الموضوع: الوضع الافضل للفتيس الاوتوماتيك اثناء الوقوف

المشاركة الأصلية كتبت بواسطة borio1704

الحقيقة أنا شايف إن اللي بيقول ده أحسن ولا ده أحسن بيتكلم بناء على حاجة من اتنين:

إما إنه شايف إن كده صح نتيجة خبرته أو راحته النفسية..

أو يكون سمع الكلام ده من حد تاني.

بس يمكن لو فكرنا بطريقة تانية.. زي مثلا إننا نعرف ونفهم إيه اللي بيحصل أصلا.. وبعدين نبقى نحكم.


بس بصراحة .. ومن المواضيع اللي شفتها على النت.. ما زال الفتيس الأوتوماتيك لحد دلوقتي يعتبر حاجة مبهمة لكتير من الناس.. حتى المتخصصين في السيارات.


بس علشان أبقى واضح من الأول... أنا مش خبير في الفتيس الأوتوماتك.. بس بحاول أفهم..



ملخص الكلام... إن الفتيس فيه مشكلتين أساسيتين:

أول واحدة: محول العزم



وبدون الدخول في تفاصيل معقدة... الجزء ده هو بديل الدبرياج في الفتيس المانيوال..

بس فكرته إنه عامل زي مروحتين قصاد بعض.. واحدة فيها كهربا وشغالة (اللي جاية من موتور العربية).. والتانية مفصولة من الكهربا (اللي رايحة على الفتيس).. بس بتلف بردو علشان تيار الهوا اللي جاي من المروحة المقابلة خلاها هي كمان تلف.

محول العزم بيستخدم الزيت بدل الهوا... علشان ينقل الطاقة الكبيرة اللي جاية من الموتور ويقدر يحرك وزن العربية.

في الحالة دي... فيه عمود طالع من الفتيس وراكب في محول العزم... وهو اللي بياخد الحركة من محول العزم إلى الفتيس.


طيب لو حبينا نجيب الوضع n... هل ده معناه إننا بنفصل العمود ده من محول العزم ؟؟


أبدا... العمود متعشق باستمرار


أمال الوضع n ده ازاي بيفصل كل السرعات؟؟

هي دي تاني مشكلة....


ببساطة... الفتيس فيه مجموعات كلتش داخلية على كل تعشيقة تروس




لما مجموعة الكلتش دي بتتعشق.. الفتيس بيحول على الغيار اللي تم اختياره حسب دوسة البنزين وسرعة العربية.



يعني الفتيس الأوتوماتيك فيه مرحلتين كلتش... واحد خارجي (محول العزم).. وواحد داخلي (على كل غيار)


لما حضرتك بتجيب الوضع n... كل اللي بيحصل إن كل الكلتشات الداخلية بتبقى فاصلة... إنما محول العزم موصل حركة للعمود الرئيسي.. وده ما بيتفصلش.




نيجي بقى للأضرار اللي ممكن تحصل نتيجة الوقوف في الإشارة على الوضع n....

ممكن يكون فيه تأثير على مجموعة الكلتش الداخلية الخاصية بالترس الأول أو التاني.. ويحصلهم تآكل على المدى البعيييييييييييد.


بس لما تيجي تفكر فيها كده... مش الكلتشات دي بتفصل وتعشق بردو طول ما العربية ماشية؟؟؟

من وجهة نظري... يمكن الاستخدام المفرط في استخدامهم ممكن يعمل مشاكل... إنما المفروض حسب الاستخدام العادي ما يحصلش حاجة.

يعني مثلا.. مش كل ما تلاقي العربيات هدت قدامك تقوم جايب n وترجع تجيب d لما السكة تفتح.. ده كده اسمه استخدام مفرط وبدون داعي.



طيب نيجي للأضرار اللي ممكن تحصل نتيجة الوقوف في الإشارة على الوضع d....


بصراحة.. أنا شايف الأضرار هنا محسوسة أكتر...

أولا... محول العزم بيبدأ يفوت الطاقة اللي طالعة من الموتور.. وبالتالي الزيت اللي جواه بيسخن جدا... وده بيأثر على قوة وكفاءة السحب.. وده معناه استهلاك بنزين أعلى.

ثانيا... الوضع ده بيقصر عمر محول العزم بشدة... نتيجة تزايد معدل التآكل في الريش الداخلية في محول العزم.

ثالثا... الوضع ده بيعمل مقاومة جامدة جدا على الموتور أثناء التوقف.. والموتور بيحاول يفضل شغال... يعني بتصرف بنزين أكتر بكتير من المعتاد لو انت واقف بدون حمل.

رابعا... الحمل الزايد ده معناه كمان أحمال مالهاش لازمة على أجزاء الموتور الداخلية وخاصة السبايك .. بالإضافة للإجهاد اللي الزيت بيتعرضله .

خامسا... أجزاء نقل الحركة بالكامل بتكون مضغوطة وأي رولمان بلي داخلي فيها بيبقى معرض للضغط... بدون داعي.

سادسا... الفرامل بتتأثر كمان خصوصا لو رجلك بدأت تخف من على الدواسة وبدأت العربية تتحرك... ده معناه احتكاك وتآكل.



ملخص الكلام...

لو لقيت إن الإشارة هتطول أكتر من نص دقيقة .. حول على n.



...

ياريت تحول المشاركه ديه بموضوع مستقل

عشان يكون مرجع في القسم التعليمي

تحياتي وتقديري