الموضوع: الصعايدة وصلوا !!!

المشاركة الأصلية كتبت بواسطة نور القمر

[align=center]ايه رأيكم نكمل حكايات
الجنينه بتاعتنا فيها شجر زيتون
كنت وانا صغيرة عاملة فيها مرجيحة بحبل
تيته الله يرحمها كل شوية تقطع لي الحبل وانا ارجع اعمله تاني من وراها
كان ليها حق والله هههههههههههههههه لسببين

اول سبب اني بالمرجحة كنت بوقع الزيتون او زهره
تاني سبب اني كنت لازم اخد مخدة اقعد عليها وهي الله يرحمها مش بتحب فرش البيت يتبهدل


كانت ست عمري ما شوفت ولا هشوف زيها
كانت بنت باشا اقطاعي من بتوع زمان
متعلمة ومثقفه وبتكتب شعر
كانت بتقرأ كتير لحد قبل وفاتها بحاجة بسيطة وهي حريصة على القراءة
لحد قبل المرض ما يشتد عليها في السنه الاخيرة قبل وفاتها وهي نفسها في حاجتين
تتعلم انجليزي وتتعلم نت
وكنت فعلا بدخلها معايا النت وادخلها مواقع مختلفة تقرأ منها
ومرة دخلتها شات هههههههههههههههه كنت هافسد اخلاقها على اخر العمر .. ربنا ستر
هي توفت في فبراير اللي فات الله يرحمها
كانت حالة شاذة في الصعيد
كنت صديقة للكل كبير وصغير وبتعامل كل شخص على حسب عقله
الله يرحمك يا تيته ... كنتي صحبتي الوحيدة في سن المراهقه وكنتي الوحيدة اللي بقولها اسراري
لو شوفتم صورها في شبابها عاملة زي بطلات افلام زمان الابيض والاسود
كانت تقعد مع اي حد من احفادها تحسسه انه هو ياما هنا ياماهناك
زرعت فينا الكبرياء بدون تكبر وزرعت فينا الثقه بالنفس
مع البنات ... تعامل كل واحده مننا على انها ملكة جمال الكون
وكانت بتكتب فينا شعر
ومع الولاد تزرع فيهم الشهامه والرجولة بطريقه غير مباشرة


كان عندنا في الجنينة اشجار مانجه كتير
كانت مسميه كل شجرة باسماء ولادها واحفادها
لغاية دلوقت انا معرفش الاسماء الحقيقية للمانجة
خلاص بالنسبة لي النوع ده اسمه مانجة فلانه والنوع ده اسمه مانجة علانه
كنا في موسم المانجة العيلة كلها بتتجمع في البلد لانها اجاز الصيف
كنا كلنا بلا استثناء نصحى من النوم جري على الجنينه علشان كل واحد يلحق يلم اكبر كمية ممكنه من المانجة اللي وقعت على الارض
وكنا بنعمل خطاطيف بنفسنا ننزل بيها المانجة
ونخبيها من بعض علشان محدش يستخدمها
اللي كن يدور وسط شجر الموز يلاقي وراه كذا خطاف
شجر الموز زرعناه وانا كبيرة شوية يمكن كنت اعدادي
مرة نازلة الجنينه لقيت حاجات سودة كتير واقعه على الارض
قربت منها بحذر
واذا هي بمفاجئة محصلتش
اول طرح لشجر الموز واحنا مش عارفين واستوى اوي على الشجر لحد وما اسود ووقع
ومن فرحتي لميتهم كلهم بسرعه وجريت على تيته
هي اتخضت اوي يا عيني كان شكله عامل زي ما يكون فيران هههههههههههههههه
بس كان ليه فرحة كبيرة اوي عندنا كلنا علشان اول مرة ناكل موز من شجرنا

كانت ايام جميلة كلها شقاوة ببراءة
تصدقوا كنت بطلع النخلة وانا عندي 6 سنين
بجد كان افترا مني ... بس ربنا بيستر .. الحمد لله[/align]

6 سنين حرام عليكى!!ربنا ستر بس بجد انت قلبك جامد!الواحد وصغير فعلا قلبه بيبقى جامد جدا جدا انا كمان عملت بلاوي وانا صغير بس ربنا بيستر يانور!!

ولما تيجى تفكرى تقدرى تعملى كدة دلوات
تلاقى قلبك مايطاوعكيش

المشاركة الأصلية كتبت بواسطة نور القمر

اه طبعا استحالة افكر اطلع شجرة ولا نخله
اساسا انا بقيت اخاف انزل الجنينه
متهيألي هايطلع لي تعبان من وسط الشجر

ما تقولنا بقه على البلاوي اللي عملتها دي

لا بلاش فضايح بقى

أحب ان اضيف للصعايدة المنتدى كمان واحد

اكتشفت الموضوع ده النهاردة بس (موضوع نور - مش انى صعيدى .!!! )

انا كمان اهلى من المنيا وكل اخوالى واعمامى عيشين فى مدينة المنيا

وفعلا المنيا من اجمل المحافظات اللى شوفتها مش تحيز بس هى دى الحقيقة

كورنيش من اروع مايكون - ملوكى (كان بانيه الملك فاروق علشان زوجته ناريمان )

محطة قطار كانت من اروع مايكون بس للاسف اصابها مااصب مصر كلها من قبح بدعوى التطوير والتجديد بس للاسف للاسواء

وكمان بتشتهر بالحنطور بس خلاص التاكسى الابيض زحف عليه ومتبقاش منه غير اعداد قليلة بس - بس ميزة التاكسى اى مشوار ب 2 جنيه وتاكسيات نظيفة موديل السنة .

بس الزحام بها بقى شديد عكس الاول ولان المحافظة طولية وعرضها قليل فالتوسع محدود والناس تكدست فى شريط ضيق .

ومع ذالك تظل جميلة :k8:

لما اتجوزت اخذت زوجتى ورحنا الى المنيا عدة مرات واعجبت بها جدا وتلح علي للذهاب هناك مرات اخرى لانها اعجبت بها وباهلها جدا .

شكرا يانور ...طلعنا بلديات يابوى

مواضيعك مميزة وبقت تثير مشاعر كانت قربت تتنسى :k10: