الموضوع: أى سؤال أو استشارة فى طب العيون

المشاركة الأصلية كتبت بواسطة mosaelaswad

اهلا وسهلا بيك دكتور شريف انا فعلا موسى الاسود بتاع زمان بتاع الليزك اللى حضرتك لما زهقت من مناقشاتى خلتهم ىوقفونى اسبوعين عشان تستريح منى ,,, ما علينا اللى فات مات
طبعا اكيد انت كدا استنتجت انى دكتور عيون ودة حقىقى انا واخد md دكتوراة يعنى بتكلم وعارف انا بقول اية..المهم السؤال هنا هو الطفل اللى عندة 10 او 8 سنوات وطلع الكمبيوتر بتاعة استيجماتيزم ناقص نص او حتى واحد محتاج قطرة توسيع ولو استخدمت قطرة توسيع محتاج فى السن دة cyclopentolate ولا كفاية tropicamide ولو استخدمت cyclopentolate هل تكفى ساعة لتحقىق الغرض...وهل كل هذا يطبق على كل الاطفال سن عشرة او اقل على المطلق وشكرا

د. موسى ، أولا أهلا بيك و دايما بنقول الخلاف فى الرأى لا يفسد للود قضية.

ثانيا ماعتقدش ان انا شخص واصل للأدارة للدرجة اللى تخليهم يوقفوا حضرتك علشان خاطرى ، ادارة المنتدى بالذات مستقلة و بعيدة عن التأثيرات الفردية و ده واضح فى ادارتهم للمنتدى ، و مش عارف هاتصدقنى ولا لأ لو قلت لك ان انا لم اتقدم بشكوى منك او ضدك للأدارة ، و لكن اسلوب حضرتك كان على مايبدو ساعتها فيه تهكم اعتبرته الأدارة مخالف للقواعد.

ثالثا على فكرة انا كمان معايا MD و الحمد لله و كمان عضو فى الجمعية الرمدية المصرية ، و جميعة الشبكية المصرية و كمان عضو فى AAO الأكاديمية الأمريكية للعيون و زى ما سعادتك عارف عضويتها تستلزم ترشيح 2 من اعضائها و الحمد لله اساتذتى رشحونى و حصلت على عضويتها من زمان و الحمد لله.

بالنسبة لموضوع القطرة فحضرتك سيد العارفين ان ممكن الطفل يكون الأستيجماتيزم بتاعه -0.5 أو مافيش خالص و لكن يكون عنده Hyperopia و عينه عاملة Accomodative Spasm و مخليه مقاسه على ال Autoref يطلع Zero Sphere و لكن لما تعمل له Cycloplegic refraction بيطلع المقاس البلس بتاعه ، و ده احد اهم الأسباب لأستعمال القطرة فى الطفل اللى 10 سنين او اقل.

بالنسبة لحكاية ساعة كافية ولا لأ فلو حضرتك تفتكر ان ده الوقت المناسب لعمل القطرة ، و يا سيدى الفاضل ده مش كلامى انا ، ده كلام الفارماكولوجى ، و حضرتك لوشفت البامفلت بتاعة اى واحدة من القطرات دى هاتلاقى ان التأثير الأقصى بيكون بعد ساعة.

باللنسبة لسؤال حضرتك عن ال cyclopentolate ولا ال Tropicamide فمش عارف ده سؤال بجد و لا حضرتك بتمتحنى ؟؟ حضرتك زى ما قلت معاك MD يبقى أكيد سيادتك عارف ان ال cyclopentolate تأثيرها الأساسى على ال ciliary muscle و تأثيرها الثانوى الأضعف على ال dilator pupillae ، فى حين ان ال tropicamide تأثيرها الأساسى على ال dilator pupillae و الأضعف على ال ciliary muscle و بالتالى لا يجوز ان نستعملها فى أخذ المقاس للأطفال لأنها لن تحقق الغرض المطلوب وهو cycloplegia ، و لا ايه رأى حضرتك يا أخى العزيز ؟؟ اعتقد اننا مش مختلفين على النقطة دى .

بالنسبة للأستعمال مع الأطفال فهنا كمان سيادتك ده مش كلامى ، ده كلام كتب ال pediatric ophthamology ، و طبعا حضرتك عارف ان مافيش فى الطب حاجة مطلقة (و اسمح استعير الكلمة دى من كلام حضرتك) ، و لكن هناك قواعد نتبعها و نحاول الوصول للأفضل للمريض.

و أخيرا يا عزيزى د/ موسى ، حضرتك انا كل غرضى من الموضوع اللى انا عاملة ده انى احاول اقدم خدمة لأخوانى فى المنندى زى بقية الزملاء اللى عملوا كده قبلى و منهم دكتورنا الغالى د. محمود صلاح على سبيل المثال و ليس الحصر ، حيث يوجد العديد من الزملاء الأفاضل ، و ليس الغرض هو ادعاء العلم بكل شئ او الأدعاء بأنى الوحيد الذى يعرف كل شئ ، بل بالعكس تجدنى احاول التجنب فى الخوض فى التفاصيل العلمية لتبسيط المعلومة و سهولة توصيلها ، و لا اعتقد ان ذلك الغرض يستدعى تحويل الموضوع الى مناظرة علمية بيننا لأثبات من هو الأصح ، علما بأن الطب مدارس كما تعلم سيادتك ، و ممكن اكون انا تبع مدرسة و حضرتك تبع مدرسة تانية خالص مختلفة ، و لكن المدرستين صح ، و مش لازم واحدة تكون غلط و التانية صح ، و بعدين احنا كده بنبعد عن الهدف الأساسى و هو محاولة مساعدة الأعضاء.

و سعيد بوجود حضرتك معانا و أهلا وسهلا بحضرتك فى اى وقت.

و تحياتى لك يا أخى العزيز

المشاركة الأصلية كتبت بواسطة ahmadmidop

لو سمحت يادكتور انا لابس نظارة نظر وكنت عاوز اعمل نظارة شمس بس الفوتو جري ماعجبنيش ... فأنا عاوز اعمل شمبر شمس بس يكون شمس ونظر ... يعني مثلا شمبر ريبان واشيل العدسات واعمل عدسات نفس اللون وتكون طبية في نفس الوقت .. وبردو في شنابر الماسك الي العدستين بيكونو متصليين ببعض ممكن تتعمل بنفس الفكرة ولا ما ينفعش ....وشكرا

أنا عامل الفكرة اللى حضرتك بتقول عليها ، و يمكن اكتر كمان ، انا عندى نظارة راى بان و خليت محل النظارات اللى باتعامل معاه شال لى منها العدسات الأصلية و حط مكانها عدسات مقاسى و بنفس اللون ، و تخيل حضرتك انى عامل واحدة للمصيف و نزول البحر ، جبت نظارة سباحة و خليته شال لى العدسات بتاعتها و حط مقاسى مكانها ، و دى بانزل بيها الميه من غير ما اقلق ازاى هاشوف لو قلعت النظارة (لأن عندى البديل دلوقت).

و ألف مبروك النجاح ، و بالتوفيق ان شاء الله.

و تحياتى

المشاركة الأصلية كتبت بواسطة n.y.s.m.a

حلوة قوي فكرة النظارة بتاعة السباحة دي ... أنا ببقى ضايع خالص في البحر وكمان كتير بأنزل البحر بالنظارة العادية سواء العادية أو الشمس (عشان أعرف أشوف) لدرجة إن النظارات بتاعتي اللى ضيعتها في البحر عدت الـ 10 نظارات تقريبا بولس وري بان وكاريرا والباقي مضروب لأني زهقت من الماركات اللى بتضيع مني

ياريت يادكتور تقوللى إنت عملت فين الزجاج بتاع بتاع نظارة السباحة وكان نوعها إيه عشان نفسي أعمل واحدة زي كده لأني سألت كذا واحد بس لاقيت في الآخر إن مش أي واحد بتاع عدسات يعرف يعملها

وجزاكم الله خيرا

هى ما فيهاش فن كتير و لا مجهود ...

الحكاية كلها نظارة سباحة من نوع كويس علشان العدسات ما تقعش منها و محل نظارات فاهم شغله ، مش لازم يكون كبير أو صغير ، المهم فاهم شغله كويس علشان يركب العدسات صح.

و تحياتى.