الموضوع: كيف توفر الوقود من خلال الهيدروجين drycell او wetcell

تمام يا استاذ مصطفى انا عارف ان دماغك جامده فى الابتكارات والعمل الشخصى
انا شخصيا حبدء تنفيذ بعد العيد وحعمل خليه اشغلها مع المولد 100% واجربها مع العربيه حتى اصل الى افضل النتائج
انا متوقع السلبيات حتكون زى العربيات اللى بتستخدم الغاز الطبيعى (بيقولو حامى على المكنه وبتعمر بسرعه)لاكن الغاز بفلوس والخليه مصاريف بنائها فقط ومهما كانت العيوب اللى حيتوفر حيغطيها بمراحل
ممكن نقلل العيوب دى بستخدام بيكات صغيره جدا مع نسبه غاز كافيه بحيث يكون الخليط 75% غاز 25% بنزين 92 (ده كاربراتير معرفش ازاى تظبط كده فى الانجكشن)
وادينا بنتناقش للوصول لافضل الافكار فينك يا استاذ ياسر لعل المانع خير

المشاركة الأصلية كتبت بواسطة ZARIF

على فكرة الكلام اللى بيتقال على الغاز دة اشتغلات صنايعية مش اكتر

انا مركب غاز بقالى 8 سنين

وكلمة السر فى المحافظة على الموتور من اى شيى هو الزيت ( فيسكو cng )
الزيت دة مصمم خصيصا من شركة bp للمحركات التى تعمل بالغاز المضغوط والبنزين

لو غيرت الزيت او لو حطيت حتى اغلى زيت موبيل1 هتبدا تظهر معاك المشاكل

والكلام دة من عشرة 8 سنين مع الغاز وسيبك من الهرى اللى بيتقال دى ناس بتسمع وتردد
انت كده جبتلى من الاخر فى موضوع الغاز
نيجى بقة لموضوعنا
وهو انى عايز اعمل زيك بالظبط يعنى ابتدى من حيث انتهى الاخرون

بمعنى انى عايز اعمل اكبر خلية ممكن تتحملها بطارية العربية العادية

بس انا هحط شوية لمسات من عندى

يعنى مثلا هجيب عوامة زيت باكم بتاعة لانوس واركبها فى خزان المية بحيث لما تنقص عند مستوى معين تدينى تنبية صوتى وانا سايق ودة عشان الخلية متفضاش من المية وتسخن
فكره جيده عشان متقفش (الميه هى الوقود) لاكن الميه لو فضت الخليه مش حتسحب كهرباء لان نظريه تشغيلها مبنيه على السائل
وحاجة تانية انى هخليها تبدا تحمل على البطارية او الدينامو بعد 30 ثانية من الدوارة عشان متبقاش حمل على الدينامو والبطارية ودى دايرة عادية تتنفذ
تمام وانا عندى دواير من دى لو ليك فى الاليكترونيات
وحاجة تالتة انى هعمل لها مروحة تبريد هوا شديدة مخصصة ليها تشتغل معاها مجرد ما تشتغل لانى باذن الله ناوى اركبها بين الاكصدام الامامى والسربنتينة فى الانوس جنب الكلاكس تحت
النقطه دى فيها حوار
الخليه نفسها مش حتقدر تعملها تبريد مثالى لاكن تقدر تعملها سربنتينه صغيره(وتعملها مروحه وممكن بترموستات) من المخرج اللى عباره عن غازى الهيدروجين والاكسجين والماء وتقدر تبردها كده تبريد مثالى لتعود للخزان مبرده حتى لا يحدث تبخير
وفية شوية افكار تانية لسة مخلصتهاش عشان اعمل حاجة متكاملة لكن اللى واقف معايا دلوقتى هو اكبر مقاس للخلية واكبر عدد الواح ممكن تتحملها البطارية العادية بتاعة العربية 70 امبير
حنحسبها مبدئيا
ودة اللى الاخ الفاضل صاحب الموضوع اتمنى انة يفيدنا فية

احنا هنا حنخرج البطاريه من المعادله وحنعتبرها مكثف عملاق وداعم للدينمو ومحافظ على ثبات الفولت والامبير(لاننا حنربط الخليه بعد التشغيل)
متوسط امبير الدينمو 80 امبير
الرسم البيانى ده فى معدل اخراج الدينمو بالنسبه للار بى ام

كده ممكن نوصل ل140 امبير مع الدينمو الاستوك عن 4000 لفه
بس لازم منهملش ان الدينمو مطلوب منه تشغيل جميع اجهزه العربيه وشحن البطاريه (عمليا افوميتر قوى يقيس امبير عالى ويتوصل توالى مع طرف اخراج الدينمو وحساب متوسط سحب العربيه للادره ومع جميع الاضواء ومع شحن البطاريه)
كمثال متوسط 20 حتى 40 امبير(يعنى 30 ودى نسبه انا حاططها من دماغى ولازم عمليا تقاس
حنقسم مستويين وحقولك ليه
الاول تحت ال1500 ار بى ام
تقريبا الخرج حيكون 100 امبير نطرح منهم ال30 يتبقى 70 (مينفعش نسحب ال70 كلهم والا حنوصل الدينمو لبيك باور وحيسخن ومش حيتحمل يعنى نقدر نسحب 50% بامان 35 امبير)
المستوى التانى 140 امبيرنطرح منهم ال30 يتبقى 110 (مينفعش نسحب ال110 كلهم والا حنوصل الدينمو لبيك باور وحيسخن ومش حيتحمل يعنى نقدر نسحب 50% بامان 55 امبير)
افضل فكره اننا نعمل خليه مزدوجه للمستويين عشان كميه الغاز تكون متناسبه نسبيا مع الار بى ام
كل الافكار دى على الستوك لاكن لو حنجيب دينمو اكبر الكلام حيختلف طبعا
فى ملحوظه اخرى ان اكيد القدره الحصانيه حتقل لان المحرك كان بيجيله الوقود جاهز دلوقت اصبح مطلوب من المحرك انتاج وقوده سيحدث فرق فى انتاج الطاقه
جميع الافكار معرضه للصواب والخطء ومفتوحه للمناقشه

لا يا استاذ مصطفى انت فاهمنى غلط كل الكلام اللى فوق على العربيه لانى حعمل خليه قادره على تشغيل المولد بالكامل وحخدها اجربها على العربيه وحستفيد بتجربه التشغيل الكامل للمولد واستخلص العيوب والمميزات كا استهلاك الخليه بالواط وقدره اخراج التيار بالواط (الواط الصافى)وده حيفيد جدا فى الخليه الكامله للعربيه لمعرفه الحسابات العمليه الكامله لتشغيل محرك 1600 (محرك الدينمو 200 سى سى)ولمعرفه امكانيه الاعتماد الكلى فى توليد كهرباء لشقه
يعنى انا الطريقين بيؤدو الى نفس النتيجه

السلام عليكم جميعا و كل عام و انتم جميعا بخير
انشغلت عنكم لان عدد ساعات الصيام هنا طويلة جدا بالاضافة للشغل ..ان شاء الله يتقبل منا و منكم صالح الاعمال..
ما شاء الله تبارك الله عليكم ابتديتو فعلا تتعمقوا في الهيدروجين و والله مجهود مشكور للاخ rotanamasoud و الاخ مصطفي و الاخ zarif و الاخ احمد ..
وان شاءالله نتواصل من جديد و شكلي هتعلم منكم كتير ...لان المناقشات المكتوبة و الردود يولد افكار جديدة
وهنبدأ ان شاء الله في الرد علي تساؤلاتم و كمان الملاحظات اللي فهمتها منها الممتاز و منها محتاج تصحيح