ايه رأيك فى الطب النفسى والآطباء النفسانيين؟

**waled369** · 13-11-2008 11:46 PM

شكرا لك يا دكتور

أنا مقتنع جدا بكلامك . بس باسأل علشان شفت امس برنامج على ال بي سي كان بيتكلم عن الموضوع ده و رأي علماء الأزهر زي ما قلت انته كده .

**omar906** · 14-11-2008 12:10 AM

أشكرك على التقدير الغالى ده و نفسى الناس تبص لقدام و تشغل المنطق
لان فى الاسلام مناط التكليف هو العقل
يعنى لولا العقل مكناش هانبقى مكلفين أصلا يبقى ازاى نعطله و نبقى محاسبين و مش فاهمين
و علشان المأسى اللى شفتها لناس ضاعت حياتها ومستقبلها علشان المعتقدات الخاطئة دى و تحولوا لمرضى معوقين عبء على غيرهم لاخر العمر

**shankosi** · 14-11-2008 12:35 AM

شوف يا دكتور

الطب النفسي له أصول ودراسة متأنية وعلم معقد جداً ومحتاج لدكتور شاطر
في مصر الطب بصفة عامة بقى تجارة وليس علم

بلاحظ ان الدكتور لما الواحد يروحله الدتور ميدهوش اي معلومات مفيدة ويكتبله دوا في خمس دقائق ويخش على اللي بعده

وانا في اعتقادي ده راجع لعدة اسباب محتمله:
الدكاترة بشكل عام بقولك المريض جاهل ولو شرحتهله هضيع وقت عالفاضي لانه كده كده مش هيفهم وانا عندي وراه 20 حاله

اصبح عندنا عدم ثقة في الطب المصري بعد الحوادث الخطيرة اللي حصلت بسبب التخدير وعمليات التجميل الفاشلة وخلافه

أما بالنسبة للطب النفسي بشكل خاص فمعظم الناس عندهم اعتقاد انه بتاع المجانين وبس وان اي دكتور نفسي حتروحله سيجلسك على شزلونج ويقولك كلمني عن طفولتك المعذبة وفي الآخر يكتبلك أدوية مهدئة ومضادة للاكتئاب توؤدي بدورها الى الإدمان ومن ثمة الى الوفاة في مستشفى العباسية .

طبعا ببالغ حبتين بس الطب النفسي لسه مش مفهوم لدينا في مصر والمترددين على عيادات الطب النفسي مش كثره زي بقية التخصصات.

بس يمكن لو طبيب كون سمعة طيبة يكون له حظ اوفر ويقدر يقنع الناس بغير المفهوم الخاطئ عن الطب النفسي.

ربنا يوفقك الى ما فيه الخير...

**omar906** · 14-11-2008 12:48 AM

أنا معاك فى كتير من الكلام اللى بتقوله و لكن يا أخى ما لا يدرك كله لايترك كله
و اذا رفضنا القضية بالجملة و قلبنا الترابيزة ايه البدائل؟؟؟؟؟؟ما فيش مجموعة من البشر كلهم ملائكة بس البقعة السوداء بتبان أوى فى التوب الابيض و نقاشنا ده لو بيساهم بخطوة بسيطة ليه مانخطيهاش
كلنا عاوزين بلدنا أحسن بلد فى الدنيا و احنا جوانا خير كتير كشعب بس الاحساس الدائم بالعجز بيتولد من نفوسنا و يطلع يكتفنا

**shankosi** · 14-11-2008 12:57 AM

المشاركة الأصلية كتبت بواسطة omar906

أنا معاك فى كتير من الكلام اللى بتقوله و لكن يا أخى ما لا يدرك كله لايترك كله
و اذا رفضنا القضية بالجملة و قلبنا الترابيزة ايه البدائل؟؟؟؟؟؟ما فيش مجموعة من البشر كلهم ملائكة بس البقعة السوداء بتبان أوى فى التوب الابيض و نقاشنا ده لو بيساهم بخطوة بسيطة ليه مانخطيهاش
كلنا عاوزين بلدنا أحسن بلد فى الدنيا و احنا جوانا خير كتير كشعب بس الاحساس الدائم بالعجز بيتولد من نفوسنا و يطلع يكتفنا

لازم تغير ثقافة الناس وده مش حيحصل الا إذا الناس اتعلمت كويس من البداية وهم نشئ صغير ومع الأسف لسه في ناس تؤمن بالدجل والشعوذه وعندهم استعداد يصرفوا كل مدخراتهم على (العمل) و(الزار) و تحضير الجان وليس لديهم استعداد يحضروا جلسة علاج نفسي واحدة

أنا واحد من الناس بشوف أد ايه النفسانيين مهمين عند الغرب وأصبح شيء أساسي في حياتهم لنهم فاهمين كويس تبعات العلة النفسية من نقص انتاج وضعف موارد

احنا هنا (يا عم مشي حالك) (يا عم طريها ومتكلكعهاش) (يا عم كبر الجمجمة) هي الكلمات السحرية لحل أي مشكلة....

ربنا يصلح حالك يا مصر ... اللهم آمين...

**omar906** · 14-11-2008 01:07 AM

كلام حضرتك ده أكبر دليل على ان فيه خير كتير جوانا أو شعلة نور محتاجين ناخد منها حتة و نحطها قدامنا تتدينا تفاؤل و تنور لنا الطريق لان ما فيش بديل تانى قدامنا علشان نبقى أحسن من الدول دى كمان و لازم ده يكون طموحنا

**ahmed_badr** · 14-11-2008 01:11 AM

السلام عليكم انا احمد 19 سنة في جامعة المنصورة قسم علم النفس سنة تالته لازم نهتم بالموضوع دة و نتكلم فية بالصراحة بس ....وشكرا

**shankosi** · 14-11-2008 01:15 AM

أعتقد ان نقطة البداية الصح تكون أنكم تفهموا الناس يعني ايه طب نفسي بوضوح وببساطة من غير ماتخوفوهم وليه هم محتاجينه في حياتهم والنتائج اللي ممكن يوصلوا ليها...

يعني مش كله حياخد جلسات كهربا يا جماعة ههههه متخافوش

**omar906** · 14-11-2008 01:35 AM

المشاركة الأصلية كتبت بواسطة ahmed_badr

السلام عليكم انا احمد 19 سنة في جامعة المنصورة قسم علم النفس سنة تالته لازم نهتم بالموضوع دة و نتكلم فية بالصراحة بس ....وشكرا

تمام يا عم أحمد الموضوع ده حيوى جدا مش ترفيهى ولا ثقافى نظرى مالوش علاقة بالواقع

**omar906** · 14-11-2008 01:46 AM

المشاركة الأصلية كتبت بواسطة shankosi

أعتقد ان نقطة البداية الصح تكون أنكم تفهموا الناس يعني ايه طب نفسي بوضوح وببساطة من غير ماتخوفوهم وليه هم محتاجينه في حياتهم والنتائج اللي ممكن يوصلوا ليها...

يعني مش كله حياخد جلسات كهربا يا جماعة ههههه

متخافوش

اذا جاز لى ان أعرف الطب النفسى فهو فرع الطب المختص بتشخيص الاضطرابات النفسية و العقلية و السلوكية التى تطرأ على الانسان و علاجها
و على فكرة فيه مذاهب كتير فى العلاج و كلها صح و علشان أطمنك أكتر الطفرات اللى حصلت فى العلاج الدوائى فى السنين الاخيرة مذهلة و زى السحر فى مفعولها ولسة موجود بردة معانا جلسات ضبط ايقاع الدماغ الكهربية اللى تعتبر أفضل علاج نفسى على الاطلاق بل من أنجح العلاجات فى تاريخ الطب كله و لا يشعر معها بأى احساس بالآلم على الاطلاق