الموضوع: ::: البولونيز المظلومة :::

المشاركة الأصلية كتبت بواسطة asaeed

أنا برده كنت في سوق السيارات أول انبارح ولاقيت أسعار البولونيز عالية جدااااااااااااا بس بصراحة حالة محترمة زي ما علق الزميل السابق هي دي أسعار السوق بالضبط وهي دي الموديلات إللي كانت موجودة في السوق، ده كمان كان في عربية ملاكي غربية موديل 1987 وكانت دي أرخص عربية والراجل كان بيتكلم في المعقول وكان عايز 18500 يعني تخلص آخرها 16500 جنيه ده كمان بالعافية بس كانت دواخلها حلوة وفرشها كويس، بس بصراحة أنا شايف من وجهة نظري أن البولونيز تستاهل هذه الأسعار وأكتر لأنها والله عربية عملية جداً بس عايز تكون إيدك فيها وتنظفها باستمرار
أما المقارنة بالـ 128 إللي بيتكلموا في 18000 وموديل 1987، يعني بزمتكم أجيب 128 بـ 18000 ولا بولونيز بنفس السعر
بس الحاجة الغريبة الملحوظة في السوق أن الـ 128 إللي كانت بياعة، مكانش عليها طلب خالص (للعلم الـ 128 اشترتها وبعتها بعد 40 يوم علشان مدخلتش دماغي غااااااالص)

هو سعر البيع في المحافظات غير القاهرة لان كان في حد من المحلة عارض بولونيز موديل 91 و كان عايز فيها 12000 بصراحة انا شكت في السعر قلت احتمال العربية فيها مشكلة بس هو على كلامه ان العربية بحالة جيدة و مش محتاجة مصاريف و عدداتها كلها شغالة

ممكن لو اى حد يعرف اى عربية بولونيز معروضة للبيع فى حدود 14000 وتكون بحالة كويسة وياريت تكون فية ماتور 131 يكون افضل

دة رقم المحمول 0184715195 عاطف احمد

علشان كل الناس اللى اعرفهم مش عاوزنى اشترى بولونيز

ممكن الاستاذ اللى يعرف العربية اللى فى المحلة يارب تكون موجودة لسة يقول علية

فبرجاء المساعدة وشكرا

السلام عليكم
أنا محمود لسة شارى بولونيز 89 حمراء منذ شهرين بصراحة على أراء الناس واضح إنها جميلة
بس أسمع إن عفشتها مبتستحملش هو دة صحيح ولا لاء فى تكة عندلف الدريكسيون جامد مش عارف من إية
لو عندك ميكانيكى أو عفشجى كويس قولى وأكون شاكر جدأ جدأ
أنا فى إنتظار الرد شكرأ

المشاركة الأصلية كتبت بواسطة bolonez

السلام عليكم
أنا محمود لسة شارى بولونيز 89 حمراء منذ شهرين بصراحة على أراء الناس واضح إنها جميلة
بس أسمع إن عفشتها مبتستحملش هو دة صحيح ولا لاء فى تكة عندلف الدريكسيون جامد مش عارف من إية
لو عندك ميكانيكى أو عفشجى كويس قولى وأكون شاكر جدأ جدأ
أنا فى إنتظار الرد شكرأ

اولاً الف مبروك على العربيه و اعطاك الله خيرها و جنبك شرها...
بالنسبه لموضوع التكه هي في الصالون ولا من بره؟ عشان في صوت تكه بيطلع من الريشه بتاعه دراع الاشاره و انت بتلف الدركسيون على اساس لو انت فاتح الاشاره في جهه اخري تقفل...
و يا ريت توضيح اكتر عشان الاعضاء يقدروا يفيدوك اكتر...
يا رب اكون افدت

الموضوع ده معدى ال 300 صفحه- امال لوكان الكلام على مرسيدس كان بقى كام ؟؟؟؟
من الاخر السوق المصرى هو اجدع سوق يحكم على عربيه بالموت او الحيا
والعربيه دى اعدمت من تاريخ ما نزلت فى 1984- ركبتها والله وكانت زيرو- وللاسف تحس انك راكب محرات
القوه والعلو مطلوب- بس زيها زى النيفا- للاستعمال فى الصحراء لوالغيط-
يا راجل ده انا قابلت سواقين محترفين واحد منهم قالى سبت خدمة السواقه الخصوصى من تحت راس العربيه دى
ده حتى عند الميكانيكيه لما كان حد يجى يصلح العربيه كانوا يتغمزوا ويقولوا للزبون اركن - بعيد كده شويه اصل يومك طويل
حتى السمكريه اللى كانوا بيشدوا عربيات علشان يكسبوا فيها عمرهم ما شفتهم بيشدوا واحده بولنيز- ولما سالتهم قالوا حرام عليك نشدها وندفع من جيبنا هى وشها زى قفاها