التفكير في إعادة إنتاج بيجو 504 مرة أخرى بواسطة أباظة بعد مرور 35 سنة على مولدها!!!

**mazagngi2010** · 30-08-2009 07:22 PM

ياجماعه تفكيركم مش عاجبنى بصراحه
لانكم بتفكروا كاصحاب سيارات ملاكى مش اجره
انا لو سواق اجره هفكر ازاى:
-تغور راحه الزبون ماكده كده هيتنيل وهيوصل المهم العربيه تشيل احمال على قد ماتقدر (شوله -كراتين جزم بالهبل-بضاعه) علشان اخد اجره زياده لكن لو جبت الحديث زى اللوجان ممكن تكسفنى طبعا وعمر المكنه -الموتور هيقصر بسرعه-لانها مش متصممه على الاحمال دى
-مش هنسى ان الشعب ده اس الفساد يعنى لو عيل صغير مع امه هيحسرنى على الصالون من اول اسبوع لكن البيجو مش فارقه دى هيا اللى هتعوره
-الصياااااااااااااااانه ودى اهم نقطه واللى بيلعب عليها اباظه ويبقى غبى قوى لو غير فى الموتور او العفشه او الكهربا ليه؟؟
لان كل سواق عليها حافظ فيها كل مسمار حتى لو عارف انه هيتصلح كل شويه بس اهو الراجل عارف هيعمل ايه لكن لو ركب بقى اى حاجه غريبه عليه فين وفين لما يطبع عليها ده فى حاله انه كسر خوفه منها الاول وهديكم مثال بسيط جدا قدامنا وهو الميكروباص التويوتا الجديد 0 ناس كتييييييييييير كاشه منه مع انه تحفه خصوصا الوسط والكبير لكن السواقين جابوا الصينى لانه رخيص وبيركب عليه التويوتا واول مالموتور يفوت هيغيروه باى مكنه تويوتا تسعينات والفينات وهتمشى كده كده
-خوف السواقين من التوكيلات والاماكن الغريبه عليهم لانهم عارفين انهم كدا كدا هيدبحوا فيها حتى لو لهم معامله خاصه فى الصيانه بس ده طبع المصرى اللى نعرفه احسن من اللى منعرفوش
-ال504 اوتومبيل بيبان فيه اى حاجه ياهندزه يعنى لو صرفت عليه 10 جنيه فى حاجه هتنطق وهتحس انك صرفت عليه لكن الباقى كله كسر وكمان ال504 مبيفتحش بقه لما تشده الا بعد كام سنه
(من بق احد السواقين على خط الزقازيق-عبود)
ومتنسوش طبعا ان لو فانوس اتكسر هيتصرف لكن لو لوجان هيتخرب بيت اهله واحنا ماشيين على هوا يابشوات وربنا اللى بيسترها
-شعبيه العربيه وعراقتها فى الصعيد والارياف وتحملها لكل الظروف ودى حاجه غنيه عن التعريف
-الراحه النفسيه حيث انهم ش\كهنوا الاسد العجوز وجابوا اسد شباب رغم تحسرهم على الخامه الفرنساوى اللى على ابوها ومحمله
عقليه بتفكر كده تقنعها ازاى انها تجيب تويوتا افانزا ولا حتى لوجان يابهوات
------------
محدش يزعل منى اصل تقمصت دور السواقين بجد فى الرد ده
اقوم افطر بقى

**JAM** · 30-08-2009 08:26 PM

المشاركة الأصلية كتبت بواسطة lord_fouad

مش بعيد نسمع ان مصنع 200 الحربي بيفكر يجمع عجلات احمس الحربية

نياهاهاهاهاهاهاهاهاهاهاها :pointi~2[2]:

**bassemali** · 30-08-2009 09:46 PM

كلام فاضي قال بعد ماجمعوا اللادا و 128 وشاهين اللي أنقرضوا من كل دول العالم وماأثبتوش كفاءه نهائيا بل أن كلهم أعطال ولهم مواقف بايخه وسخيفه ولا يصلح للتعامل معاهم إلا سواقين التاكسي واللي معتادين على الذهاب للميكانيكي والعفشجي كل شويه ( ولو العربيه سليمه ومافيهاش حاجه بيروح لهم برضه يشرب شاي ) وأنا لا أنكر أن العربيات الشاهين والادا و 128 أثناء فترة عملهم في مصر كان لهم الكثير من المميزات وكذلك الكثير من العيوب سببها الأساسي فشللللللللللللل التجميع المصري بجميع المقاييس يمكن لو كانت العربيات دي جايه من بلدها ماكانش هيبقى فيها المشاكل دي كلها ( مثال حي الادا الروسي مشاكلها أقل بكثير من نظيرتها المصريه ) بعد كل ده لسه عايزين يجمعوا البيجو 504 طبعا لو ده حصل فأنا مش معترض لسبب واحد بس وهو أن البلد هتنظف من كم العربيات البيجو القديمه التي تسير على أراضيها وأيا كان هيبقى أسمك (كراكب يعني ) راكب تاكسي زيرو خلاف هذا السبب فأنا شايف أنه لايصلح أبدا إعادة تجميع سياره بتكنولوجيا قديمه عف عليها الزمان من أكتر من 30 سنه ويجب أن نضع في الحسبان انه إبتداء من 2010 سوف يتم تخفيض الجمارك على السيارات الأوروبيه وده هيفتح المجال لكثير من السيارات الغاليه ( من مجموعة فولكس فاجن مثلا) حاليا أنها تكون بسعر مناسب وأقل كثيرا من سعرها الحالي وهيسمح لها انها تكون بديل مناسب من حيث القوه والأعتماديه والسعر للبيجو 504 واللي سعرها حاليا لايقل عن 40000 جنيه .

**eng.octooo** · 30-08-2009 10:00 PM

الرينو اللوجان ال7 راكب جامدة وشكلها ثورى جدااااااااااااااااااااااا ااا بالنسبة للتاكسي وعلى الاقل هاتكون احسن من البيجو والصينى

**ahmed1981** · 30-08-2009 11:10 PM

المشاركة الأصلية كتبت بواسطة mazagngi2010

-مش هنسى ان الشعب ده اس الفساد يعنى لو عيل صغير مع امه هيحسرنى على الصالون من اول اسبوع لكن البيجو مش فارقه دى هيا اللى هتعوره

إحنا برضه بنتكلم على سيارة هتكون زيرو
يعني هتكون بنفس حالة اللوجان الزيرو ويمكن بنفس الخامات
والسعر غالباً هيكون متقارب

أنا لم أفتح الموضوع للمقارنة بين البيجو504 واللوجان

أنا أتساءل لماذا الإصرار على موديلات قديمة طالما هناك متاح موديلات أكثر حداثة من نفس الماركة
يعني في ال 505 مبلوعة شوية
وفيه الأحدث لو عايز ال 806
ليه نختار أقدم وأسوأ حاجة ومليئة بالعيوب التي عولجت في غيرها
وطبعاً بتكلم عن بيجو فقط لأن صاحب الفكرة هو أباظة صاحب توكيل بيجو

**mazagngi2010** · 31-08-2009 02:54 AM

مانا قلت لك يابو حميد اشمعنى ال 504 بالذات
انت مقريتش الرد كله ولا ايه
ال504 وصلت لمرحله التقديس عند السواقين والميكانيكيه وبقت بتتصلح وهما مغمضين لسه هيشوفوا ال505 ويوفقوا لها حاجات من ال504
ياراجل صلى صلى
وانا اقصد ان مهما كانت البيجو ال504 جديده برضه هتكون صالونها فقير بالنسبه للوجان مثلا يعنى التجريح فيها مش هيفرق

**TaoTao** · 31-08-2009 01:16 PM

نسيت حامل الأكواب :)

واحد صاحبي قاللي ماتشتري شيفروليه لانوس، ده فيها حامل أكواب :)

**D . a .\ AYMAN** · 31-08-2009 01:53 PM

المشاركة الأصلية كتبت بواسطة mazagngi2010

مانا قلت لك يابو حميد اشمعنى ال 504 بالذات
انت مقريتش الرد كله ولا ايه
ال504 وصلت لمرحله التقديس عند السواقين والميكانيكيه وبقت بتتصلح وهما مغمضين لسه هيشوفوا ال505 ويوفقوا لها حاجات من ال504

الـ 505 ... 90 % من قطع غيارها هيه هيه نفسها بتاعت الـ 504 ... ده بالنسبة للموتور ... وانا دايما بجيبها على طول

بالنسبة للباقي زي العفشة والكلام اللى مش ممكن يكون متشابه .. فانوس رفرف وهكذا ماعتقدش هايبقى مشكلة

وبعدين المفروض إنه حتى لو هاينزل العربية دي تاني مش ممكن ينزلها بنفس الموتور القديم ... مثلا أكيد هايبقى إنجكشن وفيه شوية حاجات حديثة من اللى مش ممكن يتنازلو عنها دلوقتي في أي عربية .... يعني كده كده أكيد في إختلاف هايكون بين القديمة والجديدة ... هو ممكن يحتفظ بالشكل والعفشة (اللى هما أساسا عيبها الرئيسي) عشان بس الناس تحس إنها هيه هيه ويشتروها

-

مشاهدة نتائج الإستطلاع: ما رأيك في فكرة إحياء السيارة بيجو 504 ؟؟

الموضوع: التفكير في إعادة إنتاج بيجو 504 مرة أخرى بواسطة أباظة بعد مرور 35 سنة على مولدها!!!

LinkBack

أدوات الموضوع

عرض

-

-

-

-

-

-

-

المواضيع المتشابهه

Bmw تحتفل بذكرى مرور 30 عام على إنتاج الفئة الخامسة بإصدار خاص

هل يعود وجيه أباظة للمنافسة مرة أخرى؟

إعادة انتاج الاسطورة بيجو 504 استيشن في مصر

وكيل "بيجو" يقرر إعادة انتاج "بيجو 504" سبعة راكب

الكلمات الدلالية لهذا الموضوع

المفضلات

المفضلات

ضوابط المشاركة