رينو داستر الشكل الجديد - الآن في مصر

[zangry]

الف مبروك على العربية وربنا يباركلك فيها ويكفيك شرها

[bebo2000]

اولا انا بعتذر عن التأخير في الرد عليكم بس انا كنت امبارح بالليل عند الحاج/ احمد مشعل علشان بنجهز لمفاجأة من العيار التقيل لملاك ومحبين الداستر وخلال يومين باذن الله هعلن عنها وبالتفصيل الممل زي ما اتعودنا

نرجع لموضوعنا

معلش بقى كمان كام سؤال كدة ما هو إنت اللي جبته لنفسك حد قالك هات العربية دي هههههههههههه
بسأل يا غالي عن

1- الدبرياش تقيل ولا خفيف؟
الدبرياج خفيف جدا ومتحسش بيه نفس دبرياج القاشقاى بالظبط علشان انا جربتها

2-الباور بتاع الدريكسيون بيخليه خفيف ويتقل مع السرعة ولا نظامه إيه؟
هو مختلف عن بتاع الفلوانس لو بتقارن بيها هو بيبقى خفيف وانت بتركن بس زى اغلب العربيات اللى سوقتها كوري او ياباني (الفلوانس وانت واقف الدريكسيون بيبقى خفيف خالص ممكن تحركه بصباعك الصغير وده ماشوفتوش الا في الفلوانس بس) وطبعا الباور بيفصل على السرعات العالية

3-لو هركب مسند اللي ما بين الكرسيين هل هيتعارض مع حركة الهاند بريك ولا لأ؟
اسمحلى نأجل اجابة السؤال ده شوية وهقولك ليه ساعتها

4-التكييف أخباره إيه معاك؟
من مشاركات الاخوة اللى جابوها قبلي في المنتدى التكييف تلاجة واحلى ما فيه انه مش بيأثر على السحب ( ده كلامهم برضه )

5-في عز الصيف هل في أي مشاكل في حرارة السيارة ولا كله تمام؟
نفس اجابة السؤال اللى فات لاننا في الشتاء ومعرفش نظام الصيف ايه

6-مقاس جنوطها كام؟
16" سبور

7-النظام الصوتي أخباره إيه وهي فيها كام سماعة؟
النظام الصوتي اكثر من رائع وبمنتهى الصراحة انا ماتخيلتش انه ممكن يطلع كويس كدة وكنت ناوى اغيره لكن لما جربته طلع ممتاز وفيها اربع سماعات

8-نظام الإضاءة بتاعة الفوانيس و الرؤية ؟
الموضوع ده لسة مخلينى اضحك امبارح وانا راجع من عند الحاج/ احمد مشعل بالليل داخل شارع ولقيت عربية جاية في وشي وبيقلبلى علشان اطفي النور المهم ببص على دراع النور يمكن اكون فاتح العالى لقيت اني مشغل نور الشابورة بس ومن غير النور الواطي حتى فقعدت اضحك

9-نظام العجل الخلفي ايه طنابير ولا حاجة تانية؟
العجل الخلفي طبلة مش طنابير

وانا عندى سؤال برضوا

الدركسيون حركتة فوق وتحت بس ... ولا تليسكوبى برة و جوة كمان ؟
لأ مش تليسكوبي فوق وتحت بس

الكلاكس بتاعها فين ذى اللوجان ؟
ذي الفرنساوى كله مش اللوجان بس في دراع النور

انتو هريتوا الراجل اسئلة يا جدعان
دة اكيد هيندم انة حط الموضوع دة
شيء يسعدني جدا انى اقدر افيد حد بمعلومة خصوصا انى استفدت كتير من المنتدى سواء مع الافيو او البروتون او قرار شراء الداستر وانا بعتذر تاني على التأخير في الرد بس المفاجأة تستاهل

[الصيداح]

شكرا جزيييييييييييييلا على الردود الوافية ربنا يسعدك
وبسرعة بقى أبوس دماغك إيه هي المفاجأة كدة إنت مخلينا على نار
بانتظارك دوما فلا تتأخر علينا

[beeronasr]

أنا مستنى المفاجأة على نار

[ashouhdy]

اكيد حيجلد التابلوة :)))

[beeronasr]

هههههااااااااااااا لسة؟

[f4f8f12]

بصراحة انا كمان متابع المفاجأة باهتمام لانى ناوى اجيب السانديرو الاوتوماتيك بس كل ما ابص على التابلوة بتاعها بغير رأيي فى ثانية.. مبروك يا باشا وربنا يكفيك شرها

[محمد بدر]

متابع

[beeronasr]

يالا بقى ياعم Bebo2000 اليومين خلصوا يا بيبو - لازم تجيب جون فى قسم الداستر النهاردة

[الصيداح]

عمنا بيبو إنت بتشوينا على نار هادية!!!!!!!!

[beeronasr]

الموضوع طلع اكبر من يومين بكتير - اوعى تكون غيرت العربية كلها وجبت حاجة تانية؟

[bebo2000]

الموضوع طلع اكبر من يومين بكتير - اوعى تكون غيرت العربية كلها وجبت حاجة تانية؟

انا بعتذر جدا جدا جدا عن التأخير وعدم الرد بس الموضوع خارج عن ايرادتي
اللى حصل ان شركة tedata العظيمة قطعت عنى النت لاخر الشهر بسبب سياسة الاستخدام الفاشل اللى طلعولنا بيها جديد فارحت على فودافون جبت usb خط ودى الغلطة اللى عملتها لان الخط بيقعد 48 ساعة لغاية ما يتعملوا activate مش زي الكارت في ساعتها فارجو انكم تسامحوني

ردا على اخويا beeronasr الموضوع فعلا طلع اكبر من يومين لاننا بنعمل حاجة مخصوص للداستر وانا روحت للحاج احمد امبارح وعملنا بروفة والموضوع خلص بنسبة 90% وناقص اللمسات الاخيرة فمعلش اصبروا شوية صغيرة كمان

[Land_Cruiser]

انا بعتذر جدا جدا جدا عن التأخير وعدم الرد بس الموضوع خارج عن ايرادتي
اللى حصل ان شركة tedata العظيمة قطعت عنى النت لاخر الشهر بسبب سياسة الاستخدام الفاشل اللى طلعولنا بيها جديد فارحت على فودافون جبت usb خط ودى الغلطة اللى عملتها لان الخط بيقعد 48 ساعة لغاية ما يتعملوا activate مش زي الكارت في ساعتها فارجو انكم تسامحوني

ردا على اخويا beeronasr الموضوع فعلا طلع اكبر من يومين لاننا بنعمل حاجة مخصوص للداستر وانا روحت للحاج احمد امبارح وعملنا بروفة والموضوع خلص بنسبة 90% وناقص اللمسات الاخيرة فمعلش اصبروا شوية صغيرة كمان

معلش يا باشا . انا كنت عايز أسالك سؤال بالنسبه للتوكيل ايه اخباره و قطع الغيار و اسعارها و معلش هتقل على حضرتك و أسألك مره تانيه عن رايك فى الخامات الداخليه و التقفيل لان فى واحد صاحبى سألنى و عايز يعرف رأى حد راكبها فعلا لانه قلقان شويه من جوده الخامات و قلتله هسألك و ارد عليك و حضرتك خير من يرد بإذن الله

[bebo2000]

معلش يا باشا . انا كنت عايز أسالك سؤال بالنسبه للتوكيل ايه اخباره و قطع الغيار و اسعارها و معلش هتقل على حضرتك و أسألك مره تانيه عن رايك فى الخامات الداخليه و التقفيل لان فى واحد صاحبى سألنى و عايز يعرف رأى حد راكبها فعلا لانه قلقان شويه من جوده الخامات و قلتله هسألك و ارد عليك و حضرتك خير من يرد بإذن الله

بالنسبة للتوكيل فتوكيل eim من احسن التوكيلات في بلدنا دلوقتى بالرغم من ان في ناس رأيهم انه عادي بس محدش هايقدر قيمته غير اللى اتعاملوا مع منصور حبيب قلبى او غبور حبيب الملايين بس نصيحة ابعد عن المركز الرئيسي بتاع المقطم وخليك في بتاع العبور احسن ( ده رأى الغالبية العظمى من الناس اللى جربوا الاتنين ) اسعار الصيانات وقطع الغيار تقريبا زى الفلوانس بالظبط يعنى اعلى من الكوري شوية بس صدقنى في حدود الطبيعى وخصوصا اننا بنتكلم عن الاوروبي يعنى زيارة واحدة لاوماترا توكيل فيات او وجيه اباظة توكيل بيجو هاتعرف ان الاسعار في رينو اكتر من ممتازة ( مقارنة بالاوروبي مش الكوري )
رأى في الخامات الداخلية انها جودة عالية بشكل قديم شويتين يعنى مش زى التيجو مثلا تحس ان البلاستيك هايطلع في ايدك وشكله اى كلام
في الداستر هتلاقي الخامات محترمة جدا جدا مقارنة بالافيو اللى معايا وتحس انه بيستحمل البهدلة وخدمة شاقة بس شوية الحاجات الرخمة زى زراير الازاز اللى في التابلوه مش الباب هى اللى بتدى الاحساس ان الجودة اى كلام مع ان ده يندرج تحت التصميم والشياكة مش جودة الخامات
وبالنسبة للتقفيل اكتر من ممتاز وانا عن نفسي مفيش عيوب تقفيل ظهرت في العربية الى الان والحمد لله وكمان دى عربية بتطلع من المصنع بالمواصفات الاوروبي مش انتاج خاص بمصر وكالعادة متشال منه كل حاجة يعنى محدش يخاف من موضوع التقفيل وعيوب الصيانة

[Land_Cruiser]

بالنسبة للتوكيل فتوكيل eim من احسن التوكيلات في بلدنا دلوقتى بالرغم من ان في ناس رأيهم انه عادي بس محدش هايقدر قيمته غير اللى اتعاملوا مع منصور حبيب قلبى او غبور حبيب الملايين بس نصيحة ابعد عن المركز الرئيسي بتاع المقطم وخليك في بتاع العبور احسن ( ده رأى الغالبية العظمى من الناس اللى جربوا الاتنين ) اسعار الصيانات وقطع الغيار تقريبا زى الفلوانس بالظبط يعنى اعلى من الكوري شوية بس صدقنى في حدود الطبيعى وخصوصا اننا بنتكلم عن الاوروبي يعنى زيارة واحدة لاوماترا توكيل فيات او وجيه اباظة توكيل بيجو هاتعرف ان الاسعار في رينو اكتر من ممتازة ( مقارنة بالاوروبي مش الكوري )
رأى في الخامات الداخلية انها جودة عالية بشكل قديم شويتين يعنى مش زى التيجو مثلا تحس ان البلاستيك هايطلع في ايدك وشكله اى كلام
في الداستر هتلاقي الخامات محترمة جدا جدا مقارنة بالافيو اللى معايا وتحس انه بيستحمل البهدلة وخدمة شاقة بس شوية الحاجات الرخمة زى زراير الازاز اللى في التابلوه مش الباب هى اللى بتدى الاحساس ان الجودة اى كلام مع ان ده يندرج تحت التصميم والشياكة مش جودة الخامات
وبالنسبة للتقفيل اكتر من ممتاز وانا عن نفسي مفيش عيوب تقفيل ظهرت في العربية الى الان والحمد لله وكمان دى عربية بتطلع من المصنع بالمواصفات الاوروبي مش انتاج خاص بمصر وكالعادة متشال منه كل حاجة يعنى محدش يخاف من موضوع التقفيل وعيوب الصيانة

الف شكر يا باشا. فعلا حكايه مكان الزراير ملهاش دعوه بالجودة و اكيد فى حكمه من الموضوع ده لانهم مش هيخسروا حاجه لو عملوها فى الباب و اعتقد ان الموضوع هيبقى عادى بالتعود و ربنا يباركلك فيها