الموضوع: حكايات البشر

المشاركة الأصلية كتبت بواسطة asaadte

]
على فكرة يا دكتورة الطبع ده فى ناس كتير من مصر
انا ساعات ببيقى قاعد مع ناس زمايل فى الشغل واصحاب
يقوم واحد فيهم تلاقى الكلام دار عليه ، مش على مواقفه مع حد فيهم لكن كمان حياته الشخصية
مرة لقيت سواق بيتكلم على المدير المالى وبيقول انه مش عارف حاجة واللى قبليه كان احسن .الخ والكلام كان مع المحاسبين مروؤسى الرجل ....قلت فى بالى هوة ايه السواق اللى بيكلم على شغل حسابات ، هوة ماله ، لكن اتاكدت ان فى ناس كل غايتها النفاق او الغيبة

للأسف النفاق و الرياء و مـتعددى الأوجه مفيش أكتر منهم فى البلد ديه

و لكن الله فوق الجميع و الله ، فان نفذوا من عقاب الدنيا فهناك آخرة و هناك حساب و الله مُطلع على ما فى القلوب

جزاك الله خيراً على تواصلك و مرورك

المشاركة الأصلية كتبت بواسطة fadymelad

بجد موضوع اكثر من رائع

وبدليل نسبة المشاهدة

ربنا يباركك ويقويكى على عمل الخير دايما

و ربنا يباركلك و يقويك على كل ما فيه الخير

و جزاك الله خيرا

المشاركة الأصلية كتبت بواسطة muslimah_dentist

طيب ماشى هنمشيها أخى أحمد من هنا و رايح

أصل انت اديتنى نصيحة الصراحة ماينفعش فيها غير"أستاذ و رئيس قسم كمان"

موافق يا دكتوره

و بالنسبه للنصيحه اى خدمه انتى تؤمرى :k10:

يعجز بيانى عن وصف هذا الموضوع

الحكاية التاسعة عشر

النهاردة أكملكم كلام عن الأسر اللى انا متكفلاها فى الجمعية

النهاردة هأكلمكم عن "بدر" ، "بدر" ديه ست مصرية غلبانة فقيرة أما روحنلها من 5 سنين كان زوجها كهربائى بس كان بيعانى من أمراض كتير فأقعدته عن العمل (زوجها مات دلوقتى بعد صراع مرير مع المرض و الدوخة على الدكاترة)، كان عندها بنت و ولدين شاب كان فى دبلوم و ولد صغير ، المهم أما روحنا زرناها مش عايزة أقولكم انها قعدة فى مكان أقل ما يُقال عنه أنه بيئة غير صحية بالمرة لدرجة اننا ماكناش بنقدر نقف كتير معاها من الريحة الفظيعة اللى فى المكان.

"بدر" ابنها فى دبلوم و بما اننا مؤمنين ان احنا نساعد الفقير على العمل أفضل بكتير من احنا نديله فلوس و يتكاسل و يتواكل كنا بنحرص أننا نعرف ابنها بيشتغل و لا لأ و كانت بتقولنا : أيوة بيشتغل ، بيطلع يشتغل مع نقاش باليومية و ابنها اللى فى الدبلوم أصبح العائل الوحيد لهذه الأسرة ، بس للأسف ابنها ده ولد عاق دايماً بيتخانق معاها و بيعلى صوته عليها و موريها الغُلب.

أنا بأحكيلكم كل المُقدمة ديه عن بدر عشان أحكيلكم الموقف ده ، أما بدأنا نروح لبدر و لظروف مرض زوجها(قبل ما يموت) و ظروف العيشة و خلافه قررنا ان احنا نتكفلها مع التموين الشهرى ان احنا نتكفلها مادياً و قلنا هنديها مبلغ بسيط و هو فعلاً مبلغ بسيط جداً و هو كان بالظبط 50 جنيه بس كان ورقة بخمسين أنا مش عايزة أقولكم أما اديت "بدر" الورقة ديه يايديه قعدت تقلبها فوق و تحت و يمين و شمال زى ما تكون شافت كائن من عالم آخر ، أول مرة فى حياتها تمسك ورقة بخمسين ، و قعدت تحضن و تبوس فيا زى ما أكون اديتها مليون جنيه.

ساعتها بصيت لنفسى و قلت أد ايه الواحد حقير " الست مش مصدقة نفسها عشان مسكت ورقة بخمسين أُمال احنا اللى بنمسك الميات و الألوفات نعمل ايه"

نعم ربنا علينا لا تُعد و لاتُحصى بس احنا عيبنا ان احنا دايماً بننسى نقول " الحمد لله"

و صدق ربى عندما قال فى كتابه
و قليل من عبادى الشكور

اللهم اجعلنا من هذا القليل الذى يحمدك على جميع نعمائك عليه فان انت أحق أن تُحمد و انك أنت أحق أن تُجل.آمين

المشاركة الأصلية كتبت بواسطة ams

يعجز بيانى عن وصف هذا الموضوع

جزاك الله خيراً أخى الكريم على مرورك و تواصلك

بالنسبه للحكايه التاسعه عشر احب اقول حاجه

ان الواحد مش بيحس بقيمه النعمه اللى ربنا مديهالوا غير لما تزول

بالتالى الواحد علشان يحس بالنعمه دى ينظر للاخرين و سيجد انه فى نعمه لا تحصى