الموضوع: بتسقط نقلة وآلا بتدوس فرامل ؟؟

يا جماعة موضوع التسقيط ده مهم علشان المحافظة على الفرامل و كمان عشان تساعد الفرامل على الوقوف و لزيادة التحكم في العربية ....
بس الموضوع مش بسيط انك تجيب نقلة أقل و تسيب دبرياج و السلام ..
و خطورة الموضوع ده هيظهر في انك لو ماشي على 70 مثلا و قمت مسقط تاني و سيبت الدبرياج كده فجأة اتفرج على القفشة اللى هتحصل و هتلاقي العربية لمت جامد جدا .... كتيير هيقولوا ما هوا ده المطلوب
لكن معلش ده أكبر غلط و ليه تأثير كبير على الاسطوانة و الديسك لانوا بيسبب نقل حركة العجل فجأة للموتور و ده ((عشان كده صوت الموتور بيعلى فجأة و تلاقي العربية قفشت فجأة و بعدين تهدي عادي )) و التأثير ده مماثل لتأثير الأمركه أو الفرك (( يعني كمان تأثير على مجموعة نقل الحركة من جيربوكس و كبالن أو كرونه و كمان مجموعة الدبرياج ))
و المصيبة الأشد لو الحركة ديه اتعملت على طريق مبلل و ياسلام لو العربية دفع خلفي زي اللادا و الشاهين اتفرج بقي على العوم و الزحلقة اللى هتحصل عشان احتمال كبير ان العجلة تقفش و تقف و ده بيكون تأثيره زي شد فرامل الهاند بريك ....
معلش أنا طولت عليكم بس أنا على طول بهدي بتسقيط النقلة و لكن بالطريقة الصح بس المشكلة انها طريقة صعبة شوييتين و عيزة تدريب كتيييير عشان تتقنها و الطريقة ديه اسمها (( Hell & Toe )) ..
و الطريقة ديه ببساطة انك لما تكون ماشي مثلا على 70 و عايز تفرمل بالموتور :
1- تدوس دبرياج و تسقط تاني أو تالت مثلا حسب القوة اللى انتا عايز العربية تقف بيها و التاني أشد من التالت
2- و بعدين تدوس فرامل و لكن من اسم الطريقة (( hell & toe يعني الفرملة بالكعب و الصباع )) انك تدوس على الفرامل بصوابعك و في نفس الوقت تضغط على دواسة البنزين ضغطة حسب النقلة اللى هتسقط عليها
بمعنى لو انتا هتسقط تاني تضغط جامد لحد الموتور ما يجيب 5000 RPM مثلا بس بسرعة و ضغطة واحدة و تسيب تجيب بيها السرعة ديه
3- تشيل رجلك من على الدبرياج على طول بعد ما تكون جبت سرعة الموتور المطلوبة و و تكمل دوس على الفرامل عادي هتلاقي العربية لمت جامد بس بطريقة ناعمة و هادية تماما و جميلة
و كل ده في حوالى ثانية بالكتير ............. انا عارف ان فيع كتير هيقولو ايه الكلام ده و ازاي باسرعة ديه و غيرواا.... بس أنا قولت انها صعبة و محتاجة تمرين كتير و حد يعملها عملي قدامك عشان تفهمها ...
أنا عن نفسي من كتر ما عملتها بقيت بعملها من غير تفكير و بقت زي ما بوزن عشان أطلع بالأول ....
على العموم أنا جاهز لأي استفسار بخصوص الموضوع ده و كمان إن شاء الله هاحط موقع فيه شرح للطريقة ديه
و شكرا و معلش على التطويل بس حبيت أفيد رواد المنتدي مش أكتر و السلام عليكم