دائما الالتزام بتوصيات الكتالوج هو الأفضل لسيارتك... مهما كانت نوعها...
كتالوج عربيتك بيوصي بأفضل شيء تعمله علشان تحافظ على عربيتك في أحسن حالاتها.. والتوصيات دي متجربة من قبل الصانع وبناء على معايير واعتبارات كتير.. احنا كمستخدمين ما نعرفش حاجة عنها.. وبالتالي ما ينفعش نفتي من دماغنا ونستخدم حاجة بناء على آراء أو تجارب شخصية...
حسب معلوماتي (وصححني إن كنت مخطئاً) أن كتالوج سيارتك طلباته لزيت المحرك كالتالي:
مستوى الأداء والجودة:
للزوجات الخفيفة: API SL على الأقل + ILSAC GF-3 على الأقل
للزوجات الأثقل: API SL على الأقل
يعني الأفضل تحط مستويات أداء أعلى وهي:
API SM أو API SN
وأيضا
ILSAC GF-4 أو ILSAC GF-5
اللزوجة:
5W-30 (المفضل) (خفيف)
أو 10W-30 (خفيف)
أو 15W-40 (أثقل)
أو 20W-50 (أثقل)
وده معناه إنه غير مسموح باستخدام لزوجات أخرى غير المذكور أعلاه..
الزيت المناسب يجب أن يكون مطابق لطلبات مستوى الأداء وطلبات اللزوجة.. لازم الاتنين مع بعض مش واحد منهم بس..
طبعا أكيد حضرتك بتسأل إزاي أعرف الزيت مطابق للمطلوب ولا لأ...
ببساطة جدا.. الأكواد اللي فوق دي لازم تلاقيها مكتوبة على علبة الزيت (غالبا على ظهر العلبة بخط صغير)...
ولو ما لقيتهاش... ما تشتريش الزيت.
وكمان .. اختيار اللزوجة بيعتمد في منطقتنا على أسلوب استخدام السيارة.. وتأثير الجو على الاختيار يكاد يكون منعدم لأن العامل الأساسي اللي الجو بيدخل فيه هو حرارة الجو عند التشغيل على البارد (لما تشغل عربيتك الصبح بدري).. واحنا درجة حرارة الجو عندنا لا تقل عن الصفر إلا في ما ندر.. وفي درجات الحرارة فوق الصفر كل الزيوت بتشتغل كويس.
على حسب وصف حضرتك لطريقة استخدام العربية... فأسلوب السواقة يعتبر خفيف.. وانت مش محتاج أي زيت بلزوجة ثقيلة.. لإننا بنزود اللزوجة مع زيادة الأحمال على الموتور.
أنصح حضرتك بأي زيت من دول:
موبل1 x1 بلزوجة 5W-30
Mobil 1™ x1 5W-30
بترومين A-1 سوبر سنثيتك بلزوجة 5W-30
Petromin Lubricants Products – Petromin
زيت آيسن بلزوجة 5W-30
زيت تويوتا الأصلي بلزوجة 5W-30
زيت AC Delco بلزوجة 5W-30
زيت مانول إنرجي فورمولا بلزوجة 5W-30
https://www.mannolegypt.com/mannol-p...-formula-5w-30
زيت ليكوي مولي سبيشال تك AA بلزوجة 5W-30
LIQUI MOLY SPECIAL TEC AA 5W-30
زيت ليكوي مولي موليجين نيو جينيريشن بلزوجة 5W-30
LIQUI MOLY MOLYGEN NEW GENERATION 5W-30
آمسويل سجنتشر بلزوجة 5W-30
Signature Series 5W-30 Synthetic Motor Oil
آمسويل XL بلزوجة 5W-30
AMSOIL XL 5W-30 Synthetic Motor Oil
آمسويل OE بلزوجة 5W-30
AMSOIL OE 5W-30 Synthetic Motor Oil
ويجوز السوق فيه زيوت أكتر وتكون مناسبة زي الكتالوج.. بس أهم شيء إنك تلاقي عليها عبارة API SN و ILSAC GF-5 مع بعض (واحدة لوحدها مش كفاية إلا إذا كنت ناوي تحط زيت بلزوجة عالية)..
بالنسبة لمواعيد تغيير الزيت.. فبردو اتباع الكتالوج هو أفضل شيء...
أغلب كتالوجات تويوتا بتنصح بتغيير الزيت كل 10 آلاف كيلومتر أو 6 أشهر (أيهما أسبق) في الحالات الاعتيادية.. و5000 كيلومتر أو 6 أشهر في الحالات الشاقة
كل الزيوت دي اللي فوق دي ممكن تخدم معاك لحد 10 آلاف كيلومتر أو 6 أشهر.. أيهما أسبق.
وفي حالة حضرتك.. التغيير كل 6 أشهر هو الأفضل لإن معدل مشي العربية قليل جدا.
بالنسبة لنقص الزيت.. فالمتوقع إن الاستخدام البسيط للعربية يكون أحد الأسباب.. خصوصا إذا كان ثرموستات الكوعة متشال أو عطلان مفتوح.. وده بيخلي الموتور ياخد وقت طويل في الوصول لدرجة حرارة التشغيل الصحيحة.. وبالتالي فخلوصات المحرك (الشنابر بالذات) ممكن ما تكونش واصلة للقيم الصحيحة اللي المفروض تشتغل عليها.. لإن المعدن بيتمدد وينكمش مع تغير درجات الحرارة.
اتأكد كمان إن مفيش تسريب زيت من جوان غطا التاكيهات.. لإن أي أجزاء كاوتش عمرها لا يزيد عن 7 سنوات سواء استخدمتها أو ما استخدمتهاش...
على العموم.. توقع زيادة بسيطة في نقص الزيت مع استخدام اللزوجات الخفيفة.. وما تنساش تراجع على أي تسريب زيت..
ولو إني أتوقع العكس.. إن نقص الزيت هيكون أقل مع استخدام الزيوت المذكورة أعلاه لإنها مطابقة لطلبات الكتالوج بالضبط..
عموما لو عايز معلومات أكتر.. أنصحك بالدخول على المواضيع دي:
القواعد الذهبية لاختيار زيت العربية.... موسوعة مبسطة لأساسيات زيوت المحركات
إمتى تغير زيت الموتور؟؟؟
تبخر الزيت... هل هو حقيقة أم خرافة؟؟
مستوى الزيت في المحرك .. إيه أسباب نقص الزيت؟؟؟
إزاي تختار لزوجة زيت الموتور المناسبة لعربيتك؟؟؟
ولو عندك أي سؤال أنا تحت أمرك.
...
المفضلات