الموضوع: اشتغلت ايام الدراسه ؟ طب في الاجازه حتى ؟ تعالى اقولك انا اشتغلت ايه ..!!!

انا من اولى إبتدائي وانا بقف فى محل والدي ( بقالة ) وفى 3 إبتدائي إشتغلت فى ورشة إبن خالتي الله يرحمه ( الله يرحمة علمني كتير اوي ، علمني مفتنش على الناس اللى شغالين رغم انهم شغالي عنده وانا قريبة بس انا يُعتبر شغال معاهم فمينفعش افتن على اصحابي ( كلهم كانوا كبار اكتر من 25 سنة ) ، علمني يعني اية اخرج استمتع بالفلوس اللى جبتها ، علمني ازاي ابقى راجل واتكلم مع الناس ، بجد ربنا يرحمة ويجازية عني كل خير ) وفى رابعة رجعت تاني مع والدي ، وفاكر اني وانا فى خامسة إبتدائي كنت بروح أشتري كل البضاعة بنفسي وبشيل الفلوس عادي وانقى البضاعة وكانوا بتوع الجملة عارفيني وواثقين فيا لدرجة انهم لما كانوا بيبقوا مضغوطين كانوا بيدخلونى جوة أساعد معاهم (وطبعا كانوا بيتوصوا بيا ولو في بضاعة شاحة بيشيلوهالي) بجد ايام المحل دي شوفت فيها حاجات كتير ، كنت بشوف اصحابي بيلعبوا وانا واقف فى المحل ، حتى الآن بلاقي ناس بتتكلم عن أفلام وبرامج أطفال انا مشوفتهاش ، فى ثانوية عامة كنت بقف برضوا فى المحل والحمد لله ربنا اكرمني وحققت حلم والدي ودخلت هندسة

بصراحة كان فى ايام بقول ان طفولتي راحت هدر ، بس حاليا ببوس ايد والديانه خلاني اطلع كده

يكفي اني بفضل الله إشتغلت وانا فى أجازة 2 كلية فى مكتب هندسي هولندي وكنت بقبض والله قد المهندسين واوقات أكتر ، بفضل الله اثبت وجودي في كل شغل اشتغلته ، ولما بفتكر اسباب نجاحي مبلاقيش ذكاء فريد ولا مواهب عبقرية ولا حاجه ، كل الموضوع ان الواحد اتودج وشاف تجارب كتير واتحط فى مواقف كتير عرفتة الناس وازاي يتعامل

الحمد لله اول ما اشتغلت بعد الجيش رحت معرض دولي أمثل الشركة بتاعتي لوحدى ، والحمد لله اثبت نفسي لدرجة انه اتعرض علي 3 وظائف هناك

بجد والله كل ما افتكر المواقف الكويسة اللى مرت في شغلي ألاقي ان خبرتي فى محل والدي والتدريبات اللى كنت بروحها فى الكلية والمرمطة اللى شوفتها جابت نتيجة

الحمد لله ، وكان فضل الله على عظيما

وبإذن الله هخلي ابني يشتغل ( وهنقيلة مكان كويس واراقبة واخلية يتمرمط تحت عيني علشان بجد يبقى عندة شخصية )