الموضوع: ماهو الشنبر و أزاي ممكن يخلي الموتور خفيف ؟

المشاركة الأصلية كتبت بواسطة samirayad

طبعا بأشكرك على التدخل.......وهو ده الهدف من التحاور .....ومش شرط المعلومه الصح جايه منين .....ولكن المهم الثقل الفنى لنا جميعا (لأن أولا الكمال للمولى سبحانه وتعالى )............................نعود الى الفنيات.............ألا توجد فرصه لهروب جزء من غازات الأحتراق من بين ساق ودليل الصباب الى منطقة التاكيهات فى حالة التفويت من مناطق الحبك بين قاعدة الصباب وراس السلندر(يعنى الرأس عاوزه يتعمل لها روديه )........وأنا أعتقد أن ده بيكون السبب الأساسى فى تلف سيلات الصبابات(أى حدوث حمل من الغازات على سيل الصباب لحد مايتلف وينشف من الغازات المتواجده بين ساق ودليل الصباب )..........ولما تكبر العلميه ويحدث خلوص من حول منطقة حبك السيل على ساق الصباب.........أعتقد فى الحاله دى ممكن تزداد عملية التفويت الى منطقة التاكيهات......وهنا بقه حيزداد الضغط داخل حوض التاكيهات.....................مش عارف أنا قدرت أبين وجهة نظرى ولا الصياغه كانت غير كافيه...................ياريت تعليق

اولا احب اشكرك على الأسلوب المتميز فى الحوار والمناقشة، فالهدف فى النهاية ليس اثبات اى مننا هو الصح ولكن طرح وجهات النظر بالكامل حتى يستفيد الجميع

بداية انا حابب اعلق على نقطة ان قصور الحبك بين راس الصباب وقاعدة الصباب قد يكون سبب فى تلف مانع التسرب(السيل)
ماذا سيؤدى اليه قصور الحبك بين راس الصباب وقاعدته، سيؤدى الى تسرب بعض غازات الشحنة من منطقة البستم الى منطقة المانيفولد ، لو افترضنا ان هذا سيؤدى الى تلف السيل، طيب ما احنا عندنا اساسا الشحنة بتخرج بالكامل فى لحظة فتح صباب العادم الى منقطة مانيوفولد العادم،يبقى طبقا لفرضيتك مفروض كاوتش صباب العادم يبوظ حتى فى المحركات السليمة وهو ما لا يحدث، طيب بلاش العادم ، ممكن نقول ان هذا النوع من الضرر هحصل فى منطقة مانيفول الوقود لو حصل قصور لحبك صبابات الوقود لأن منطقة الوقود اصلا باردة، برضه هيكون عندى اعتراض بسيط ان كاوتش صباب الوقود يصنع من نفس خامة كاوتش صباب العادم وبالتالى الضرر غير متوقع، كما ان عادة الصبابات اللى بتحصل فيها مشكلة قصورالحبك أولا هى صبابات العادم نظرا لتعرضها لغازات العادم بكل ما تحمل من اكاسيد كبريت وفوسفور اثناء خروج العادم واكيد حضرتك شفت الفارق بين منظر صبابات الوقود وصبابات العادم فى اى محرك بيتفك، يبقى اسمح لى ان تكون لى وجهة نظر مخالفة لوجهة نظرك فيما يتعلق بتأثير قصور الحبك على كاوتش الصباب مع تقديرى التام لوجهة نظرك

النقطة الثانية، حتى لو كاوتش الصباب متآكل، فالغازات اللى هربت من خلوص الصباب هيكون امامها طريقين، لو بنتكلم على على صبابات الوقود فاطلب منك انت تتقمص دور شوية غاز هربانين من داخل مكبس من صباب ضعيف، وامامك طريقين، واحد فيهم هو المرور عبر سيل صباب ضيق مخنوق-حتى لو متآكل-والآخر هو الدخول الى المكبس المفتوح فى شوط السحب(دائما يوجد مكبس فى شوط السحب فى كل لحظة فى المحركات 4 سلندر فما فوق) واللى الضغط بتاعه سالب وبيرحب بكل غازات منطقة المانيفولد فماذا تختار؟ بيتهيأ لى الاجابة سهلة، اصلا ضغط منطقة مانيفولد الوقود دائما سالب (ويستفاد بهذة الظاهرة فى تشغيل سيرفو الفرامل)ولذلك مستحيل ان غازات منطقة مانيفولد الوقود السالبة تتسرب الى منطقة التاكيهات ذات الضغط الجوى(او الضعط الأعلى قليل من الضعط الجوى نتيجة لتأثرها بضغط غرفة الكرنك)

اما باه لو اتكلمنا فى منطقة غازات العادم، فبالفعل ضغطها موجب مثلها فى ذلك مثل منطقة التاكيهات، لكن لازال امام هواء العادم اختيارين، احدهما ان يدخل مانيفولد الشكمان الواسع مع مقاومة ديناميكية قليلة جدا وبين ان يمر من الخلوص الضيق بين كاوتش صباب متآكل وبين مجرى الصباب، لو انت مكانه تختار ايه؟

مش مصدقنى، هقول لك على تجربة ظريفة جدا، هات شكمان وانفخ فيه من أوله ، وهات صباب راكب عليه كاوتش صباب مشقق واقفل شفايفك علي الكاوتش وحاول تنفخ، وشوف الفرق الشاسع بين مجهود النفح فى الحالتين

وبعدين التجربة العملية بتقول ان لما كاوتش الصباب بيشقق العربية بتدخن، يعنى الزيت هو اللى بينزل من فوق لتحت ، وبينزل ليس تحت تأثير الضغط ولكن تحت تأثير ظاهرة التوتر السطحى التى تدفع السوائل اللزجة لملئ الفراغات ، كما ان برضه لو فرضنا ان غازات العادم الهاربة من الصبابات هى اللى بترفع ضغط منطقة التاكيهات يبقى كان مفروض الواحد لو هيقيس ضغط منطقة التاكيهات بسد مكان الغطاء بيده يجيله حرق من الدرجة الثالثة من حرارة غازات العادم لأن كمية الهواء الموجودة فى منطقة التاكيهات قليلة جدا وبالتالى قدرتها على تبريد غازات العادم-لو قبلنا نظريتك-محدودة جدا، كما ان كمية الهواء التى تكفى لرفع الضعظ لهذه الدرجة لو انها بتعدى فعلا من منطقة كاوتش الصباب لكانت كفيلة تحت درجة حرارتها المرتفعة بحرق كاوتش الصباب اللى قد عقلة الصباع فى دقائق، وليس دهورة اداء المحرك على مدى شهور، يعن ببساطة تخيل انك جبت كاوتشه صباب(اكبر شوية من جلدة الحنفية)وحطيتها فى فرن درجة حرارته 200 درجة(تكفى لتسوية ديك رومى معتبر) وسبتها 10 دقائق، هتفتح الفرن تلاقيها بقت عصير كاوتش، وهو ما كن يتنظر ان يحدث للكاوتش لو قبلنا نطريتك

لذلك برضه اسمح لى اختلف فى النقطة دى معاك، برضه مع احترامى لوجهة نظرك التى قد تكون صحيحة لأنى برضه لا ادعى الكمال ولكنى فقط اطرح رؤية مختلفة

مع احترامي لكل العمالقة اللي بيتكلموا وبجد ماشاء الله عليكو ربنا يزيدكو
بس انا عندي استفسار
خرطوم الفايز عندي داخل علي العمة بتاعة الكاريراتير وبتاع الكاربراتير قالي ما تركبوش وسيبه بره (ليه يا ابن الناس ؟ هو كده ....... يعني اللي عمل العربية قال نحط الخرطوم وانت عايز تشيلو وتقول مالوش لازمة ؟ اه )
ايه رأيكو افادكم الله
وشكرا ليكم كلكم وبالأخص سمير باشا عياد

المشاركة الأصلية كتبت بواسطة ahmad5997

مع احترامي لكل العمالقة اللي بيتكلموا وبجد ماشاء الله عليكو ربنا يزيدكو
بس انا عندي استفسار
خرطوم الفايز عندي داخل علي العمة بتاعة الكاريراتير وبتاع الكاربراتير قالي ما تركبوش وسيبه بره (ليه يا ابن الناس ؟ هو كده ....... يعني اللي عمل العربية قال نحط الخرطوم وانت عايز تشيلو وتقول مالوش لازمة ؟ اه )
ايه رأيكو افادكم الله
وشكرا ليكم كلكم وبالأخص سمير باشا عياد

خرطوم الفايظ فى الأصل موجود لسببين احدهما صحى والآخر فنى، اما السبب الصحى فهو جمع هواء تنفس المحرك(النسبة الهاربة من الشنابر) ودفعها داخل الكاربراتير بما تحمل من ابخرة زيوت وذلك لكى تدخل غرف الاحتراق وتحترق بدلا من ان يتنفسها ركاب السيارة، اما السبب الفنى فهو ان النسبة الضئيلة من بخار الزيت التى يحملها هواء الفايض تمر عبر خرطوم الفاض الى الكاربراتير ويستفاد بها فى تشحيم اجزاء الكاربراتير،
فى السيارات القديمة ذات الكاربراتير يمكن فك خرطوم الفايض بعد ان يقدم المحرك ويبدأ فى طرد كمية كبيرة من بخار الزيت مع هواء الفايض، لأن هذة الكمية الاضافية من الزيت اذا دخلت الى المانيفولد واختلطت ببخار البنزين فانها تدهور خواصه تتسبب فى خنق المحرك الى حد ما

لكن فى السيارات الحديثة ذات الحقن الالكترونى عادة ما يؤدى فك خرطوم الفايض الى (برجلة) اداء المحرك نظرا لأن مكان الخرطوم يسمح بدخول كمية هواء اضافية لم يتم حسابها بواسطة وحدة الايرماس مما يفسد حسابات حقن الوقود تماما، ولذلك فانه فى السيارات الحدثية يتطلب فك خرطوم الفايظ فى نهاية عمر المحرك اجراءات معقدة منها سد مكانه فى الثروتل بادى وسد طرفه واستعمال خرطوم الPCV للتهوية بدلا منه، لكن عموما بالنسبة للسيارات ذات الكاربراتير فمشكلة فك خرطوم الفايض هى فقط تلويث حوض المحرك بابخرة الزيت الى جانب شم رائحة الزيت داخل الصالون، مقابل اداء افضل الى حد ما للمحرك، عموما لو محركك بيجيب بخار زيت من الفايظ فالحل الصحى هو فك خرطوم الفايظ وتركيب خرطوم طويل بدلا منه ينتهى فى مؤخرة السيارة، لكن لو المحرك بتاعك مش بيجيب بخار زيت كتير من الفايظ فركب الخرطوم مطرحه وسيبك من فتى الميكانيكى

الله ينور عليك يا MMamdouh انت وسبعاوي بك
بجد انتوا منورين المنتدي
بارك الله فيكم

المشاركة الأصلية كتبت بواسطة samirayad

الحته دى أنا أقتبستها من كلامك.....علشان برضه أأقول وجهة نظرى فيما ذكرته أنت فى تلك الجزئيه.................................... .......................وهو يجب أن نضع فى التقييم أن غازات العادم مش ممكن تكون قوة الضغط بتاعتها علشان تؤثر فى المحركات الجديده وأحنا المفروض فى شوط العادم وأستنفذنا كل الطاقه الحراريه....وتعتبر حالتها هزيله وضعيفه مقارنة بالضغوط اللى بتكون موجوده فى شوطى القدره والتمدد (التانى والتالت ) لمحرك صباباته مفوته........على أساس بتكون معظم الطاقه الناتجه من الكبس والأنفجار تحولت الى شغل ميكانيكى على عمود الكرنك ...........وجب التنويه

تصدق وتومن بالله، كنت مستنى الرد ده تحديدا ، وكنت هزعل منك جدا لو مارديتش بيه ،لأن واضح ان من كل كلامك ان حضرتك دارس فالبالتالى لازم تنتبه لتلك الثقطة الثرموديناميكية
ولذلك انا من امبارح كاتب الرد ومستنى تعليقك، والرد برضه مبنى على الثرموديناميكا، صحيح ان غاز العام فقدت ثلثى طاقتها بالتسواى تقريبا ما بين طاقة حركية وتبريد ولم يتبقى لها سوى الثلث لتهرب به الى الشكمان( اكيد طبعا انت ملم بهذة التوزيعة التى تقول ان الطاقة الحرارية الناشئة من الحريق تنقسم تقريبا بالتساوى بين طاقة حركة والتبريد وطاقة الغاز الهارب الى الشكمان)
ل
كن برضه لو تأملنا الغاز الهارب من صباب غير محبوك، مش يحق لنا برضه التصور انه فقد 80-90% من طاقته فى فى شكل مقاومة ديناميكية اثناء المرور عبر الفارق الميكرونى الضئيل بين رأس(قرص)صباب وقاعدته وبالتالى فهو بدروه برضه طاقته هزيييييييييييييلة جدا فضلا عن ضآله كميته بالمقارنة بالشحنة الكاملة، لأن لو كان الصباب متآكل للدرجة التى تسمح بهروب كمية كبيرة من الغاز بطاقتها الكاملة لما تحركت السيارة اصلا ، (يحدث صباحا فى المحركات ذات التصميمات القديمة القديمة ، حيث ان السيارة بدون تسخين كافى لا تتحرك لأن الصباب لم يتمدد للدرجة الكافية التى تسمح له بالاغلاق التام على قاعدته بما يمسح بابقاء طاقة تكفى لتحريك السيارة داخل المكبس، وبالتالى اى محاولة لتحريك السيارة قبل سخونة المحرك لدرجة كافية تبوء بالفشل ويتوقف المحرك، ورغم ذلك فان كاوتش صباب السيارة لا يتآكل بسبب التسخين صباحا ويعيش عمره الطبيعى، كانت هذة الظاهرة واضحة جدا لى ايام ما كانت معايا الشاهين ولازلت اعانى منها فى سيارة زوجتى الماروتى)، وبالتالى فكون السيارة لها القابلية انها تمشى يدل على ان الهارب من الغاز من صباب غير محبوك هو كمية ضيلة جدا

مثال آخر ، لو عربية التاكيهات بتاعتها محملة، هذا سيؤدى الى ان الصباب لن ينغلق جيدا وسيكون الهروب على البحرى لغازات بكامل طاقتها من البساتم الى غرف المانيفولد، هروب اكتر بكتير من الهروب الناتج من صباب غير محبوك، ويحدث ان يتسبب ذلك فى سخونة السيارة وضعف قدرة المحرك واستهلاك عالى للوقود، يعنى تاُيره اكتر بكتير جدا من صباب متأكل وفيه مسار ميكرونى لهروب كمية هزيلة من الغاز، مع ذلك عمرك سمعت عن عربية كاوتش صبابها شقق بسبب ان التاكيهات محملة؟

التجربة العملية تقول انه مبيحصلش

فيه مسالة تانية انا حابب اعلق عليها، انا ملاحظ فى رسالتك الأخيرة نبرة ضيق من عرضى لوجهة نظرى ، اذا كان عرضى لوجهة نظرى يثير اى مشاعر سلبية لديك فساتوقف تماما لأن الموضوع بالنسبة لى هو مجرد ختلاف فى وجهة النظر من حق من يتابع الموضوع ان يعرفه وليس صراعا على اثبات من منا الأصوب، فاذا كنت تحب ان اتوقف عن شرح وجهة نظرى فى هذه القضية فى هذا الموضوع فسأتوقف عن ذلك تماما فانا لا ابحث اطلاقا عن اثبات التفوق او اثارة مشاعر سلبية لدى اى من زملاء المنتدى