الموضوع: انت تسأل وإستشاري منتدى متسوبيشي يجيب (2)

المشاركة الأصلية كتبت بواسطة Ralliart

بشمهندس طارق

انا عندي العربيه لما بجيب الفتيس على r واسيب الفرامل بتفضل واقفه شويه وصوتها يعلى لثواني وبعد كده تمشي

وكان عندي مشكله تانيه وهي ان العمه البلاستيك بتاعت الراديتير (البلاستكه اللي بيركب فيها الغطاء والخراطيم ) كانت اتشرخت وطلعت الميه كلها والعربيه سخنت وغيرتها برره بس في ناس قالولي انها هتتكسر تاني لو مشغل التكيف في الحر وان في حاجه بتتعمل في التوكيل في التكيف بتظبطها

وجزاكم الله خيراً..........

رد المهندس أحمد عناني مدير الورشة بمركز الخدمة الرئيسي للتوكيل بقليوب :
شرفنا في التوكيل لتجربة السيارة وتحديد ايه المشكلة في حالة النقلة على R وعلاجها بعد الكشف عليها بالأجهزة Multiuse tester

أما بخصوص لحام خزنة الردياتير العلوية فالأفضل وللأمان تغيير الردياتير بالكامل

المشاركة الأصلية كتبت بواسطة Kareem Khattab

الى المهندس المحترم/ طارق زويل
انا معايا لانسر بومه 2009 سوبر اكشن و كنت عملت بيها حادثه من اسبوعيت تقريبا و العربيه حاليا في الرواس اللي في العجوزه هي العربيه اتغير فيها مقص و علبة دركسيون و حاجات تانيه كده و لسه محتاجه كوبلن امامي شمال و الكارثه انهم بيقولو انه مش موجود عندهم و كانو عايزين يركبوا واحد مستعمل ب 700 جنيه بس طبعا والدي ماوافقش... فهل الكوبلن ده ناقص فعلا في التوكيل ؟ و لو مش موجود يبقي ايه الحل ؟ لان العربيه كل حاجه خلصت فيها ماعدا الكوبلن ده
حاجه تانيه انا عايز اشتكي لحضرتك من مركز الخدمه ده للاسباب التاليه:
1- كل واحد جوه التوكيل شارك باي حاجه عايز فلوس يعني كل ما والدي يروح يتلموا عليه و عايزين اي حاجه !
2- سلموا والدي العربيه و علبة الدركسيون كانت بايظه و كان هيعمل بيها حادثه تانيه و هو راجع يعني صلحوا العربيه و ماجربهوهاش و ده طبعا انعدام ضمير و لما رجعنا العربيه تاني واحد صنايعي قالنا اللي حصلكوا ده عشان مادفعتولناش فلوس ! بالرغم ان والدي دافع للكبير بتاعهم 150 جنيه عشان يوزعها عليهم و اسمه فايز بس هو طبعا اخد الفلوس كلها ليه و المشكله تيجي تكلم اي حد يقولك انا مليش دعوه
3-مفيش اي اهتمام بالعربيه او بالنضافه يعني العربيه متشحمه من كل حته و فرش الابواب بقي كله بصمات !
ده طبعا جزء من المهازل اللي بتحصل هناك و فيه اعضاء كتير هنا بيواجهوا نفس المشاكل و اكتر فياريت حضرتك تشوفلنا حل
شكرا

بخصوص الكوبلن فلازم رقم الشاسيه كامل علشان نعرف الصنف المطلوب ونشوف موجود ولا لأ

وبخصوص الشكوى انا عرضتها على مدير الصيانة بالشركة وابلغني انه عايز بيانات العربية واسم العميل ورقم الموبايل علشان المتابعة وهو بدأ يتابع الموضوع ومهتم به (ارجو ارسال البيانات على الخاص)

المشاركة الأصلية كتبت بواسطة mohamedali

السيد المهندس/طارق
تحية طيبة وبعد ,,
بعد بحث ومعاناة شديدة ولله الحمد وجدت لانسر بومه 1300 مانيوال 2010 فى بعض المعارض النادرة, الغريب إني لقيت فيها شوية إختلافات عن الشكل المألوف للبومه زي:
1- شبكة الريدياتير مختلفة كما هو موضح بالصورة المرفقة
2- كرسي السائق مافيهوش البكرة اللي بترفع وتنزل القاعدة
3- شكل الدريكسيون متغير شوية بس فيه إيرباج
وكان مكتوب عالورقة بتاعة الشحن إنها وارد الإمارات فياريت يا بشمهندس طارق تفيدني هل التغييرات دي طبيعية بتاعة 2010 ؟ وهل ممكن تكون العربية دي بتتجمع بره اليابان؟
وعلى فكرة اصحاب المعارض اللي سألتهم عليها قالولي ان ليها ضمان 3 سنين أو 60 الف كيلومتر
هل صحيح الكلام ده يا بشمهندس طارق ولا لأ؟
برجاء إفادتي حيث إني نويت أشتريها ومحتاج سرعة الرد قبل ماتخلص لأن كميتها محدودة جدا"

وجزاكم الله عنا خير الجزاء

الصورة مش موجودة انما البومة 1300 موديل 2010 المفروض ما اتغيرش فيها حاجة خالص عن 2009
انما لو وارد الامارات ومواصفات خليجية فاطمن تبقى خليجي عادي واتأكد من موضوع ضمان 3 سنوات او 60 ألف هيكون الضمان تبع مين (غالبا ضمان الرواس)

المشاركة الأصلية كتبت بواسطة ebhhu2

المهندس طارق,,
السلام عليكم و رحمة الله و بركاته..

أنا و الحمد لله عملت حادثة من حوالى اسبوعين و الاكصدام اطبق شوية لجوة و و جزء من غطاء الشنطة و الفانوس الخلفى شمال طار فيها و الحتة اللى فوق الفانوس التابعة للرفرف اطبقت. فهل ينفع انة الاكصدام يتعدل فى التوكيل مع العلم انة متكسرش.
فى ناس قاللولى ان التوكيل بيغير الجزء المتضرر مش بيصلحه فهل ينفع يتصلح.
و كمان السمكرة تتكلف فى حدود كام علشان أعمل حسابى و بعد اذنك ثمن الفانوس الخلفى شمال.
السيارة لانسر بومة موديل 2009

أرجو الرد لان بصراحة شكل العربية ميطاقش و هى مخبوطة كدة.

و شكرا لمجهوداتك معانا يا بشمهندس.

في التوكيل لا يتم اصلاح الاكصدام وانما تغييره فقط
وبخصوص السمكرة تتكلف كام فممكن حضرتك تجيب العربية في اي يوم ويتم معاينتها وتحديد تكلفة الاصلاح المطلوبة (بسرعة وبدون تكلفة معاينة) وحضرتك تقرر تعملها ولا لأ
سعر الفانوس الخلفي للبومة 900 جنيه

المشاركة الأصلية كتبت بواسطة behman

1000 شكر يا باشا علي الرد و شكرا للمساعده
بس ال1500 دي نازله بالموتور ده مش متسقط .... و هيه الارجح فعلا بالنسبالي
لو عندك خلفيه عن اسعار قطع الغيار يبقي شكرا جزيلا و هل فعلا زي الناس مابتقول غاليه فعلا و مش موجوده ؟؟

في التوكيل فيه بعض قطع الغيار للكولت القديمة انما مش كتير ولازم رقم الشاسيه للعربية علشان احدد اسعارها ونوعيتها بس رأيي انها مش هتكون كتير المتوفر منها

المشاركة الأصلية كتبت بواسطة nashaat1970

السلام عليكم
المفتاح الاحتياطي ضاع مني اجيب مفتاح تاني من فين وشكرا

التوكيل فيه كل المفاتيح بس لازم نحدد الأول هو المفتاح ريموت ولا بدون والعربية 1600 بايموبيليزر (مفتاح مشفر) ولا 1300 بدون تشفير