تقييم الm11 من الاول للاخر

[hemaa_82]

بسم الله

بقالي كتير العربية بيس و مبعملش حاجة ... يا دوب من اسبوعين بس كنت غشلت دورة المية و حطيت خضرا اسباني من بنزينة شل الجركن ب 40 بلبل

المهم امبارح نقاوة قالت تمسي عليا ..

الصبح نزلت 7 الصبح دورت و حلاوة ... خدت المدام و العيال ..رحت عند العزبي جبتلهم دوا"ربنا يشفي مرضانا و مرضاكم" و رجعت دورت ..حلاوة ... رحت نزلت المدا م عند باص الشغل و العيال عند باص الحضانة ....دورت ... مفيش ... يهديكي يرضيكي ...مفيش ... المارش بيتكتك..

واقف ورايا راجل محترم راكب بي واي دي ... ممكن وصلة بعد اذنك ؟؟ اي يا افندم اتفضل .... اجي اطلع الجنابر علشان اوصل الاقي سلوك التوصيل مقطوعة من المشابك ....

المهم الراجل ربنا يصلحله الحال اداني زقة و دارت ...

رحت الشغل و خلصت و نزلت ادور ..دارت بس بتعتل .... قلت خلاص نكشف علي الحجر القلم اللي اسمه بطارية جافة ...

رحت عند ورشة حسين الكهربائي بتاعي ... فين لاسطة حسين يا عيد"الصبي بتاعه" .. الاسطي في العزبة يا باشا ... خير .. لا ابدا يا عيد .. هات التستر علشان البطارية بتهس ....

طلعت قارية 1040 و بتموت ... يمين شمال .... خلاص يا باشا روح غير البطارية ...... طب يا عيد رجلشلي الشبورة اليمين علشان بيضرب نور فوق ....

ظبطني عيد و ظغرفته باللي فيه النصيب ...

رحت عند عادل سعد اللي في طومانباي عندنا .... خير يا باشا ... غيرلي البطارية يا قمر ... المهم خدت مارشيتيللي ايطالي اخت اللي فيها ... 55 امبير ب 375 و سبت القديمة ليه ..."الاصلي كانت اي سي ديلكو 62 امبير تقريبا و قعدت سنتين ... و المارشيتيللي كانت 55 امبير و قعدت 3 سنين فيعني شغالة بيس"

ركبنا ... دور يا بيه ... حلاوة .... حاسبت و رجعت ركبت ... اجي ادي غيار .... هوه الدبرياج فين .... الدواسة فين يا ظلمة .....

الدواسة هربانة في بطن العربية ... انزلها برجلي ... مجرد ما المسها تهرب.... كلمت محمد رشاد صاحب ورشة الحمد في صقر قريش .... ابو حميد ... ازيك يا حبيبي ... تمام يا باشمهندس ... تب اسمع يا محمد ... انا كذا كذا كذا ... مش كدة ماستر ولا في اي حوار تاني ....

قالي طبعا يا باشا كدة ماستر من ال2 ...... طبعا قولتله انا في الزتون و مستحيل اجي فهشوف بقي ميكانيكي يتعامل ....

كلمت مصطفي صاحبي يجي يقطرني "معاه 113" ... و بعدين كلمت ابانوب ... قالي تشرفنا يا باشا... طب هتخلصني النهاردة ... قالي مستحيل ... يهديك يرضيك يمين شمال ..مفيش... يا بيه عندي زباين كتير و عيب الطعهم و اشتغل عندك .... ماشي يا عم ... براحتك ...

كلمت مجدي ابن عم عاطف .. الصنايعية بتوعي من ايام عزيزة "128" ... الو يا ميجا بقولك انا كذا كذا ... اجي و نخلص ... يا هيما بيتك و مطرحك ... تنورني..

انا بقي مجدي حبيبي و رجولة و كفاءة و كان يجيلي علي اكتوبر في عز الحر لما اعطل و تظبيط عالي يعني بس كان دايما يسقط و ميركزش .. يعني في مرة غيرلي سير الدينامو و محرقش علي مسمار الطنبورة فوانا ماشي لقيط اطباق الطنبورة بتاعت السير بتجري جنبي علي الطريق j

قلت هروح و اركز معاه علشان اصحيه لاي حاجة كدة ولا كدة ...

جالي مصطفي و شدني "رجولة مصطفي صاحبي ده والله ربنا يباركله" و الشارع امبارح كان زفت ... المهم وصلنا ...

مجدي فتح الكابوت و قالي ده احنا هنسهر ...ليه يا ميجا ... قالي بص شوف ...

احنا هنشيل البطارية

هنشيل الفلتر

هنشيل علبة الفيوزات العمومي

هنشيل بوق الهوا بتاع الفلتر

هنشيل قاعدة كل اللي فات ده

هنحل الماستر بتاع الفرامل

هنريح السيرفو

بعدها نقدر نفك الماستر .......انا قلت اوبا ...ربنا يستر .... دوس يا ميجا

قعد بتاع ساعتين يفك ..علشان كان بيجيله زباين يبص بس عنهم .... و طلع الماستر .و لقي اللي علي الفتيس سليم .. اللي بايظ بتاع الدواسة بس.. نزلت الف عليه في الحلمية لقيت البهوات قافلين علشان ماتشات كاس العالم .."اومال لو كنا اتأهلنا كنا خدنا اجازة رسمي طول البطولة بقي"

تاكسي... دمشق يا اسطي......وصلت بعد 36785555 سنة ... لقيت كله قافل و لحت زكي جرجي المحل الجديد ...اداني الماستر و قفل .... ب 190 بلبل...و جبت من محل تاني علبة دوت4 ب 12 بلبل... و رديت علي مجدي..

ركب يابا .... قفل قفل قفل و كله علي ابو زي ما الكتاب بيقول .... خد هوا و زود باكم .... جرب يا هيما ... حلاوة العنتابلي ...

المهم بقولة بس 10 علي 10 يا ميجا و بقيت حرير و مركز ولا مسمار زيادة ولا مسمار منسي ... ظبط اهه و بقيت صنايعي جامد ...

حكالي ان هوه ساب ورشة ابوه سنتين اشتغل في الامل اللي في العباسية و خد دورات تدريب علي الاف 3 و مواتير تويوتا و دايو و شيفورليتو انه اتعلم حاجات كتير و بعدين رجع الورشة مع ابوه تاني علشان يقدر يفتح في المكن الجديد بدل ما يزنق نفسه في الفيات و القديم بس .... و خد مصنعية 100 جنيه في سحلته معايا من الساعة 6 و نص ل 12 و نص بليل ... و بصراحه اللي حصل يستاهلهم ...

و بكدة نقاوة مصمصتني في 700 بلبل علي سبيل التهريج ... j

نوافيكم بكل جديد و علي خير ان شاء الله

[tarek22]

استاذ هيما انا كنت ناوي اشتري m11 وسالتك عليها من فتره بس الظروف بقي اخدت من الفلوس شويه واديني مستني لما ارجع معايا حق m11مستعمله استعمال نضيف انا شفت عربيتك في شارع ماهر كان راكن قدمها A113 طوبي صح المهم لسه عند رايك علي m11 ولا ايه انا هاخد بقي الفتره دي تفكير لغايه لما الفلوس تكمل وبالمره ايه رايك في A113

[hemaa_82]

السلام عليكم

و الله و لله الحمد انا راضي جدا عن العربية .... و بالذات بعد ما خدت عربية اختي الفيرنا من الخميس اللي فات علشان راحت عمرة "ربنا يوعدنا و اياكم" و سابتلي العربية اظبطها ....
فرق الركوبة .. فرق الكراسي.. فرق خفة الدريكسيون و البور ... فرق الاحساس بالنعومة في الطلعة و النقلات ..فرق الفرامل.. فرق وضع الصالون و الدريكسيون ...فرق زراير و دراعات اشارات .. فرق خشونة مكن ازاز .. فرق تابلوه ... فرق انزارات بيبان مفتوحة و حزام ..

صحيح الفيرنا بتشم بنزين ... و غيرت جلب و طرمبة بنزين في ابو بلاش ... بس بجد لما ركبت عربيتي بعدها كنت هنزل ابوس كاوتش الام 11 فردة فردة ...

يا راجل دي موتورها بيتغابه علي الفتيس لحد التالت ... مفيش نعومة كدة زي عندنا...

[hemaa_82]

لا و مع كل ده ... الفيرنا دلوقت تقريبا بقت اغلي من الام 11

[hemaa_82]

دي مصر يا عبله ...

[tarek22]

دي مصر يا عبله ...

بلد شهادات صحيح - ربنا يباركلك فيها بس ماقولتش رايك في a113

[hemaa_82]

والله هيه علي اد فلوسها تحفة ..بس طبعا مقاس العجل مع البروفايل الصغير بيدي احساس بالنشوفية .... يا اما تركب 185 علي نفس البروفايل يا اما تكبر البروفايل علي ال 175 ...

سرعة بيس ... ثبات بيس ... تكييف بيس .... بس حوض المتور مقرف للصنايعية علشان زحمة

[towfeq]

السلام عليكم
ازيكم يا كل رجاله الm11 نفر نفر

كل سنه و انتم طيبين و رمضان كريم عليكم و علينا و على المسلمين جميعا و يرزقنا فيه الطاعه و يكرمنا ربنا بالمغفرة ان شاء الله..

بعد الوصله الايمانيه دي بقى عايز اشوف قصة تيل الفرامل عشان يشكر كده بقاله 12 الف كيلو مشيت بيهم غير اللي 14 الف كيلو كانوا ماشيين قبل كده.

سمعت ان تيل ال516 يركب و زي الفل..هل هو فعلا كويس ولا احترم نفسي و اشتري الاصلي بتاع الام 11.

السؤال التاني بقى..التيل الخلفي بيتغير عادي بردو زي الامامي ولا ايه ظروفه..و هل بتاع ال516 يركب بردو ولا لازم الاصلي بتاع الام.11

هيما:الله يباركلك يا حج اديني تليفون محمد رشاد و اوصفه ليا من اكتوبر..انا مبدئيا هطلع الدائري بتاع المعادي و امشي في الاتجاه اللي رايح مدينه نصر..لحد كده تمام..انزل بقى من انهى منزل و امشي ازاي و يا سلام لو يبقى مع علامات زي محل او جامع او اي حاجه عشان انا من ساعه ما رجعت مصر و انا بغرق في شبر ميه في الشوارع..و هل الورشه بتاعه محمد رشاد فيها كهربائي و تكييف و سمكرة و الكلام ده و لا ايه النظام.
تسلملي يا حج

و رمضان كريم علينا جميعا

[shadymt2005]

عندى صوت تكة من الخلف شمال مع المطبات البلدى الجميلة ال مليه البلد حد يعرف السبب ايه.

[hemaa_82]

عندى صوت تكة من الخلف شمال مع المطبات البلدى الجميلة ال مليه البلد حد يعرف السبب ايه.

غالبا سوستة تيل ...."انت غيرت تيل قريب؟؟""

[hemaa_82]

السلام عليكم
ازيكم يا كل رجاله الm11 نفر نفر

كل سنه و انتم طيبين و رمضان كريم عليكم و علينا و على المسلمين جميعا و يرزقنا فيه الطاعه و يكرمنا ربنا بالمغفرة ان شاء الله..

بعد الوصله الايمانيه دي بقى عايز اشوف قصة تيل الفرامل عشان يشكر كده بقاله 12 الف كيلو مشيت بيهم غير اللي 14 الف كيلو كانوا ماشيين قبل كده.

سمعت ان تيل ال516 يركب و زي الفل..هل هو فعلا كويس ولا احترم نفسي و اشتري الاصلي بتاع الام 11.

السؤال التاني بقى..التيل الخلفي بيتغير عادي بردو زي الامامي ولا ايه ظروفه..و هل بتاع ال516 يركب بردو ولا لازم الاصلي بتاع الام.11

هيما:الله يباركلك يا حج اديني تليفون محمد رشاد و اوصفه ليا من اكتوبر..انا مبدئيا هطلع الدائري بتاع المعادي و امشي في الاتجاه اللي رايح مدينه نصر..لحد كده تمام..انزل بقى من انهى منزل و امشي ازاي و يا سلام لو يبقى مع علامات زي محل او جامع او اي حاجه عشان انا من ساعه ما رجعت مصر و انا بغرق في شبر ميه في الشوارع..و هل الورشه بتاعه محمد رشاد فيها كهربائي و تكييف و سمكرة و الكلام ده و لا ايه النظام.
تسلملي يا حج

و رمضان كريم علينا جميعا

01111766770
01026900065

محمد رشاد عنده كل حاجة ماعادا سمكرة ....
محمد رشاد انت تروح صقر قريش زي ما نت عايز"اوتوستراد بقي او من المعادي براحتك" ... و بعدين تسأل علي مكتب البريد .... ورشة محمد في ضهر مكتب البريد .....

الامامي اه 516 بيركب بس بتشيل الفيشة تقريبا ..
المشكلة ان انا جبت من دمشق و من الحرفين ... جبت ب 60 و 70 و 100 و كله بيصفر لما كرهت نفسي

الوحيد اللي ركبتة برة التوكيل و مصفرش كان عند المتحدة و كان ب 220 و كان في التوكيل ب 250
....

[shadymt2005]

غالبا سوستة تيل ...."انت غيرت تيل قريب؟؟""

لا انا مغيرتش تيل خلفى خالص

[hemaa_82]

همممم .... طب مع الفرامل ؟؟ مع الطلعة ؟؟؟ مع نقلة او بين نقلات ؟؟؟؟

مهو لو مش فرامل ممكن تبقي جلب متاكلة و عفشة بتخبط في بعضها بس ده عجيب لان مع كل البهدلة و الاهانة اللي انا بعملها مع عربيتي انا كل عفشتي الخلفية سليمة ...هما المساعدين بس اللي ابتدوا يدبوا علي خفيف...

[towfeq]

ازيك يا هيما
تسلم يا حبيبي على الرقم

هو التيل الخلفي لازم يتغير بردو ولا ايه نظامه..و لو بيتغير بيكون بكم تقريبا

تسلم يا حج

[hemaa_82]

بيتغير عادي بس علي مسافات اطول ....
يعني بفرض ان الامامي كل 25 الف ...هتلاقي الخلفي علي كل 50 ....علي سبيل المثال بفرض ثبات العوامل التانية ....
لان ممكن يكون تيل وحش و يبدر بسرعة فاكيد هتحتاج تغيرة اسرع من الامامي الكويس اللي بيقعد احسن ....


السعر تقريبا ازيد 10 ولا 20 من الامامي ....