والحمد لله وبعد 15 يوم من استلامها اتمت ال 1000 كيلو عند مدخل مركز الصيانة

والتقرير ده هيكون ناتج من خلال قيادتي للسيارة مدة طويلة سيفيك 2007 وسيارتي 2008 احب اسرد لكم تقييمي للعربية دي :

أولا الموتور : -
ناعم وهادي جدا جدا الا في ساعات النرفزة لما تعمل كيك داون تحس ان في اسد بيزأر ولكن لو سواقتك هادية و soft acceleration فمش هتسمع صوت للعربية حتى وانت فاتح الزجاج

ثانيا العفشة :-
بالنسبة ليا العفشة مناسبة جدا هي متوسطة يعني لاهي ناشفة قوي ولا ناعمة جدا

ثالثا الثبات :-
السيارة ثابتة جدا على الطرق وفي الغرز للناس اللي بتحب تغرز ولكن ... العربية وانت ماشي على الصحراوي او اي طريق سريع ومشي من جنبك لوري او اي عربية نقل كبير تحس ان العربية بتتحرك من مكانها وده تقريبا العيب اللي مضايقني في العربية مع العلم ان ثبات العربية عالي جدا جدا يعني عمرك ما تحس انها بتعوم منك

التسارع :-
جيد جدا يعني من 0-100 في 9 ثواني باضبط ( سيفيك 2007 ) ولسه ما جربتش عربيتي عشان جديدة وان شاء الله هنزل لكم فيديو لان كل لما اقول لواحد مابيصدقش بيقولي لا لا دي 11 ثانية .... عموما مش فارقة الثانيتين دول !! هو احنا راكبين عربيات سبورت ؟؟ واللي فارقة معاه يروح يشتري S2000

استهلاك البنزين :-
من يوم ما جبت العربية والتفويلة 78 جنية اي ما يعادل 42 لتر وبتشتغل معايا 600-650 كيلو ويكون فاضل 3 شرطات

التحكم بالسيارة :
بصراحة هوندا ابدعت في باور الدركسيون بتاع العربية دي ;)

ال Body :-
* العربية لاتستطيع تحديد ابعادها لاول مرة لما تركبها يعني ولا انت شايف اخر العربية من قدام ولا من ورا
* بالنسبة لارتفاع السيارة من على الارض هي اه واطيه شوية ولكن حتى لو معاك اكتر من 4 وأخدت المطب بالراحة مش هتحك

---------------
-: نيجي بقى للمقصورة الداخليه :-

التابلوة : -

شيك جدا جدا ولكن الكاسيت اللي فيه مش عاجبني خالص وانا بعت اشتري اللي بينزل في اليابان من موقع ال E-bay ولكن خامات التابلوة ممتازة للغايه ولكن برغم ان التابلوه كبير الا ان الدرج الموجود فيه صغير نسبيا ( مقارنة بالتيدا فيها دولاب مش درج )

التكييف :
مش هتكلم عليه راااااااائع بمعنى الكلمة لما تشغلة على AC بيبقى التبريد كويس ولكن لما تضغط نيتروز التكييف قصدي زرار ال Max AC ممكن تتجمد

النظام الصوتي :-
لا يوجد سوى سماعتين فقط في البابين الاماميين بس صوتهم معقول

اماكن الركاب :-
العربية واسعة من جوة يعني 5 ركاب وبس

اماكن التخزين :-
الشنطة مافيهاش كلام ..... واسعة

---------

ومن خلال قيادتي لعربيات كتير و المنازعة ( الشد يعني ) مع عربيات تانية بصراحة تفوقت السيفيك على عربيات كتير من فئتها والله وبدون تحيز في الاداء على الجانب الاخر تفوقت نظيراتها في الكماليات ولكن مش مهم لان انا هركب لها كل حاة ان شاء الله

نيجي لموضوع التوكيل :-
ناس محترمين جدا جدا وتلبية لرغبات العميل ولكن هناك عيب واحد خطييييير ان اللي بيسوقوا العربيات جوة مش في دماغهم حاجة يعني انا امبارح عربيتي حكوا الاكصدام بتاعها من ورا للاسف بس الحمد لله


ده تقرير بسيط عن العربية واللي عنده اي سؤال يتفضل يسأل وانا مستعد اجاوب