شرح ميكانيكة اتراج المصممة للطرق السريعة

[eng.m7md.ali]

لونى مش فاهم تقصد مين جرب ومين مجربش بس انا معايا العربية وفعلا هتقدر تتحكم فيها على السرعات العالية
ولو انت جربت انقل تجربتك بمنتهى الامانة

انا اللي جربت .. ونقلت التجربة بمنتهى الامانة

[هانى شوقى]

اعزرني مين قال ان الموتور زو الكامة الواحدة الكامة بتلف اسرع من الاتنين كامة
ومين قال ان سير التقسيمة بيبوظ في الكامة الواحدة اسرع
دة سير التقسيمة في الاتنين كامة علية نقط تلامس اكتر
من ناحية طنبورة اضافية وبلية شداد اضافية
الحاجة التانية ازاي 78 حصان مقبولين وزي الفل
لم تجرب مرة تشد بيها حترعف يعني اية 78 او مشغل تكييف ومحمل ركاب وطالع مطلع
علي سرعة اقل من 60

العربية بقالها معايا 4 شهور وبتقولى جرب تشد وبعد كل اللى قولناه من ان ركبنا فيها كل خلق ربنا ولا تكييف اتاثر ولا ريحت فى مطالع وكان العربية فاضية لا والتحكم فيها فظيع وتقريبا انا العربية الوحيدة اللى فى الشارع عملة زى الدودة فى لحظة اعدى من اى حتة لان بورها ناعم جدااا وبمجرد انى اخد قرار فى لحظات اكون نفذته وكمان سرعة استجابتها هايلة عايز اقولك ايه تانى روح جرب ممكن تستفيد بمعلومات عن عربية فعلا مختلفة

[eng.m7md.ali]

اللى يراهن على الاتراج عمرة ما يخسر
لانها عربية العام فعلا
اللى مجربش مينطقش
و اللى جربها يقوم يبخرها

مش بمزاجك تخلي الناس تسكت او تتكلم .. لو هتتكلم بالطريقة دي يبقى مينفعش هنا احنا في منتدى محترم

[eng.m7md.ali]

سمعت ان المواتير ال 3 سليندر بتكون مزعجه نوعا ما في صوتها غير المواتير ال 4 سليندر الكلام ده سليم ؟

المواتير ال 3 سلندر بتستهلك قواعد للموتور عشان عدم انتظام حركة الاسطوانات .. عكس ال4 سلندر الحركة بين ال4 منتظمة

[mhmd_farouq]

يا رجاله صلو عالنبي الراجل بينقل تجربته مع اني على اختلاف بموضوع الثبات ده، ميتسوبيشي معروفه بمواتيرها الجباره والعبقريه الهندسيه بالذات مع الايفو، النيسان يا اخوانا فقدت مصداقيتها في مصر عشان تقفيل مصري رديئ انما نيسان بره حاجه تانيه، الاتراج معموله عشان تنافس فئتها وفي نفس الوقت يتقال عليها سيارة التوفير لان دي احتياجات السوق المصري للاسف، اللي يشوفك محموء اوي كده عالعربيه يقول انك اللي مصممها، بهزر والله ربنا يكفيك شرها.

[reyad_mohamed]

يا جماعة العربيات دى راحات ونصيب بس المهم ان كل واحد فعلا يتكلم عن تجربه او يسمع للناس اللى معاها العربيه افضل وبعد كده يأخد القرار اللى هو مرتاح له
انا عموما معايا العربيه من 25 يوم وعامل 3200 كيلو يعنى بمعدل بمشى بيها يوميا 125 كيلو بمشى فى طريق زراعى رخم وأيام بمشى فى طريق صحراوى مسافة 45 كيلو وبصراحة مرتاح جدا بالعربيه بمشى بيها 140 -150 وفى التسارع ممتازة جدا وجربتها مره على الدائرى الاقليمى مسافة 20 كيلو بسرعة 170 متواصل والتحكم بالعربيه كان ممتاز محستش ان العربيه تقلق فى الجرى وعلى فكرة انا من ساعة ما اشتريت العربيه مشغل التكيف وانا فى الطريق لانى بخرج فى وقت الظهر لحد المغرب
العربيه فى الاستجابة بصراحة ممتازة جدا
ومع ذلك مفيش عليها اقبال فى الشراء واللى يقول غير كده يبقى بيبالغ انا عن نفسى بحس انى الوحيد المشترى العربيه انا يوميا بمشى فى القاهرة والقليوبيه والشرقية وطريق مصر اسماعلية الصحراوى ما قبلتش عربيه اتراج بس كتير يوقفنى فى الطريق ويسأل على العربيه هى لانسر ولا ايه واللى عارفها يوقلى العربيه عامله معاك ايه واخبار التكيف الناس عنده فوبيه من 1200 و3 سلندر
دى وجهة نظرى بكل صدق وامانه عربيه ممتازة على المدى القريب فى المدينة والطرق السريعة الصحراوية ودى عن تجربه اما عن المدى الطويل ده مش هيبان الا بعد 100 الف كيلو

[مؤمن حمزه]

يا جماعة الخير الموضوع مش حرب و لا خناقه.لولا اختلاف الاذواق لبارت السلع....الراجل ناقل ميكانيكا العربيه علشان نفهم و علشان اللى بيفكر يشترى يبقى قدامه معلومات و مايتعبش ...و ده شيء يشكر منه...و فى ناس بتهاجم العربيه باستمرار بدون سبب و للاسف بدون تجربه و هما احرار ...لكن لما تيجى تتكلم على عربيه لازم تسال اللى راكبها باستمرار كل يوم.و المنتدى هنا فيه عدد لا باس به من ملاك الاتراج و العربيه لم تسجل مشكله واحده فى 5 شهور الان و ده شيء رائع.....العربيه دى بتجمع بين قوة الموتور و الفتيس و التوفير و الوسع سواء فى الصالون او الشنطه.....العربيه بتؤدى الغرض سواء داخل المدينه او على الطرق...العربيه بالفعل ممتازه و انا معايا شارك و باستخدم الاتراج اكتر لانها عمليه جدا...ثالثا العربيه بتسحب كويس جدا و مالهاش صوت تقريبا و خصوصا بعد ماعدت 2000 كيلو مابقاش فى اى صوت يتسمع.....العربيه تحفه بجد فى كل شيء......و المستقبل للعربيات دى لان البنزين هيترفع عنه الدعم كامل تدريجيا فى خلال 5 سنين.يعنى كل سنه البنزين هيغلى شويه لحد ما هيوصل لمستوى اللى معاه 1600 و طالع هيرميها فى الزباله

[Mohamedjetta]

حضرتك دا مش كلامى دا راى مهندسى السيارات مش بتاعة جرى صعب اوافقك عليها لانى العربية بتجرى وادائها بيزيد مش بيقل حتة الثبات لغاية دلوقت تصنف من العربيات اللى ثباتها كويس جدا بشهادة ركابها وكلمة وغير انى طول مانا بسافر بيها متحكم فيها بشكل كبير
انا رايى 2 كامة 3 سلندر احسن من كامة 4 سلندر
بتقول ليه مخدوعين باليبانى واشمعنى النيسان متنساش البومة والشارك من اكتر العربيات الاعتمادية واتراج من انتاج نفس الشركة
العزم بتاعها ممتاز مع وزنها يعنى مفيش مطلع مهمها كان بيقف قدامها والتكيف بتاعها رائع ملوش دعوة على مطلع على ارض
يعنى كل اللى مش متفق معايا فيه واللى معتبره عيوب مش موجود فى العربية يبقى ايه رايك

البومه 1300 اتوماتيك اكبر مقلب في الحياه
العيوب: تسند ع الصاج يدخل لجوه
2- اي خبطه من ورا لو ضعيفه تطلع تلاقي الفوانيس مفارقه عن الرفرف بفرق ملحوظ او تلاقي الفوانيس طلعت لبره ( انت وحظك)
3- تسارع فاشل
4- ثبات في الضياع
مميزاتها
1- اعتماديه جدا جدا

[Mohamedjetta]

اختلف معاك في اول نقطة ورابع نقطة واخر نقطة

اول نقطة هيا ان العربية مش بتاعت مدينة وانها بتاعت طرق سريعة .. اسمحلي الكلام ده غير صحيح لان ال 3 سليندر مش بتاع جري ولا سحب وسرعات عالية هو موفر فقط للبنزين وده كل اللي مطلوب منه .. وكمان ثبات العربية ميخلكش تجري لانها خفيفة وزناً وكمان تصميم العفشة بيزود الطين بلة


النقطة الرابعة هيا ان العزم مهم فعلا مع الوزن والمطالع .. بس محتاج قدرة حصانية كفاية عشان التكييف مع الوزن

اخر نقطة وللاسف كلنا مخدوعين وخلاص بالياباني .. عندك الصني الجديدة زفت الزفت اهيه وبيتقال عليها يابانيومحدش عايز يفهم انها هندي تقفيل مصري .. الكوري شرخ في كل حاجة تصميمات واداء واعتمادية كمان

فعلا احنا مخدوعين في كلمه ياباني ولوجيت قارنت الالنترا hd مع البوما مش هتلاقي وجه مقارنه وباعتراف كل صحابي و كل اللي اعرفهم اللي ركبو الالنترا بتاعتي و البومه بتاعت والدي سابقا

[ahmed.Elashy]

انتوا بتحكوا ف ايه ؟؟؟
متسوبيشي ذات نفسها قالت ان اتراج City car يعني عربيه مدينه .. هنخاليها بتاعه سفر بالعافيه
العربيه من النوع العملي لجوه البلد بس مينفعش تقول انها سفر وثبات والكلام ده
احنا برده عندنا عقول .. العربيه واخده تقييمات متواضعه جدا ودا طبيعي لانها زي اي عربيه مدينه امكانياتها وموتورها متواضع لتوفير البنزين
العربيه كويسه جدا بس سعرها عالي علي امكانياتها
التقفيل بتاعها كويسه
الهاندلنج بتاعها مش كويس .. التسارع اكيد مش كويس.. عربيه عائله بالدرجه الاولي داخل المدينه .. وخارج المدينه تسافر بس بحرص

[ashouhdy]

اللي بقراة دة

الاتراج حلوة جوة البلد علي السريع بشويش عليها

اي عربية بتجري بس مش اي عربية بتعرف تقف وتعرف تناور

بس كدة .. متدوش الحاجة اكبر من حجمها ولا تقللوا منها برضوا

الاتراج كعربية مدينة فهي نمرة واحد كبنزين وحجم

[hamaad]

هى سيارة تصلح للمدينة وتصلح للسفر بسيط وهى سيارة على قد فلوسه بس هى ناعمة على الطريق وموفرة للبنزين بس كااعتمادية ضعفية وهى وكل السيارات اللى فى فئته ضعيفة شوية وده العادى فى هذه الفئة

[sword00]

العربيه ميه ميه ميه وزى الفل متوازنه حتى لو ماشيه على عجلتين
بتمشى بسرعه 170 واحياننا 200 وفى واحد بيطير بيها وبيوصل لارتفاع 2 كيلوا فوق الارض
العربيه بتمشى فى السفر والمدينه وكمان بتمشى فى الصحراء ولو عايزها غواصه ممكن كمان
الماتور 75 حصان وده كافى جدا لان الطياره قصدى العربيه ممكن يخلى العربيه تطلع عى الحيط كمان وكلام كتير يوكد ان دى عربيه احلامك وفيها كل اللى نفسك فيه
عايز اقول حرام عليكم بطلوا غش فى الناس كل الناس اللى شكرت فى العربيه اعضاء جدد معملوش حتى عدد مشاركات وكل كلامهم اوووفر وعن غير دليل علمى اطلاقا
كل الاراء اللى تستحق المناقشه كانت من اعضاء قدام وكبار فى المنتدى

[هانى شوقى]

العربيه ميه ميه ميه وزى الفل متوازنه حتى لو ماشيه على عجلتين
بتمشى بسرعه 170 واحياننا 200 وفى واحد بيطير بيها وبيوصل لارتفاع 2 كيلوا فوق الارض
العربيه بتمشى فى السفر والمدينه وكمان بتمشى فى الصحراء ولو عايزها غواصه ممكن كمان
الماتور 75 حصان وده كافى جدا لان الطياره قصدى العربيه ممكن يخلى العربيه تطلع عى الحيط كمان وكلام كتير يوكد ان دى عربيه احلامك وفيها كل اللى نفسك فيه
عايز اقول حرام عليكم بطلوا غش فى الناس كل الناس اللى شكرت فى العربيه اعضاء جدد معملوش حتى عدد مشاركات وكل كلامهم اوووفر وعن غير دليل علمى اطلاقا
كل الاراء اللى تستحق المناقشه كانت من اعضاء قدام وكبار فى المنتدى

بص يا غالى هى مش شركة ابونا علشان نغش او منغشش احنا بنقول راى عن تجربة احسن من رايك اللى بيهاجم بدون تجربة
عارفين انها 1200 عارفين ان صاجها زى غيرها من نفس السعر ومحدش قال انها احسن من اللى اعلى منها سعريا بنقول احسن من اللى فى نفس تمنها
واالى خايف من 1200 متخفش مش هتحس بفرق والعربية بدون مشاكل
انا مش فاهم على ايه حرقة الدم دى وكل اللى معاهم العربية كلامهم متوحد ودا قمة المصداقية
فبلاش كلام ملوش لزمة يا شعب فتاى يدى رايه عن حاجة وهو قاعد فى البيت انزل جرب وبعد كدة اتكلم ولو مش عايز يبقى تقعد ساكت ومتغلطش فى حد
الواحد بيتكلم عن حاجة عجباه ولو ظهر فيها شئ سئ هكون قبلك مش هسكت هنعرف الكل بيه

[monamize4]

ياجماعة صلو على النبى ,, اصل الموضوع مش بالعافيه و بلاش نحمل الاتراج اكتر من طاقتها
واضح من الكلام ان المشكلة مش ف مسائل ميكانيكية و رغم كدا الاعضاء المحترمين وضحوا كل حاجة
الفكرة زى ما انا شايفها انها تحيز المالك لعربيته و كلامى عام على فكرة و مقصدش ان اخص بيه ملاك الاتراج المحترمين


اعتقد كلنا شوفنا و لسه بنشوف اللى يعمل تقييم لعربيته و مايكتبش اى عيوب !!!!
و بنشوف ناس ف المنتدى اشتروا موديل معين و بيدخلوا ف اى موضوع و ينصحوا
الناس انهم يشتروا نفس الموديل و طبعا ماينفعش ان عربيتك انت تكون الانسب لكل
الناس بمختلف متطلباتهم