الموضوع: ايه رأيك فى الطب النفسى والآطباء النفسانيين؟

أنا محتاااااااج أروح لدكتور نفسى ... مشاكل كتير جوايا بتركها من غير حل .. و خايف تتراكم و تعملى عقدة بعيد عنكم

مش بهزر أنا مؤمن إن زيارة طبيب نفسى مرة كل 6 شهور أو عند وجود مشاكل مهم جداً ... لكن للأسف حتى الآن لم أتابع مع أى دكتور ... لكن قريب إن شاء الله هلاقى حد و أواظب معاه.

يا جماعة متستهونوش بالموضوع ....
أولاً لازم تعرفوا إن أكتر مرض منتشر فى مصر هو إرتفاع ضغط الدم .. أكتر من أى مرض تانى ... و مشاكله خطيرة و أى دكتور عارفها لأنه بيأثر على كل أعضاء الجسم دون إستثناء ...و بيقتل الإنسان ببطء على مدار السنين .. كأنه بيخلص عليه بدم بارد.

فتخيلوا كمية التوتر العصبى و الشد اللى عايشين فيه .... تفتكروا مش محتاجين حد يساعدنا نتأقلم على كده؟ ... خاصة الناس العصبيين.

فكروا تانى فى موضوع الأطباء النفسيين ده ... لأن المرض موجود عند معظمنا بس خفيف و مش ظاهر لكن خلوا بالكم إنه مزمن و خطير.

المشاركة الأصلية كتبت بواسطة MoToRiZeR

انا زيك يا ميزا و الله .. بفكر أروح العيادة لدكتورة بتدرسلي سيكولوجي في الجامعة بعد ما التيرم يخلص لا تفتكرني برشيها .. هي شخصية ظريفة .

same here my friend

عندى دكتور كان بيدينى سيكولوجى السنة اللى قبل اللى فاتت ... الكارت بتاعة لسه فى المحفظة مكانه من ساعتها ... و إتبهدل خالص ... بس العنوان و التليفون لسه باينيين ... ;)

المشاركة الأصلية كتبت بواسطة waled369

بالنسبة يا دكتور للحاجات اللي بنسمع عنها زي المس الشيطاني فيه علماء بتنكره و بيقولوا دي هلاوس سمعية و بصرية و محتاجة طبيب نفسي و في علماء بيقروها و بيقولوا ان دا محتاج علاج ديني و لا دخل للطب فيه . ممكن توضح لنا هل فعلا الكلام ده لا يعدو كونه هلاوس و ازاي تتعالج ؟.

شفت الحلقة دى ..... و فكرتنى على طول برد للأستاذ فادى كان كتبه هنا فى موضوع مسبق.
تقريباً كلامه ينطبق تماماً على موضوع الحلقة.

الرد كان بيقول إن أيام الحملة الفرنسية كان المصريين بيفسروا القنابل اللى بتترمى عليهم إنها من الجن .... و ده كان أسهل تفسير جاهز قدامهم.

كذلك الحالات النفسية دى ... ما إدناش فرصة لنفسنا نستعمل العلم عشان نفك لغز الحاجات دى و لصقناها على طول فى الجن و المس الشيطانى و معرفش إيه ... مش نفكر فيها الأول و نستخدم عقلنا و بعد كده نبقى ننسبها للعفاريت !؟

أدى الرد بتاع الأستاذ فادى ...... لا زلت أتذكره حتى اللحظة و عاجبنى جداً .....

زمان عندما جاء الفرنسيس الى مصر, استخدموا البارود و قذائف اللهب لدك المدن المصرية, فكان المصريون يعتقدون أن الفرنسيون قد سخروا الجن لخدمتهم, و لم يكن الفرنسيس يعرفون الجن, بل كان الجن وقتها يعشش فى عقول المصريون,
لقد كان المدفع الذى يطلق منه الفرنسيون قذائف اللهب غريبا على المصريين, و لم يتعب المصريون أنفسهم للعثور على سر هذا المدفع, مادام التفسير سهلا و جاهزا أمامهم, انها الجن بلا شك!!
الأن يعرف معظم المصريون أن هناك شيئا اسمه البارود له طاقة تفجيرية عالية, لكن بعضهم مازال يردد انها الجن, و للأسف هؤلاء لا يعيشون فى الريف أو المناطق العشوائية, بل فى أرقى أحياء المحروسة, و يالسخرية القدر, بعضهم يقوم بتأليف الكتب أيضا!!

تحياتى أستاذ فادى ,,,

طييب يا دكتور عمر ما تنتهز الفرصة وتعرفنا إيه الفرق بين المرض النفسى و المرض العقلى ، لأن الفرق مش واضح بالنسبة لى على الأقل ، عشان إحنا ثقافتنا محدودة فى المجال ده ، ولو ماعندكش مانع ممكن تبقا تفتح موضوع جديد فى الإجتماعى تخصصه لمناقشة الإدمان من وجهة نظر الطب النفسى ، وهلى الإرتباط بيه نفسى ولا عضوى ، أو بمعنى تانى هل هو عادة ولا فعلاً الجسم بيحتاج المخدر ، ونفس الشئ بالنسبة للتدخين لأنه منتشر أكتر ، فنستفيد كلنا من الفرصة الطيبة دى وهى وجود حضرتك معانا ، وتستفيد حضرتك ثواب عند ربنا لو كلامك ساعد حد يبطل تدخين مثلاً

أولا أنا فى غاية السعادة بأن الموضوع بدأ يشارك فيه ناس كتير
ثانيا مبسوط اكتر لان الناس عاوزه تعرف

احب أوضح الفرق بين الطب النفسى و علم النفس
ببساطة الطبيب النفسى خريج كلية طب و ممكن يستخدم وسائل كتير فى العلاج من أول جلسات العلاج النفسى الفردى و الجماعى وحتى العلاجات الدوائية و جلسات ضبط ايقاع الدماغ الكهربائية

أما الاخصائى النفسى فهو خريج كلية أداب قسم علم نفس و ده ممكن يستخدم الجلسات النفسية فقط أو يقوم بعمل اختبارات الذكاء أو اختبارات السمات الشخصية و ذلك لمعاونة الطبيب النفسى فى التشخيص باعتباره عضو فى الفريق العلاجى

أما عن الفرق بين الامراض النفسية و العقلية

فالامراض النفسية مثل القلق المخاوف المرضية (الفوبيا) و اضطراب الشخصية يعنى الامراض اللى يكون فيها المريض مسئول عن افعاله بس عنده معاناة نفسية

الامراض العقلية زى الفصام مثلا و دى بيكون المريض فيها غير مسئول عن افعاله نظرا لانه تحت تأثير الشكوك والضلالات المرضية و الهلاوس السمعية و البصرية و ده علاجه الاساسى دوائى

ملحوظة المعلومات دى مبسطة جدا علشان التبسيط للناس

المشاركة الأصلية كتبت بواسطة omar906

فالامراض النفسية مثل القلق المخاوف المرضية (الفوبيا) و اضطراب الشخصية يعنى الامراض اللى يكون فيها المريض مسئول عن افعاله بس عنده معاناة نفسية
الامراض العقلية زى الفصام مثلا و دى بيكون المريض فيها غير مسئول عن افعاله نظرا لانه تحت تأثير الشكوك والضلالات المرضية و الهلاوس السمعية و البصرية و ده علاجه الاساسى دوائى

إسمحلى يعنى إيه تحت تأثير الشكوك والهلاوس ، مش دى حاجة نابعة منه ، يعنى كدة مسئول عن تصرفاته ويبقا نفسى مش عقلى ؟

أنا توقعت أمراض عضوية زى الصرع مثلاً