عايز حل ل موضوع رفعي ده

**mohaakotb** · 03-08-2014 11:06 PM

من الاخر يا جماعه قررت اتغير ومسلمش بالامر الواقع
الموضوع اني رفيع جدا وزني 65 كيلو و طولي 184 ف اللي هو عصاية ماشية وعندي 24 سنة
كنت مسلم للأمر وقلت اهو ربنا خالقني كده بس لما شوفت ناس وزنها زاد واتغيرت تمام قولت طب وليه لأ !!

الموضوع ببساطة انا عايز حل لو حد مجرب او في نفس حالتي اهو ندردش
دلوقتي انا مش مواظب علي نظام اكل و جربت كده فشلت بكل المقاييس نظام اكل 3 او مرات ده مش نافع معايا هي مره اكل في اليوم وممكن بليل قبل ما انام اكل حاجه بسيطة و في الاغلب لأ
جربت اروح الجيم ميت مره كنت بكمل شهرين او شهرين ونص بقعد لأني مبحسش بأي حاجه !!

من الاخر انا مش عايز اعمل جسم وفورمة الساحل وعضلات و الجو ده انا بس عايز املي شوية لما البس اي لبس مايبانش ان انا رفيع اوي كده

نصحوني بالمكملات الغذائية مع الاكل واقتنعت لما قريت عنها واشهر انوعها سيرس ماس فقلت اخد رأيكو
هل ينفع اخدها من غير جيم ؟؟ عشان بصراحه حاسس اني لو اخدتها هتتحرق في الجيم ويبقي معملتش حاجه !!
هل في نوع افضل يمدني ببروتينات اكتر ؟؟ وهل الموضوع كله بروتينات للي عايز يملي شوية زي حالاتي مش عضلات بقي وجسم وبتاع ؟؟

**amrelsaqqa** · 03-08-2014 11:28 PM

سبحان الله مع ان اي حد مليان هيتهيأله ان مفيش اسهل من الاكل والتخن :d

أنا طولى 184 بردو بس وزنى 109 :(

لو خدنا وزنى على وزنك وقسمناهم بالنص هيبقى كل واحد 87 :d

**abokoko** · 03-08-2014 11:36 PM

اول حاجتين جم على بالى - عفوى -

تزوج

بطل تدخين لو مدخن

**Sameh samy** · 03-08-2014 11:36 PM

هاقولك علي وصفة قالي عليها واحد كبير زمان انا كنت كدة ودلوقتي موش عارف اخس واكتشفت ان الرجيم اصعب
نص كوباية لبن عليها معلقة سمنة بلدي وبيضتين نيين ومعلقتين عسل
قلبهم كويس واستحمل واشربهم

**SeiffoZ** · 03-08-2014 11:40 PM

نوعية اكلك ايه؟ بتاكل ايه؟؟ قولنا غذائك كده يمكن نقدر نساعدك

**Mido Casper** · 03-08-2014 11:54 PM

الرفع ده بسبب الشغل الزياده لللغده والتخن المفرط بيكون بسبب خمول عمل الغده
في ناس بتاخد ادويه بتدي خمول للغده بس لازم يكون باشراف الطبيب دا للرفيعين
والتخان بياخدوا ادويه تزود من عمل الغده و دا حل اخر للتخين

**mohaakotb** · 03-08-2014 11:57 PM

المشاركة الأصلية كتبت بواسطة amrelsaqqa

سبحان الله مع ان اي حد مليان هيتهيأله ان مفيش اسهل من الاكل والتخن :d

أنا طولى 184 بردو بس وزنى 109 :(

لو خدنا وزنى على وزنك وقسمناهم بالنص هيبقى كل واحد 87 :d

طب ياريت يالا بينا :)

المشاركة الأصلية كتبت بواسطة abokoko

اول حاجتين جم على بالى - عفوى -

تزوج

بطل تدخين لو مدخن

لا مش مدخن وموضوع الجواز يعني لسه مبفكرش فيه دلوقتي

المشاركة الأصلية كتبت بواسطة sameh samy

هاقولك علي وصفة قالي عليها واحد كبير زمان انا كنت كدة ودلوقتي موش عارف اخس واكتشفت ان الرجيم اصعب
نص كوباية لبن عليها معلقة سمنة بلدي وبيضتين نيين ومعلقتين عسل
قلبهم كويس واستحمل واشربهم

ده فعلا الكلام ده؟؟ علمي يعني ولا كلام بتوع جدودنا اللي بيبقي حلو في اوله وبعدين تكتشف انه فيه مصايب الدنيا :)
هو ممكن موضوع اللبن والسمنة و العسل بس بيض ني دي مستحيل

المشاركة الأصلية كتبت بواسطة seiffoz

نوعية اكلك ايه؟ بتاكل ايه؟؟ قولنا غذائك كده يمكن نقدر نساعدك

اكل عادي باكل مثلا مره واحدة نص فرخة و رز و الحاجات دي بس ماليش في اللحمة اول ولا المحاشي
وعادي بردو فزل و طعمية والحاجات دي

**J A G U A R** · 04-08-2014 12:00 AM

سبحان الله

حضرتك بتوصفنى .. وبالمناسبه انا لغايه دلوقتى على فطارى ومش جعان خالص :)

**aboomar22** · 04-08-2014 12:07 AM

قبل اى حاجة روح لدكتور الاول هيطلب منك تحاليل مثل هرمون غدة درقية T3 T4 TSh وتحليل براز وسكر فى الدم وممكن يضيف عليهم اللى هو شايفة بعدها هتروح كتور تغذيه هتمشى على نظام غذائى وادوية مساعده تحت اشراف طبى