الموضوع: أهم موضوعات قسم فيفوريت و فليشيا المشروحة بالصور

بالصور طريقة تصليح ذراع الاشارة (العالى-الواطى) للنور فى الفليشيا


لينك الموضوع

المشاركة الأصلية كتبت بواسطة المنسي

الموضوع ده انا عامله هدية لحبايبي اصحاب الفليشيا اولا انا ايه اللى حصل معايا فجاة لقيت ذراع الاشارة اللى هو الاصلى اللى راكب فالعربية بقاله 14 سنة ابتدى يعلق يعني اجى ادى اشارة يمين والنور الواطى شغال اول مالف الدريكسيون يمين الاقى النور العالى ضرب فى وش اللى قدامى ونفس الموضوع لما اجى ادى اشارة شمال وبعدها بفترة ابتدي النور الواطى يقلب عالى لوحده من غير ماجى جنب الذراع وانا بصراحة كنت مطنش لغاية ماجيت كنت مسافر بالعربية وقلت مابدهاش اغيره وخلاص واشترى واحد جديد وكانت الصاعقة لما سالت عن الالمانى الجديد لقيته ب 180 جنيه قلت لما الجديد كده هيبقي الاستيراد بكام وحالته ايه سالت برده لقيت الاستيراد عامل 120 جنيه واكتشفت ان فيه منه صيني وب 50 جنيه فاشتريت الصيني وقلت امشي بيه نفسي وروحت للكهربائى فك لى الاصلى اللى كان راكب وركب الصيني وتمام زى الفل وقاللى انا ممكن اصلحلك الاصلى وروح رجع الصيني ده بس الاصلى هيتصلح ويشتغل معاك فترة وهيرجع تانى قلتله لا ركب الصيني وخلاص ولما يبوظ ابقي اجيلك نصلح الاصلى المهم بعد ماركب الصيني واخدت الاصلى وشيلته عندى المهم الصيني مكملش اسبوع وعمل نفس المشكلة اللى كانت موجودة قبل كده فبقيت امشي من غير ما اولع النور الواطى بتاع العربية لغاية ما جيت فى مرة واتعافيت على الدراع الصيني ده واتكسر فى ايدى فقلت لازم اصلح الذراع الاصلى فعملت ايه فكيت الذراع الصينى المكسور وقلت علشان اشوف ايه الفرق بين الاتنين الصيني والاصلى :-

1- فكيت المسمار اللى بيربط الجزء اللى تحت الدريكسيون مكانه تحت الطارة.

2-طلعت العلبة بتاع ذراع الاشارة بالضغط على ذراعين موجودين فى الجنب زى اللى فى الصورة 3-فكيت الكابلات الواصلة للدراع من اسفل وهما عبارة عن كابلين.
ودلوقتى العلبة بقيت بالشكل ده بعد مافتحت الغطاء العلوى ليها

4-وده شكل الغطا بتاع العلبة من جوة
5-هنبص هنلاقى سوستتين موجودين واحدة يمين وواحدة شمال هنفكهم بالراحة علشان ميطيروش مننا زى اللى فالصورة بالظبط

6-والجزء ده فى سوستة بس انا اخدتها مكان اللى كانت موجود فى الذراع الاصلى علشان السوستة اللى كانت فى الدراع الاصلى ضعفت وكمان غيرت شوية سوست اخدتهم من العلبة الصيني مكان اللى موجودين فالاصلى

7-بعد ما شيلنا السوستتين والدراع بتاعهم هنفك الجزء ده

8-بعدين هتظهر لنا العلبة بالشكل ده وفيه فردتين سلك واحدة مشعرة وواحدة متغطية بغطاء بلاستيك زى سلك الكهرباء وهما دول سبب المشكلة

9-السلكة اللى هيه باللون الازرق هنلاحظ انها مقطوعة هنلحمها بمكواة لحام قصدير

10- ونخلى بالنا برده من السلك اللى مشعر ده ونحاول ان احنا منخلهوش ملمس لانه عبارة عن كوبرى بين الوصلتين الحديد انا مش عارف اوضحها ازاى بس اكيد الصورة اللى فاتت موضحة اكتر من كلامى

11بعد ما خلصنا اللحام هنغير سوستة مهمة جدا فى الذراع لانها لو ضعيفة كل الشغل ده هيروح على الفاضى ولو بصينا فى الصورة اللى جايو هنلاقى فيه دراع بلاستيك لونه ابيض لو شديناه بايدينا هيبقي تحته سوستة ضاغطة عليها دى اللى المفروض تتغير ولو ما امكنش ممكن نشدها شوية بحيث انها تطول شوية

12-خلاص غيرنا السوستة دى نرجع بقى نركب كل حاجة زى مافكيناها هنبدا الاول بالجزء اللى لسه مغيرين له السوستة وهيبقي بالشكل ده نركب الجزء اللى فيها الحتة النحاس لتحت والدراع اللى لسه مغيرين له السوستة يكون جوة العلبة من قدام وفيه قاعدة مدورة من تحت انا معلم عليها وهيبان هيه بتركب ازاى

13-هنلاقى العلبة بقت بالشكل ده

14-نيجي لاصعب جزء فى التركيب اللى هو الدراع والسوستتين دول

15-السوستتين اماكنهم زى ماهو فالصورة كده

والدراع الابيض هيدخل فالمجرى بتاعه

16-اخر حاجة الغطاء اللى احنا كنا فكيناه فالاول هنلاحظ فيه ان ليه مكان علشان الدراع اللى فالنص يبات فيه وكمان بيقفل على الجزء اللى ركب فيه السوستتين

17-
1- نرجع نركب الكابلين اللى كنا فكيناهم من العلبة ونركب العلبة بالضغط على الدراعين اللى فالجنب ونقفل تانى

معلش كان نفسي اصور لكم فيديو بس مقدرتش ويارب اكون قدرت افيدكم على قد ما قدرت ولو حد مش فاهم جزئية ممكن اشرحها تانى والحمد لله الواحد وفر على نفسه 120 جنيه ولا حتى 180 كان الواحد دفعهم فى دراع جديد