إسأل و إطمن علي الفرامل..

[SAMER_ENGINES]

شكرا على الموضوع المفيد ده ...
ازاى اعرف ان الفرامل عندى مظبوطة ؟
عربيتى فيرنا 2007 ماشية 14500 كم ...

من كام يوم حصل وواحد نرفزنى فى وسط الطريق .. رحت كاسر و ساحب جامد ( قرصت عالعربية ) بس معدتش السرعة بتاعت الأول بكتير يعنى .. و بعدين جبت التانى و دايس بنزيييين على اساس انى عايز اطلع من الزحمة دى بقى..لاقيتلك تاكسي من اقصى اليسار كاسر عليا و داخل يمين ..دوست فرامل عالأخر و العربية مش عايزة تقف! مع العلم انى كنت جبت سرعة 40 كم/س مثلا ..يعنى مكنتش طاير بس الحمد لله فاديته بانى كسرت يمين شوية ( بجد كنت خلاص هدخل فى الإكصدام المدرع بتاعه )

السؤال : اعرف ازاى ان الفرامل مظبوطة ؟ هل لما الواحد يقرص على العربية فى السحب كفائة الفرامل بتقل ؟ مش المفروض ان انا طالما دوست فرامل عالآخر العربية تقف ؟ طب لية موقفتش ؟ مع العلم انى مسمعتش صوت الفرملة الشهير و صوت زحف الكاوتش مثلاً ... يعنى من الآخر حاسس ان فى حاجة غلط!

شكراً

اهلا بيك و الحمد لله انك لحقت العربية.

و ازاي نعرف اني الفرامل مظبوطة؟
سأجيب علي سؤالك ده في رد لوحده حتي يستفيد منه الجميع بصورة اوضح و ستجد الرد اسفل هذا الرد مباشرة.

و من الواضح اني الفرامل عندك واطية و ده ليه اكتر من احتمال:
اولا: يكون الفرامل واخدة هوا و لا زم يطلع منها عشان الفرامل ترجع تعلي.
ثانيا: يكون في نقص في زيت الفرامل و في الحالة دي راجع علي خزنة زيت الفرامل مرة تانية و لو وجدت ناقصة يتضح ان هناك تسريب زيت او تأكل في التيل.
ثالثاً: ان يكون هناك عيب في الماستر العمومي.

فأول خطوة الان هي الكشف علي مستوي الزيت و لو وجد ان مستواه جيد اذهب الي اي ورشة فرامل و دبرياج و أطلب منه اخد هوا من الفرامل و قوله البدال واطي و هو حياخد هوا لو ظبطت يبقي تمام لو لا حيبدا في الكشف علي الماستر العمومي و لا اعتقد اني السبب سيخرج عن تلك النقاط.

[SAMER_ENGINES]

كيف أتأكد من جودة الفرامل؟؟

1- يكون مشوارها مش طويل لتحت زي ما هو واضح عندك.

2- (تجربة الفرامل العادية) تاخد سرعة بالعربية و تفرمل فجائي و لو صرخ العجل و توقف العجل عن الدوران يبقي الفرامل جيدة.

3- ألا تكون الفرامل ناشفة زيادة عن اللزوم يعني مشوارها قصير زيادة عن اللزوم و اول ما تدوس العربية تكلبش في الأرض.

4- تكون الفرامل مش محجرة لما تدوس تحس انك بتدوس علي طوبة و مع ذلك العربية مش بتفرمل و لا تتوقف.

5- عدم وجود حدفة يمين او يسار.

6- أن تكون الفرامل مستقرة و استقرار الفرامل بمعني الا تتوقف في مرة و مرة الفرامل تهرب.

7- عدم توقف عجلة واحدة فقط و الباقي لا و عدم توقف جميع العجل و عجلة واحدة لا أو ان تتوقف السيارة من ناحية الشمال فقط او اليمين فقط او من الامام فقط او الخلف فقط.

* و للتأكد من فرامل اليد نضع السيارة علي السرعة الاولي و نشد فرامل اليد و نقوم بالتحرك بالسيارة بصورة عادية و كأننا بنتحرك بالسيارة بشكل عادي لو امتنعت السيارة عن التحرك أو المحرك بطل تكون الفرامل جيدة اما لو تحكرت السيارة و لو بثقل يكون هناك عيب.
و الباب مفتوح لي و لغيري لإضافة المزيد من طرق التأكد من الفرامل لو كان هناك المزيد.

[maka]

التيل موجود للكوري و الياباني و الفيات و اللادا و كل الماركات تقريبا.

و بالنسبة لتغيير التيل ليس له علاقة بالكيلومتر اطلاقا عكس كل شئ في العربية يمكن كل شئ بالسيارة فعلا مرتبط بالكيلومتر بس التيل لا لانك ببساطة ممكن تكون بتسافر يوميا و بكدة بتستهلك كل حاجة في العربية ما عدا التيل تقريبا لانك طول الطريق لا تستخدم الفرامل الا قليلا و لهذا فالتيل ليس له علاقة بالكيلومتر ابدا.

شكرا..........

[M.Osman]

car lover
شكرا لك عزيزي ... إن شاء الله لما اشيك عليها اقولك عملت ايه :)

[Karim Salem]

انا عندى مشكلة فى الفرامل زهقتنى

انا بشكرك على الموضوع الرائع
بس انا عندى مشكلة غلبتنى و موش عارف ايه حلها
اولا عربيتى بروتون ويرا
كنت دايما متابع الصيانة الدورية كل 5000 كيلو ، المهم الفرامل كل مرة يقولوا التيل زى الفل موش محتاج تغيير
لحد صيانة ال30000 قلتلهم التيل صوتة باين انه خلاص انتهى
قالوا اه لازم يتغير و لازم نخرط الطنابير (ده كان عز العرب اللى فى اسكندرية) هو المهندس اللى هناك رشح الخرط لان الطنابير اللى عندهم الجديدة ب1000 جنيه
المهم من ساعة ما اتلعب فى الطنابير و انا دايما بحس ان الدريكسيون فيه رجه لما بدوس فرامل.
المهم غيرت الطنابير و التيل و الكاوتش قلت خلاص بأه المشكلة المفروض تكون اتحلت برضة لسه
انا خلاص اتعقدت ساعات اقول لنفسى ما كل العربيات كده اكيد لما هدوس فرامل هحس برجة فى الدريكسون.

[ehab_mansour]

استاذ كارلوفر عندي سؤال محتار فيه
ليه لما ابطل السيارة بتكون الفرامل محجرة وتقريبا مافيش فرامل خالص لأن دي زهقتني لما كانت عربيتي عطلانه وسحبتها للميكانيكي وتقريبا مافيش فرامل وهيا مش دايرة واكنك بتدوس علي حجر وشكرا

[EHAB TAHER]

المشكلة هى طول مشوار دواسة الفرامل لكنها ف الاخر بتمسك
علما انى غيرت ماستر عمومى والميكانيكى خد الهوا ومن ساعتها
المشكلة الاساسية اتحلت لكن ده اللى فاضل
والف شكر ع المعلومات دى
الرجاء من الادارة تثبيت الموضوع

[SAMER_ENGINES]

انا بشكرك على الموضوع الرائع
بس انا عندى مشكلة غلبتنى و موش عارف ايه حلها
اولا عربيتى بروتون ويرا
كنت دايما متابع الصيانة الدورية كل 5000 كيلو ، المهم الفرامل كل مرة يقولوا التيل زى الفل موش محتاج تغيير
لحد صيانة ال30000 قلتلهم التيل صوتة باين انه خلاص انتهى
قالوا اه لازم يتغير و لازم نخرط الطنابير (ده كان عز العرب اللى فى اسكندرية) هو المهندس اللى هناك رشح الخرط لان الطنابير اللى عندهم الجديدة ب1000 جنيه
المهم من ساعة ما اتلعب فى الطنابير و انا دايما بحس ان الدريكسيون فيه رجه لما بدوس فرامل.
المهم غيرت الطنابير و التيل و الكاوتش قلت خلاص بأه المشكلة المفروض تكون اتحلت برضة لسه
انا خلاص اتعقدت ساعات اقول لنفسى ما كل العربيات كده اكيد لما هدوس فرامل هحس برجة فى الدريكسون.

تسعدني دائما مساعدتكم و لا شكر علي واجب.......
و بالنسبة لخرط الطنابير عند تغيير التيل فبالرغم من ان هذه العملية تأكل من حديد الطنبورة او كما يقول الصنايعية (بتاكل في اللحمية بتاعة الطنبورة) و لكن و مع هذا فهذا شئ لابد منه لاني التيل بيكون جديد و الطنبور من كتر الإستعمال و الإحتكاك في التيل القديم اصبح به تعريجات علي سطح الطنبور و لهذا فيجب علينا خرط الطنابير حتي يتساوي سطح الطنبور تماما حتي لا يقضي علي التيل الجديد او يقصر عمره.
هذا من ناحية اقتراح الخرط و الذي كان المهندس فيه علي صواب.

بس واضح اني الخراط مش كويس بس من الواضح انك اشتريت طنابير تانية بس اكيد فيها مشكلة لاني رجة الدركسيون دي بتكون طنابير بنسبة كبيرة معلش حاول تشيك علي الطنابير مرة تانية و اخرطهم عند حد كويس و شوف التيل بالمرة بس اهم شئ خراط يخرط بنضافة و شغل حلو.

[SAMER_ENGINES]

استاذ كارلوفر عندي سؤال محتار فيه
ليه لما ابطل السيارة بتكون الفرامل محجرة وتقريبا مافيش فرامل خالص لأن دي زهقتني لما كانت عربيتي عطلانه وسحبتها للميكانيكي وتقريبا مافيش فرامل وهيا مش دايرة واكنك بتدوس علي حجر وشكرا

اهلا بيك صديقي
و بدون ما اسألك أكيد سيارتك بها سرفو و هو موجود في غالبية السيارات و منذ اوائل الثمانينات تقريبا و هو مساعد الفرامل و هو لا يعمل الا مع دوران الموتور فقط.
و هذا هو شكله:


و هو يعمل علي شفط هواء من الموتور و هذا الهواء يعمل علي تعزيز القوة الفرملية و جعلها تعمل بصورة افضل و انعم و بسلاسة اكتر و هذا الهواء لا يدخل للسرفو الا في حالة دوران الموتور بالطبع و يتضح سحب الهواء هذا في المكاركة مع دوران السيارة فعندما تكارك او تدوس دوسات متتالية في السيارة علي بدال الفرامل تشعر انها حتبطل و هذا لأن السرفو يأخذ من الهواء الداخل للموتور لتغذية نفسه و لتعزيز الفرامل (ملحوظة: هذا الهوء لا يدخل في خراطيم الفرامل فهذا غير الهوا الي بيكون في دورة الفرامل و بيسبب ضعف الفرامل), و لهذا فما حدث معك شئ طبيعي جداً و لا يوجد منه اي خوف و لا يوجد مجرد شبهة خطأ في الفرامل فالسرفو لا يعمل ابداً الا مع دوران الموتور.

[SAMER_ENGINES]

المشكلة هى طول مشوار دواسة الفرامل لكنها ف الاخر بتمسك
علما انى غيرت ماستر عمومى والميكانيكى خد الهوا ومن ساعتها
المشكلة الاساسية اتحلت لكن ده اللى فاضل
والف شكر ع المعلومات دى
الرجاء من الادارة تثبيت الموضوع

اهلا بيك.........
و ممكن يكون المشكلة في الرجلاش حاول تروح للميكانيكي يفتح لك الجلاش او لو التيل متاكل اوي و عايز يتغير يبقي لازم يتغير عشان ترجع الفرامل تعلي تاني و كنت عايز اعرف لما غير الماستر العمومي اخد هوا منين من العمومي و لا من المساتر الفرعية؟؟
عامة خليه يفتح لك الرجلاش شوية لو التيل لسه كويس و ياخد لك هوا كمان مرة.
و عادي مش عيب في الصنايعي لأني العربية ممكن ترجع عندنا تاخد هوا مرة و اتنين لحد ما الفرامل تظبط مفيش مشكلة.

[EHAB TAHER]

اهلا بيك يا باشا
انا لما غيرت الماستر غالبا الميكانيكى خد هوا من المساتر الفرعية
انا كده اخليه يكشف ع التيل ويرجلش الفرامل وياخد هوا
ولا ف حاجة تانى
ولك جزيل الشكر

[SAMER_ENGINES]

اهلا بيك يا باشا
انا لما غيرت الماستر غالبا الميكانيكى خد هوا من المساتر الفرعية
انا كده اخليه يكشف ع التيل ويرجلش الفرامل وياخد هوا
ولا ف حاجة تانى
ولك جزيل الشكر

خليه ياخد لك هوا و جرب الاول (و ده عشان ميفتحلكش شغل و يحل و يربط كتير و ممكن يطلب فلوس تاني), لو ظبطت يبقي كدة تمام لو واطية برضه يبقي يفتح عشان يرجلش و في نفس الوقت يبص علي التيل.
و انا في الخدمة دايما.

[maka]

ممكن صورة للمساتر الفرعية

[ehab_mansour]

اهلا بيك صديقي
و بدون ما اسألك أكيد سيارتك بها سرفو و هو موجود في غالبية السيارات و منذ اوائل الثمانينات تقريبا و هو مساعد الفرامل و هو لا يعمل الا مع دوران الموتور فقط.
و هذا هو شكله:


و هو يعمل علي شفط هواء من الموتور و هذا الهواء يعمل علي تعزيز القوة الفرملية و جعلها تعمل بصورة افضل و انعم و بسلاسة اكتر و هذا الهواء لا يدخل للسرفو الا في حالة دوران الموتور بالطبع و يتضح سحب الهواء هذا في المكاركة مع دوران السيارة فعندما تكارك او تدوس دوسات متتالية في السيارة علي بدال الفرامل تشعر انها حتبطل و هذا لأن السرفو يأخذ من الهواء الداخل للموتور لتغذية نفسه و لتعزيز الفرامل (ملحوظة: هذا الهوء لا يدخل في خراطيم الفرامل فهذا غير الهوا الي بيكون في دورة الفرامل و بيسبب ضعف الفرامل), و لهذا فما حدث معك شئ طبيعي جداً و لا يوجد منه اي خوف و لا يوجد مجرد شبهة خطأ في الفرامل فالسرفو لا يعمل ابداً الا مع دوران الموتور.

السلام عليكم
متشكر جدا جدا استاذ كارلوفر علي معلوماتك القيمة والمفيدة فعلا وده فعلا اللي عندي والحمد لله ردك ده علمني كتييييييييير وخاصة الصورة عشان اكون فاهم لما تحصل مشكلة اعمل ايه .
ممكن سؤال تاني انا عندي الفرامل كويسة جدا والحمد لله وعربيتي ابيزا موديل 98 وشاريها من 6 شهور تقريبا وحتي الأن ما عملتش فيها اي شيء غير اني غيرت تيل قدام ومشيت بيها حتي الأن 20 الف كيلو والتيل مازال كويس والزيت مستواه كويس يا تري محتاجه صيانة او حاجه او الزيت يتغير.... يعني من الأخر ايه المطلوب مني عشان اضمن ثبات الأداء بتاع الفرامل ؟؟؟؟؟
وجزاك الله خيرا وربنا يكرمك علي قدر مساعدتك للناس

[SAMER_ENGINES]

السلام عليكم
متشكر جدا جدا استاذ كارلوفر علي معلوماتك القيمة والمفيدة فعلا وده فعلا اللي عندي والحمد لله ردك ده علمني كتييييييييير وخاصة الصورة عشان اكون فاهم لما تحصل مشكلة اعمل ايه .
ممكن سؤال تاني انا عندي الفرامل كويسة جدا والحمد لله وعربيتي ابيزا موديل 98 وشاريها من 6 شهور تقريبا وحتي الأن ما عملتش فيها اي شيء غير اني غيرت تيل قدام ومشيت بيها حتي الأن 20 الف كيلو والتيل مازال كويس والزيت مستواه كويس يا تري محتاجه صيانة او حاجه او الزيت يتغير.... يعني من الأخر ايه المطلوب مني عشان اضمن ثبات الأداء بتاع الفرامل ؟؟؟؟؟
وجزاك الله خيرا وربنا يكرمك علي قدر مساعدتك للناس

عفوا صديقي و لا شكر علي واجب..........
بالنسبة لصيانة الفرامل و انك تحافظ علي ثبات ادائها كل المطلوب منك تكشف علي سائل الفرامل من وقت للتاني و لو وجد الزيت ناقص متزودش الزيت بتروح بيها لورشة فرامل و دبرياج يكشف علي التيل عشان النقص ده ممكن يكون ناتج عن تآكل في التيل (ماعدا لا قدر الله في حالة النقص الشديد و تحس انه مش هينفع تمشي بيها كدة في الحالة دي لازم تزود لغاية ما توصل لورشة فرامل و دبرياج عشان يقوم باللازم).
و ده هو الشئ اللي بتعمله عشان تضمن انها تفضل جيدة و بصراحة اخاف اقولك تروح تكشف كل شوية عند حد (يعني كشف دوري) لأني ده مينفعش في مصر برة ممكن لكن هنا ممكن حد يقولك اه دي فيها و فيها و ممكن يلعب فيها و خلاص و ترجع تقول انا كنت الاول أحسن فكدة افضل و لاحظ لما تيجي تشتري ماستر عمومي بالذات يكون مش صيني و يكون نوعه كويس لاني ده الماستر اللي بيوزع سائل الفرامل للعربية كلها و لما تحط سائل فرامل تحط نوعية جيدة يستحسن بندكس فرنساوي او لوكهيد بس البندكس نوعية جيدة جدا و سعره ارخص.
و من ناحية تغيير الزيت انا مش بفضل التغيير لاني الزيت بيتغير لوحده مع عمرات الفرامل زي ما قلت قبل كدة لما بتعمل حاجة في الفرامل الزيت القديم بينزل و بيتحط زيت جديد عادة فأنا شايف انها طالما العربية ماشية كويس خلاص لأني مش بفضل اللعب في الفرامل كتير من غير داعي.
هو بس و انت بتكشف علي المية و زيت الموتور و كدة اكشف علي سائل الفرامل بالمرة زي ما قلت لك.
و أي حاجة انا تحت امركم.