الموضوع: مـخصـص لشكــاوى مالـكين بـروتــون / م. أمــر (مديــر صيانــه بروتـون مصـر)

السلام عليكم، انا والدة علي، إسمي ( آية )
انا معايا عربية ساجا أوتو أحمر ، للأسف رقم الشاسيه والموتور في الرخصة في العربية في توكيل أبو رواش، ومش فاكراهم بس ممكن أجيبهم بكرة ان شاء الله.. اشترتيها من شهرين بالظبط، ، وكنت هاعمل صيانة الـ1000 قبل العيد ورحت حجزت اعطوني ميعاد بعد العيد. أنا شغلي في التحرير وساكنة في الجيزة فلم أذهب بها أبداً أي مشوار طويل، وثالث أيام العيد ذهبت بها إلى كارفور أول الطريق الصحراوي ، وأنا راجعة فجأة سخنت وبطلت مني، فتحتها لقيت المياة الخضراء منطورة على الموتور كله ومافيهاش نقطة مية واحدة مش عارفة اللي حصل، كلمت الصيانة وخلوني كلمت الونش أخذها يوم الإثنين، م/ محمد عبد الهادي اللي استلمها، رحت النهاردة علشان أشوف إيه الأخبار قالولي غيروا الرادياتير لأنه فيه عيب وبعدين جربوا العربية، لما رجع المهندس المروحة فضلت شغالة 20 دقيقة بعد ما ركن ومشيت والمروحة مابتفصلش، المهندس قالي هاتدخل الورشة تاني وبعدين كلومني قالولي جوان وش السلندر هايتغير كمان!!!!!!! معقول كل دة ولسه في أول 1000 دة طبيعي؟؟؟
يا باش مهندس لو سمحتم حد يرد عليا أن بجيب عربية زيرو علشان أريح نفسي منها على الأقل 3- 4 سنين
مش من الأول تعمل معايا كدة!! أنا ولادي مدرستهم على الطريق الصحراوي ومحتاجة عربية تسعفني مش معقول أتعرض لدة وولادي معايا الواحد بيجيب عربية زيرو وكويسة علشان ماتبهدلش، عربيتي الأولى أول مرة والله العظيم مهندس يمد إيه فيها كانت بعد 5 سنوات وبعتها عاملة 40 ألف كيلو بس في 7 سنين أنا استهلاكي مش جامد بس ماعنديش استعداد للبهدلة؟؟ أرجو من المهندس آمر يرد عليا انا كلمته ومردش ويقوللي ايه العمل؟؟؟؟ انا مش عاوزة مشاكل؟؟؟

-----------------
يمكن ان الرداياتير كان به مشكله وهو من سبب تلك المشكله ...... ولكن مع اصلاح المشكله لن تتكرر المشكله ان شاء الله

برجاء متابعه السياره وعند وجود اى ملاحظات اخرى برجاء حجز صيانه وابلاغ المهندس/امر بالموعد

مشرف القســم ب8

شكر خاص جدا وعتاب شديد جدا جدا
انا عربيتي جين 2 اوتوماتيك رمادي 2010
شاسيه : 230239
موتور: 4077
عدد الكليومترات : 32000
الحمد لله العربية زي الفل ما عدا الفرامل خفيفة واشتكيت منها لما عملت صيانة ال5000 كم بالدقي
قالولي مفيش عندك مشكلة والعربية تمام وبعدين لقيت ان المشكلة مازالت موجودة
سألت صديق عنده نفس العربية قاللي ان الجين 2 فراملها خفيفة شويه" قلت خلاص امري لله
ولكن حدث مالم اكن اتوقعه" حادثة امامي علي بعد 20 متر تقريبا وانا خارج من نفق العبور الي طريق الاسماعيلية ولم اخد سرعتي بعد كانت تقريبا 50 او 60 كم / ساعة لو اي عربية تانية كانت فرملت مكانها ولكن للاسف اصطدمت بالسيارة التي امامي وحدث بعض التلفيات لا داعي لسردها " المهم الحمد لله
فقررت عمل الصيانة بابو رواش بدلا من الدقي بمعرفة اخي الاصغر يوم 14-9-2010 لاني مكنتش طايق نفسي ولا طايق التوكيل
وكانت المفاجأة حسب ما اخبرني به اخي ان العربية محتاجة تيل امامي فقط والله اعلم عاملوا حاجة تانية ولا لأ
المهم ان العربية فراملها كويسة واحسن من الاول بكتير وتم تجربتها عن طريق المهندس امر بنفسه
بصراحة قررت عدم زيارة فرع الدقي تماما مهما حدث" واتوجه بالشكر للمهندس امر
علي فكرة وانا بكتب الكلام ده دلوقتي حالا مركز الصيانة بابو رواش كلمني وبيطمن ان كله تمام ولا لأ
بجد شكرا
اخوكم مهندس \ عادل عامر

اسف يا جماعة انا كان قصدي فرع العجوزة مش الدقي لان مفيش اصلا في الدقى
وارجو من المسؤل عن توكيل بروتون محاسبة المسؤل عن فرع العجوزة لسوء الخدمة وعدم الخبرة في الصيانة
الموضوع مش سهل يا جماعة ومش كل الناس عندهم خبرة في العربيات واحد زيي بيروح التوكيل عشان اريح نفسي مش اتعب نفسي والا اصين برة عند ناس عندهم خبرة احسن ولو بضعف الثمن و طبعا اكيد ارخص
وشكرا

----------------------
تم ابلاغ المهندس/امر بشكواك ....... وسوف يتم اتباع الازم

مشرف القسم ب8

م/ آمر خالص تحياتي لحضرتك
بينات عربيتي كالآتي :
برسونا 2009
الكيلومترات : 18900 تقريبا.
رقم المتور : 1434
رقم الشاسيه : 193509

الكلام اللي بسمعه عن أخلاق حضرتك و تفانيك في شغلك و حبك لبروتون و ان اسمها يعلى كل يوم عن التاني هو اللي شجعني أستشير سيدتك في حل مشكلتي
المشكلة بكل ايجاز ان أول م استلمت العربية و أنا ملاحظ ان فيه صدأ و اضح في الشكمان أنا قلت ممكن على الوش و هيروح بس أتا ملاحظ انه في زيادة... يترى حلها ايه المشكلة دي و ياريت لو ممكن ووقت حضرتك سمح و رديت عليا قبل يوم الاثنين على أساس أنا رايح أعمل صيانة ال 20000 يوم الأثنين 4-10-2010

شكرا لسيادتك و ربنا يجازيك عنا كل خير

م/ شريف حمدي
0106727967

---------------
تم ابلاغ المهندس/امـر بشكواك .. ولكن لابد قبل الذهاب للصيانه المرور على رجل المبيعات الذى باع لك السياره واخذ منه ورقه تثبت بها وجود هذه المشكله من يوم الاستلام

مشرف القسم ب8

إسمي أحمد عزت
0103185692
السيارة برسونا 2009
عدد الكيلوات 27000
رقم الشاسيه : 215323
موتور : 9763
السلام عليكم مهندس آمر
أنا عندي مشكلة علبة الدريكسيون اللي بتخبط في المطبات منذ الألف كيلو الأولى للعربية ومشكلة ماكينتين الزجاج الأمامي للبابين بيعملوا صوت عالي جدا في الطلوع والنزول بردو منذ الخمسة آلاف كيلو الأولى
مشكلة علبة الدريكسيون كنت كلمت حضرتك فيها كذا مرة في التليفون وأخر مرة حضرتك قلت لي إنكم بتدرسوا التعديل مع الماليزيين وبعد فترة في صيانة العشرين عرفت ان التعديل وصل ولما سألت المهندس أنكر في تعديل اصلا مع أني عرفت من المنتدى أن ناس عملت التعديل ومرة تانية حاول يقنعني أن ماعنديش المشكلة المهم أخر صيانة الخمسة وعشرين ألف طلعت جربت مع مهندس وأخيرا تأكدوا أن عربيتي محتاجة للتعديل علبة الدريكسيون وماكينتين زجاج امامي وكتب ده في تقرير الصيانة وسجلت اسمي عند أ فاطمة تقريبا وبعد كده اتصلت كذا مرة وكل مرة اللي يرد عليا يقولي لسة ماجاش ولسة مكن الزجاج ما جاش وبعدين ادخل المنتدى ألاقي ناس عملت التعديل
ياريت يا مهندس آمر حضرتك تهتم بهذه المشكلة وأنا متأكد إن لو حضرتك تدخلت بنفسك التعديل لعربيتي هيتعمل إن شاء الله وماكينات الزجاج هتتوفر بردو إن شاء الله

---------------------
تم ابلاغ المهندس/امر بشكواك .. وسوف يتم حجز قطع الغيار الخاصه بك وحجز يوم لتغيرهم وابلاغك به

مشرف القسم ب8