شرح ميكانيكة اتراج المصممة للطرق السريعة

[ahmed.Elashy]

بالنسبه للاخ اللي مغلطنا كلنا وفاكر انه الوحيد اللي مهندس و بيفهم . ف انا برده مهندس ف شركه مالتي ناشونال مش واحد فاتح كشك
وبالنسبه ع العربيات ف احنا ركبنا ولفينا العالم برده مش انت لوحدك
ف للاسف ف غيرك برده بيفهم
عن تجربه العربيه ف انا فعلا جربتها وكنت بفاضل م بينها و بين الميراج
وبامانه التقييمات كلها ف المواقع بتقول انها كويسه بس مننصحش بالعربيه دي لانها عربيه مدينه
متسوبيشي مبتعملش حاجه وحشه ودا شئ اكيد
بس رحم الله من عرف قدر عربيته

[مؤمن حمزه]

ياريت الكلام توجهوه لنفسكم ..اللى داخل يقارن العربيه بكامرى و ليكزس و اللى داخل يتكلملى على عربيات فوق ال2000 سى سى و كلام غريب ..و اللى بيصحى الصبح اول شيء يعمله يدخل يهاجم العربيه و هو مشافهاش اصلا...و مادام حضرتك جربتها و سمعت ان الناس كلها بتشكر فيها يبقى احنا كلامنا صح و كنا صادقين فى نقل تجربتنا و الحمد لله و ده يكفينى...و اذا كنت لفيت و لا عملت انت حر دى حاجه ترجع لك انا كنت باشرح تجربتى فقط لا غير مع العربيات علشان الاخ اللى دخل و كتب الناس اللى مشاركتها قليله ..على اساس ان اللى مشاركته قليله ركب عربيات و اللى مشاركاته كبير بقى ابو الفتوح.....عموما العربيه ممتازه سواء مدينه او سفر و انا باستخدمها فى الاتنين و ماشاء الله ممتازه و ربنا يديمها نعمه دائما و لو حصل اى مشكله من العربيه انا اول واحد هاكتبها هنا ان شاء الله علشان الجميع يستفيد.....

[مؤمن حمزه]

الاستاذ اللى بيتكلم عن سعر قطع الغيار..يا استاذنا طبيعى جدا لما عربيه تبقى نازله جديد يبقى سعر قطع غيارها عالى فى التوكيل و مع الوقت السعر بينزل ..لكن عربيه بقالها سنين و قطع غيارها بالشكل ده و فيها عيوب تقفيل كتيره و انا قلت لك انا ليا صديق الدرج اللى فى التابلوه مابقاش يقفل........

الجين عربيه كويسه و موتورها كويس لكن قطع غيارها سعرها مش منطقي على ماركه زى دى ....على الاقل الميتسوبيشى شركه كبيره و عربياتها فى العالم كله لو قطع غيارها غاليه فده منطقى ..

[max_ziro]

الاستاذ اللى بيتكلم عن سعر قطع الغيار..يا استاذنا طبيعى جدا لما عربيه تبقى نازله جديد يبقى سعر قطع غيارها عالى فى التوكيل و مع الوقت السعر بينزل ..لكن عربيه بقالها سنين و قطع غيارها بالشكل ده و فيها عيوب تقفيل كتيره و انا قلت لك انا ليا صديق الدرج اللى فى التابلوه مابقاش يقفل........

الجين عربيه كويسه و موتورها كويس لكن قطع غيارها سعرها مش منطقي على ماركه زى دى ....على الاقل الميتسوبيشى شركه كبيره و عربياتها فى العالم كله لو قطع غيارها غاليه فده منطقى ..

فعلا اسلوب مهاجمتك للناس غريب ..
عموما هيا عربية حلوة فى حدودها مش بتاعت سفر اصلا دة من وجهة نظرى ولاكن عربية مدينة ممتازة
مش احسن حاجة فى الفئة بتاعتها ولا فى السعر عشان ممكن ب 80 الف اجيب لانوس زيرو و فيها كل الامتيازات و اكتر ماعدا شوية الحجات بتاعت الفرامل
و مع احترامى لسعاتدك ال2 كامة مش ب الاهمية الفظيعة الى بتتكلم عليها دى ال2 كامة موجودة من قبل ال ثمانينات :)

[مؤمن حمزه]

اسلوب مهاجمتى؟؟؟على فكره ملاك العربيه اتهانوا اكثر من مره فى المنتدى ده و لو طلعت كلمه واحده انا كاتبها فيها تطاول على حد ابقى وريهانى...

ثانيا انت حر فى وجهة نظرك دى حاجه ترجع لك...بس ابقى قولى هتجيب لانوس اوتوماتيك منين علشان استفيد من خبرتك الكبيره....و ياريت تشوف لى لانوس فيها اي بى اس و ايه بى دى و اير باج و ماتور ميفيك و فتيس محترم علشان اجيبها برضه اهو برضه نستفيد ....

2 كامه 9 كامه مش هى دى الازمه بالنسبه لى على فكره...الازمه عندى اللى مركبش العربيه و ماشفهاش و بيكدب ملاكها اللى بيركبوها ليل نهارو بيتهمهم بالكذب ...حاجه عجيبه و الله.....

اخيرا انا لم اوجه لك كلام علشان تيجى تعلق على كلامى و تهاجمنى بشكل شخصى و تقولى مهاجمتك للناس ...و ياريت تتناقشوا على العربيه افضل ...واضح ان المنتدى هنا مسيطر عليه ناس معينه و الاغرب ان ماتعملش موضوع مثبت عن العربيه و ملاكها و عن تجربتهم عن العربيه...واضح ان فى اتجاه معين فى المنتدى ده ...

[ashouhdy]

يا جماعة الراجل فرحان بعربيتة وهي بأمانة اغضل حاجة في الفئة السعرية دي

هو بيشرح من وجهة نظرة ولة كل احترام

هو انتم بتاكلوا في بعض لية

بعدين انا شايفها انتشرت ماشاء الله شايف منها النهاردة ٣ في اسكندرية منهم واحدة بجنوط و فوج لايت

[D . a .\ AYMAN]

انا اللى باقولك التكييف بيشتغل على كامه واحده لوحده و العربيه بتمشى على الكامه التانيه مابيحصلش اى تحميل و لا تاثير على السحب ...

معلش سؤال يافندم ... إزاي حضرتك بتقول إنك مهندس ميكانيكا في المشاركة دي وانك بتفهم في العربيات أكتر مننا

http://www.nilemotors.net/Nile/442831-a-4.html#post3875772565

وفي نفس الوقت كتبت السطر اللى فوق ده ... !!!!!!!!!!!!!!!!!!!!!!!!!!!!!!!!!!!!!!!!!!!!!!!!!

يا استاذنا بالمنطق لما يبقى عندك مخرجين تقدر تركب عليهم اكثر من صباب بيدى رئه زياده للعربيه خصوصا للمواتير الصغيره زى الاتراج بدل ما التكييف و العربيه دايره يحملوا على كامه واحده بيتحمل على 2 كامه فبتدى باور اكتر و مابتاثرش على السحب نهائيا و كان التكييف مش شغال...عكس الكامه الواحده بيبقى التحميل كله على كامه واحده لو العربيه موتورها عالى و وزنها كبير مش هتمشى بالتكييف هتموت.......و ده اللى خلى الاتراج بتؤدى كويس وزن بسيط و موتور صغير 2 كامه على 12 صباب و 3 سلندر يدى اداء ممتاز و يدى عمر للموتور

يافندم ... انت عندك كل حاجة راكبة على عمود الكرنك .. الكامة الأولى والثانية والتكييف والمولد ولو في باور هيدروليك بيكون راكب برضه على عمود الكرنك ... كل ده راكب على عمود الكرنك بسير كاتينة واحد للكامات وسير مجموعة واحد للتكييف والمولد والباور (لو هيدروليك) وعلى نفس عمود الكرنك ... وطبعا معنى كدة إن الكامتين شغالين باستمرار مع حركة السير ... ومعنى كدة برضه إن التكييف بياخد الباور بتاعه من عمود الكرنك مباشرة ومالوش دعوة بأي نوع من أنواع الكامات اللى في العربية

منين بقى ممكن كامة تشتغل أو تفصل بمزاجها حسب هوى التكييف عشان تديله الباور اللى هو عايزه بعيد عن سحب العربية

الفرق الوحيد في موضوع كامة واحدة أو اثنين ... إن الكامة الثانية بتدي عزم أكبر للموتور على نفس عدد اللفات سواء قليلة أو كبيرة ..

والسبب إن عملية دخول الهواء وخروج العادم منتظمة ويمكن التحكم فيها بصورة دقيقة أكبر ... وده بيحقق خليط أكثر جودة وسرعة من الوقود والهواء مما ينتج عنه احتراق فعال ومحكم للوقود بصورة أكبر وبالتالي عزم وقدرة حصانية أعلى

على فكرة أنا كان معايا ألتو 800 سي سي ثلاثة سلندر .. 48 حصان .. كامة واحدة ... وكنت باجيب بيها 150 - 160 ك/س بالتكييف على طريق الكريمات أسيوط ... لمدة ثلاث سنوات لمسافة 400 كيلومتر ذهاب وعودة أسبوعيا ... والعربية بحمد الله لم تشتك نهائيا أو تقصر في شيء

السؤال بقى هل ده معناه إن الألتو عربية بتاعة سفر

الفرق بقى إن لما كنت أمشي على نفس الطريق ده بالعربية البيرسونا أو ماتريكس أو غيرهم من العربيات الـ 1600 ذات القدرة الحصانية الأعلى كنت أقدر أجيب بيها 190 والموتور مرتاح أكثر ومن غير ما أحس إني قارص عليه زي الألتو ..

وفي جميع الأحوال متوسط السرعة اللى كنت بامشي عليها سواء بالألتو أو البيرسونا أو بأي عربية تانية كانت 120 - 130 ك/س بالكثير

القاعدة إن كل ما العربية كانت سعتها اللترية أكبر كل ما كانت مرتاحة أكثر في السفر وكمان كل ما كانت مريحة أكثر للي راكبينها

والعكس صحيح ... العربية الصغيرة مريحة أكثر جوة المدينة ومتعبة في السفر ... ودي حقيقة لا جدال فيها

كون إن فيه عربيات دلوقتي زي السويفت والألتو والأتراج سعتها صغيرة وكفاءة مواتيرها تسمحلها بالسفر بدون تعب ... دي حاجة كويسة طبعا ... بس في الآخر عايز حضرتك تجاوب على السؤال ده

البيرسونا والجين2 (اللى سعرهم قريب من الأتراج) هايسافرو مرتاحين أكثر ولا الأتراج هاتسافر مرتاحة أكثر ... ولو قرصت على موتور الأتراج أنهي واحدة فيهم هاتوفر بنزين أكثر من التانية

الجواب ... إن لو قرصت على موتور الأتراج لسرعة عالية زي 170 هاتستهلك وقود ضعف اللى هاتستهلكه البيرسونا على نفس السرعة .. لأن موتور البيرسونا مؤهل للسرعة دي أكثر من الأتراج وكمان الإيروديناميكية بتاعتها وكمان تصميم العفشة بتاعتها ... كل ده يخليها موفرة أكثر على السرعات الأعلى من 90 ك/س عن الأتراج

الأتراج هاتكون موفرة على سرعات هادية لا تزيد عن 90 ك/س ... أي سرعة أعلى من كدة الجين2 والبيرسونا هايكونوا موفرين أكثر في نفس الظروف

الكلام ده طبعا عن تجارب شخصية كثير .. غير مجالات الدراسة النظرية على الورق ... واللى مش عايز يصدق الكلام ده هو حر بالتأكيد ... لكن احنا مش هانخترع العجلة من أول وجديد ... والنتيجة مش هاتتغير لمجرد إننا مش عايزين نشوفها

على فكرة كمان أنا ركبت الأتراج وسقتها وعملت بيها تست درايف قبل ما السويفت تنزل حتى في السوق .. وكنت ساعتها بقارنها بالبيكانتو لأن كان مطلب أساسي عندي عربية موتورها صغير

وبرغم غلو سعر البيكانتو على إمكانياتها ... لكن كانت البيكانتو تكسب من ناحية قوة الموتور بالمقارنة مع الوزن وكمان التقفيل الداخلي وكمان هدوء الموتور عن الأتراج بفارق كبير ... لأني مجرب الثلاثة سلندر في الألتو وكان خانقني جدا بعد مدة من الزمن وبقيت أحس بالرجة بتاعته جامدة في العربية وسخيفة

عشان كدة كنت متجه إني أشتري البيكانتو برغم عدم اقتناعي بيها لكن كانت لوحدها في السوق .. لغاية ما نزلت السويفت

موتور في نفس قوة البيكانتو (وهم الأثنين أثوى من الأتراج بـ 9 حصان) وعلى وزن متقارب جدا بينهم هم الثلاثة وكمان عفشة السويفت أفضل من حيث التحمل والتصميم زي كبر حجم قاعدة العجلات وحجم الجنوط ومقاسها .. والتقفيل الداخلي متساوي إن لم يكن أفضل كمان من البيكانتو ... وكان هدوء الموتور ونعومته مطلب أساسي بالنسبة لي عشان كدة رجعت ركبت الأتراج تاني وقارنتها مع السويفت والبيكانتو (والثلاثة جنب بعض أنزل من دي وأركب دي) .. وكانت النتيجة إن الأتراج تخرج تماما من المنافسة دي من غير تفكير

احسن عربية في فئتها ازاي؟!!!!!!!!!
احسن من الديزاير في ايه؟!!!!!!!!
احسن من السانديرو ليه؟!!!!!!!!
احسن من اللوجان لييييييييييه؟!!!!!!
احسن من الجراند i 10 بردو ليه؟!!!!!!!!!!

ازاي احسن من الجين2 اللي فئة اعلى ؟؟ ازاااااااااااااااااااااااااااي؟!


بلاش التحيز الرهيب ده ياباشا في ناس بتاخد الكلام ده ثقة ولما تشتري بتلاقي حاجة تانية خالص

فكرتني بواحد معاه نيو صني بيتكلم عن الثبات بيقولي انها احسن من الاوكتافيا A4 اللي كانت معاه ... طبعاً انا اكاد اجزم ان هو ميعرفش ايه الاوكتافيا a4 دي ولا يعرف شكلها واصلا النيو صني دي سالفها من ابن عمه لانه شكله مركبش عربيات قبل كدة اساسا -_-

:) :) +1

يا استاذى و لا تحيز و لا حاجه بالعكس و الله الواحد بيقول الكلام اللى يرضى ضميره و لو فى كلمه عن العربيه انا قلتها مش موجوده كانت ظهرت كشكوى من اى من ملاك العربيه بالعكس كل اللى بيشترى العربيه بينبهر بادائها...ثانيا حضرتك بتهاجم العربيه دى بالذات من اول ما ظهرت بسبب و بدون سبب و انا باقولك خلى بالك علشان انت كده بتضلل الناس.....

ايوه من وجهة نظرى العربيه دى احسن من العربيات اللى فوق و انا كنت محتار اجيب اى عربيه فيهم قبل ما اجيب و رسيت عليها و هاقولك ليه...

اولا الستيب واى دى كانت اكتر عربيه داخله دماغى..الاقى قطع غيار مش موجوده فى التوكيل و لا بره و اسعارها غريبه ده غير ان العربيه استهلاكها لللبنزين عالى و شنطتها صغيره....


ثانيا الجراند اى 10 انا نزلت شفتها الاسبوع اللى فات عربيه ضيقه جدا من جوه بلا وسائل امان و سعرها عالى على عربيه مافيهاش وسائل امان و ده مهم بالنسبه لى جدا...

الديزاير عربيه ممتازه لكن توكيل فاشل بكل ما تعنيها الكلمه قطع غيار مش موجوده تقعد شهور تعيط عليها و تركن عربيتك شهور علشان حاجات عبيطه........


الجين 2 موتور قوى و تقفيل سيء جدا انا ليا صديقى عنده جين 2 مشاكل دايما فى الكهربا و الدرج اللى فى التابلوه مابقاش يقفل و قطع غيار غاليه جدا .!!!!!!!!!!


النيسان صنى الجديده ماشفتش حد جابها ماشتكاش منها سواء فى الفرامل او الاير باج اللى مش بتفتح و لا ولا ولا...تقفيل مصرى سيء....

على فكره انا اول عربيه ركبتها بيجو و بعدها مازدا و فى الامارات كان معايا كورولا و فى الفلبين ركبت جيب شيروكى و انا طالب فى امريكا ركبت شيفروليه...و معايا على كده لانسر 2014 شارك.....انا اديت لمراتى الشارك و باركب الاتراج لان العربيه فعلا رائعه فى كل شيء و بعد اكتر من سنه استخدام بره مصر و 6 شهور جوه مصر مافيش اى مشكله فى العربيه نهائى..............نسيت اقولك ان عربيه زى الميراج الهاتشباك محققه السنه دى اكبر مبيعات فى بعض الولايات فى امريكا.............المواتير و الفتيس الميتسوبيشى شيء محترم ...

الموضوع مش وجهات نظر ... الموضوع أرقام وحقائق

- الستب واي دي عربية مقلب وأنا متفق معاك إن الأتراج أحسن منها ... لأنها موتور قديم وقدرة حصانية ضعيفة (زيها زي السويفت والبيكانتو .. برغم إنها 1600) وبرغم كدة وزن تقيل جدا غير مناسب لها


- الجراند آي تن أفضل من الأتراج في إنها أربعة سلندر وقدرة حصانية أعلى ووزن مقارب وفتيس أفضل دي فروق جوهرية ... والفروق غير الجوهرية إنها كمان أوبشنز أعلى وتقفيل تحفة بصراحة من الداخل


- الديزاير والسويفت أفضل من الأتراج في كل حاجة ... عوامل أمان (الفرامل في السوفت فيها ba .. الأتراج لأ) .. صوت أهدأ بكثير .. موتور أربعة سلندر .. عفشة أفضل للخدمة الشاقة (مستوحاة من عفشات العربيات الرالي).. كاوتش أعرض وقاعدة عجلات أكبر (يعني ثبات ومناورة أعلى) وجنوط 15 (يعني فرامل أفضل وثبات أعلى برضه) ... كل دي فروق جوهرية ... وكمان تقفيلها من جوة أفضل وأجود

- بالنسبة للتوكيل ... بصراحة مش عارف مين اللى وصفه لحضرتك بدرجة السوء اللى نقلتها من خلال كلامك ... ده في ناس عملت حوادث بعربياتها السويفت اللى لسة مستلمينها والعربيات دخلت التوكيل واتغيرلها قطع غيار كثير جدا من إكصدام لرفرف لفوانيس لقواعد واتعملها سمكرة ودوكو .. واتسلمت في خلال اسبوع تقريبا (أنهي توكيل في مصر بيعمل كدة أصلا) ... وأنا واحد من الناس عربيتي اتخبطت تاني يوم ما استلتمها ولما سألت على قطع الغيار اللى أنا عايزها كانت موجودة وسعرها كويس جدا

- غير إن قطع غيارها ابتدت تنتشر برة التوكيل ولسة العربية ما عملتش انتشار كبير

- بالنسبة للجين تو ... لو انت بتتكلم عن الجين تو القديمة أنا معاك إن تقفيلها من جوة كان جودته سيئة .. لكن الجين تو والبيرسونا الإليجانس من أول 2012 حاجة تانية خالص .. تقفيل محترم جدا زي السويفت وأفضل من الأتراج ومن غير مشاكل تذكر ... وأساسا العربية عمرها ما كان فيها مشاكل جوهرية في الموتور أو العفشة حتى الموديلات القديمة منها ... وفي نفس الوقت موتور أقوى بكثير وعربية مريحة جدا بالذات في السفر ...

طبعا مش هاتكلم في الثبات الأسطوري بتاع الجين تو والبيرسونا اللى استحالة عربية زي الأتراج ترقى لربعه حتى (ده كفاية تصميم العفشة التورشن بيم بتاع الأتراج وقاعدة العجلات الصغيرة جدا عليها عشان نعرف ثباتها عامل إزاي) اللى أساسا مش ممكن يوصل لنص ثبات السويفت حتى بسبب التصميم وقياسات العفشة دي


- النيسان صني ما أعرفش حاجة عن الموديل الجديد عشان كدة مش هاتكلم عنها خالص ... بس برضه مش ممكن الأتراج تقارن بيها ويتقال عنها إنها أريح منها في السفر ... برضه ما تجيش أبدا

ممكن تكون أريح منها في قلة المشاكل إن جاز لي هذا القول

... في النهاية ما حدش قال على الأتراج إنها وحشة .. بالعكس عربية حلوة ومكن يتسافر بيها عادي ومش هاتكون متعبة ... بس بصراحة ما ينفعش تتقارن بالعربيات الاربعة سلندر اللى موجودة في السوق حواليها واللى كلها 1200 سي سي برضه ... حتى لو بالإيرباج والإيه بي إس وهي بالسعر ده ... العربية دي سعرها آخره إنها تبقى أرخص من السويفت بشويتين كمان سواء هي أو البيكانتو

وكمان ماينفعش تتقارن بعربيات أقوى منها وأكبر منها ويتقال كمان إنها أريح في السفر منهم ... بصراحة ده كلام لا يعقل

الموضوع سياسة تسعير وبيع لاسم ميتسوبيشي في مصر فقط لاغير

وعلى فكرة كمان العربية مش 100 % ياباني ... دي تقفيل تايلاندي .. يعني التقفيل الهندي أفضل منه مرتين مثلا

لأن لو كدة هانقول إن السويفت ياباني 100 % هي كمان :)

وفي الأخر أنا مش عارف كتبت الكلام ده كله ليه (عذرا) على عربيات ماتستاهلش ... بس فعلا في ناس بتقرأ الكلام ده وتبني على أساسه قراراتها عشان كدة كان لازم التوضيح

عايز وموتور صغير مافيش مشاكل الأتراج مش وحشة مع توضيح مميزاتها وعيوبها

لكن عايز عربية عائلية للسفر يبقى حاجة تانية أكيد (زي البيرسونا) لو بتدور في الفئة السعرية دي


والله سبحانه وتعالى أعلى أعلم

[هانى شوقى]

D . a .\ AYMAN
كلامك ليه احترامه طبعا بس العربية على الجانب العملى هتخليك تغير التصنيف المكتوب ده
وخلاص يا جماعة العربيات كلها حلوة وكل سنة وانتوا طيبين
لولا اختلاف الاذواق لبارت السلع وملاك الاتراج نقلوا بكل امانة كل صغيرة وكبيرة فيها مميزات كتير من ناحية الجانب العملى لكن اللى يحسبها نظرى هيكون بعيد عن وجهة نظر ملاكها
احب اقول ان العربية وانت راكبها ليها احترامها ودا جانب مهم وبعض الناس فاكراها اغلى من الشارك على اساس انها لانسر الجديدة يعنى من ناحية الفخامة مقبولة قوى لانها متسوبيشى وانا فى اسيوط شوفتها كام مرة تقريبا فى خمسة داخل المدينة لكن للامانة شوفت اللوجان والستيب والسانديرو بشكل اكتر اللى نزلوا قبلها بشهور
والسويفت ملحقتش شوفتها مرة والجين على الرغم من انها حلوة لكن اسيوط فيها 3 بالعافية وابيجو 301 مش كتير قوى صراحة اللى انتشرت قوى نيسان صنى الجديدة غير كدة اعتقد ان الناس مش معاها فلوس تشترى ب 110 الف لذلك الانشار هيكون بطئ ودا رايى والله اعلم

[مؤمن حمزه]

استاذ ايمن شكرا على ردك و انا احترم وجهة نظرك جدا على فكره و هى وجهة نظر برضه...انا ركبت كل العربيات اللى انت ذكرتهم و لقيت الاتراج افضل فى كل شيء..و عذرا السوزوكى هى اسوا وكيل فى مصر و اسوأ تواجد لقطع الغيار بجوار الرينو و عن تجربه لكثير من اسرتى اللى عانوا فى الرينو و السوزوكى كثيرا و ده سبب ان العربيات السوزوكى سعر اعادة بيعها سيء جدا......انا قلت لك قبل كده الديزاير عربيه جميله لكن مشكلة السوزوكى عندى واضحه جدا ممكن يكون اتحسن التوكيل حاليا على حسب كلامك....

موضوع التكييف انا وضحته فى مشاركه ثانيه بعد كده و قلت انا اقصد ايه بالضبط حضرتك ممكن تبقى تدور عليه و تشوفه..

ثالثا انا كل ازمتى فى الاخوه اللى بيهاجموا بلا درايه و بلا تجربه للعربيه بل و بيهاجموا ملاكها لمجرد انهم بينقلوا تجربتهم .
رابعا انا سافرت بالاتراج و ماعنديش اى مشكله و كنت مرتاح جدا و ماحسيتش باى مشكلة فى الثبات ...لو فى حدمن ملاكها حس باى مشكله ياريت يتفضل يقول...
خامسا العربيه بدات تنتشر بشكل كبير و بدات اشوفها يوميا...

[Ahmed S Nassar]

اعرف واحد سافر بيها مطروح يعنى 400 كيلو متواصل ب 20 لتر

[مؤمن حمزه]

فى حاجه تانيه عايز اقولك عليها بالنسبه لموضوع التقفيل...العربيه مكوناتها 100 فى الميه يابانى كل قطعه فيها من اليابان و اتقفلت فى مصنع ميتسوبيشى فى تايلاند...زى الياريس....و تقفيل العربيه جيد جدا و فى الاخر دى اذواق.....ثانيا حضرتك اتكلمت على الاى 10 جراند..انا شفت العربيه دى الاسبوع الماضى بعينى و ركبتها...العربيه سيئه بجد..ناهيك عن ان مافيهاش اى وسيلة امان من الاساس و دى مصيبه.لكن العربيه ضيقه جدا جوه انا ماعرفتش اقعد ورا .العربيه فيها شبه كبير من الاكسنت بس صغيره قوى من جوه لا تصلح لعائله نهائيا....ثم دى تقفيل و مكونات هندى!!!!!!

اخيرا سؤال عايز اسالوا ليك ليه الديزاير و السويفت ماشفتهمش ولا مره فى الشارع ..رغم انى باشوف الاتراج كل يوم تقريبا دلوقتى ....عايز اعرف ايه سبب انعدام وجود العربيتين دول فى السوق رغم انهم كويسين؟

[walidzakzok]

الاتراج عربية من اشباه العربيات زييها زي الصني واللوجان واللانوس والفيرنا

[mestca]

انا سافرت من مطروح لدمياط مسافة 578 كيلوا بمتوسط سرعة 120 ك و مشغل التكيف اغلب الوقت و كنت مستريح مش تعبان زي اى عربية كبيرة و استهلكت 37.5 لتر فقط و العربية وصلت بيها فى بعض الاحيان لسرعة 150 ك من غير ما اقصد و كانت العربية ثابتة جدا و مفيش شعور بالسرعة لدرجة انى كنت ماشى على سرعة 120 و أولادى بيقولولى ماشى براحة لية العربية ممتعة جدا فى السواقة و المناورة و الباور ممتاز و الفرامل تديك إحساس للأمان الاتراج عربية ممتعة مع احترامى للجميع

[reyad_mohamed]

صحيح مفيش ولا موضوع اتثبت عن الاتراج لحد دلوقتى غريبة شوية هى العربية مضيقة ناس كتير قوى كده
وعيد سعيد على كل اعضاء المنتدى وتهنئة خاصة لملاك الاتراج اللى مجننه ملاك العربيات اللى فى الفئة السعرية بتاعتها واللى اعلى منها ب 30 الف جنيه دايما الهجوم عليها هيبقى من الفئات دى
عمرنا مثلا ما هنلاقى حد راكب النترا ولا كرولا ولا لانسر ولا غيرها من العربيات اللى تستحق التقدير هيدخل يهاجم الاتراج الهجوم من العربيات اللى الاتراج هتقضى على مستقبلها فى مصر الفترة القادمة
بس دى حال الدنيا يوم ليك وشهر للاتراج
عيد سعيد

[mr.moustafa]

مقدر لكل الكلام اللي بيتقال و الأعضاء الكرام ردهم ابلغ و اوقع
كل واحد عربيته عنده احسن عربية و كل واحد بيحللي عيشه

مافيش عربية جديدة دلوقتي كامة واحدة و كلهم 2 كامة يبقى مالهوش لازمة المقارنة اصلاً بينهم
العربية 3 سليندر عربية مدينة و ليست سفر و مش محتاجة نقاش
الاتراج ما شاء الله عربية جميلة و بتؤدي المطلوب منها في حدود فئتها