تم الرد على الخاص يا عزيزى
عرض للطباعة
دكتور/شريف انا كشفت عليها في رمد الجيزة في العيادة المسائية وطلب نوديها مرة تانية في عيادة حول الأطفال وفعلا رحنا وكشف عليها تاني وطلب نعمل تحاليل ونستعد لعملية وقال ان فيه ضعف في عضلة وهتحتاج شد طبعا أجلنا الموضوع علشان ألأمتحانات وكمان متردد جدا اني اعملها عملية هناك. و انا لما قريت عن العملية علي النت لقيت في بديل ليها وهو حقن العضلة المقابلة للعضلة الضعيفة بمادة البوتكس ومكتوب ان مفعول البوتكس بيخدر العضلة السليمة لمدة اسبوعين بتكون العضلة الضعيفة قويت وبكدة تغني عن الجراحة . لو سمحت محتاج اعرف تنصحني بأية ومين في مصر بيستخدم التقنية دية ولو ممكن انا محتاج تليفونات حضرتك علي الخاص ضروري .... تحياتي
ازيك يا دكتور ... يارب تكون بخير
ممكن حضرتك تفيدني في الموضوع ده
http://www.nilemotors.net/Nile/155726-a.html
او لو حضرتك تحب اعمل ملخص هنا زي ما حضرتك تشوف انا تحت امرك
السلام عليكم يا دكتور
لو سمحت ليا سؤال
أنا أول مرة أعمل عدسات نظارة أنتى رفلكشن كنت الأول بستعمل عدسات بيضاء عاديه
المهم أنا دلوقتى لما بلبسها حسيت أن الأشياء مش لونها ابيض بحس انها على أصفر شويه
هل العدسات الأنتى رفلكشن بتبقى كده ولا دا عيب فى العدسات والمفروض انها تفضل بيضاء زى ما هى ؟؟؟؟؟؟؟؟؟؟؟؟
رجاء الإفاده
ممكن سؤال كمان ؟ :ask:
دلوقتي لميس بنتي بقالها كام يوم بتصحى وعينها الشمال معمصة جامد جدا لدرجة إنها ساعات مش بتعرف تفتحها لغاية مانغسلهلها
هية عندها 4 سنوات
كان الموضوع ده حصلها برضه من فترة وكان رد الفعل مننا أنا ووالدتها هو تغيير ملاءات سريرها يوميا وكنت بحطلها قطرة ليكويفيلم من نفسي ... قلت أهي حاجة تنضف وترطب شوية على الأقل فضل الموضوع لمدة أسبوع أو أقل تقريبا لغاية ما راح أول مرة
دلوقتي رجع تاني نفس الموضوع ... تنصحني أعمل إيه
وأكرمك الله وأعزك في الدنيا والآخرة .. آمين
الأستاذ أيمن ، أهلا وسهلا بحضرتك فى أى وقت
و ألف سلامة على أمورتنا لميس ، ربنا يحفظها و يحفظكم جميعا
بالنسبة لوصف حضرتك فهو للأسف مش كامل و لكن اعتقد انى اقدر أكمله ، اعتقد ان العماص اللى بيقفل عينها بيكون لونه أصفر و أحتمال يكون أخضر ، و احتمال كبير يعدى العين التانية ، و ممكن حضرتك و والدتها تلقطوا منها العدوى ، لو الصورة زى اللى انا قلتها فده غالبا بيكون التهاب مخاطى صديدي و بنسميه MPC (أختصار Muco Purulent Conjunctivitis) و ده أحد اأمراض العيون الشائعة فى الصيف ، و أحيانا بيكون مسبوق بحاجة تقلل المناعة زى دور برد او التهاب فى اللوزتين مثلا قبله بكام يوم او اسبوعين حتى ، و ممكن يكون بسبب ذبابة مثلا ، المهم ان اسبابه كتيرة و صعب نحدد السبب بعينه ، و لكن الحمد لله عادة بيكون دور بسيط باذن الله
بالنسبة لقطرة ليكويفيلم فللأسف مالهاش دور هنا خالص غير اننا ممكن نعتبرها غسيل ميكانيكى للعماص فقط.
المفروض فى رأيي انن ندى لميس العلاج التالى :
Tobrex Eye Drops
قطرة للعينين 5 مرات يوميا
Fucithalmic Eye Ointment
مرهم للعينين قبل النوم يوميا
ياريت نبدأ لها العلاج لو الصورة اللى كملتها سليمة ، و لو الصورة مختلفة ياريت حضرتك تكملها لى.
و بالشفاء و العافية لأبنتنا لميس بأذن الله.
و تحياتى
مافيش مشكلة لو ما جالهاش برد ، دى احد النظريات و انا باعدد الأحتمالات ليس الا.
بالنسبة للمرهم ده بالذات فممكن نعتبره زى قطرة لزجة شوية ، و بالتالى نحط نقطة فى كل عين قبل النوم زى القطرة بالضبط.
ياريت بس الفوطة و كيس المخدة الخ الخ يتغلى كل يوم لأنه معدى جدا ، و المنديل اللى نمسح لها بيه العماص نرميه فى الباسكت بره الشقة ، لأن لو رميناه فى الباسكت اللى فى غرفتها او اى باسكت جوه الشقة ممكن تيجى ذبابة و تقف عليه و توزع الميكروب على كل اللى فى البيت ، فخلينا فى الأمان احسن ، عادة بيكون ميكروب بسيط و لكن سريع الأنتشار ، فلازم ناخذ حذرنا منه.
مع تمنياتى لها بالشفاء باذن الله تعالى.
و تحياتى
دكتور شريف .. مجهود حضرتك مشكور عليه فعلاً لخدمة أعضاء المنتدى .. وأنا كنت مستمتع أثناء قرائتي للموضوع ولردودك اللي بتبين دماثة خلقك وعلمك الواسع .
بس كنت عاوز استفسر بالنسبة لعملية الليزك (اللي حضرتك معترض عليها .. إلا إذا كان الواحد مضطر .. وأنا موافق حضرتك في الرأي
ده) القول الفصل فيها بالنسبة لجدواها من عدمه حيكون في سنة 2012 بعد انتهاء منظمة fda من دراستها وابداء الرأي النهائي فيها .. ولا الكلام ده كله مجرد تحصيل حاصل .
وشكراً مرة تانية لمجهودك في المنتدى
السلام عليكم
ازيك يا دكتور شريف
انا عملت اقتباس لمشاركة كنت عملتها قبل كدة بخصوص مشكلة عين ابنى المزمنة وحضرتك تفضلت وعرضت انك تشوفه على الخاص ونظرا لانه كان في حالة حرجة وكان بياخد كورس مكسف من القطرات مكنتش بخرجه ولا بعرضه للضوء فانا بشكر حضرتك مرة تانية
المهم يا دكتور ان نفس المشكلة موجودة بل تزداد سوءا وهى احمرار دائم بالعين مع حكة شديدة والم كبير ونتيجة لذلك حدث قرحة بالعيبن وتم الذهاب لاكثر من دكتور
ودائما يعطون قطرات الكورتيزون التى اصبح مداوم عليها وانا خايف عليه من كتر الكرتيزون واول ما بيبطله عنيه بترجع تسوء تانى يوم ايه الحل فى المشكلة دى وشكرا
السلام عليكم ورحمه الله وبركاتة
لو سمحت يادكتور لى استشارة سريعة
عندى كيس دهنى واخدت العلاج ولله الحمد بقى كويس دة كان يوم الاثين وخفت على يوم السبت ظهر ورم تانى واحمرار فى نفس الجفن وكرر الدواء تانى ولكن المرة دة من غير نتيجة وظهر فيها زى حبة بيضاء وسط الاحمرار
اية دة ؟؟؟؟
وباخد دواء
قطرة oflox خمس مرات
وقطرة ocuphenicol ثلاث مرات
ومرهم tobrex قبل النوم
اقراص paracetamol مره واحدة
اقراص thiophenicol 250mg باخد قرص واحد ثلاث مرات وبعدين باخد قرصين ثلاث مرات يوميا
هل العلاج دة كويس ولا اغيرة
واسف على الاطاله
أسمحولي أشارك عن تجربة أنا عملت العملية من حوالي سنتين وللحظة دي مش مستريح منها وحاسس الفترة دي أن نظري بدأ يضعف تاني ده غير بقه لو الجو فيه رطوبة بأحس أنها مزغللة ولغاية اللحظة دي باستعمل قطرة مرطبة للعين مرة في اليوم تقريبا
هي أحلي حاجة فيها الأستغناء عن النظارة ومللها بس مع السلبيات دي كلها!
شكراً لنقل تجربة حضرتك .. بس انا ملاحظ في الصورة الشخصية بتاعتك أنك راكب بايك .. فهل ركوبك للبايك ممكن يكون مأثر على العملية وخاصة لو حضرتك مش بتلبس خوذة .. يا ريت توضيح للنقطة دي .. وكمان لو شرح وافي لتجربتك مع الليزك .. يعني النظر كان كام وعملتها فين ... إلخ وشاكر اهتمامك في الرد .
حسب ما ذكر فى موقع ال fda ان الدراسة هاتكون من 3 مراحل و بعدها هايتم التقييم ، و كلامهم حرفيا زى ما هو فى الموقع بيقولوا :
نتائج البحث سوف تساعد على التعرف على العوامل المؤثرة فى جودة الحياة بعد عمل الليزك و امكانية تقليل مخاطر الأعراض الجانبية التى تؤثر على نتيجة الجراحة. و إذا تبين أن أى من هذه العوامل له تأثير على سلامة أو فعالية الليزر المستخدم فى جراحات الليزك ، ستقوم ال fda بتقييم الموقف لمعرفة هل من الضرورى اتخاذ اجراء نحو ذلك ام لا.اقتباس:
the results of the project will help identify factors that can affect quality of life following lasik and potentially reduce the risk of adverse effects that can impact the surgical outcome. If any of these factors are related to the safety or effectiveness of the lasers used in lasik surgery, the fda will evaluate whether any action is necessary.
تلك كانت ترجمة الجزء السابق و اعتقد ان الناس دى مش بتهرج ، فلما يعملوا اعادة تقييم بعد 10 سنين ليزك و الدراسة دى تقعد سنتين و نصف فأكيد هايعملوا اللى بيقولوه.
و ادينا منتظرين النتائج.
و تحياتى
الكورتيزونات كعلاج للحساسية فكرة مش لطيفة ، انا ممكن استعملها فى الأول بس و بخاصة لو الحكاية شديدة جدا علشان تهدى العين لغاية ما بقية العلاج يبتدى يعمل مفعوله و اسحب الكورتيزون بالتدريج ، و انا عن نفسى مش باحبه ابدا فى السن الصغير..
هل حضرتك منعت الحاجات المسببة للحساسية اللى قلنا عليها قبل كده ؟؟ و هل فرقت و لا لأ ؟؟
و مازلت باكرر دعوتى لحضرتك علشان اشوف ابننا الغالى و ربنا يتم شفاؤه على خير.
و تحياتى
ألف سلامة على حضرتك.
انا بس لى ملاحظة صغيرة ، كم العلاج كتير جدا على كيس دهنى (انا مش عارف هو كده و لا لأ و لكن بافترض ان التشخيص المذكور صح) ، و فيه حاجات بلا داعى زى الباراسيتامول .. ده مسكن و مضاد للألتهاب ... ايه لازمته هنا ؟؟؟ و بعدين ال Thiophenicol مالوش دور هنا ... لو محتاجين مضاد حيوى بالفم فيه حاجات اقوى منه بكتير و متخصصة اكتر منه ... عموما زى ما قلت ... انا شايف ان العلاج اكتر من اللازم..
لو ممكن وصف ادق لمكانه و شكله بالتفصيل أو صورة للجفن و ترفعيها علشان اشوفها...
فى انتظار الرد لتحديد العلاج المطلوب ان شاء الله..
ملحوظة .. لو فيه نظارة لازم نلبسها على طول علشان قلعها ممكن يكون أحد اسباب تكون الأكياس الدهنية.. و بالتلى لبسها باتظام بيساعد على تقليل حجم الكيس الدهنى..
و تحياتى
كلام حضرتك مضبوط و وارد حدوثه بنسبة لا بأس بها ...
و علشان كده بارجع و بأقول لازم المريض يعرف كل حاجة بالحقيقة قبل ما يدخل العملية و هو حر فى قراره بعد كده ... بلاش نقول ان كل حاجة فل الفل و تمام التمام ... يعرف الحقيقة و اللى ممكن يحصل حتى لو بنسب ضئيلة ، و له مطلق الحرية فى تحديد احتياجه للعملية و قبوله لها ..
و تحياتى
المفروض ان ركوب البايك مالوش تأثير على العملية ، لأن الشكوى دى متكررة من العديد من المرضى فى ابحاث سابقة عن الليزك ، و طبعا مش كلهم بايكرز... دى احد مضاعفات ... او نقول الأعراض الجانبية لعملية الليزك.. و لكن مش شرط حدوثها مع كل مريض ، و لكن فيه ناس بتقبلها و ناس بتضايق منها.
و تحياتى
الله يسلم حضرتك متشكرة جدا على الرد يادكتور
انا غيرت الدكتور لانى كانت شكت فى كلامه وكمان ملاقتش تحسن والدكتور التانى تشخيصة ان كيس دهنى واتلوث فجمع صديد وهو عرض على اقتراحين اما بالجراحة وده هو مستبعده لانى الكيس قريب من القناه الدمعيةو بس التهاب الشديد او بالعلاج وهو
قطرة orchacin قطرة 5 مرات
و flumox كبسول كل 8 ساعات
و terra-cortril مرهم قبل النوم
كمدات مياه دفئة علشان الصديد يفتح وبعد كدة يعمل جراحة للكيس الدهنى
ما هو راى حضرتك فى التشخيص التانى ؟ وهل لازم جراحة ولا ممكن يروح بالعلاج
والصورة للعين مش وضحة اوى ومفيش نظارة
فى رعاية الله
انا نظرى تقريبا -3/4 و -1/2
هينفع أجيب عدسات؟ وهأجيبها علشان بأتحرك كتير وبأمارس رياضه زى الكوره وممكن النضاره تبقى متعبه شويه فى الموضوع ده
ولو ملونه هيبقى فى مشاكل؟ وخاصه انا بأستخدم الكمبيوتر كتير فهل فى ألوان معينه لازم ألتزم بيها؟
وبرضه فى مشاكل لو نزلت فى الميه بيها؟
وتنصح بعدسات ايه؟ شهريه ولا سنويه ؟
واﻷسعار بترراوح فى اد ايه؟
ولو واحد نظره 18/6 ده معناه ايه ؟
اسف على اسئلتى الكتيره وشكرا أوى يا دكتور شريف
موضوع جميل اوى
انا يا دكتور شريف انا كنت ليبس النطارة بقالى فترة طويلة وبعدين انا عملت النطارة جديدة وكدة لما عملت النطارة بقت بشوف النور هو يبقى الشارع ضرب على عنيا وعامل الاشاعة كتير اوى دة عيب اية بقى انا خايف اوى من مووضع دة ؟
عادة 97% من الأكياس الدهنية بيحتاج جراحة و 3% بس بيستجيب للعلاج و لكن لازم ندى فرصة للعلاج.
حكايبة انه جنب القناة الدمعية فمن المفضل اعطاء العلاج فرصة اكبر تجنبا لأى مضاعفات قد تحدث نتيجة الجراحة (الواحد شال اكياس دهنية من جنب القناة الدمعية مئات المرات و لكن كل ما باقابل حالة بأفضل ابعد عن الجراحة ان امكن).
فى رأيى كنت افضل اعطاء قطرة مضاد حيوى مع كورتيزون لأن مفعولها محبب فى الكيس الدهنى.
و لكن ان شاء الله يكون خف مع العلاج.
و تحياتى
لو ده قصر نظر فقط و مافيش معاه اسيجماتيزم يبقى تنفع العدسات ان شاء الله
مافيش مشكلة ملونة او شفافة لأن اللون ده منظر تجميلي فقط و مالوش دور فى الرؤية
ممنوع نزول البحر او القعدة على البلاج بالعدسات ، الملح و الرمل ممكن يدمروهم و ممكن يتسببوا فى اذى للعين . لو بيسين مافيش مشكلة بس الكلور فى الحالة دى بيلهب العين زيادة بسبب وجود العدسة ، و بلاش القفز داخل المياه لأن لو القفزة عنيفة ممكن العدسات تتقلع من العين و تعوم مع المياه ، و لكن السباحة العادية مافيش فيها مشكلة.
السنوية مش مفضلة دلوقت لأن لازم استعمال الأقراص المزيلة للبروتين معاها كل شهر ، و للأسف الأقراص دى الصيادلة بطلوا يجيبوها فى مصر من 3 سنوات لحد دلوقتى ، و علشان كده لو جت عدسات سنوية يا اما اجيب الأقراص من بره ، او اعمل حسابى ان عمرها مش هايزيد عن 4-5 شهور فقط (يعنى خسارة لقيمة العدسة لأن عمرها مش كامل).
الأسعار بتبتدى من حوالى 100-150 جنيه (شفاف او ملون) و تطلع حتى حوالى 1500-2000 جنيه (لبعض الأنواع الملونة الخاصة)
يعنى الشئ اللى الأنسان الطبيعى يشوفه بوضوح على بعد 18 متر ، المريض محتاج انه يبقى على بعد 6 متر فقط علشان يشوفه بنفس الوضوح
تحت أمرك فى اى وقت و شكرا
و تحياتى
انا باخد قطرة امسها فلوكا حاليا
دكتور شريف بعتلك رسالة ومنتظر ردك ضروري
الف شكر لحضرتك
السلام عليكم
الف شكر لحضرتك على المجهود الجمد دة وجزاك الله كل خير,
حتقل على حضرتك شوية و اسأل سؤالين
1- بيجيلي صداع شديد لما ببص على حاجة بزاوية (يعني مثلا شاشة الكومبيوتر على جنب المكتب) و الصداع بيبتدي في العين و بعدين يبتدي يمسك دماغي و غالبا بيبقي صداع نصفي)
2- عندي مشكلة مع كل المطبات و الحفر في الطريق وانا سايق و هي إني ببساطة مابشوفهمش (بإستثناء المطبات إللي قبلها العلامات التحذيرية)
انا قست نظري من كذا شهر والحمد لله كان 6/6 بس انا طول عمري مش يميز الالوان قوي من بعض
و اسف جدا على الإطالة
الصداع ده ممكن يكون نتيجة شد عضلات العين و هى ثابتة فى اتجاه معين لفترة علشان تشوف الحاجة اللى على الجنب ، جرب تحرك راسك فى الأتجاه المطلوب كلها و شوف هل الصداع ده بيحصل و لا لأ ؟؟ بالنسبة لعدم شوف المطبات فحضرتك جاوبت فى الجزء اللى بعدها ، ان حضرتك مش بتميز الألوان كويس من بعضها ، و بالتالى درجات اللون بتاعة الظل بين المطب و الأسفلت اللى بتخلى الواحد يلمح المطب بتكون مش واضحة عند حضرتك تماما و بالتالى تصعب رؤيتها ، و تزداد المشكلة مع الأضاءة الخافتة. حكاية عدم تمييز الألوان جيدا دى بتبقى عامل وراثى اساسا و بدرجات مختلفة و هى اللى بنسميها ";عمى الألوان"t; و تتدرج من جزئى لدرجة لون او اكثر ، حتى تصل الى عمى الألوان التام (يرى الدنيا بدرجات الرمادى) و لكن كل درجة لا يمكن تتقدم و تصل الى التالية ، يعنى الدرجة اللى حضرتك عليها تفضل معاك طول العمر ، لا تزيد و لا تنقص. و تحياتى
دكتور بعد اذنك عاوز اعرف افضل مكان لشراء العدسات الطبية اللاصقة وطبعا يكون مضمون
وهل العدسات ليها تاريخ صلاحية زي الدواء كده المفروض اتاكد منه قبل الشراء ؟
حاجة تانية لو عدسات شهرية يعني صلاحيتها شهر بيتحسب الشهر استخدام يعني استخدام 30 يوم
ولا الشهر من اول استعمال يعني لو استعملتها يوم 1 في الشهر لازم تتغير يوم 30 حتى لو ما استخدمتهاش غير اسبوع او 10 ايام ؟
ده الكشف
http://img269.imageshack.us/img269/5110/eye1u.jpg
وياريت اعرف افضل ماركات موجودة تناسب حالتي .... الف شكر
السلام عليكم يادكتور شريف
كنت عايز اسال حضرتك عن حساسية العين
انا عندي حساسية (وبعض الدكاترة بيقولو ان ده التهابات) من الضوء خصوصا من ضوء الكومبيتر والتلفيزيون حنى الموبيل
والموضوع ده بيجلى كل فترة ومش لاقى حل له
ومن شهر زادات الاتهابات ومش عارف ابص للكمبيوتر وانا شغال مبرمج كومبيوتر يعنى بحتاج اركز على على الكومبيتر واشتعل
عليه حوالى 8 ساعات فى اليوم
ورحت مستشفى العيون الدولى من شهر وخدت قطرة اسمها (orchadexoline)لمدة عشرة ايام ولم اشعر بتحسن
وبعد كده روحت لدكتور تانى وزود لي الجفاف وخدت قطرة (tobradex,systane, genteal gel )لمدة عشرة ايام ولم اشعر بتحسن
وبعد كده روحت لدكتور تانى فى مستشفى الرواد بالدقى وقالى فى التهاب فى داخل العين واعطاني برشام (cataflam)لمدة 5 ايام
مع الاستمرار على العلاج القطرات السابقة لمدة اسبوعين
وطلبت منه اعمل نضارة فكتبلى على نظارة من غير ميعمل كشف علامات
left eye(sphere +.025,cylinder -0.25, axis180 ) والعين اليمين سابها فاضية
وطبعا انتى ريفلكشين
وسؤالى لحضرتك بالنسبة لقطرات الكرتزيون فى فترة شهر وعشرة ايام متواصلة ده خطر على العين ولا لاء؟
وبالنسبة للنظارة هل هتفدينى ؟لاني حسيت انه كتبها علشان يريحنى بس
وكنت عايز اعرف فى فرق بين التهابات العين والحساسية ؟وبالنسبة للحساسية كنت قريت انها ملهاش علاج فهل الكلام
ده صحيح؟
وانا كمان ابتدت عضلات وجيه توجعني من كتر مش قادر ابص للضوء
وشكرا ليك يادكتور شريف
السلام عليكم يا دكتور
ليا سؤال بعد إذن حضرتك
أنا روحت عملت عدسات فى مركز عدسات لدكتور هنا فى إسكندرية
وأخترت عدسات شفافة إسمها
air optix aqua
استعملتها لمده حوالى اسبوع كويس اوى
بعد كده لقيت نفسى بعد لما بلبسها حاسه بحاجات فيها مش مريحه عينى زى التراب كده
المهم روحت ليهم تانى قالوا لى لازم تنظفيها كويس بالمحلول وهما نظفوها لدرجه انى حسيت زى ما تكون العدسه مش موجوده فى عينى خالص وراح كتب لى قطره اسمها tears natvaril
بعد كده بقيت بنظفها بالمحلول والبسها وأخر مره لبستها كان يوم الخميس اللى فات رغم ده لقيت انى عينى بتحمر وفيها شعيرات حمراء خاصة لما اقوم من النوم والوضع ده مستمر حتى الأن
مش عارفه ده سببه ايه رغم انى موقفه العدسات وبلبس النظارة ؟ ياريت تجاوبنى يا دكتور ؟
مع العلم ان دى اول مره البس فيها عدسات
والعدسات العين اليمين -5
والعين الشمال -5.50
وصناعتها ماليزى
ونوع المحلول ( solo care aqua )
هو انا جالى كده جفاف فى العين وخلاص مش هينفع البس عدسات تانى ولا ايه سبب احمرار عينى ده ؟؟؟ هل نوع العدسات ده كويس ولا ليه اضرار ؟؟؟
ختاما شكرااااااا لحضرتك
اولا يادكتور ..جزاك الله خيرا عالمجهود الجامد ده وربنا يجعلو في ميزان حسناتك
انا عندي اكتر من سؤال ..معلش يادكتور هنتعبك معانا
الاول ان انا غيرت مقاس النضاره قريب وعندي العين الشمال
-2.75 واليمين 2.25-
واول ماعملت النضاره الجديده حسيت ان اليمين مش بشوف بيها اوي زي الشمال وجربت كده اعكس النضاره يعني اخلي العدسه الشمال عالعين اليمين لاقيتني اني شايفه احسن
هل معاني كده ان المفروض المقاس يتغير ويبقي زي الشمال ؟؟؟
انا سالت الدكتور وقاللي عادي علي ماعينك تتعود بسس انا بصراحه مش مقتنعه اوي
تاني حاجه ..
من فتره كده .وانا بحس ان في حاجه كده زي بروتين او زلال ابيض كده زايد اوي عن الطبيعي
في sclera بسس
مش في lens نفسها
يعني بيبقي عامل غشاوه بسيطة كده كل شويه لحد مااشيله بايدي او اغسل وشي ؟؟
ياتري ده ايه ؟؟؟؟ انا خايفه يكون بدايه ل cataract ???
تالت حاجه ..
انا بلبس لينسز من حوالي 5 سنين ..وانا عندي دلوقتي 20 سنة ومش بحب النضاره خاالص
وعايزة اعمل الليزك ؟؟حضرتك تنصحني بايه ؟؟
وشكرا جداا يادكتور وآسفه عالاطاله
سلام عليكم