الموضوع: اشتغلت ايام الدراسه ؟ طب في الاجازه حتى ؟ تعالى اقولك انا اشتغلت ايه ..!!!

المشاركة الأصلية كتبت بواسطة أبو آسر

أنا أيام الكحرتة والشقاوة من أكتر من 14 سنة اشتغلت كذا شغلانة بردة في الصيف منها waiter في نادي الأطباء بالجربي برأس البر واتعرفت على ناس برده كانت بتحترمني جدا لما بيعرفوا إني طالب بالجامعة وبشتغل في الأجازة ومنهم كانوا بييجوا النادي يسألوا عليا مخصوص علشان يدوني التيبس في إيدي :)
وقبلها كنت شغال ببيع دباديب واكسسوارات حريمي على فرشة في شارع النيل برأس البر برده :)
واشتغلت برده في شركة تايم شير وكنت بقف أمام محلات مشهورة بالمنصورة والمحلة ورأس البر أوقف الناس وأديهم دعوة لحضور حفلة للتعرف على التايم شير زي الناس الرخمة اللي بتشوفوهم دلوقتي أمام كارفور وفي البنزينات :) وطبعا كنت بقابل أشكال وألوان منهم ناس كانت بتجري ورانا في الشارع وتبقى عايزة تضربنا ههههههههههه وناس تانية اتعرفت عليهم منهم رجل أعمال لبناني أعجب بيا وبأسلوبي وحب يشغلني معاه في استيراد وتوزيع ماكينات من ألمانيا وحوار كبير كده مكملتش فيه
بصراحة كانت تجارب ممتعة ومفيدة وأكسبتني خبرات جامدة في الحياة وعلى عكس ما كنت متوقع إنها شغلانات بعضها مهين كانت الناس بتحترمني جدا وتقدرني واكتشفت أن العمل لا يعيب الشخص بل يرفع من قدره أحسن ما أقعد في البيت وآخد مصروفي من بابي ومامي :)

بمناسبه التيبس ... في بدايه شغلي كنت برفض اخد التيبس ده ابدا وكنت بعتبره انه حاجه زياده عن حقي ... بس بعد كده قالولي ان الزبون بيكون مبسوط من الشغل وراضي عنه ف عشان كده بيدي تيبس واحنا كمان مش بنطلبه بنفسنا .... ف بعد كده بقيت اخده بصراحه
طبعا من كلام حضرتك نفهم انك موافق من حيث المبدأ ان ابنك يشتغل في الاجازه

المشاركة الأصلية كتبت بواسطة sherifmt

السلام عليكم .......شكرا علي الموضوع التاريخي .... بجد كانت ايام جميلة وافتخر بيها وانا بحكي عنها لاولادي ....اول مره بدأت شغل كان واناعندي 9 سنين علشان كنت شاطر جدا في عمل الطيارة الورق وحالنا علي قدنا كنت عايش انا وجدتي فقط في الشقة ... اصحابي وجيراني اللي في سني واكبر كمان كانت بتعجبهم طياراتي لما كنا بنلعب بيها وبدأت ابيع ب 5 قروش الطيارة وبعدين 10 قروش الطيارة وكانت بتكلفني قرشين فقط للزق والجلاد الملون والعيدان كنت بقطعها من أقفاص الخضار وبعدين اصبحت موضة في الصيف وكنت مشهور في الجيزة وطياراتي كلها كان ليها علامة ان الميزان معمول بخيط شلة برتقالي وبدات اوسع نشاطي .. هاها ها ها .....وابيع جملة للمكتبات كنت بيبيع الطيارة جملة ب 7 قروش والمكتبه تبيعها ب 10 قروش ( كنت بالعب ) او بشتغل 7 ساعات في اليوم بعمل 200 طيارة في اليوم = 14 جنيه في اليوم ويوم الثلا ثاء كنت ببيع في السوق الطيارة ب 10 قروش (كنت بتكسف لما حد من الجيران يشوفني وانا ببيع لكن المكسب ليه نشوة كانت بتغلب الكسوف) 3 سنين والموضة انحصرت واشتغلت بلية ميكانيكي لمدة 3 ايام ومرة خالتي شافتني زعقتلي واديتني جنية وقالتلي روح ومتشتغلش كدة تاني واشتكتني لجدتي ( ستي ) طيب وبعدين انا كنت اتعودت ادي الفلوس لجدتي تصرف علي البيت ووالدي كان بيبعت لجدتي 5 جنية فقط مصروفي طول الشهر !!! نزلت كلمت صاحب مكتبة جنب البيت من اللي كنت باتعامل معاهم يشغلني عنده ووافق وقالي هديلك 5 جنية في الاسبوع وكان عندي 12 سنه وكنت سعيد جدا اتعلمت حاجات كتير جدا وكانو 3 سنين شغل كل يوم حتي في الدراسة لما كانت مدرستي مسائي كنت بفتح المكتبة الساعة 6 صباحا لغاية ميعاد المدرسة وارجع اكمل لغاية 9 باليل ولما كانت المدرسة صباحي برضة بفتح معاه واسيبة وارجع اكمل بعد المرواح كان بيثق فيا جدا وعلمني كل شيء عن التجارة في المكتبات مع ان اولادة كانو تقريبا في سني لكن انا كنت اشطر وبحفظ اماكن الاشياء المختلفة بسرعة كنت بصلح كل حاجة بايظة خصوصا لعب الاطفال واتعلمت اصلح وصلات لمبات النيون وياما اتكهربت وكنت خفيف لدرجة اني لما كان عندي 15 سنة كان بيبعتني للفجالة والموسكي بالف جنية لوحدي اشتري بضاعة للمكتبة اشتريها واشيلها وانا جاي في الاوتوبيس او الميني باص ويديني 5 جنية في المشوار وبعدها كان لازم اركز في الاعدادية اعتزلت شغل المكتبة وظهرت موضة جديدة اطباق الحلويات واشتريت عجلة نصر وركبت عليها 2 برنيكة (زي القفص لكن بلاستيك) وبدات اوزع اطباق حلويات زي بلح الشام وجلاش وكنافة نص جملة كنت بشتري الطبق من المصنع في الطالبية ب 160 قرش وكنت ببيعة للبقالة والمكتبات في الجيزة ب 210 قرش وكان بيجمع 260 قرش وكنت ممكن اوزع لغاية 80 طبق في اليوم لو السوق شغال وايام كنت بوزع 20 طبق بالعافية علي العجلة 3 مرات في الاسبوع وطبعا المكسب بعد تصليح العجلة كان مجزي جداً وغيرها شغلانات كتير اللي اتعود علي الشقي من صغرةه تصعب عليه نفسه لو قعد في البيت ........وعمري في حياتي ما هنسي اني بكيت وانا بحمد ربنا وقلت الحمد لله راضي يا رب اول مرة طليت علي الكعبة المشرفة من شباك الجناح في الفندق اول مرة اجي مكة بعد ما اشتغلت في دول زي قطر والصين والامارات افتكرت لما كنت لسة بعمل طيارات ورق وابيعها ونا صغير.... الخلاصة الشغل بيربي الشخصية وبيعرفك القرش بييجي ازاي وبيديك ثقة بالنفس ويعلمك تصرف فلوسك فقط في اللي يستاهل وبيبعدك عن الشارع والصحاب اللي ملهومش لازمة ..... انا بحكي لولادي وانا فخور لكن الزمن اتغير ابني عمر السنة دي هيكمل 16 سنة علشان يشتغل انا اثق فية تماما لكن معنديش ثقة في اللي ممكن يشتغل معاهم علشان كدة انا بحكيلة واكلمة واناقشة وبحاول انقلة الصورة علي قد ما اقدر علشان يكون جاهز للحياة العملية لما بعد الدراسة ...... بحاول اجنبه السلبيات اللي بتتفرض في الشارع علشان هو مش مضطر يشتغل حاليا ..... لكن بمشيئه الله في الكلية الوضع مختلف علشان يكون تخطي مرحلة المراهقة ويبدأ يعتمد علي نفسة عن اقتناع وضروره نتيجة لاحتياجاته واهدافه اللي هو يحددها بنفسة......تحياتي من مكة (:

بسم الله ماشاء الله
قصتك دي عالميه بصراحه
وتتعمل افلام ومسلسلات وكتب وكل حاجه
ربنا يوفقك
الموضوع فعلا لمس حاجه حلوه جوانا كلنا
ياريت لو في حد عنده تجربه يححكيها
واللي ماعندوش ياريت يقولنا هل لو كان اشتغل اثناء الدراسه كان الموضوع هايفرق معاه بعد التخرج ولا عااااااادي ؟

المشاركة الأصلية كتبت بواسطة a_nbm

بسم الله ماشاء الله
قصتك دي عالميه بصراحه
وتتعمل افلام ومسلسلات وكتب وكل حاجه
ربنا يوفقك
الموضوع فعلا لمس حاجه حلوه جوانا كلنا
ياريت لو في حد عنده تجربه يححكيها
واللي ماعندوش ياريت يقولنا هل لو كان اشتغل اثناء الدراسه كان الموضوع هايفرق معاه بعد التخرج ولا عااااااادي ؟

السلام عليكم جميعا ..... انا متشكر جدا للموضوع اللي لمس قلوبنا والف شكر لكل الردود الأيجابية اللي شجعتني اكمل..... اسمحولي اضيف باقي القصة .... كنت شاركت بيها سنة 2010 هنا في المنتدي كان في استفتاء كانت مدام / نور القمر طلبت استفتاء كل واحد يقيم معدنة وانا ايامها كنت في الصين قبل ما استقر بمكة......

المشاركة الأصلية كتبت بواسطة sherifmt

عن نفسي معدني دهب والحمد لله مش غرور وواثق من كدة علشان باتقي الله في كل شيء بداية من لساني مع كل الناس والرضا الداخلي اللي ربنا انعم عليا بيه ورحمة ربنا اللي بالمسها في كل شيء
بشتغل من وانا عندي 9 سنين علشان اصرف علي نفسي بالرغم من وجود والدي ووالدتي بس كانو منفصلين وجدتي هي اللي بتربيني علشان تكسب ثواب ربنا وبفضل الله كنت باعمل طيارات ورق وابيعها في الصيف وساعات صبي ميكانيكي وعامل في مكتبة لغاية الاعدادية كان مجموعي صغير في اعدادي 140 درجة فقط مع العلم كنت شاطر وكنت متاكد ان التصحيح غلط وبرضة كنت حابب اكمل الحاجة الوحيدة اللي قبلتني كانت مركز تدريب مهني في امبابة كملت برضة وانا بشتغل والحمد لله خلصت الاول علي المركز والتاني علي ترتيب محافظة الجيزة(:
ايامها مكنش في جامعة مفتوحة وبدل كدة اخدت كورسات في جامعة القاهرة بفلوس رمزية اسمها مركز خدمة المجتمع انجليزي وكمبيوتر وبقيت لما انجح في مستوي علي طول ادخل اللي بعدة وكل دة وانا شغال ساعات في محل فطير واحيانا كاشير في محل واحيانا عامل في مطبعة وشيال في فندق j وبعد 3 سنين كورسات سافرت الخليج و اتعلمت ازاي اتعامل مع الاخر 40 جنسية ديانات والوان ولغات.
انا عمري في حياتي ما هنسي الفرحة اللي من القلب لما بشوف واحد كنت اعرفة من سنين في الخليج وعلي وشة ابتسامة من القلب انة شافني تاني بعد 8 سنين برغم اختلاف الدين واللغة والسن ومكنش طايقني ايامها علشان عربي مسلم قوي (: وهو يهودي ومديري لكن الشركة الام في كندا كانت بعتاني هناك يعني مش بمزاجة وضغطني ضغط رهيب اول اسبوعين لغاية ما زهق مني وبالحسني اشتغلنا مع بعض 11 شهر متواصلين ولما جة وقت مغادرته كنت حريص اني اكون في وداعه بهدية (: اول ماشفني تاني كان تاني سؤال لية بعد انت فين؟ كان انا عايزك تشتغل معايا تاني في مشروع جديد !!!
فعلا مش كلام الرضا لمن يرضا ودايما اشكر ربنا علي كل شيء.
ربنا كرمني ووضعي اتحسن كتير جبت عربية وبعدين شقة وبعدين كرمني بانسانة فوق الممتازة اتجوزنا بعد ما عرفتها ب 85 يوم (: ايوة يوم وكان عندي 25 سنة يعني من 13 سنة ور بنا رضاني بطفل وطفلة هما وامهم اجمل ما في حياتي كلها بعد امي وابويا.
انا بكتبلكم دلوقتي من شنغهاي الشركة العالمية بعتاني شهر علشان تدريب فريق الشركة الصيني استعدادا لافتتاح مشروع جديد في الصين والحمد لله المسلم المصري العربي الافريقي الوحيد في المجموعة كلها بكل فخر.
حد عايز حاجة من الصين (:

:

تحياتي من مكة (: