الموضوع: أعزائي الوحوش.....محتاج رأيكم في تشخيص المشكلة دي

كنت النهاردة عند طارق الميكانيكي بعمل حاجة

قولتله على موضوع المؤشر اللي بيطلع و ينزل تاني مع نفسه......و بالصدفة حصلت و انا عنده و طلع عارف المشكلة بس مش عارف لها حل لسه.

عمل الاتي في عربية فيها نفس المشكلة و المشكلة لسه موجودة
غير حساس الحرارة بواحد جديد
لغى ثرموستات الكوعة علشان يجرب بس
غير الردياتير بالمروحة
غير غطا القربة

الحاجة الوحيدة اللي مغيرهاش هي العدادات نفسها .

السلام عليكم يا وحوش

علشان تكمل الاستفادة.....هحكي اللي حصل

من ١٠ ايام و انا ماشي على الساعة ٧ بالليل التكييف فصل فجاءة مع انه كان شغال قبلها ب ٣ ساعات زي الفل لدرجة اني قللت المروحة
الحرارة مفيهاش مشكلة ساعتها....
تاني يوم كان الجمعة اللي فاتت اللي درجة الحرارة وصلت فيها ٤٥ و ده احسن اختبار لموضوع السخونية :-)

اخدت العربية و نزلت......التكييف ما زال فاصل.......الحرارة يا دوب مشعرة سنة اعلي من الطبيعي

السبت اخدت العربية و نزلت رحت لطارق.....نزلت سلمت على واحد في الطريق و سبت العربية دايرة من غير تكييف اقل من ١٠ دقايق
رجعت لقيتها سخنة ( بين الشرطة الطبيعية و اللي بعدها)

مشيت بيها شوية ابتدت تنزل و كملت الطريق عادي من غير ما تسخن لحد شارع الهرم
لما ادخل حتة زحمة الحرارة تعلى سنة بسيطة

وصلت لطارق الحرارة طبيعية
وقفت شوية و العربية دايرة....مفيش سخونية
بصينا على المروحة.....شغالة حلاوة.....المياه كانت ناقصة حوالي كوباية و زودناها
قلت لسالم الكهربائي على التكييف......التكييف شغال بس بالعافية مع انه كان مش شغال قبلها بيوم
بص على الفلتر لقاه مش كويس......شاله و الدنيا ظبطت شوية و قالي عاوزك تكشف على الفريون

كل ده العربية دايرة.....التكييف شغال معظم الوقت و الحرارة زي الفل

مشيت من عندهم في اتجاه ورشة تكييفات بعدهم بشارع......يا دوب وصلت و ببص على الحرارة لقيتها عليت.

لفيت و رجعتله بسرعه

سالم فتح الكبوت و بص على المروحة لاقاها مش شغالة سرعة تانية خالص مع انها كانت شغالة من قبلها ب ١٠ دقايق.

ابتدوا يبصوا و لقو العيب من المروحة نفسها
ابتدى يغير بواحدة جديدة ايطالي و وهو بيفك لقى الرادياتير من الركن بتاعه في الحتة اللي متغطية بالمروحة بيجيب مياه
غيرت الردياتير كمان بواحد جديد من عنده

الحمد لله ماشي اسبوع اهو بدون مشاكل.....ربنا يكملها بالستر :-)