ايه رأيك فى الطب النفسى والآطباء النفسانيين؟

**omar906** · 13-11-2008 11:17 AM

أنا طبيب نفسى ومتخصص فى علاج الآدمان فى السعودية دلوقت وراجع مصر انشاءالله بعد شهر
عاوز أشوف أراء الشباب اللى فى المنتدى فى الطب النفسى و الاطباء النفسانيين و ايه الاسئلة اللى بتخطر على بالكو لما بتسمعوا مصطلح الطب النفسى
منتظر اراؤكم وتساؤلاتكم:wacko::k20:

**omar906** · 13-11-2008 08:27 PM

ايه يا شباب 60 واحد و محدش عاوز يقول حتى السلام عليكم؟؟؟؟؟؟؟

**حاتم سليم** · 13-11-2008 08:42 PM

عزيزى د. عمر

احنا كشعب عندنا بعض التحفظ من مناقشة هذا الموضوع على الملأ

بمعنى انى لو حروح لدكتور نفسانى

لازم اكون ملفوف بملايه عشان محدش يشوفنى !!

**waled369** · 13-11-2008 08:49 PM

المشاركة الأصلية كتبت بواسطة omar906

ايه يا شباب 60 واحد و محدش عاوز يقول حتى السلام عليكم؟؟؟؟؟؟؟

يا دكتور السؤال محرج جدا .

للأسف الناس بتبص على الدكتور النفساني كما تصوره السينما . و دايما بيطلع هوه اللي عايز حد يعالجه .

فاكر الدكتور خشبه في فيلم مطار الحب بتاع فؤاد المهندس آهي الناس فكرتها كده .

**waled369** · 13-11-2008 08:49 PM

المشاركة الأصلية كتبت بواسطة omar906

ايه يا شباب 60 واحد و محدش عاوز يقول حتى السلام عليكم؟؟؟؟؟؟؟

يا دكتور السؤال محرج جدا .

للأسف الناس بتبص على الدكتور النفساني كما تصوره السينما . و دايما بيطلع هوه اللي عايز حد يعالجه .

فاكر الدكتور خشبه في فيلم مطار الحب بتاع فؤاد المهندس آهي الناس فكرتها كده .

**omar906** · 13-11-2008 08:55 PM

ايه يا جماعة كم الاحراج ده دى مناقشة حرة بدون الدخول فى تفاصيل شخصية و على فكرة كأطباء نفسانيين ملاحظين ان الحرج زال الى حد كبير فى السنوات الاخيرة و الدليل عدد المترددين على أى عيادة أو مستشفى نفسى

واللى عاوز يستفسر عن شىء يتفضل

**حاتم سليم** · 13-11-2008 09:07 PM

المشاركة الأصلية كتبت بواسطة omar906

ايه يا جماعة كم الاحراج ده دى مناقشة حرة بدون الدخول فى تفاصيل شخصية و على فكرة كأطباء نفسانيين ملاحظين ان الحرج زال الى حد كبير فى السنوات الاخيرة و الدليل عدد المترددين على أى عيادة أو مستشفى نفسى

أعتقد ان الزيادة فى عدد المترددين على العيادات النفسية :biggrinjester:

سببه زيادة الضغط على المواطن المصرى

و ليس بالضرورة زيادة الوعى ...

**omar906** · 13-11-2008 09:15 PM

ده اذا كنا بنتكلم عن الامراض النفسية بس فيه كمان الامراض العقلية و الادمان الموضوع فيه عوامل كتير و متداخلة

**waled369** · 13-11-2008 09:42 PM

بالنسبة يا دكتور للحاجات اللي بنسمع عنها زي المس الشيطاني فيه علماء بتنكره و بيقولوا دي هلاوس سمعية و بصرية و محتاجة طبيب نفسي و في علماء بيقروها و بيقولوا ان دا محتاج علاج ديني و لا دخل للطب فيه . ممكن توضح لنا هل فعلا الكلام ده لا يعدو كونه هلاوس و ازاي تتعالج ؟.

**omar906** · 13-11-2008 11:42 PM

شوف يا سيدى
احنا هانحسبها بالمنطق اللى مايختلفش عليه حد
نفترض مجازا ان الرأيين صح يبقى نسأل الاسئلة دى و نحاول نجاوبها مع بعض
س1 الوقت المطلوب لبدء العلاج مين محتاجه اكتر؟

ج1 الطبيب النفسى طبعا لآن الحالة لو اتأخرت فى بدء العلاج بتتحول لحالة مزمنة يعنى علاج يستمر مدى الحياة بدل ما كانت هاتكون حالة حادة لها كورس علاج و ينتهى بعد فترة محددة بالشفا انشاءالله
انما عمرنا ما سمعنا ان شيخ قال القران ما بقاش ينفع فى العلاج لان الحالة اتأخرت

س2 هانخسر ايه لما نبدأ بالطب بدل ما نعكس الآية؟

ج2 مش هانخسر حاجة بالعكس العلاج هايبدأ فى الوقت المناسب بس نروح لمتخصص مش أى تخصص ونتلكك ان العلاج ما نفعش

س3 لو المعالج الشعبى عك أى عكة واللا خالف الاداب العامة هاتقدر تعمله ايه؟

والا حاجة انما الطبيب مجاز من مكان معروف و هو الجامعة ومعاه ترخيص مزاولة مهنة وممكن تسأل عنه فى المستشفى الرسمى اللى بيشتغل فيه أوتتأكد من نقابة الاطباء لو شاكك فيه و لو ارتكب أى مخالفة تقدر تشتكيه و تاخد حقك انما التانى هاتجيبه منين

س4 ليه الازهر أعرق جامعة أسلامية فى العالم لا يدرس العلاج بالقران أو الرقية الشرعية ممكن تكون الحكاية دى اتنست على مدار عمر الازهر اكتر من ألف سنة؟

لان الكلام ده ليس عليه سند شرعى و بالعكس الطب النفسى يدرس فى كليات الطب التابعة لجامعة الازهر

س5 فيه دليل من كلام أحد العلماء على عدم شرعية العلاج من المس و السحر؟

ج5 طبعا الشيخ محمد الغزالى رحمة الله عليه فى اخر ندوة عقدها فى مجلة الشباب قبل وفاته قال ان القران يروى على لسان ابليس لأتباعه (و ما كان لى عليكم من سلطان الا ان دعوتكم فاستجبتم لى فلا تلومونى ولوموا أنفسكم)
و هذا ينفى أقل قدر من السلطان على الانسان
و يقول تعالى (وننزل من القرأن ما هو شفاء و رحمة) و الشفاء يختلف عن العلاج و الشفاء هنا يعنى السكينة و الطمأنينة و الكلام للشيخ الغزالى أيضا

و شكرا