الموضوع: التفكير المجتمعي السلبي و نظرة المجتمع للدراجة و البساطة

المشاركة الأصلية كتبت بواسطة rembrandt

كلام جميل بس للاسف دى ثقافة شعب واحنا بسم الله ماشاء الله شعوب متخلفة
عشان تغيير العقلية دى عشان تستوعب المتطلبات الجديدة فى الحياة انت محتاج ثورة تطهير عقلى لازالة اثار التخلف والعادات السخيفة للشعب المصرى

فعلا ثقافة الشعب متخلفة جدا .
بس التغيير سهل لو الناس بدأت تحاول تعمل الصح بغض النظر عن نظرة المجتمع للفعل الصحيح ( و لكنه منظور إليه كفعل مخالف للتقاليد أو العادات )
زي ما بنقول بالظبط .... و أنا مالي ... هو أنا اللي هاغير الكون !!
طبعا دي بتكون نظرة سلبية
يعني أنا بعمل 500 مليون مليار خناقة في اليوم علشان أحاول أفهم سواقين الميكروباظ غلطهم ... هوصحيح أنا بأدن في مالطا لأنهم كائنات لم يتكتمل تطوير مخها و هو ما نُطلق عليه التخلف العقلي و البلاهة .
و لكن صدقني .... كبر دماغك من نظرة الناس أدام اللي بتعمله صح و مفيهوش لا عيب و لا حرام .
و لتسقط العنتظة المصرية الكدابة إلى الأرض و إلى الأبد .
شكرا للمداخلة يا باشا و نورت الموضوع بإفادتك .

المشاركة الأصلية كتبت بواسطة دينا أبوالعلا

يااااااااااااااااااااااه يا جماعه انتو جيتو علي الجرح انا من زمان نفسي الناس تركب عجل للاسف معاصرتش الفتره اللي كان العجل فيها حاجه عاديه بس امنيه حياتي ترجع تاني
بالنسبه لموضوع الانعره الكدابه فده بحسو لما بقف امسح عربيتي بحس ان الناس بتبص باستغراب معرفش عشان بنت بتسمح العربيه ولا المبدا عندهم هو اللي فيه مشكله ما علينا يعني المهم اني نفسي اركب عجلk30::k30:

فعلا يا دينا ..... الموضوع صعب حبتين بالنسبة للبنات ...
و أنا لا أُشجع خروج بنت بمفردها لتركب دراجة
حيث سيأتي إليك الكائنات المتخلفة عقليا و لن تكوني في أمان أبدا أبدا .
للآسف بلد درجة تالتة حضاريا .
ربنا يهدي الناس

المشاركة الأصلية كتبت بواسطة aif

حلقة في سلسلة .....
الموضوع محتاج قدوة
الناس اللي بتتمنظر بالسيارات بيقلدو علية القوم
لما الناس تلاقي وزراء بيركبو دراجة اكيد ح تبقى حاجة شيك واوريجينال وحيقلدوهم
المشكلة بقى ..... عاوزين دراجة مقاس الدكتور نظيف

فعلا يا باشا ......... كلامك مظبوط و تمام و الله
بس برضه الناس ممكن تغير من نفسها و تعمل الصح .. بغض النظر عن القدوة ...
بس سيبك أنت .... أنت زي العسل
أنت عايز تجيب عجلة لنظيف و لا أيه ؟؟؟؟ ده عايز عجلة تفصيل يا عم الحج .... مينفعش عجل السوق ... ما يكلش معاه عيش و بعدين الوزير نظيف ينفع يلعب سلة :k38: و أهي برضه رياضة
و نورت المحكمة .... أنت لسة ساكن في دير النحاس يا عسل ؟ .... أحذر الدواء فيه سُم قاتل .... يا إما تسيب دير النحاس بقى ....

المشاركة الأصلية كتبت بواسطة mada121977

فى الستينات وبعد افتتاح مبنى الاذاعه والتليفزيون الجديد وقتها فى ماسبيرو قرر احد مذيعى الاذاعه المشهورين فى ذلك الوقت الذهاب للمبنى بالدراجه واستمر على هذا الحال تقريبا كام يوم الى ان عرف رئيسه فى العمل انه بيأتى الى العمل بالدراجه فقام بفصله من العمل فى الاذاعه !!! (دى قصه حقيقيه فعلا )
يعنى حتى من زمان والوجاهه الاجتماعيه والعنطزه مؤثره فى المجتمع المصرى نظره الافراد فيه لبعضهم البعض ومن الطبيعى ان النظره دى تاخد وقت طويل جدااا لتغييرها وممكن ماتتغيرش اساسا

تحيا ج ع ع و تخلف ج ع ع
شكرا يا باشا على المعلومة دي .....
و شكر على المرور

المشاركة الأصلية كتبت بواسطة mahora

الوجاهة الفارغة و العنطزة الزائفة متأصلة فى الشعب المصرى من ايام الفراعنة، لما كنت تلاقى فى داخل المقابر قوائم طويلة بالقاب المتوفى الرسمية مثل حامل الختم الملكى و المشرف على بناء مقبرة الملك و حتى حامل الصندل الملكى، الخ الخ الخ..... و فى اخر القائمة الطويلة اسم المتوفى من اربع حروف مثلا .... تى تى (الباشا المتوفى اسمه كده)

وراثة و العياذ بالله .... كله كدب في كدب ... مظاهر كدابة
ج ع ع بأقتدار

المشاركة الأصلية كتبت بواسطة ابو سيف

المصري هيفضل طول عمره مصري

النيل رواه .. و (الخير) جواااه

تمام ...........

المشاركة الأصلية كتبت بواسطة mahora

هو برضه لازم استكمال المنظومة، لانه حتى لو تم تغيير الادمغة (وهذا يحتاج الى عشرات ان لم يكن مئات السنين)، فان ما لدينا من طرق و زحام لا يسمحان بتنفيذ هذه الفكرة، واذا حاولنا الان سيكون المصير ان ننزلق الى بلاعة او نخيش فى رصيف ارتفاعه 30 سم او ننقلب بسبب مطب زجزاجى حلزونى يجعلك تعانق الارض بقوة 9 ريختر

المدن الجديدة و خارج القاهرة الفكرة قابلة للتنفيذ .
شُكرا يا باشا على المرور و التعليق

المشاركة الأصلية كتبت بواسطة abo_hosni

تيجي نبادل العجل و نتسابق. بس الفرامل بتاعتي حاجة تانية. تباطؤ رهيب بأأقل ضغط مش أي كلام يعني :k4:
بعدين أنا عامل فيها زمبة كده أن الفرامل اليمين للعجلة الخلفية و الشمال للعجلة الأمامية (بالعكس يعني). كذا واحد ياخد لفة بيها يتقلب لما يمسك فرامل شمال وهو بيلف

لا .... ملاك ملاك ....

فكرتني بواحد مات و كان سايب وصية أن عربيته (المرشيدس) تترفع جنب المقبرة بتاعته و كانت S500 أو S600 سوداء مش فاكر الموديل بالضبط. مش عارف شفتوها أو لأ. سأحاول أجيب لك صورة العربية و هي مرفوعة داخل المقابر!!!!!! بجد مش باهزر

هو ده قمة التخلف و الأنعرة الكدابة .... و غياب الإيمان
ربنا هو الهادي

المشاركة الأصلية كتبت بواسطة mahora

ده بقى اسمه الابداع الذى تنتجه القريحة المصرية على مر العصور، واذا كانوا الاجداد قد بنوا اهرامات تتضاءل امامها الانجازات الحديثة لتخليد ذكراهم، فالاحفاد كانوا كرماء و خلدوا ذكرى فخر صناعة غيرهم، هذا هو الفرق بين الحال من 3000 سنة و الحال الان

تمام و مظبوط الكلام .......... شعب متخلف و أنعري
بس أحنا شتمنا كتير قوي في نفسنا .... بس أحنا نستاهل الشتيمة

المشاركة الأصلية كتبت بواسطة SuccessCre8or

لا حول ولا قوة إلا بالله ....

لسة بدري علينا خالص!

فعلا .......... لسة بدري أوي

المشاركة الأصلية كتبت بواسطة powerofhelll

فين المكان الي هنمشي بيه بالعجل

المدن الجديدة .... المدن خارج القاهرة و المسافات القصيرة

المشاركة الأصلية كتبت بواسطة karim_monir

شوف انت اثرت نقطة شغلاني كتير قوي قوي
ليه بقى
لاني بيني وبين شغلى 5 كم
ممكن اخدها عن طريق جسر السويس وده يغور لاني لو عملتها مش هاروح لعيالي
وممكن عن طريق جوزيف تيتو وده ارحم
المشكلة في حاجتين
ان شركتي تموووت في المنظرة شان معظم الشركات الاجنبية العاملة في مصر لدرجة ان السواقين عندنا عندعم عربيات وبعض السعاة كمان وده مش دليل ارتفاع الدخول ولكن دليل المنظرة الكدابة فعلا
ثاينا هدومي وحط تحت البند ده خطين لاني مش معقول اروح كل يوم بهدوم متبهلدلة بسبب العجلة وده من طبيعة جو مصر والشوارعنا النضيفة جدا
رغم ان المكان اللي هاركن في العجلة متوفر وبسهولة سواء في البيت او الشغل
وكمان عشان الدكتور بتاع ضهري نصحني بيها كتير من كتر القعدة قدام الكمبيوتر
لدرجة اني قلت بلاها عجلة واجيب الفسبا الصيني ال 100 سي سي دي ام 3 الالاف جنية وشكلها حلو وعملية وهاتوفر هلك العربية
اللي خلاني اتراجع مثال جيد لشخص محاسب اول ما جه الشركة كان بيجي بموتوسيكل
رغم ان ربنا رزقة بعربية كويسة الا انه كل مايقعد في اجتماع ولا قعدة اصحاب العقد ومرضى النفوس يقعدة يقولوة اخبار العنننن ايه يا ..... اشارة الى صوت الموتوسيكل

بلد منظرة فارغة والله

عنن عنن عنن ..........
يا عم سيبك من الناس
أصل الشعب المصري ده أحلى حاجة فيها
التريأة على خلق الله ............ مفيش تقدم حضاري و لا ثقافي
بجد أتكل على الله و هات اللي أنت عايزه و أعمل اللي أنت عايزه و كبر دماغك
هو الموضوع بس محتاج شوية شجاعة و أقدام و بعدين هاتلاقي نفسك أخدت على كدا و اتعودت تواجهة الغلط بفعل الصح .
و بعدين ليه تخلي نظرات الناس تحرمك من متعة ركوب دراجة و تحسين صحتك و تقويم ظهرك ( أصل أنا برضه بأعاني من نفش المشكلة )
و ألف ألف سلامة عليك يا عسل و ربنا يشفيك و يريحك .

المشاركة الأصلية كتبت بواسطة octooo

انا عاوز اجيب عجلة واظبطها من كتر الكلام دة هههههههههه

طيب يلا .... علشان نشوف الناس الرياضية هنا بقوا كام واحد
لحد دلوقتي
مفيش غير العبد لله و أبو حُسني و أبو عبد الله ...

المشاركة الأصلية كتبت بواسطة MoToRiZeR

مش كل الناس تعرف بيتك و تقدر تخش جواه عشان تعرف مستواك المادي، إنما كل الناس تقدر تشوف عربيتك .. لذلك تحولت السيارة إلي السلعة الوحيدة تقريباَ التي تستطيع أن تعبر عن مستوي الشخص المادي، و كلما كانت السيارة فارهة أكثر زاد إحترام ووجاهة الشخص .

لو عربيتين بيركنوا واحدة مرسيدس و واحدة 128 .. السايس هيجري علي مرسيدس .. و ذلك ليس تقديراَ لراكب المرسيدس و إنما المرسيدس نفسها .. و تجاهلوا لل 128 هو تجاهل للسيارة نفسها و ليس راكبها أيضاَ .

و مع إرتباط الطبقة الوسطي فما فوق بالسيارات، إرتبطت المواصلات بالمستويات الدنيا في المجتمع و هي الطبقات التي يسهل تجاهلها خاصة بالنسبة للحكومة إذ أنهم لا يمثلون أهمية لهم .. فأصبحت المواصلات غير أدمية .

لذلك فعملية التنقل في المواصلات في مصر مرتبطة بعوامل نفسية و تراكمات ثقافية أكثر من أنها عملية تنقل من مكان لمكان أخر، بل أن الجوانب الإجتماعية فيها تفوق عملية التنقل ذاتها .

لذلك فمن الصعب أن يخرج من هذا الخليط أشخاص يفكرون في البيئة و الزحام و مصلحة المجتمع .

كلام مظبوط ....و تحليل منطقي
و لكني لا تراجع و لا إستسلام للعادات المتخلفة الكئيبة التي تجعلنا نفقد الأحساس بحلاوة الحياة و تحرمنا من فعل و ممارسة رياضة جميلة مُحببة إلى الكثير مننا .
شكرا على المداخلة يا موتوريزر ... نورت المحكمة

المشاركة الأصلية كتبت بواسطة hh

انا ابن عمتي ساكن في وسط البلد و شغله في الدقي و بيروح شغله بالعجلة. مع العلم هو عنده عربية citroen C4. بصراحة لما سمعت منه الفكرة دي عجبتني أوي, بس انا عندي مشكلتين:
أولا ان انا ست, و طبعا شعبنا المصري العظيم بيعتبر انه اي واحدة ماشية في الشارع تستاهل تتعرض لكل انواع المضايقات اللي تيجي في خياله, فما بالك لو الواحدة دي اتجرأت و ركبت عجلة.
ثانيا ان انا طبيعة شغليOutdoors و باتنقل كتير فموضوع العجلة ده مش حيبقى عملي خالص.

طيب و الله أبن عمٍتك ده ... راجل 100 % .... طيب ليه فعلا يأخد العربية من وسط البلد للدقي و يقف بالساعات في اشارات المرور و بعدين ستهلك بنزين و كمان يدوخ عالبال ما يلاقي مكان يركن فيه .
تحية خاصة له و أمثاله من الناس المثقفين المتفتحين .
و فعلا البنت ما ينفعش تركب عجلة لوحدها في بلدنا المحروسة ..للآسف
الغلاسة من الكائنات المتخلفة عقلية ستفوق الحد .
الله يكون في عونكم يا بنات مصر .

المشاركة الأصلية كتبت بواسطة lancerevolution

الموضوع كمان مش على العربية الوضوع فى الشغل كمان كله عايز الشغل يجيله تحت البيت و كله عايز يشتغل فى بيته أصلا و يسكن جنب بيت والده أو العيلة
فى واحد صاحبى أخوه الكبير عربيته زى الزفت و بيبقى عليها تراب لازق بسبب الندى الصبح بقوله هو ليه أخوك قبل ما يروح الشغل يمسح العربية لحد لما تسخن يقولى ما ينفعش أصله بيبقى لابس بدلة مش فاهم يعنى إيه مع إن نضافة العربية بتأثر على نفسية الواحد
دا غير واحد تانى بيوصل لأخر شارعهم يعنى بتاع 200 متر بالعربية عشان يجيب علبة سجاير و لو العربية مع والده يبقى ينام
الناس عايزة الحاجة تجيلهم لحد عندهم
و لما نظيف نزل لعب كورة و طايرة الصحافة إتريقت و الناس إتريقت عشان نزل

فعلا الكسل و التناحة ........... هما سمة أساسية
ربنا يهدينا جميعا

المشاركة الأصلية كتبت بواسطة ams

فضلت حوالى شهر اقنع والدى انى اجيب عجله و اروح الجامعة
بيها و هو يرفض رفضا قاطعا معتبرا ان ركوب العجلة قفزة للخلف و يقوللى "احنا مش عارفين نمشى على 4 هتمشى انت على اتنين ؟ "- يقصد العجل- ده غير انه يرفض بشده انى اسوق العربية و غالبا بيصرف عليها اكتر ما بيصرف عليا
يلا يعيش و يصرف

بس فى اتنين اصحابى دلوقتى بيروحوا الكلية بالعجلة يوم و يوم
هى بس عاوزة شوية شجاعة و ثبات
يعنى لما بنجرى حول القصر الجمهورى او الكلية الحربية تلاقى ردود افعال الناس غريبة جدا يعنى اللى يبصلك من فوق لتحت و اكنه بيقول ايه الهبل ده
و اللى يطلع دماغة من العربية و يقولنا عاش يا رجالة عاش و اللى ينظرلك نظرة خاوية من اى تعبير متعرفش هو متعجب ولا مش مستوعب

سيبك من تعليقات الناس في الشوارع ... أنت مش بتعمل حاجة غلط و لا بتأذي حد
و يلا شجع نفسك و هات عجلة و أتكل على الله .....
رياضة مفيدة و توفير فلوس المواصلات أو البنزين .... و كمان أسرع في الوصول في حالة القاهرة الكُبرى المخنوقة .
الله يكون في عونك وتقدر تقنع السيد الوالد ....
و يلا علشان تنضم للعبد لله و أبو حُسني و أبو عبد الله

المشاركة الأصلية كتبت بواسطة deee

للأسف نحن نشعب نهوى ونعشق

النفخة الكدابة
المظاهر الفارغة
الفشخرة (سورى فى اللفظ)
الضحك على الدقون

أنت جبت من الأخر .......... للآسف هي دي سمات شعبنا العزيز فعلا ....

المشاركة الأصلية كتبت بواسطة TaoTao

موضوع متميز وعرضه أكثر من وافي ..
فكرني بجدي (خال أمي) رحمه الله، كان يذهب لعمله ويعود يومياً بالدراجة مسافة لا تقل عن 15 كيلومتر.. بصراحة كنت دايماً اقول يابخته، كانت سككته كلها كورنيش :) والطرق أكيد فاضية .. .إنما دلوقتي نمشي بالدراجات للعمل ازاي؟ لا أتخيل أنني أجرؤ على قيادة دراجة في شارع الطيران مثلاً، أكيد النتيجة مفرمة !!

تعليق آخر على الموضوع، احنا شعب يموت في الأنتخة عشان كدة الستات عندنا مربربة والرجالة من ذوي الكروش لأننا نكره التعب والمشي، وده في كل الطبقات حتى اللي معهوش سيارة، خد عندك الست حالياً بدلاً من المشي للسوق تشير لتوكتوك في الذهاب والعودة، الشباب يوقف ميكروباص لمسافة نصف محطة وهو زي الشحط ولامؤاخذة، الأطفال في خروجهم من المدارس يتقافزون في أوتوبيسات النقل العام لنصف محطة أوتوبيس ويتعرضون لزجر الكومساري في منظر هزلي يومي احنا شعب أنتييييييييييييخ.

فعلا ياباشا ..... العشب أنتيخ أنتيخ أنتيخ و محدش بيحب يمشي
سُبحان الله .... ناس غريبة مع أن المشي مفيد صحيا
ربنا يهدي الناس و يهدينا .
و شكرا على المداخلة و التعليق

المشاركة الأصلية كتبت بواسطة zobaaa

ياعم انت دخلت دماغي وعششت فيها اخر حاجه
خصوصا فموضوع الجواااااز فعلن يا جماعه صباح المنظره الفارغه

دي بقى كارثة لوحدها
موضوع الزواج و المغالاة في المهور و تكاليف الزواج .
ربنا يهدي الناس و تخرج من دائرة الفشخرة الكدابة دي .

المشاركة الأصلية كتبت بواسطة Ayman_52

بجد موضوع اكتر من رائع...والصراحه كل طروحات حضرتك بتحسسنى ان لسه فيه امل للتغير للافضل.

وموضوع العجله دا بحترمه جدا...بس الصراحه ماينفعش مع شوارع المحروسه...
بس انا حاسس ان ممكن يحصل بجد وخصوصا فى المدن الجديده ..لان شوارعها تسمح هناك بذلك.

وبخصوص اللى حضرتك عملته ..ان حضرتك بتهتم بسيارة حضرتك بنفسك..بجد احييك جدا جدا....
لانى فعلا بيكون نفسى اعمل كده..بس الصراحه الكلام اللى حصل مع حضرتك حصلى وخلانى ابطل ...

ياريت لو حضرتك ساكن جنبى...بجد هتكون قدوه لناس كتيره...وانا اوعدك انى اول واحد هابقى مع حضرتك


الف شكر يااستاذ/تـــوت عالطرح المميز المختار.

شُكرا يا أستاذ أيمن و نورت الموضوع
بس عايزك ما تنكسفش من حد ... و أنزل تاني نظف عربيتك بنفسك مفيهاش أي مشكلة ..... اللي مش عاجبه ما يبصش
دي ناس عايشة في العصر الحجري عقليا .
و أنت ممكن تكون القدوة
الموضوع كله محتاج شوية تحدي للتقاليد الغلط و أهم حاجة أنك تقتنع أنك صح و متنكسفش .... و كبر دماغك من العالم المتخلفة دي .
ربنا يهديهم
و نورت الموضوع بتعليقك الجميل

طيب دلوقتى فى مشكلة ممكن مثلا العايش برة المدن المزدحمة و المكدسة عربيات واقفة مستنية الإشارة يبقى صعب التنقل بالعجلة و سط كتل المعدن المتوقفة و خاصة إن الى راكب عربية غالبا و ليس الكل لأن من الخطأ التعميم بيبقى فاكر نفسه هو الى ليه الأولوية و دا صح لما أكون فى نهر الطريق الأولوية للعربية إنما فى الشوارع الجانبية ال 6 و 10 متر بردوا بيبقى فاكر نفسه هو الكل فى الكل مع إن هنا الأولوية للماشى على رجله طب ليه الى راكب العربية ما بيحترمش الى راكب عجلة و ماشى أقصى اليمين ممكن عشان إحنا بنجب الطنطيت و الفشخرة على خلق الله يمكن دا طبع فى المصرى و لا عقد نفسية ماتعرفش بس أكيد السبب البعد عن الدين سواء مسلم أو مسيحى الديانتين بيدعوا للتسامح و إن نفسيتك تكون كويسة تجاه الأخر فيمكن العجلة دى حاجة صغيرة بس بتبين للناس نفسيتنا المعقدة و بتطلع العقد الى عندنا و البتبين قد إيه إحنا ناس بتوع مظاهر

المشاركة الأصلية كتبت بواسطة lancerevolution

طيب دلوقتى فى مشكلة ممكن مثلا العايش برة المدن المزدحمة و المكدسة عربيات واقفة مستنية الإشارة يبقى صعب التنقل بالعجلة و سط كتل المعدن المتوقفة و خاصة إن الى راكب عربية غالبا و ليس الكل لأن من الخطأ التعميم بيبقى فاكر نفسه هو الى ليه الأولوية و دا صح لما أكون فى نهر الطريق الأولوية للعربية إنما فى الشوارع الجانبية ال 6 و 10 متر بردوا بيبقى فاكر نفسه هو الكل فى الكل مع إن هنا الأولوية للماشى على رجله طب ليه الى راكب العربية ما بيحترمش الى راكب عجلة و ماشى أقصى اليمين ممكن عشان إحنا بنجب الطنطيت و الفشخرة على خلق الله يمكن دا طبع فى المصرى و لا عقد نفسية ماتعرفش بس أكيد السبب البعد عن الدين سواء مسلم أو مسيحى الديانتين بيدعوا للتسامح و إن نفسيتك تكون كويسة تجاه الأخر فيمكن العجلة دى حاجة صغيرة بس بتبين للناس نفسيتنا المعقدة و بتطلع العقد الى عندنا و البتبين قد إيه إحنا ناس بتوع مظاهر

نهر الطريق للسيارات و الدراجات الهوائية و البخارية و كلهم لهم الحق فيه

المشاة ليس لهم أي حق إلا عبور الطريق

الناس في مصر متعرفش يعني أيه رصيف
و اللي بيمشي على الرصيف في مصر للآسف يبقى جبان
واحد صاحبي قالي كدا بالحرف الواحد
بيقولي الرصيف ده ملوش أي لزمة
لازم ننزل نرزل على أصحاب العربيات
مع أنه صاحب العربية و لو شاف ناس مشاية في الشارع في وسط الطريق بيتخانق معاهم ....... و هو بيعمل كدا نفسه زيهم .
تقريبا أن أحنا شعب مريض نفسيا فعلا

المشاركة الأصلية كتبت بواسطة enas75

انا محترفه ركوب عجل من وانا صغيره طول السنه بتحرك بيها ........
وبحبها جدا ........
السنه اللي فاتت قعدت تقريبا لمده اسبوع اشجع زمايلي الشباب في الشغل
انهم يسيبو العربيات ويجيو الشغل بعجل (كلنا تقريبا ساكنين حوالين الشركه)معظمهم ساكن في النزهه الجديدة وشيراتون والشركه في شيراتون قعدو يقولو منظرنا وشكلنا (جتهم خيبه).......
والله العظيم انا عندي استعداد اركب العجلة من الصبح ....
ميهمنيش الناس حتقول ايه ديتها خرزانه واللي يفتح بقه يتلب بيها .......
مش مشكلتي الزحمه حيث اني محترفه في ركوب العجل......:k36:
ومش مشكلتي الشركه اللي باشتغل حيث اني اللي حيفتح:POINTI~2[2]: بقه حيترد عليه رد حيندم انه فتح بقه.....
مشكلتي الوحيده ولادي الصغيريين (5 سنين و 2 سنه) حوديهم الحضانه
ازاي بعجله حيث انمصر مفيهاش عجل مجهز لاكثر من راكب.......
كما انهم لسه صغيريين معرفش اسيبهم يمشو بعجل لوحدهم

والله يا ايناس انتي زي العسل بجد انا ببقي مبسوطه قوي لما بشوف حد راكب عجله ومن كام يوم كنت بفكر ليه مش بنركب عجل
هي فيها عيبين العربيات مش هتخليكي تمشي والشوارع المسفلته بتاعتنا هتزحلق العجل من كتر نضافتها
والمشتكله التالته بالنسبه للبنات هنلبس جيبات ازاي