رابطة مالكى الويرا (2) فيد وأستفيد .

[mahmoodallam]

أ.أحمد ( ahmed_h_g )
ممكن تقولي ازاي افك طبلوه الويرا علشان أطلع العدادات
أنا فكيت التلات مسامير اللي فوق بس هو في حاجة ماسكاه من تحت فتحات التكييف اللي في النص
فكيت ريش التكييف بس مش لاقس حاجة !
وبصراحة خايف اروح عند حد يتغاشم عليه يكسر كلبس ولا يكسرلي حاجة !
معلش هتعبك معايا

[moh81]

السلام عليكم
معلش أنا هحكيلكم حكايتى مع الويرا بالتفصيل شويه .. إستحملونى .. علشان عايز أخد نصائحكم :)
أنا معايا ويرا 2005 .. 1300 .. مانيوال .. جبتها من حوالى شهرين .. و ددى أول عربيه ليا .. و كمان أنا لسه جديد فى السواقه
أنا لما جبتها غيرتلها زيت موبيل .. ال 2000 كيلو .. و غيرت فلتر زيت .. و الراجل ركب فلتر هيونداى .. قالى ده أكبر و أحسن !!!
المهم من حوالى 3 أسابيع كده .. العربيه كانت بتكركر جامد جدا .. و كانت لمبه الأعطال بتاعه الإنجكشن منورة من قبلها .. فرحت لمركز عصام صفا .. و كشف عليها .. و غيرلى البوجيهات .. و قالى ان البوجيهات معرقه زيت .. و كده الموتور خفيف .. و قاس كبس الماتور .. لاقاه.. 10 .. 14 .. 10 .. 13 .. (يا ريت أفهم معنى الأرقام دى أيه ) .. و محتاج حاجه زى عمره !! و لمبه الأعطال . .قالى ان السبب فيها حساس الهواء .. و شاورلى ع الحساس اللى فى أعلى الماتور.
المهم العربيه إتعدلت شويه .. و بعدها بيومين .. رحت لمركز فى عين شمس .. علشان أظبط التكييف .. المهم و هو شغال قالى تحب أفصلك السخن . علشان أداء التكييف يبقى أحسن .. قلتله ماشى .. و فى خلال الشغل .. لاقيت إن فلتر الهواء كان مخرم .. و حالته وحشه .. و كمان بعد ما خلص قالى ان حساس الهواء الفيشه بتاعته مش مظبوطه .. و عدلهالى مؤقتا .. و لكنه شاورلى على حساس تانى .. غير اللى قالى عليه عصام صفا .. اللى هو موجود فى الماسورة السوداء بتاعه الهواء شمال الماتور .. و لما قلتله التانى ده ايه .. قالى ده حساس الضغط .. !!! (يا ريت برضه أفهم أنهى فيهم الصح ) .. المهم إن دلوقتى اللمبه فى الغالب مطفيه .. و لكن بتنور و تطفى بحالات بس لما بتنور .. مش بتفضل كتير ... و قالى انت لازم تجيب فلتر هواء و فلتر بنزين .. [ و أنا رحت جبتهم من شارع دمشق بس لسه مركبتهمش .. و الفيشه مالقتش بتاعه الويرا جبت واحده إستعمال بتاعه لانسر .. و الراجل قالى الكهربائى ممكن يظبطهالك عليها .. هو إدهالى ببلاش :) ]
و كمان أنا قلت للمركز إن انا غيرت البوجيهات و لاقتها عرقانه زيت .. قالى يبقى نوع الزيت وحش .. قلتله انا حاطط موبيل .. قالى الموبيل مضروب الأيام دى .. زيت شل أنظف حاجه .. و قلتله ايه رأيك فى ماتور العربيه؟ .. قالى الماتور تمام .. بس اهم حاجه تهتم بالفلاتر !!!
و لكن لما بشغل التكييف .. العربيه بتبقى تقيله معايا فى السحب و كده بس مش زى الأول .. الأول كانت أرخم ( هل ده طبيعى علشان العربيه 1300 ؟؟ !)
المهم .. إمبارح أخويا خدها راح مشوار و هو بيحب يشغل التكييف كتييير.. و لكن لما ركبتها أنا النهارده .. لاقيت فى تسقيفه أو كركرة بسيطه .. بتظهر أكتر لما بنقل من الأول للتانى و هى لسه بطيئه شويه بضطر أدوس سنه دبرياج و اضغط بنزين لحد ما تسرع
و لكن المشكله ان كل شويه الطريق بيقف .. فبضطر أمشى ع الأول .. و خصوصا فى الشوارع المكسره علشان ع التانى العربيه بتتهز جامد جدا .. أو لما بكون ع الثالث أو الرابع و العربيه بطئت شويه ( الحاجات دى مكنتش موجوده فى العادى ) .. و لما بكون واقف .. بلاقى الدريكسيون بيتهز فى إيدى شويه .. و العربيه بتترج خفيف ( أنا قلقان الصراحه ) . .هل فى مشكله فى البوجيهات تانى .. عرقت زيت ؟

إنا إن شاء الله فى خلال يومين ..هعدى ع المركز اللى فى عين شمس علشان قالى تعالى يوم الصبح .. نغسل ثلاجه التكييف و هغير فلتر البنزين و الهواء .. و هغير زيت شل 5000 .. كده أنا همشى صح ؟؟؟
يا ريت أعرف فى حاجه تانيه أخليه يعملها أو يبص عليها ؟
و كمان عايز أعرف رأيكم إيه فى اللى بيحصل معايا؟

[anchoor]

أ.أحمد ( ahmed_h_g )
ممكن تقولي ازاي افك طبلوه الويرا علشان أطلع العدادات
أنا فكيت التلات مسامير اللي فوق بس هو في حاجة ماسكاه من تحت فتحات التكييف اللي في النص
فكيت ريش التكييف بس مش لاقس حاجة !
وبصراحة خايف اروح عند حد يتغاشم عليه يكسر كلبس ولا يكسرلي حاجة !
معلش هتعبك معايا

معليش بعد إذن الاستاذ أحمد انا ممكن اقولك

إنت الأول تفك النص التحتانى من الكونسول اللى فيه الطفاية والولاعة هتلاقى مسمار تحت الطفاية على جنب كده وبعدين فى مسمارين فوق الكاسيت ممكن تلاقيهم وممكن لا وبعدين تطلع النص التحتانى بس على مهلك هو الباقى عبارة عن كلبسات ,
بعد كده هتلاقى المسمارين اللى ماسكين الجزء العلوى تفكهم وتطلعها وبعد كده هتلاقى مسامير العدادات تفكها وتسحبه واحده واحده.

والطريقة دى انا مجربها فى عربيتى لما كنت بظبط العدادات

[ahmed_h_g]

أسف جدا" عالتأخير
أهلا" بيك يا أستاذ moh81 ومبروك عليك العربية
نمسك الموضوع حاجه حاجه
بالنسبه للتعريق اللى على البوجيهات ده يبقى الموتور محتاج طقم شمبر
حاجه بسيطه متقلقش التكلفه مش هتعدى ال600 جنيه وهياخد معاك يوم أو يومين شغل بالكتير
بالنسبه للمبة الأعطال هو شاورلك على ايه بالظبط
لو على الحساس اللى فى ماسورة الهواء يبقى حساس حرارة الهواء
الحساس ده بيحس بدرجة حرارة الهواء اللى داخل من الفلتر و بيرسل البيانات للكنترول علشان يظبط حرق العربيه مع الهواء اللى داخل ساخن أو بارد
بالنسبه للتسقيفه حضرتك بتمون بنزين كام
بالنسبه لتقل العربيه مع التكييف لو بسيط يبقى طبيعى لو شديد يبقى من ضعف طقم الشمبر

[ahmed_h_g]

ماحدش عنده عدادات ويرا ؟
اللي فيها rbm أو ما فيهاش مش هاتفرق ؟
يفضل rbm ؟
ياريت لو حد عنده يبعتلي عالخاص

والله أنا باعت على 4 أطقم عدادات و 4 أطقم مفاتيح زجاج لسه موصلوش
لو وصلوا هخليلك واحد

[ahmed_h_g]

نصيحه للملاك أحبائى فى الله
طبعا" معروف ان كل حاجه ليها عمر أفتراضى
طلمبة البنزين باظت عندى فى عربيتى
روحت نازل شارع دمشق أشتريت طلمبة الفيرنا الأصليه على كلام صاحب المحل
نفس الطلمبه ومفيش أختلاف تمنها 150ج
ركبتها بعد حوالى شهرين باظت
روحت فاكك القديمه ونزلت شارع دمشق تانى
أشتريت واحده صينى ب60 ج
ركبتها مكملتش شهر وباظت
معأنها كانت شركة ريفلى الصينيه من أفضل شركات الطلمبات فى الصين
قررت انى أشترى الأصليه من التوكيل
أتصلت بعز العرب لقيت تمنها حوالى 1500ج
أتصدمت وقلت طالما نفس الطلمبه بتركب على معظم السيارات الأنجكشن
روحت متصل بتوكيل هيونداى لقيت الأصليه ب550ج
فضلت فى حيره لغاية ما فكرت أشتريها أستيراد
روحت رايح محل قطع غيار أستيراد قلتله عايز موتور طلمبة بنزين لانسر البومه علشان يابانى
الشرط انه يفكهالى من تانك عربيه أستيراد جديده
وفعلا" فكيت واحده لقيتها ماركة دينسو وتمنها 200ج
أهم حاجه لما فكيتها بصيت على المصفه
لو المصفه لونها غامق يبقى أكيد مستعمله
بس الحمد لله لقيتها جديده
وهركبها وهبلغكم بالجديد ان شاء الله .

[ahmed_h_g]

شكل الطلمبه من موقع دينسو

[moh81]

أسف جدا" عالتأخير
أهلا" بيك يا أستاذ moh81 ومبروك عليك العربية

الله يبارك فيك يا أبو حميد .. أخوك .. محمد طلعت .. و معلش هتعبك معايا الفترة الجايه :)

نمسك الموضوع حاجه حاجه
بالنسبه للتعريق اللى على البوجيهات ده يبقى الموتور محتاج طقم شمبر
حاجه بسيطه متقلقش التكلفه مش هتعدى ال600 جنيه وهياخد معاك يوم أو يومين شغل بالكتير

الله يطمنك .. يعنى كده الموتور كويس ؟ و كمان هيبقى محتاج يفتح وش السلندر ؟
و طقم الشمبر ده أجيبه أصلى منين و مضمون منين .. و يبقى جديد ولا إستيراد؟ و يعمله فى حدود كام؟
طب و قياس كبس الماتور .. الأرقام دى معناها ايه .. كده كويس و لا وحش.
و ينفع أسافر بيها كده بورسعيد و أرجع ولا ممكن تعمل معايا مشكله علشان إحتمال أروح مع والدى يعمل حاجه هناك ..
و كمان بالمرة .. العربيه ممكن تكون محتاجه إيه اشوفه هناك إستيراد؟؟؟

بالنسبه للمبة الأعطال هو شاورلك على ايه بالظبط
لو على الحساس اللى فى ماسورة الهواء يبقى حساس حرارة الهواء
الحساس ده بيحس بدرجة حرارة الهواء اللى داخل من الفلتر و بيرسل البيانات للكنترول علشان يظبط حرق العربيه مع الهواء اللى داخل ساخن أو بارد

ده فعلا اللى شاورلى عليه و عملهولى المركز (عمل الفيشه بلزق مؤقت كده) .. و لكن عصام صفا شاورلى على واحد تانى فوق الموتور كده

بالنسبه للتسقيفه حضرتك بتمون بنزين كام

بنزين 92 .. من ساعه ما جبتها .. و اللى قبلى برضه كده .. و لكنه قالى ان اللى جابها منه كان بيمون 80 !!!

بالنسبه لتقل العربيه مع التكييف لو بسيط يبقى طبيعى لو شديد يبقى من ضعف طقم الشمبر

هو بسيط بس تحس انها متكتفه كده .. و لكن لما بشغل التكييف فترة طويله بتتقل أكتر معايا

[mrwho1982]

معلش بقي في استفسار بسيط

انا دلوقتي ماسورة المية اللي واخدة من الطرمبة المية باظت واتخرمت كذا خرم حلوين

قعدت ادور لقيت بتاعة الاكسيل تركب عليها وجبتها ب 60 جنية + كوعة ب 20 جنية والدنيا تمام والتسريب وقف خالص بس لما امشي علي سرعات عالية عالدائري والكلام ده الحرارة مابتنزلش

عن 3 شرط

المهم نطيت جوة الكبوت لقيت اخر الماسورة طالع 2 تفريعة رايحين لبوابة الانجكشن واحد الخرطوم بتاعها راكب مستريح والثانية خرطومها متني شوية

بمعني ان مجري الماء مش مضبوط وهو ده اللي بياثر هل الكلام ده صح ولا غلط

[ahmed_h_g]

معلش بقي في استفسار بسيط

انا دلوقتي ماسورة المية اللي واخدة من الطرمبة المية باظت واتخرمت كذا خرم حلوين

قعدت ادور لقيت بتاعة الاكسيل تركب عليها وجبتها ب 60 جنية + كوعة ب 20 جنية والدنيا تمام والتسريب وقف خالص بس لما امشي علي سرعات عالية عالدائري والكلام ده الحرارة مابتنزلش

عن 3 شرط

المهم نطيت جوة الكبوت لقيت اخر الماسورة طالع 2 تفريعة رايحين لبوابة الانجكشن واحد الخرطوم بتاعها راكب مستريح والثانية خرطومها متني شوية

بمعني ان مجري الماء مش مضبوط وهو ده اللي بياثر هل الكلام ده صح ولا غلط

الخرطومين الصغيرين اللى داخلين على البوابه ملهمش لازمه
دول معمولين علشان يسيحوا التلج من البوابه علشان البوابه متتجمدش
بالنسبه لخنقة الخرطوم مالهاش دعوه مش هى السبب
لما بتشغل التكييف الحراره بتنزل ؟

[ahmed_h_g]

الله يبارك فيك يا أبو حميد .. أخوك .. محمد طلعت .. و معلش هتعبك معايا الفترة الجايه :)



الله يطمنك .. يعنى كده الموتور كويس ؟ و كمان هيبقى محتاج يفتح وش السلندر ؟
و طقم الشمبر ده أجيبه أصلى منين و مضمون منين .. و يبقى جديد ولا إستيراد؟ و يعمله فى حدود كام؟
طقم الشمبر محتاج شرح هكتبهولك بالكامل تحت
طب و قياس كبس الماتور .. الأرقام دى معناها ايه .. كده كويس و لا وحش.
الأرقام مش مظبوطه
الكبس بيتقاس بالpsi
و ينفع أسافر بيها كده بورسعيد و أرجع ولا ممكن تعمل معايا مشكله علشان إحتمال أروح مع والدى يعمل حاجه هناك ..
و كمان بالمرة .. العربيه ممكن تكون محتاجه إيه اشوفه هناك إستيراد؟؟؟
لا سافر عادى متقلقش
مفيش حاجه هتجبها أستيراد


ده فعلا اللى شاورلى عليه و عملهولى المركز (عمل الفيشه بلزق مؤقت كده) .. و لكن عصام صفا شاورلى على واحد تانى فوق الموتور كده



بنزين 92 .. من ساعه ما جبتها .. و اللى قبلى برضه كده .. و لكنه قالى ان اللى جابها منه كان بيمون 80 !!!
بتعمل معاك كام كيلو فى الصفيحه
لما بتدور العربيه الصبح بتلاحظ دخنه سوده خفيفه من الشكمان وبتختفى بعد ثوانى ؟


هو بسيط بس تحس انها متكتفه كده .. و لكن لما بشغل التكييف فترة طويله بتتقل أكتر معايا
أنا شاكك فى البنزين اللى بتمونه مش عارف ليه
مون من وطنيه وأبعد عن كالتكس

[ahmed_h_g]

http://www.nilemotors.net/Nile/65410-copression-test.html

[ahmed_h_g]

شرح تغيير طقم الشمبر بالكامل
طقم الشمبر الميكانيكيه بيسموه نص عمره مش عمره كامله علشان مفيش خرط ولا شغل كتير بيحصل فى الموتور
مجرد قطعه مستهلكه بيتم تغييرها أو صيانه للموتور بالداخل

طبعا" لما بتروح لميكانيكى تسأله على تكلفة طقم الشمبر بيقولك من 600 الى 1500 جنيه حسب القطع البايظه اللى فى الموتور
وده فعلا" لأن المواتير القديمه بتبقى فيها شغل جامد زى خراطه وسبايك وخراطة شميز ةتغيير بستم و ....
لكن طالما الموتور كويس وحالته نضيفه ومفيهوش صوت خروشه او تخبيط يبقى الموتور محتاج طقم شمبر فقط

هنبتدى نغير طقم الشمبر

الطلبات
1- طقم جوانات تايوانى لانسر 93 موتور1300 12 صباب تمنه حوالى 130 جنيه
2 - طقم شمبر برازيلى أو يابانى من محل مضمون زى اللى فى التوفيقيه محلات متخصصه شمبر فقط
الطقم اليابانى بيعمله حوالى 130ج برضه بالفرش
بس ياريت تاخد البستم القديم معاك علشان المقاس
3- فلتر زيت وجركن زيت رخيص علشان هتلين بيه فقط وهتغيره بعد مده قصيره
4 - سير كاتينه وبليه لو هيتغيروا بالمره
5 - طقم بوجيهات الكترونى ضرورى و فلتر بنزين بالمره لو قديم غيره
الميكانيكى هيحل وش السلندر وكارتيرة الزيت والموتور راكب وهيبتدى شغل
الأول هيبص على الشميز فيه تجاريح ولا سليم وهيبص على السبايك
يعنى يعمل كشف كامل قبل ما يحل

ونصيحه من أخ
لو الشميز مجروح وعايز يتخرط يبقى يستحسن ترمى الموتور وتجيب واحد أستيراد أفضل من عك المخرطه

المهم الميكانيكى هيحل ال 4 بساتم وهينضفهم بالفرشه وهيركب ال 3 شنابر بنضافه على البساتم (لكل بستم 3 )
وهيحل الصبابات من وش السلندر وهينضف الوش ولازم يعمل روديه للوش قبل ما يركب
وطبعا" هينضف مكان جوان وش السلندر االقديم وهيركب الجديد بنضافه

خد بالك لو الميكانيكى غلط وركب صباب مكان التانى الموتور مش هيتظبط الا لو غيرت طقم صبابات كامل
وخلى بالك كل الأويل سيلات والجوانات موجودين فى كيس طقم الجوانات
يعنى مش هيجيب حاجه من عنده

بعد كده هيقفل ويركب فلتر الزيت الجديد و يفضى الزيت الجديد فى الموتور وهيدور العربيه ويسبها تلين فى مكانها مش أقل من 6 ساعات
يعنى تعمل حسابك تبقى ممون العربيه لأخر التنك

بس كده يبقى الموتور رجع جديد ان شاء الله

[ahmed_h_g]

نسيت أقول ان الميكانيكى بعد ما هيغير الشمبر هيسيب التاكيهات مفتوحين علشان ميبقاش فى حمل على الموتور فترة التليين

بعد ما تستلم العربيه هتلينها بدون تكييف لمدة 1000 كيلو ومتحرقش على الغيارات يعنى الغيار ميعديش ال3 rpm
وطبعا" ميركبش معاك أكتر من 2 و تبعد عن الكبارى والمطالع الشديده وأقصى سرعه تمشى بيها 90

وخد بالك ان الموتور أساسا" بياخد 3 لتر زيت بالظبط بالفلتر
لكن بعد تغيير طقم الشمبر الميكانيكى بيغسل الموتور بالكامل بالبنزين فبينزل كل الزيت اللى فى دواخل الموتور
يعنى 3 لتر مش هيكفوا
تانى يوم بعد ما تستلم العربيه تزودها نصف لتر زيت وتمام على كده

تخلص ال 1000 كيلو تغير الزيت والفلتر بزين نضيف وعيش يا باشا
ومتنساش ترجع للميكانيكى علشان يظبط التكيهات

[mahmoodallam]

الأستاذ / ahmed_h_g
أرفع قبعتي احتراما لك ةللمجهود الذي تبذله في عون اخوانك
كان الله في عونك