الموضوع: مخصص للرد على أسئلة الأعضاء في مجال التوظيف و سوق العمل

برافووووووووووووو علا منتهى الايجابية فى التفكير انك تساعدى غيرك فى حدود قدرتك
ماشاء الله عليكى
متابعة بإهتمام للإفادة
ربنا يوفقكم جميعا

المشاركة الأصلية كتبت بواسطة محمد عز

الفكره ان اهلى كلم عايشين فى السويس وانا اصلا من السويس

فطبعا العين السخنه هى المكان المناسب للشغل ، لكن السويس احسن بلا شك

والقاهره انا عشت فيها 8 سنين والحقيقة صعب ارجع تانى للمطحنه ده برجليا ، الحقيقة انا مش مستغنى عن نفسي ولا اعصابي

نرجعلك لسؤالك ، معلش دوشتك بمعلوماتك عنى مش مفيده

ان مهندس مدنى عام ، مش عارف من حسن حظى ولا من سوء حظى ان تخصصت فى مجال تصميم الطرق وهندسه النقل وتخطيط المرور

المفروض ان المجال ده رقم واحد او 2 فى العالم دلوقتى ، بس هو رقم 6500 فى مصر

بس انا مش لازم اشتغل فى نفس المجال ، يعنى ممكن اشتغل كمهندس مدني

طيب يا باش مهندس ابعت لي السي في بتاعتك على olao@paulinedarcy.com فيه عندنا شركة محتاجة حد في ال infrastructure بس مكان الشغل في القاهرة.

المشاركة الأصلية كتبت بواسطة aif

سؤال دايما يتسأل في طلبات الوظيفة او في الانتر فيو ....
ايه المرتب اللي انت متوقعه؟
او
ايه المرتب اللي انت عاوزه ؟
طبعا سؤال مزعج و مربك لأي شخص ....
لو قلت مرتب كبير .... ممكن يبقي مش في صالحي عشان ابقي كدة عاوز اكتر من المتاح وفرصتي في الوظيفة تقل ...ولو قلت مبلغ صغير ... ممكن اضيع علي نفسي فرصة الحصول علي مرتب اكبر ...
انتي رأيك ايه يا علا المفروض الرد يكون ايه ؟؟؟

حاول على أد ما تقدر ما تقولش أرقام خااااااااااااااالص.. فيه كتير مش بيردوا يردوا على سؤال انت بتاخد كام دلوقتي.. و فعلا السؤال ده مش المفروض يتسأل من اللي بيعمل انترفيو.. و هو ماله انا باخد كام؟ المهم هو انا أستحق كام. بس بعض العقليات و خصوصا في مصر و العالم العربي بيصروا يعرفوا انت بتاخد كام عشان ما يديكش اكتر كتير من اللي انت بتاخده.

طيب، نرجع لسؤال أقول ايه لما اتسأل السؤال ده:
- لو حد لسه خريج جديد يفضل ما تتكلمش في فلوس خالص.. ركز بس على انك يهمك الخبرة اللي هاتكتسبها أكتر من الفلوس، انما لو عرض عليك مرتب عبيط انت عارف كويس ان ده بعيد جدا عن اللي زيك بياخدوه، في الحالة دي قول له انا آسف جدا، المرتب ما يناسبنيش و انا عارف انه بعيد جدا عن ال market range للي في تخصصي. عشان كده لازم قبل ما تروح الانترفيو تعمل دراسة كاملة متكاملة عن الشركة اللي انت رايحها و الوظيفة اللي محتاجينك فيها عشان تبقى بتتكلم عن علم مش عن فتي و سواء كده أو كده هايبان عليك هايباااااااااااااااان :)

- لو حد عنده خبرة في نفس مجال الشغل اللي عايزينك فيه، يبقى في الحالة دي انت في المركز الأقوى. لو سألوك بتاخد كام هاتسألهم انت انا اللي عايز اعرف انتوا حطين كام رينج سالاري للوظيفة دي و لما اسمع الرقم هاقول لكم اذا كان يناسبني و لا لأ. و في الحالة دي لو قالوا الرقم و ما عجبكش، لو همه متمسكين بيك و عندهم مرونة في الرينج هايسألوك طيب انت يناسبك كام؟ ساعتها بأه قول لهم الرقم اللي في دماغك و حاسس انه يناسبك عشان تمشي من شغلك و تروح شركة هاتضيف لهم الكتير من خبراتك و لما تقول الرقم يبقى ساعتها الموضوع هاينحصر في يا آه يا لأ. و في كل الأحوال خليك انت في المركز الأقوى حتى و لو كنت خلاص مش طايق الشركة اللي انت شغال فيها او عندك مشاكل كتير او حاسس انك خلاص كده كده هاتمشي منها قريب.. مش لازم اللي بيعمل لك الانترفيو يحس حاجة من دي خااااااااااااالص.. انت رايح الانترفيو على إنك بتدور على فرصة أحسن و خلاص. طبعا مش باقول لك إكدب لما يسألوك عايز تمشي ليه بس في 100 طريقة للتعريض بحيث انك لا تضطر للكذب و لا في نفس الوقت تحسسه انك مش هتلاقي تاكل لو ما ادوكش الوظيفة دي.

- طيب، في حالة ان اللي بيعمل لك الانترفيو أصر و ألح تاني انه يسمع منك انت رقم مش يسمعك هو رقم (ساعات ناس دماغهم بتقفل انك تقول رقم و خلاص)، ساعتها قول له طيب انا هاقول لك انا متوقع كام كمرتب و بدلات عشان أسيب الوظيفة اللي انا فيها بقالي كذا و اروح على شركة جديدة، وقول الرقم اللي انت فعلا حاطه لنفسك و شوف همه يقدروا يدفعوا اللي انت عايزه و لا لأ، يعني هاترمي الكورة في ملعبهم من الأول.

- اما في حالة لو التربسة زادت و لقيته راسه و ألف سيف لا يعرف منك انت بتاخد كام حاليا، و لو لقيت الانترفيوي ممكن يقفل على كده، ساعتها ممكن تقول له مرتبك الحالي كام و طبعا هاتحط عليه كل البدلات و المكافآت و كل حاجة بتحصل عليها من الشغل، ساعتها ممكن يسألك طيب عايز كام عشان تروح وظيفة تانية، قول له بأه ساعتها على اللي انت شايف انه يرضيك بصورة تحس انك بتاخد حقك و في نفس الوقت الرقم ما يكونش مبالغ فيه فيحس انك مش عارف حاجة عن السوق ولا عن إمكانياتك. طبعا دي لازم تقعد فيها مع نفسك و تشوف الناس في نفس المستوى و سنين الخبرة بياخدوا كام و في شركات شكلها ايه و هكذا.

المشاركة الأصلية كتبت بواسطة Mohamed-Saoud

أنا بعتلك الcv من بداية موضوعك تقريبا و لسة ماجليش رد (أنا كنت عاوز رأيك فقط)!
لعل المانع خير.

انا رديت عليك في يوميها

المشاركة الأصلية كتبت بواسطة elbaz45

موضوع نقاط الضعف والقوة فكرنى بالدكتور بتاع ادارة مشروعات هندسية
كان فالقنى كل شوية swat analysis بس الغريبة ان الواحد عمره ما فكر يعمل تحليل سوات لنفسه ابدا
لييييييييييييييه ....؟ مش عارف

متابع باهتمام ,

ماهو ده مش صح خالص على فكرة.. لازم كل فترة تعمل لنفسك SWOT Analysis و تطلع بنتيجة قبل ما تروح أي انترفيو.

المشاركة الأصلية كتبت بواسطة ams

يا اختى الفاضله : هو الhr بيقى شعوره ايه لما يلاقى اللى قدامه لمض و مش بيديلو اللى هو عاوز يسمعه يعنى يجاوب بلا اجابه زى الساسه الكبار ؟

دي بتبقى على حسب اللي بيعمل ال HR نفسه و شخصيته و مدى حرفيته.. يعني ممكن يكون ده يكون دليل على التمكن عند بعض الHR و يعلي من قدر اللي بيتعمل له انترفيو، و ممكن بالعكس يكون دليل على الفزلكة و تكبر في دماغه و يغتت عليك عشان يثبت نفسه مش أكتر.