السلام عليكم اعضاء المنتدي الكرام ..
معظم الناس محتاره بخصوص شراء عربيه زيرو موديل 2014 مع اختلاف الميزانيه الشخصيه طبعا للشراء
كل واحد بيفكر بطريقه مختلفه عن التاني و دا لسبب اختلاف الاولويات والمتطلبات .. اللي عايز عربيه عاليه عن الأرض والتاني بيحب الجري فعايز ثبات فحدود امكانياته الشرائيه و واحد عايز عربيه واسعه وعائليه او قطع غيار رخيصه و متوفره فالسوق ...........
أنا مش هتكلم علي مميزات و امكانيات ولا كماليات .. هتكلم علي عيوب "مكرره" بعد استلام العربيه بفتره بسيطه .. الناس بتشتري بعدين تكتشف عيوب و تعاني مع التوكيل المصري المعروف بحرفيته و أمانته المطلقه طبعا فاهميني
و زي ماقلت كلامي علي موديل 2014 يعني زيرو وموديل السنه فقط
ولو سمحتوا محدش يدافع عن عربيته فالردود لأن دا متوقع .. أنا كلامي موجه للناس اللي هتدفع دم قلبها ف عربيات غاليه جدا عن قيمتها الفعليه بسبب الجمارك وارتفاع سعر الدولار .. انا مش غرضي اكره الناس فعربياتها او اشوه سياره بعينها .. والله غرضي التنبيه والتحذير مش أكتر و الشاري له حريه الاختيار طبعا
بسم الله نبدأ أول سياره :

بيجو 301 >>> تيل الفرامل عمره الافتراضي قليل جدا و بتسمع صوت صفاره عند 1000 كم او أكتر وبيتغير عند الصيانه - نتشه فالفتيس خفيفه عن سرعه 60 او 70 معظم ملاك العربيه حسوا بيها - عند الدواره الصبح مالك واحد اشتكي من مروحه التبريد تشتغل بصوت عالي مع ظهور رساله engine failure ولازم يبطل العربيه شويه بعدين يجرب تاني العيب يروح واشتكي كمان ان فتحات التكيف تحت الزجاج مفتوحه دايما وبتأثر ع البروده ورد الوكيل ان دي عيوب صناعه و هيبعتوا ل فرنسا - معظم الملاك اشتكوا من بطئ شديد فالسحب وبتتحل مع تحديث السوفت وير وفي عيوب تانيه نادره جدا زي العربيه
تنط ل قدام ودا موجود فالموضوع تحت 5 من الاعضاء اشتكوا منه

رينو فلوينس 2014 >>> العيب الشائع "القاتل" فوجهه نظري انخفاض منسوب زيت الموتور - رجرجه فالعربيه عند سرعه 40 او 50 ودي عيوب لاحظتها اشتكي منها 6 ملاك فالمنتدي هنا حتي الأن

نيسان صني سوبر صالون >>> مشاكلها طبعا معروفه من 2013 تتلخص ف تيل الفرامل امامي وخلفي و مع تغييره بترجع نفس المشكله و ضعف نظام الفرامل بصفه عامه واتعملها recall بره مصر والتفاصيل تحت ف المصادر

اوكتافيا a7 1600 >>> اه والله mpi ال 1600 cc ظهرت هنا حاله واحده فتيس بينتش ويرزع طبعا اعتقد هيغيروله الفتيس زي ما عملوا مع واحد اعرفه بس كانت a4 وحتي الأن ناس ماشين ب dsg لسه مفيش مشاكل للفتيس الجبار سيئ السمعه لكثره مشاكله فالموديلات قبل 2013

اوبل انسجنيا >>> هي حاله واحه وخارج المنتدي كان بيشتكي من خلل فنظام hill assist لما العربيه تطلع مطلع وتنزل بتكلبش ومشاكل مع الوكيل واقترحوا عليه يغيروا الموتور !! واشتكاهم ف حمايه المستهلك واتحقق مع منصور لكن تظل حاله فرديه في سياره أقل ما يقال عنها تحفه

جيلي اميجراند >>> طبعا مش هقدر اكتب العيوب عشان مفهاش عيوب لأن 3 قرايبي معاهم تحفه تحفه تحفه .. أكيد بهزر .. الكمال لله وحده بس من كتر العيوب مش هكتبها هتلاقوها ف أخر موضوع تحت من المصادر
فالنهايه حابب أأكد ان الموضوع غرضه النصيحه والتنويه والتحذير وان كل العربيات دي عربيات مشكوره حتي الايميجراند بعيوبها فهي ممتازه بالنسبه لسعرها
والسلام ختام .....