الموضوع: اشتغلت ايام الدراسه ؟ طب في الاجازه حتى ؟ تعالى اقولك انا اشتغلت ايه ..!!!

المشاركة الأصلية كتبت بواسطة abo yasso

يااااااااااااااااااااه
شكرا لصاحب الفكره ولكل اللى شاركو
فعلا اطنان من الذكريات نزلت على الواحد
انا مش هخبى عليكما اصلى اتمرمط قوى والرصيف خد منى كتير
واكيد لازم اكتب واقول
بس اللى شاغل تفكرى بشكل فظيع دلوقتى ( ابنى الغالى ) اعمل معاه ايه
مش قادر اخد قرار عشان كده مش عارف احكى ملحوظه :( انا حبيت ابويا الله يرحمه اكتر واكتر بعد ما خلفت) عشان حسيت بحب الاب لل أبن عامل ازاى مع ان ابويا كان ميت وانا عندى عشر سنين
انا جاى جاى معاكو ان شاء الله بس مش عارف اكتب والله من كتر التفكير فى الباشا بتاعى

لا ياباشا مش هاينفع ..... لازم تحكيلنا كل حاجه وبالتفصيل طبعا....

انا اشتغلت امن شركة في مدينة نصر
واشتغلت تايم شير
بس كانت ايام ربنا ما يخليني اشوفها تاني
الحمد لله ع كل شيء

بعد كل المأسي اللي وضحتها في المشاركات اللي فاتت ..
حاليا أنا طبيب بشري عمري 27 سنه فقط .. تخصص أطفال بمستشفي أبو الريش الجامعي ..
بحضر ماستر في نفس التخصص ..
معايا دبلومه تغذيه رياضيه .. و دبلومه في التعامل مع الإصابات ..
بشتغل في إستيراد المكملات الغذائيه بقالي أكتر من 6 سنين متتاليه " كشغلي الخاص "
واخد توكيل أكتر من شركه أمريكيه و ألمانيه و سويسريه ..
أمتلك - بفضل الله - 5 stores لبيع المكملات الغذائيه بالشراكه من أصدقاء لي ..
أمتلكت حتي الان 4 سيارات بفضل الله .. أولهم الفنتازيا و أخرهم الفلوينس فيس ليفت ..
كل ما قمت بذكره لا يحمل إلا معني واحد .. بما إن حضراتكم جميعا شاركتوني المأسي السابقه من حقكم أن تعلموا ان الله كافئني خير مكافئه .. ع الأقل بزوجه صالحه و بنت زي القمر .. لسه مولوده من إسبوع بس ..

الحمد لله كما ينبغي لجلال وجهه و عظيم سلطانه ..
الحمد لله عدد خلقه و رضاء نفسه و زنه عرشه و مداد كلماته ..

شكرا لصاحب الموضوع للمره الألف .. شكرا لكل واحد شارك و شكرا لكل واحد شاركني أنا شخصيا حكاياتي اللي أنا عيشتها .. اللي مفيش ولا واحده فيهم تشبه بعضها :) ..

اشكرك على الموضوع الرائع ... وقصه كفاحك نموذج مشرف لكل الشباب ليتهم مثلك
بالنسبه لي
لم اعمل ابدا في اي مجال سواء كانت ايام الدراسه او في الاجازة وكنت اتمنى ان اعمل كي اكتسب خبرات في الحياه ولكن اعاقتي حالت بيني وبين ذالك والحمد لله على كل حال
الهدف من رغبتي في العمل هو اكتساب الخبرات وليس تحسين مستوى المعيشه
ولكن ما يجعلني اشعر بالفخر تجاه نفسي
اني كنت احصل على اعلى الدرجات في المدرسه دون ان اقدم على درس خصوصي واحد حتى اخر لحظه انهيت فيها المرحله التعليميه في الجامعه
ففي الثانويه العامه على سبيل المثال حصلت على 91 بالمائه في الصف الثاني الثانوي دون ان اقدم على اي دروس خصوصيه بما فيها ماده الرياضيات التي تحتاج لدرس خصوصي بالفعل فكل اصدقائي كانوا يأخذون درس خصوصي في هذه الماده الا انا الوحيد الذي لم يقدم على ذالك وحصلت على 50/50 الدرجه النهائيه في هذه الماده
وكنت اتمنى ان ادخل كليه هندسه قسم الكترونيات ولكن لظروف ما لا داعي للافصاح عنها دخلت القسم الادبي وغيرت طموحي من هندسه لكليه التجارة وفي النهايه دخلت كليه الاداب ! نصيب
الفكره التي اصبوا اليها في قصتي هو رغم اني لم اعمل واساعد ابي في مصاريف الاسرة الا اني وفرت عليه الكثير بعدم اخذ مصروف يومي منه وعدم الاقدام على الدروس الخصوصيه .... الخ حتى في الجامعه لم يتعدى مصروفي 100 جنيه في العام كله فكانت مصاريف المواصلات لا لشيء اخر هههههه لاني لم اقدم على شراء اي كتاب يوما من الايام ولم اذهب الى الجامعه الا ايام الامتحانات فقط
اما في الوقت الحالي فأعمل في مجالين فقط وهما (التدريس وهي الوظيفه الحكوميه التي من الله علي بها بعد تخرجي مباشرة من الجامعه فقد تخرجت سنه 2012 وبعدها بحوالي اربعة اشهر جائني جواب التعيين بعد التقديم في مسابقه توظيف 5% التي اعلنها الدكتور مرسي بارك الله فيه وفك كربه هو وسائر المعتقلين وسوف اسرد موضوع له ان شاء الله بخصوص هذا الشأن واما الوظيفه التانيه هي الفوركس ولكن تركتها منذ عده اشهر وربما اعود اليها مره اخرى)
وفي النهايه احاول تزويج نفسي بما املك من المال وما سوف املكه ان شاء الله
فقد حصلت حتى الان على 5 الاف جنيه من الفوركس و 3 الاف من التدريس اي ان الاجمالي 8 الاف جنيه قمت بتحصيلها بنفسي دون مساعده الاخرين والحمد لله وما زال الكفاح قائم

المشاركة الأصلية كتبت بواسطة elfarashah

سلام الله عليكم ورحمته وبركاته

موضوع أحييك عليه لأنه يستحق القراءة والمتابعة والإشادة

ولكن

بصراحة أنا صعب أعمل كدة لو ليا إبن دا مش صعب وبس دا مستحيل كمان

بمنطق أي أب وأي أم يصعب عليهم يبهدلوا ابنهم خاصة لو مش محتاج ده

يدرس ويخلص ويسلمني شهادته وبعدين في حفظ الله بقى مع نفسه

يعمل اللي هو عايزه ومش معنى كدة إني أقفل عليه أو أمنعه من خبرات الحياة

لكن مش بالضرورة يكون بالشكل ده ..يعني مثلا لو في كلية وحب يشتغل

حاجة معقولة في الصيف على سبيل التجربة ( مفيش مشاكل ) لكن غير كدة

إستحالة .. برغم إني معجبة بكفاحك وخبرتك لكن للأسف معنديش الجرأة ولا القلب

اللي يخلوني أتصرف كدة مع ابني بعدين

إحترامي لشخصك ولموضوعك الرائع

برعاية الله حفظه

شكرا لمشاركه حضرتك ...
وطبعا حضرتك بتتكلمي من خلال قلب وعطف وحنان الام على ابنها
بس خلى بالك !!!! مش كل الناس اللي هيتعامل معاهم ابنك بعد كده ... هما انتي
مش كلهم هايخافوا عليه كده
والله شفت شباب زي الورد كانوا بيعيطوا بالدموع مع اول مشكله تقابلهم في الشغل

حضرتك ممكن تخليه ينزل في الاجازه مع حد معرفه
مثلا الحلاق بتاعكوا
مثلا نجار معرفه ويكون امين
وهكذا
صدقيني هيفرق كتير

المشاركة الأصلية كتبت بواسطة msa142

انا حياتي شبهك كدا اول مره اشتغل كنت ف تانيه ابتدائي كان ليا صحاب كتير بيشتغلو شغله اهلهم وكدا
المهم اشتغلت مع حد صاحبي ف الخرده كنت ف اليوم بجيب فوق ال 5 جنيه طبعا مبلغ ضخم بالنسبه لحد ف سني ساعتها وكنت بلف عشان اي حته حديده كان الكيلو بيعمل ربع جنيه او نص مش فاكر
وبعدها قررت افتح شغل مع نفسي وبقيت بشوي دره ع الكورنيش وبعديها فضلت اشتغل باليوميه ف شركه تعبئه سمنه وبعد كدا انقطعت عن الشغل لانشغالي بالدراسه بعد كدا رجعت اشتغلت ف مجال الكمبيوتر كنت كل صيف اشتغل في محل شكل واكتسبت خبره كويسه جدا ف الفوتوشوب والاوتوكاد نفعوني ف دراستي دلوقتي واخيرا اشتغلت ف شركه الزجاج الدوائي السنه الي فاتت
ودلوقتي انا ف كليه هندسه قسم عماره
عموما انا كنت بشتغل عشان مكنتش،بلاقي نفسي ف عيشه اللعب واكل واشرب من غير متعب ف لقمه عيشي واعرف قيمتها

1- معاك حق فعلا كنت تحس ان عقلنا اكبر من سننا... وفعلا مكناش بنلاقي نفسنا في اللعب

2- وكنت عايز اقول لكل الناس ... لما تشوف طفل سارح بغزل البنات او بيبيع دره مشوي او بيلم خرده او .. او .. او ... بلاش تستحقره
انت ماتعرفش ظروفه ايه .... وياريت لو تتعرف عليه وتساعده ... واديكوا شوفتوا كل الاخوه الاعضاء بقوا مهندسين ودكاتره ومحاسبين

ع الهامش... لما كنت في ثانويه عامه .. كنت ساعتها شغال بائع متجول (بياع ف السوق يعني)
واول لما النتيجه طلعت كنت عايز اجري بسرعه اروح المدرسه عشان اشوف النتيجه بتاعتي
ساعتها كان في ست بنت حلال كده واقفه بتشتري مني ... تصدقوا بالله اول لما عرفت اني في ثانويه عامه ... والله عيطت بالدموع
وماكنتش مصدقه
قالتي روح يابني والله ربنا هايكرمك .. وكمان خد الحلاوه اهيه (50 جنيه طبعا كانت كبيره جدا ساعتها)
والاسبوع اللي بعده جتلي مخصوص عشان تباركلي
سبحان الله ... مش ناسي شكلها لحد دلوقتي

المشاركة الأصلية كتبت بواسطة ahmedalaahosny

متابع باهتمام

شكرا للمتابعه
وياريت لو عندك تجربه ماتبخلش علينا بيها
وياريت كمان تقولنا لو عندك ابن هاتعمل معاه ايه ؟