الموضوع: رابطة مالكي السويفت

ياشباب ممكن لو حد عنده او يعرف حد عنده سويفت 93 للبيع فابريكة جوه بحالة جيدة يبلغنى

لانى لفييت كتير وتقريبا جاتلى حالة يأس

وشكرا مقدما

المشاركة الأصلية كتبت بواسطة asdtarek

السلام عليكم
انا فى منتهى السعادة ان اكون عضو جديد وفعال فى تلك الرابطة الجميلة والخدومة ان شاء الله

انا عربيتة سوزوكى سويفت موديل 96 تجميع مصرى تانى يد
اشترتها من شهر مارس اللى فات بس فيها مشكلة كنت فكرها سهلة لكن لحد الان مازالت قائمة وهى مشكلة صوت تصقيف عند الضغط على البنزين عند باية كل غيار
ارجو الافادة وفى انتظار الردود

احنا الاسعد يا جميـــــــــــــــل
بص يا باشا
موضوع الصفع او التصقيف او Detonation
ده موضوع قتل بحثا بمعنى الكلمة وأنا هاحاول هنا أسرد لك بعض معلوماتي عنه بخصوص السويفت الكربيراتير

اول هام انت بتحط بنزين نوعه ايه؟؟؟ طبعا لو 80 يبقى الصقف ده طبيعي....وعموما السويفت المثالي ليها بنزين 90 وطبعا ال92 كويس بس عن تجربة كذا مرة هتلاقي العربية بتاكله حتى لو مظبطها معرفش ليه!!!! ودي ملحوظة مع كل العربيات الكربيراتير ايا كان نوعها

طيب...انا شخصيا ماشي بقى لي فتره اكتر من سنه بال 80 وكويس معايا...ازاي؟؟
عشان نتكلم لازم تعرف ان كل شئ بتمنه....هتحط بنزين 80 وتوفر يبقى سيادتك هتتنازل شوية عن بعض من عزم الموتور وتبدأ سيادتك بتأخير الكهربا بتاع الاسبيراتير شوية...هتروح جايب مفتاح ومهوي المسمارين الكبار بيتع الاسبيراتير شوية وبعدين هتلفه حوالي 1 او 2 ملليمتر بالكتير عكس عقارب الساعة وانت واقف عالجنب الشمال من العربية وتخللي بالك ان الموضوع ده حساس جدا لابعد مما تتخيل وان الحركة دي هتعملها لازم تبقى دقيقة....وبعد كده تجرب العربية....التاخير ده بيقلل التصقيف بس لاحظ انك كل ماهتأخر...هتضعف العزم شوية عشان كده بنقول ان الموضوع حساس
طيب...نعرف ازاي ان العربية كهربتها مظبوطة....سيادتك والعربية سخنة لازم يكون الار بي ام من 700 الى 800 هتروح ورا العربية وهي دايرة عالسلانسيه وعينك عالشكمان كويس جدا...هتلاقي الشكمان عمال يترعش ولو بسيطه....لازم الرعشه تكون منتظمة وميبقاش فيها تقطيع....
طيب لو السلانسيه مش من 700 ل 800 هتيجي سيادتك عالجنب اليمين من العربية وتبص عالكربيراتير من ورا هتلاقي مسمار له مقبض بلاستيك ابيض...هتبدا تلفه ربع لفه بربع لفة وكل مرة تشد سلك البنزين شدتين وتشوف العداد هينزل لحد كام وهكذا لح ما تستقر المسأله
طيب ده كله مع ال 80....لو 90...سيادتك ممكن تجرب ظبط الكهربا برضه بس حاجة بسيطة واذ لم يكن يبقى هنجمد قلبنا وندوس جوه الكربيراتير ونبدأ نغير النسب بتاع الهوا والبنزين....بس ده موضوع العن من تأخير الكهربا ويفضل ان محترف اللي يعمله لو عاوز تعرف ابقى قول لي وانا اكتبه في مشاركة تانية


حاجة كمان لازم تتعمل وبتسبب خشونة فالموتور وتزويد الاستهلاك ان سيادتك تنتظم جدا في تغيير البوجيهات وتجيب الدينسو النوع العادي او 7 وللا 8 جنيه الواحد وبحد اقصى 10000 كيلو متر....وغير اسلاك البوجيهات عشان بتفرق كتير قوي قوي....ودي بتتعمل على حسب انا مثلا مغيرها بعد 75000 كيلو والصراحة حسيت بالفرق وبالذات مع المكيف...وتخللي بالك لو الموبينه بتاعك من النوع الصغير اللي هو شبه علبة الكبريت لازم تجيب اسلاك بوجيهات مش نحاس ....وهتجيب اللي بيسموها هنا كربون او حراري عشان متطيرش الموبينة او اقل حاجة هتعملها هتجيب لك صداع من كتر الزن اللي هتسمعه في الكاسيت اما لو كانت موبينه عادية يبقى مش فارقة

وفي انتظار استفساراتك
ارجو ان اكون قد وضحت بعض المعلومات اللي عرفتها بالزمن وهنقول برضه
وفوق كل ذي علم عليم

نسيت أقول لك ابقى جرب قبل اي حاجة غير البنزينة اللي بتمون منها ولو جنبك بنزينة وطنية خش مون مرتين تلاتة منها عشان دول تقريبا البنزين الاستاندارد