حد جرب انواع الزيت دى

النهاردة كنت بشترى زيت فرامل للعربية وعرفت ان الزيت البندكس واللوكهيد فيه مضروب منه كتير فى السوق فلقيت نوع كورى اسمه aisin العبوة نص كيلو ب 50 جنيه . المهم انى لقيت نوعين زيت اول مرة اسمع عنهم الاول اسمه aisin تخليقى لزوجة 5w50 سعر العبوة 4 لتر 320 جنيه وزيت acdelco تخليقى لزوجة 5w30 سعر العبوة 4 لتر 400 جنيه طبعا سعرهم ممتاز وخصوصا بعد الشيل الترا ما وصل ل 595 جنيه من يوم الجمعه اللى فاتت . يا ترى حد منكم جرب اى نوع منهم ورايكم ايه فى اداءهم ... انا بتكلم عن الزيت فى العموم بغض النظر عن مواصفات الكتالوج لكل سيارة لان فيه لزوجة مختلفة من نفس الزيوت تناسب كل العربيات
ودى صور للعبوات
https://nileup.com/up/uploads/nilemo...5031580311.jpg
https://nileup.com/up/uploads/nilemo...5031580312.jpg

أولا وقبل أي شيء... التغاضي عن الكتالوج أكبر غلطة ممكن تقع فيها... لإن هو اللي بيحدد أساسا تشتري الزيت بناء على إيه...

ليه؟؟؟

لإن كل شركة زيوت عندها أنواع زيوت كتير علشان تتناسب مع طلبات المواتير المختلفة وكمان ميزانيات الزباين.
فلما تروح تختار.. اختار اللي يناسبك من الماركة حسب الكتالوج وحسب ميزانيتك... مش العكس.


أما إذا كنت بتستفسر عن الماركة بشكل عام :

آيسن مش كوري... آيسن شركة يابانية تابعة لمجموعة تويوتا بتصنع أجزاء كتير في العربية منها أجزاء في الفرامل والدبرياج والموتور والبودي .. وهي أكبر وأهم و مُصَنّع في العالم للفتيس.. وأكثرهم جودة وأقلهم في الأعطال.

باختصار.. آيسن هي اللي ادت لتويوتا اعتماديتها المعروفة عنها.

ادخل هنا علشان تتعرف على قوة المجموعة أكتر...
Aisin

بالنسبة للزيوت....

آيسن زي أي شركة زيوت في العالم... بتعمل أنواع كتير من الزيوت بحيث تتناسب مع طلبات المواتير المختلفة وكمان مع الميزانيات المختلفة... وزيوت الأساس فيها متنوعة...

عندهم زيوت زيوت من المجموعة الرابعة والخامسة (PAO و إستر) ودي أعلى مستوى في دنيا زيوت المحركات حاليا..
وعندهم زيوت تخليقية من المجموعة الثالثة.. زي معظم الزيوت التخليقية اللي في السوق...
وعندهم كمان زيوت نصف تخليقية (تخليقية + معدنية)... بردو زي شركات تانية كتير..

عيبهم الوحيد من وجهة نظري إن معندهمش أي زيوت متوافقة مع المواصفات الأوروبية (ACEA)... وبالتالي أحسن عربيات تشتغل معاها هي الياباني والكوري والأمريكي.

بس من ناحية تانية... آيسن مش هتبص للعربيات الأوروبية زي ما الشركات في أوروبا مش بتبص للعربيات اليابانية... آيسن عندها عملاء يغنوها عن 100 شركة عربيات أوروبية.


انت بقى .. عربيتك إيه؟؟؟

...

مقصدش إنى حتغاضى عن كتالوج العربية فى اختيار لزوجة الزيت انا اقصد إسأل عن الزيت بشكل عام
اما عربيتى فهى كيا ريو 2003

ودى صورة من كتالوج العربية اتمنى حضرتك تشوفها وتقولى انسب لزوجة وانسب زيت ليها وربنا يزيدك من علمه ويجعله فى ميزان حسناتك . مع العلم ان حاطط دلوقتى شيل الترا 5w40 والحمد لله مش بينقص بس عايز اروح شوية للزيوت الاقتصادية فى سعرها ويكون الاداء متقارب

https://nileup.com/up/uploads/nilemo...5031635061.png

اقتباس:

---

المشاركة الأصلية كتبت بواسطة lidosasa

ودى صورة من كتالوج العربية اتمنى حضرتك تشوفها وتقولى انسب لزوجة وانسب زيت ليها وربنا يزيدك من علمه ويجعله فى ميزان حسناتك . مع العلم ان حاطط دلوقتى شيل الترا 5w40 والحمد لله مش بينقص بس عايز اروح شوية للزيوت الاقتصادية فى سعرها ويكون الاداء متقارب

https://nileup.com/up/uploads/nilemo...5031635061.png

---

حسب الكتالوج عندك... تقدر تحط أي زيت مستوى جودته api sg أو أعلى منه.. طبعا العربية تعتبر قديمة شوية والمواصفات بتاعت الزيوت الموجودة ساعتها كانت ضعيفة بالنسبة لدلوقتي...

ده غير إن العربية معمولة لمستوى اقتصادي معين.. مش المفروض يدفع كتير علشان العربية تمشي كويس.

باختصار.. تقدر تحط أي زيت مستوى جودته sg أو sh أو sj أو sl أو sm أو sn بالترتيب من الأسوأ إلى الأفضل..

بالنسبة للزوجة.. فأفضل شيء هو الالتزام بالكتالوج (ومؤكد تبعد عن الزيوت أحادية اللزوجة)..

اللزوجات المناسبة من الكتالوج كالتالي:

20w40 - 20w-50
10w-40 - 10w-50
5w-20 - 5w-30 (تستخدمهم في حالة إنهم زيوت تخليقية فقط.. وما تخافش.. كل اللي في مصر زيوت تخليقية)

لو هتستخدم زيت تخليقي يبقى خليك في لزوجة 5w-30..
لإن لزوجة 5w-20 دايما بيبقى عليها تعليقات في الكتالوجات إنها ما تنفعش في القيادة بسرعات ثابتة لمدد طويلة (في السفر يعني).. ده غير إنها نادرة جدا في مصر وتكاد تكون مش موجودة أصلا.

لزوجة 5w-40 مش مكتوبة في الكتالوج وبالتالي ما تستخدمهاش... ولو كانت مسموح بيها كنت هقوللك علطول روح على زيت التعاون التخليقي..

لو حابب توفر.. ممكن تروح على الزيوت نصف التخليقية.. ودي غالبا هتلاقي منها لزوجة 10w-40.. ومناسبة ليك بردو.. طبعا أنا بقول مناسبة على أساس مستوى الجودة... هو الأساس في الحكم.

أو ممكن بردو تروح للزيوت المعدنية لو عايز توفير أكتر.. خصوصا لو كنت من الناس اللي مشيها قليل.. والسوق مليان زيوت تناسبك.. بس غالبا هتحس إن العربية تقلت في المشي.

قولنا بردو أسلوب سواقتك واستخدامك للعربية علشان نعرف نساعدك أكتر... الحاجات دي هي اللي بتفرق.. مش الكيلومترات اللي ماشياها العربية خالص.

...

سواقتى داخل المدينة مشاوير قليلة مش بتزيد عن 200 كيلو فى الإسبوع كله وعايز زيت احطه فى العربية وانساه سنة فهل زيت aisin اللى لزوجته 5w50 مناسب لعربيتى ولسواقتى وخصوصاً ان سعره ممتاز 320 جنيه ولا اجيب acdelco لزوجة 5w30 ودا سعره 400 جنيه مع العلم ان الشيل وموبيل المعدنى لزوجة 20w50 سعرهم دلوقتى 295 جنيه وفى النهاية معدنى مش تخليقى زى الزيوت اللى ذكرتها

اقتباس:

---

المشاركة الأصلية كتبت بواسطة lidosasa

سواقتى داخل المدينة مشاوير قليلة مش بتزيد عن 200 كيلو فى الإسبوع كله وعايز زيت احطه فى العربية وانساه سنة فهل زيت aisin اللى لزوجته 5w50 مناسب لعربيتى ولسواقتى وخصوصاً ان سعره ممتاز 320 جنيه ولا اجيب acdelco لزوجة 5w30 ودا سعره 400 جنيه مع العلم ان الشيل وموبيل المعدنى لزوجة 20w50 سعرهم دلوقتى 295 جنيه وفى النهاية معدنى مش تخليقى زى الزيوت اللى ذكرتها

---

طيب...

أول حاجة لازم حضرتك تعرفها إن مفيش زيوت بتقعد سنة في الموتور ما عدا زيوت المجموعة الرابعة والخامسة... ودول سعر الجالون (4 لتر) منهم لا يقل عن 600 جنيه.. وأتوقع إنه وصل في حدود الـ700 دلوقتي.

أي زيت تاني بيقعد 6 شهور بس.. حتى الزيوت التخليقية العادية المتوفرة في السوق...

تاني حاجة... ما دام اللزوجة مش مكتوبة في الكتالوج يبقى مالوش لازمة نغير من نفسنا..

ثالث حاجة.. طريقة السواقة بتفرق فيها إزاي بتحمل على الموتور... يعني حضرتك غاوي قرص وشد ولا سواقتك هادية.. بتركب العربية لوحدك أغلب الوقت ولا دايما معاك ناس وحمولة...

خلي بالك كمان إن طبيعة المشاوير القصيرة بتخلي الزيت يبوظ بسرعة

ادخل هنا علشان تعرف السبب...
https://www.nilemotors.net/Nile/4900...post3876087103

بالنسبة لزيت AC Delco... فالماركة دي أساسا هي المورد الرئيسي لقطع الغيار في مجموعة جنرال موتوزر... يعني تعتبر زي آيسن ودنسو بالنسبة لتويوتا.

بشكل عام الزيت مناسب لعربيتك جدا... بس ما تخليهوش في الموتور أكتر من 10 آلاف كيلومتر أو 6 شهور... أيهما أقرب.

لو آيسن عندها نفس اللزوجة دي يبقى أحسن لإن غالبا هيكون أرخص... وبردو ما تخليهوش في الموتور أكتر من 10 آلاف أو 6 شهور.

...

لو سمحت عربيتي نيسان صني اتوماتيك 2002 ماشيه 318 الف كيلو والماكينه لا ينقص زيتها ابدا
فما أنسب نوع زيت مع العلم انا بمشي حوالي 1200 كيلو في الشهر أو أقل أحيانا أو أكثر قليلا

السلام عليكم
الاستاذ بوريو استشارى الزيوت يارب تكون بخير عندى سؤالين لحضرتك

1- انا عربيتى دايو لانوس 2008 عاملة 155 الف كيلو وحضرتك مشكورا كنت متجاوب معايا ونصحتنى انى استخدم لذوجة زيت 5w30 موبيل ون سؤالى فية ناس كتير بتشكر فى زيت امسويل ويعتبر ارخص من موبيل تقريبا اللتى ب 125 ج يعنى ال 4 لتر ب 500 دنيه اية راى حضرتك بيقولوا بيقعد 15 الف كيلو او سنة

2- السؤال الثانى فى كتالوج دايو لانوس اللى حضرتك مشكورا نزلتة توجد لذوجات متعدةة على سبيل المثال 5w30 - 10w40 وغيرها فيه ناس كتير فسرت الاختلاف دى بان حسب عدد الكيلوهات اللى العربية عملها مثلا
لو اقل من 100 الف كيلو نستخدم 5w30
لو اكبر من 100 الف كيلو واقل من 200 الف كيلو نستخدم 10w 40 ( حالة عربيتى اللى عاملة 155 الف كيلو وكنت بحط موبيل ون 5w30)

ايه راى حضرتك فى الكلام دة
وشكرا مقدما على النصائح والاستفادة وربنا يكرمك

اقتباس:

---

المشاركة الأصلية كتبت بواسطة بكر خليفه الطه

لو سمحت عربيتي نيسان صني اتوماتيك 2002 ماشيه 318 الف كيلو والماكينه لا ينقص زيتها ابدا
فما أنسب نوع زيت مع العلم انا بمشي حوالي 1200 كيلو في الشهر أو أقل أحيانا أو أكثر قليلا

---

دايما استخدم الزيوت حسب توصيات كتالوج عربيتك فقط.. أو أفضل منها.

كتالوج الصني N16 تقدر حضرتك تنزله من هنا:
https://drive.google.com/file/d/0B5R...ew?usp=sharing
ده كتالوج النسخة الأمريكية من صني (اسمها هناك سنترا)... تقدر تعتمد عليه في كل شيء ما عدا الزيوت لإن أمريكا ليها قوانين بتجبر المصنعين إنهم يستخدموا زيوت خفيفة علشان التوفير في البنزين.

توصيات الصني للشرق الأوسط أوسع بكتير بحيث تقدر تقريبا تستخدم معظم أنواع الزيوت الموجودة في السوق..
بص على الصورتين دول:

http://nileup.com/up/uploads/nilemotors_14600224152.jpg
http://nileup.com/up/uploads/nilemotors_14600224151.jpg

حسب الصورتين دول.. توصيات الزيت المناسب كالتالي:

مستوى الأداء (جودة الزيت):
طبقا لـAPI بمستوى SE أو SF أو SG أو SH أو SJ أو SL أو SM أو SN بالترتيب من الأسوأ إلى الأحسن.
طبعا.. كل ما المستوى علي كل ما السعر زاد... بس المستوى الأعلى بيحافظ أكتر على الموتور.

ويفضل كمان يكون الزيت معتمد من ILSAC بمستويات GF-1 أو GF-2 أو GF-3 أو GF-4 أو GF-5


على فكرة...
مستوى الأداء اهم بكتير من اللزوجة... فخد بالك كويس.


بالنسبة للزوجة.. تقدر تحط أي زيت بواحد من اللزوجات دي:
20W-50 أو 20W-40
15W-50 أو 15W-40
10W-50 أو 10W-40أو 10W-30
5W-30 أو 5W-20 (اللزوجتين دول بالذات لازم يكونوا زيوت تخليقية فقط).


اختيار اللزوجة راجع لـ3 حاجات:
طريقة استخدامك للعربية (كل ما كان استخدامك فيه تحميل على الموتور كل ما احتجت لزيت أثقل)
حالة الموتور الميكانيكية (كل ما كان الموتور بياكل زيت كل ما احتجت لزيت أثقل)


يا ريت تقولنا إيه طريقة استخدامك للعربية وكمان الزيوت المتاحة قدامك.. وإن شاء الله نساعدك.

...

اقتباس:

---

المشاركة الأصلية كتبت بواسطة ahmed_wagih

السلام عليكم
الاستاذ بوريو استشارى الزيوت يارب تكون بخير عندى سؤالين لحضرتك

1- انا عربيتى دايو لانوس 2008 عاملة 155 الف كيلو وحضرتك مشكورا كنت متجاوب معايا ونصحتنى انى استخدم لذوجة زيت 5w30 موبيل ون سؤالى فية ناس كتير بتشكر فى زيت امسويل ويعتبر ارخص من موبيل تقريبا اللتى ب 125 ج يعنى ال 4 لتر ب 500 دنيه اية راى حضرتك بيقولوا بيقعد 15 الف كيلو او سنة

2- السؤال الثانى فى كتالوج دايو لانوس اللى حضرتك مشكورا نزلتة توجد لذوجات متعدةة على سبيل المثال 5w30 - 10w40 وغيرها فيه ناس كتير فسرت الاختلاف دى بان حسب عدد الكيلوهات اللى العربية عملها مثلا
لو اقل من 100 الف كيلو نستخدم 5w30
لو اكبر من 100 الف كيلو واقل من 200 الف كيلو نستخدم 10w 40 ( حالة عربيتى اللى عاملة 155 الف كيلو وكنت بحط موبيل ون 5w30)

ايه راى حضرتك فى الكلام دة
وشكرا مقدما على النصائح والاستفادة وربنا يكرمك

---

بالنسبة للسؤال الأول:

زيوت آمسويل فعلا من أفضل الزيوت الموجودة في السوق... ولكنها زي أي زيوت تانية .. فيها المناسب وفيها غير المناسب...

وكمان.. مش كل الزيوت بنفس مستوى الأداء...

مدة بقاء الزيت في الموتور (مدة الخدمة) ليها كذا عامل لازم ناخده في الاعتبار...

أولها توصيات الصانع... ودي ما ينفعش أبدا نتغاضى عنها.. إلا في حالة واحدة... إن كتالوج الزيت نفسه (مش العربية) يكون قايل وبكل وضوح إنه يقدر يخدم مسافة محددة أو مدة معينة.

مفيش في السوق زيوت بتقول الكلام ده بوضوح إلا آمسويل.. وده اللي مديها قوتها...

تاني حاجة... طريقة استخدام العربية...
فلو كنت بتستخدم عربيتك بطريقة شاقة على الزيت.. يبقى لازم تغير الزيت أسرع (في العادة بتبقى نص المدة الأصلية)


آمسويل عندها 3 أنواع من الزيوت (اللي نازلين مصر)... كل واحد فيهم له مدة خدمة تختلف عن التانية...

مجموعة زيوت آمسويل OE (OE اختصار لعبارة Original Equipment.. يعني زي الزيت الأصلي بتاع العربية).. مكتوب في البروشور بتاعها بكل وضوح إنها بتخدم في العربية بنفس المدة المكتوبة في كتالوج العربية.
https://www.amsoil.com/lit/databulletins/g3404.pdf

مجموعة زيوت آمسويل XL..(XL اختصار لعبارة Extended Life.. يعني زيت عمره طويل)... مكتوب في البروشور بتاعها بكل وضوح برده إنها بتخدم في حدود 10 آلاف ميل بحد أقصى (حوالي 16 ألف كيلومتر) أو ستة أشهر (أيهما أسبق).
https://www.amsoil.com/lit/databulletins/g1404.pdf

زيوت XL عموما أغلى من زيوت OE.


مجموعة زيوت آمسويل سجنتشر... ودي أعلى زيوت عند آمسويل... مكتوب في البروشور بتاعها بكل وضوح إنها تقدر تخدم لحد 25 ألف ميل (حوالي 40 ألف كيلومتر) أو 700 ساعة تشغيل أو سنة في الأحوال العادية (اللي مش بتحصل مع حد فينا).. وبتخدم لحد 15 ألف ميل (حوالي 25 ألف كيلومتر) أو 700 ساعة تشغيل أو سنة (أيها أسبق)...
البروشور كاتب شوية احتياطات لازم تتعمل علشان الزيت يخدم معاك كل المدة دي... من ضمنها إنك تشتري فلتر آمسويل الأصلي.. ولو انت بره أمريكا وكندا تمشي على توصيات كتالوج عربيتك.. ولو ما استخدمتش فلاتر آمسويل الأصلية يبقى مدة خدمة الزيت هي 12 ألف ميل فقط (حوالي 19 ألف كيلومتر).
https://www.amsoil.com/lit/databulletins/g2880.pdf

زيوت آمسويل سجنتشر هي الأغلى في مصر حاليا.. وأتوقع الـ4 كوارت يعدوا الـ700 جنيه مستريح (الكوارت وحدة قياس أمريكية = 0.945 لتر).

زيوت آمسويل الـOE والـXL تعتبر من زيوت المجموعة 3 حسب تصنيف API لزيوت الأساس..
زيوت آمسويل سجنتشر تعتبر من المجموعة 4..

لو عايز تعرف أكتر عن الفرق بين مجموعات الزيوت.. ادخل هنا:
https://www.nilemotors.net/Nile/453047-a.html

ولو عايز تعرف الأساس الصح لموعد تغيير الزيت.. ادخل هنا:
https://www.nilemotors.net/Nile/490076-a.html



بالنسبة للسؤال الثاني:

اختيار اللزوجة مالوش أدنى ارتباط بكيلومترات العربية... ده خطأ شائع للأسف وأسطورة ماشية بقالها حوالي 40 سنة مع بداية ظهور الزيوت التخليقية.

اختيار اللزوجة بيعتمد في الأساس على توصيات الكتالوج.. وبعد كده.. طريقة استخدامك للعربية..

وزي ما قلت في المشاركة اللي قبل دي مباشرة.. اختيار اللزوجة بيبقى كالتالي:
- طريقة استخدامك للعربية (كل ما كان استخدامك فيه تحميل على الموتور كل ما احتجت لزيت أثقل)
- حالة الموتور الميكانيكية (كل ما كان الموتور بياكل زيت كل ما احتجت لزيت أثقل)

أنصحك تدخل على الموضوعين دول:
https://www.nilemotors.net/Nile/481878-a.html
https://www.nilemotors.net/Nile/477071-100.html


...

ربنا يباركلك يا باشمهندس احمد على المجهودى الرائع

مجهود مشكور من حضرتك خلاصة قراتى لمواضيع حضرتك استخلصت الاتى
ان زيوت المجموعة الرابعة فى مصر pao امسويل سيجنتشر وموبيل ون
ولكن لاحظت حاجة حضرتك قلت ان امسويل ممكن يقعد سنة اما موبيل ون حضرتك مش قادر تاخذ قرار انه يقعد سنة او 6 شهور بناء على ان موبيل مش كاتبين فى الكتالوج بتاعهم ذلك

النصيحة اللى محتاجها من حضرتك دلوقتى موبيل ون اللى انا مجربة ب 600 جنية وانا استخدامى فى السنة مش بيكمل 10 الاف كيلو بس يهمنى انه يقعد سنة معايا وموبيل ون حضرتك مش متاكد
فيه حل تانى استخدم امسويل سيجنتشر هو ال 4 عبوات عاملين 680 جنيه بس انتاج 2016 يعنى فرق 180 جنية بس ايكمل السنة معايا او ال 10 الاف اللى انا مش بوصل لهم وخصوصا ان فلتر الزيت مش فلتر امسويل

معلش انا تعبك معايا بس بجد حضرتك الوحيد اللى بثق وبقتنع فى راية كل الناس مش فاهمة ان امسويل انواع وبيستغلوا دى انهم يسوقوا لل oe على انه سيجنتشر

على فكرة انا اتصلت ب توكيل امسويل وفضل يلف ويدور لحد ما زنقتة وقال نفس كلامك ان oe -xl 6 شهور وسيجنتشر سنة او 25 الف بس لازم اغير الفلتر على سنة او 12 الف

يعنى من الاخر ماشاء الله عليك ربنا يزيدك فاهم ومتواضع واهم حاجة انك مش بتزهقك مننا ولا من اسئلتنا

منتظر الرد علشان اغير الاسبوع دى بناء على قرارك ونصحيتك

اقتباس:

---

المشاركة الأصلية كتبت بواسطة ahmed_wagih

مجهود مشكور من حضرتك خلاصة قراتى لمواضيع حضرتك استخلصت الاتى
ان زيوت المجموعة الرابعة فى مصر pao امسويل سيجنتشر وموبيل ون
ولكن لاحظت حاجة حضرتك قلت ان امسويل ممكن يقعد سنة اما موبيل ون حضرتك مش قادر تاخذ قرار انه يقعد سنة او 6 شهور بناء على ان موبيل مش كاتبين فى الكتالوج بتاعهم ذلك

النصيحة اللى محتاجها من حضرتك دلوقتى موبيل ون اللى انا مجربة ب 600 جنية وانا استخدامى فى السنة مش بيكمل 10 الاف كيلو بس يهمنى انه يقعد سنة معايا وموبيل ون حضرتك مش متاكد
فيه حل تانى استخدم امسويل سيجنتشر هو ال 4 عبوات عاملين 680 جنيه بس انتاج 2016 يعنى فرق 180 جنية بس ايكمل السنة معايا او ال 10 الاف اللى انا مش بوصل لهم وخصوصا ان فلتر الزيت مش فلتر امسويل

معلش انا تعبك معايا بس بجد حضرتك الوحيد اللى بثق وبقتنع فى راية كل الناس مش فاهمة ان امسويل انواع وبيستغلوا دى انهم يسوقوا لل oe على انه سيجنتشر

على فكرة انا اتصلت ب توكيل امسويل وفضل يلف ويدور لحد ما زنقتة وقال نفس كلامك ان oe -xl 6 شهور وسيجنتشر سنة او 25 الف بس لازم اغير الفلتر على سنة او 12 الف

يعنى من الاخر ماشاء الله عليك ربنا يزيدك فاهم ومتواضع واهم حاجة انك مش بتزهقك مننا ولا من اسئلتنا

منتظر الرد علشان اغير الاسبوع دى بناء على قرارك ونصحيتك

---

مفيش تعب ولا حاجة إن شاء الله.. المهم المصلحة تقضي :shine[1]:.. وصدقني أنا ما بعملش حاجة غير إني بحاول أتأكد من المعلومة من مصادرها الموثوقة... فقط لا غير.

فعلا أنا قلت إن موبل 1 زيوتها من المجموعة 4 وأعتقد الكلام ده من سنتين أو أكتر تقريبا...

الحقيقة إن الواحد في المدة القصيرة دي ممكن تجيله معلومات زيادة توضح المعلومة أكتر.. واللي عرفته إن أغلب زيوت موبل 1 من المجموعة 3 (اللي منها أغلب الزيوت التخليقية حاليا)... إنما موبل 1 عندها فئة معينة من زيوتها (زي آمسويل) هي دي بس اللي معمولة من زيوت المجموعة الرابعة (أنا فاكر إني قلت الكلام ده في أحد ردودي قبل كده بس مش فاكر فين بصراحة)..

الفئة دي عند موبل اسمها Extended Performance... موجودة في أمريكا وكندا فقط... الزيوت دي بس هي اللي بتقعد مسافة 15 ألف ميل (25 ألف كيلومتر) أو سنة... أيهما أسبق..
https://mobiloil.com/en/motor-oils/m...ed-performance

وبردو الموضوع ده عليه ضمان من موبل (زي آمسويل بردو).. وبردو بيفضلوا فلاتر زيت محددة...
https://mobiloil.com/en/article/warr...p-oil-warranty

غير كده... زيوت موبل زيها زي أي زيوت تخليقية في السوق... غالبا مش هتقدر تخليها في الموتور أكتر من 10 آلاف ميل (16 ألف كيلومتر) أو 6 شهور... أيهما أسبق..


في رأيي.. لو حطيت زيت آمسويل سجنتشر لمدة سنة هيكون أوفر ... 700 جنيه تقريبا مقابل 600×2 لموبل (اتأكد من سعر آمسويل لإني مش متأكد .. وأنا مش موجود في مصر أصلا :N_no[1]:)...

بس اعمل حسابك على تغيير فلتر (الفلتر فقط) كل 6 شهور وعبوة زيت احتياطي (1 كوارت) علشان لو الزيت نقص.

...

تمام انا اتاكدت من السعر العبوة ب 170 جنية
وكمان انا عربيتى بتاخذ بالفلتر 3.75 يعنى احط ال 4 عبوات عادى لانها مش لتر كامل

بس لما اتصلت بيهم قالوا لى ان تاريخ الانتاج 2016 الموضوع دى يفرق

معلش لية اغير الفلتر كل 6 شهور

اقتباس:

---

المشاركة الأصلية كتبت بواسطة ahmed_wagih

تمام انا اتاكدت من السعر العبوة ب 170 جنية
وكمان انا عربيتى بتاخذ بالفلتر 3.75 يعنى احط ال 4 عبوات عادى لانها مش لتر كامل

بس لما اتصلت بيهم قالوا لى ان تاريخ الانتاج 2016 الموضوع دى يفرق

معلش لية اغير الفلتر كل 6 شهور

---

تاريخ الإنتاج ما يفرقش معاك.. لإن مدة حفظ الزيت (قبل الفتح) حوالي 5 سنوات...

وبالنسبة للفلتر.. ده إجراء احتياطي علشان تضمن إنه شغال وما اتسدش من الترسبات والشوائب اللي ممكن تكون موجودة في الموتور.. وكمان علشان ينظف الموتور أول بأول.. لإن استمرار وجود الشوائب بيعمل تأثير عكسي من ناحية التآكل...

وده سبب إن آمسويل بيأكدوا على وجود الفلتر بتاعهم... وعموما.. اتأكد بردو من وكيل آمسويل.

...

شكرا جزيلا

يعنى حضرتك انهو زيت افضل توتال٥/٣٠ ولا زيت ايسين٥/٣٠ لعربية بيجو301 مو2015 عاملة 45000كم

اقتباس:

---

المشاركة الأصلية كتبت بواسطة anawe

يعنى حضرتك انهو زيت افضل توتال٥/٣٠ ولا زيت ايسين٥/٣٠ لعربية بيجو301 مو2015 عاملة 45000كم

---

اختيار الزيت المناسب بيبقى على حسب طلبات كتالوج عربيتك... هو الأساس والمرجع الوحيد.. وما تسمعش كلام أي حد تاني...

عموما.. زيوت آيسن مناسبة للعربيات اليابانية والكورية والأمريكية لإنها مصممة علشان تطابق مواصفات محددة غير اللي بتطلبها السيارات الأوروبية بشكل عام..

أما زيوت توتال.. فغالبا هتكون مناسبة.. بس أحيانا ممكن يكون فيه طلبات خاصة في الكتالوج ما تكونش موجودة في الزيت.

فياريت تصور لنا صفحة مواصفات الزيت من كتيب الصيانة اللي جاي مع العربية.. وإن شاء الله نساعدك.

وأنصحك تدخل على الموضوع ده علشان تعرف قصدي..
https://www.nilemotors.net/Nile/341680-a.html

...

اقتباس:

---

المشاركة الأصلية كتبت بواسطة borio1704

اختيار الزيت المناسب بيبقى على حسب طلبات كتالوج عربيتك... هو الأساس والمرجع الوحيد.. وما تسمعش كلام أي حد تاني...

عموما.. زيوت آيسن مناسبة للعربيات اليابانية والكورية والأمريكية لإنها مصممة علشان تطابق مواصفات محددة غير اللي بتطلبها السيارات الأوروبية بشكل عام..

أما زيوت توتال.. فغالبا هتكون مناسبة.. بس أحيانا ممكن يكون فيه طلبات خاصة في الكتالوج ما تكونش موجودة في الزيت.

فياريت تصور لنا صفحة مواصفات الزيت من كتيب الصيانة اللي جاي مع العربية.. وإن شاء الله نساعدك.

وأنصحك تدخل على الموضوع ده علشان تعرف قصدي..
https://www.nilemotors.net/Nile/341680-a.html

...

---

انت ممتاز

سيدي الفاضل
سلام الله عليكم ورحمته وبركاته
في البداية احب اشكر حضرتك على المجهود الكبير المبذول منك وجزاك الله خيرا
انا عندي سيارة تويوتا ستارليت موديل 92 ومسقط لها موتور تويوتا 4e انجكشن 1400 cc وانا عامل طقم شنبر من كام شهر وكنت بستخدم ريت التعاون الازرق 20 .... 50
والان بستخدم زيت شل الاحمر 20 ..... 50 ولكن وهو بينقص حوالي ربع المقاس عند التغيير على 2500 ك
انا بسوق بعصبية شوية وبقرص على العربية نوعا ما ومشويري كلها تقريبا داخلية
انا مش مستريح لزيت شل
اجرب زيت ايسن ولا تنصحني بايه
وشكرا

سيدي الفاضل
سلام الله عليكم ورحمته وبركاته
في البداية احب اشكر حضرتك على المجهود الكبير المبذول منك وجزاك الله خيرا
انا عندي سيارة تويوتا ستارليت موديل 92 ومسقط لها موتور تويوتا 4e انجكشن 1400 cc وانا عامل طقم شنبر من كام شهر وكنت بستخدم ريت التعاون الازرق 20 .... 50
والان بستخدم زيت شل الاحمر 20 ..... 50 ولكن وهو بينقص حوالي ربع المقاس عند التغيير على 2500 ك
انا بسوق بعصبية شوية وبقرص على العربية نوعا ما ومشويري كلها تقريبا داخلية
انا مش مستريح لزيت شل
اجرب زيت ايسن ولا تنصحني بايه
وشكرا

ارجو النصيحة كنت استعمل فى السيارة نيسان صنى منوال n16 موديل 21011 زيت موتور تخليقى موبيل وان 10000 بالتوكيل وعند بلوغ العداد 35000 الف كم ولظروف وضعت زيت معدنى موبيل سوبر 5000 واستمريت عليه مع تغيير فلتر الزيت كل مرة والتوكيل لم ينبهنى .. وارغب اليوم فى العودة لاستخدام الزيت التخليقى والعداد عامل 90000 الف كم فما هو الزيت المناسب ودرجة لزوجته هل
5-40 ام 5-30