سقوط علامة بروتون الجزء الرابع (سلسلة مواقف كوميدية)

[FunnyMickey]

والله بغض النظر عن جيبه او بنطلون
فانا احساسي النابع من الثقافه المصريه
يقول انك كنت بتتزبط ياابو السيد من البنتين
واما عملت فيها محترم
قرروا يعلموك متبقاش محترم

والحاجه التانيه المحتمله
ان البت دي تكون من الدويقه واخوها اسمه حسن وعليه حكم
وشغال علي عربيه بروتون
وكانت بتقلب له العلامه

سؤال مهم :

انتا ازاي مصري ومتعرفش اي حاجه عن مصر
حتي لو كنت عايش بره طول عمرك ومولود هناك

الصوره اللي انتا كنت راسمها في خيالك دي اترسمت بناء علي ايه
وازاي كان نفسك تدخل الجيش وتبقي ظابط
ومتعرفش مين اللي قام بثوره 1952
ولا ثوره 1919
ولا قاموا بيها ليه وعشان ايه


وسؤال جوهري بقي

ايه ياسيد الفرق بين فيلم رد قلبي
والفيلم اللي كان شكري سرحان طالع فيه ظابط في الجيش والوانه كانت عجيبه
ما الاتنين واحد ياابني
:)

[sayed911]

هههههههههههههههه ادي بقا ضريبة الشهرة هههههههههههههه معجبين واسئلة والصحافة والإعلام :d :d والله ما هانساكم يا جماعة انتم السبب اني اقف هنا اليوم واتحدث اليكم :d :d :d

والله بغض النظر عن جيبه او بنطلون
فانا احساسي النابع من الثقافه المصريه
يقول انك كنت بتتزبط ياابو السيد من البنتين
واما عملت فيها محترم
قرروا يعلموك متبقاش محترم

بصراحة والكدب خيبة آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآه انا سمعت شوية كلام ميمعهوش عيل في ابتدائي اتمسك بيشرب سجاير !!!!!! ولكن الأدب والأخلاق بيفرضوا انك تسمع وتسكت مهي برضوا في الآخر lady

والحاجه التانيه المحتمله
ان البت دي تكون من الدويقه واخوها اسمه حسن وعليه حكم
وشغال علي عربيه بروتون
وكانت بتقلب له العلامه

احنا فيه بينا توارد افكار بطريقة انا ابتديت احس انك توأمي :d :d ولكن بص هية كان صوتها عالي وطريقتها ز.... ولكن تخيل التاتو اللي كان على الكتف واحنا اصلا كنا في عز البرد ساعتها !! ولا كم المصطلحات الفرينش والإنجليزي اللي كانت بتتحدف في وشي والنضارة اللي كانت على وشها والروج ممكن تكون المظاهر خداعة فعلا !!!!! ولكن تقدر تجيبلي شاب واحد في مصر يقدر يزعق في بنت في وسط الشارع ونقول عليه شهم :d :d :d ده حتى عيب ولكن انا متأكد انه هيا فعلا من الدويقة وانها ضاربها نضارة من العتبة اذا كنت انا النضارة بتاعتي (نظر) مش بتتلبس مع انه نظري اصلا شيش بيش خالص بقا :d :d
يالله همة البنات ها يروحوا فين ولكن صدقني انا عملت بنصيحة قريتها في كتاب :d :d هات دفتر صغير وخلي معاك قلم كل واحد وجهلك كلمة في يوم من الأيام او استئت منه او وجهلك كلمة خليتك ادايقت او عربية حدفت عليك اكتبهم في الدفتر الصغير ده وتعالا في آخر اليوم واقعد حاسب نفسك حصل كده انتا كنت مخطئ في الموقف ده ولالا هل كانت الأمور محتاجة تصعيد ولالا .. وهكذا وده كتاب تقريبا كان بتاع الدكتور فيل ..
انا بقا طبقت النص الأولاني اني اجيب اسماء كل اللي اساءوا ليا في حياتي
ووعدت نفسي اني في يوم من الأيام ها ابقى شخصية ها اعمل لائحة اغتيالات :d :d :d :d :d كل من شتمني في يوم من الأيام ها يتجاب ها يتجاب ها تلاقيني منتشر قوي :d :d وغالبا بعد تنفيذ هذه الائحة الإنفجار السكاني في مصر ها يقل كتير (اللي اسائوا ليا ميتلموش في ورق ههههههههه)

سؤال مهم :

انتا ازاي مصري ومتعرفش اي حاجه عن مصر
حتي لو كنت عايش بره طول عمرك ومولود هناك

انا والدي مصري ووالدتي مصرية برضوا ولكن انا زي ما حكيت انا زياراتي في مصر كانت لا تتعدى اشهر الأجازة الصيفية في مصر كل عامين وساعات كل ثلاثة كمان يعني اختلاطي بمصر كان بيبقى على كدى شهور .. + انا كنت بدرس في مدارس اجنبية وليست تابعة للسفارة والحاجة الوحيدة التي تسببت في فهمي وحفظي الجيد للعربي كان المدرس اللي كان والدي بيعلمني العربي عنده من وانا في ابتدائي وامتحانات اللحاق بالقنصلية والقرآن الكريم وحاجات زي دي

ولكن عمري بقا ما درست كلمة واحدة عن التاريخ في حياتي :d :d :d :d يعني انا ها اموت واعرف مثلا الأستاذ صلاح سالم عمل ايه في حياتوا عشان يبقى فيه شارع بالحجم ده بإسموا !!!!!!!!!!!!!
مكرم عبيد نفس القصة الى ان فسره لي حمدي (واحد من صحابي ) بأنه لعيب كورة كبير جدا هوة اللي رجع بكاس افريقيا مع الخطيب الى ان اكتشفت الإشتغالة الحقيقة !!!!!!!!!!!!!!!!
وكان منظري .......

الصوره اللي انتا كنت راسمها في خيالك دي اترسمت بناء علي ايه
وازاي كان نفسك تدخل الجيش وتبقي ظابط
ومتعرفش مين اللي قام بثوره 1952
ولا ثوره 1919
ولا قاموا بيها ليه وعشان ايه

الصورة دي انا رسمتها بناءا على الأخبار اللي كنت بعشق اني اتابعها الحقيقة (تخيل بتتفرج على الدش في بلد درجة الحرارة فيها اسقع من اقوى فريزر في العالم -21 وكل 3 ساعات مطلوب منك تطلع تدلق على الدش شوية انتي فريز عشان الطبق بيصل لمرحلة التجمد !!!) عن طريق الحكاوي اللي والدي كان بيحكيهالي او بقا ودي كانت الأفضل الحقيقة انا كنت عايش جزء كبير من حياتي في كونباوند وكان ليا اصدقء من الخليج والشام ومصر وبحكم اننا كلنا اطفال كل واحد كان بيتفاخر بجنسيته وكل واحد يحكي ويتحاكى بيها الى ان نصل مثلا للإعدادية وكان بيجيلنا مثلا شباب بقا عاشوا فعلا عن مصر اتعرف عليه اشهرهم حسام عباس اللي والده مدير احدى البنوك في مصر وانتدب للتدريس في جامعة البندقية فعرفني بمصر بشكل اكبر ولكن الثورات بقا !!! المشكلة اني ماشي بمبدأ انه مادام التاريخ لن يؤثر في مستقبلي بشئ فلا داعي لتضيع وقتك بقراءته ..... طيب انا مش عارف مين عمل ايه فين :d ها اعرف اقرء ايه واسيب ايه ازاي :d :d
انا كنت بعدي دائما من ميدان في وسط البلد قدام جروبي الراجل اللي رافع ايده ده كنت ها اتشل وها اعرف مين ده اصلا !!!!!!!!! بلاش الراجل المسكين اللي في ميدان الأوبرا اللي راكب حصان !!! مين ده !!!!! وده اللي خلاني اول ما جيت مصر لفيت على كل متاحف القاهرة واتفرجت على كل حاجة :d :d بس بالزبط زي ما جيت مفيش حاجة اتجمعت معلومات مشتتة يعني مفيش حقائق معلومات ثابتة واكيدة متلاقيش ولكن تلاقي طراطيش معلومات للأسف مين السبب في كده :d :d الأجندات الأجنبية بقا :d :d :d

ايه ياسيد الفرق بين فيلم رد قلبي
والفيلم اللي كان شكري سرحان طالع فيه ظابط في الجيش والوانه كانت عجيبه
ما الاتنين واحد ياابني
:)

معاك حق والله فعلا جوجل اثبت المعلومة دي التاني اللي اقصده اسمه صراع في النيل :d :d :d :d :d
الواحد تحس انه دماغوا سرعتها 0.000000001 ghz والرامات مفيش الجهاز معتمد على الإعانات الخارجية !!!!!! انتا بتقول عليا كده في الأفلام امال لو شفتني في الأكل ولا اللعيبة ولا الشـــــــــــــــــــــــــــــــــــــــــــــــ ـــــوارع اللي ننام والشارع هنا تصحى بكرة الصبح متلاقيش الشارع بحالوا !!!!!
اقسم بالله العظيم انا مرة رايح ازور بيت عمامي في شبرا عند مستشفى معهد ناصر وعلى اللي حصل !!!!!!!!!!!!!!!!!!!!!
فيه بنزينة قبل الدخلة بتاعت البيت بنزينة موبيل لو انتا عارفها قبل معهد ناصر مباشرة انا معلم بيتنا القديم بيها اعدي البنزينة وادخل اول يمين مباشرة !!!!!!!
ساعتها كانت البنزينة فيها تصليحات فكانوا محاوطينها بصوان كبير وقماش كبير جدا مغطي اصلا انه هنا فيه بنزينة :d :d :d
مش ها اقولك ايه اللي حصل بس كفاية اني اقولك انه محمد ابن عمي نزل جابني من اول طريق بنها !!!!!!!!

[Mzeid]

طيب يا عم سيد مادام والد صاحبك شغال في جامعة البندقية
ما كنت تجبلنا بندقيتين كدة نحمي بيهم نفسنا بدل ما عمالين ندور على السلف دفينس و الالكتريك
و اهو كمان لما تطلع على اول طريق بنها لو طلع عليك قطاع طريق تعرف تتعامل

ولا ايه ؟ :)

[undercover]

سيد انتا رهيييب و الله انا دحكت دحك محصلش قبل كدة

[AkramArafa]

انا بعد ما قريت حكايه علامه البروتون
اكتشفت ان القصه المفروض اسمها يتغير ل(التصاق علامه البروتون)
(:

[زينة الله]

هوة الحملة قائمة بالفعل انا بقضي كل يوم اجازة مع اصحابي في احد المناطق للتعرف عليها اكثر زي صقارة- الهرم-كنج مريوط (نفسي افهم عمل ايه الإسم ده ) - المعادي - وهكذا عشان اتعرف بشكل اكثر على الثقافات ولكن معنديش حاجات كتير جدا زي ثقافة الفصال دي الحقيقة مفيش واللي نفسي اتعلمها لأني دائما بحس انه بيندحك عليا :D :D وغيروا وغيروا ولكن حضرتك تقبلي بقا بتدريسي مادة التاريخ وياريت بقا شرح قوي جدا للمصطلحات السابق ذكرها والتي ستذكر بعد اليوم :D :D انا جبت الكشكول والقلم ومنتظر ....
يستطيع الإنسان ان يفي بحق رجل اسدى له معروفا ولكن لا يستطيع ان يسدد حق من علمه حقا ...
اجيب كشكول مربعات ولا وش وش ولا ايه بالزبط ؟ هوة التاريخ محتاج كشكول من اساسوا ؟

عايز تتعلم ثقافة الفصال و التعامل مع الناس من سقارة و كنج ماريوط !! مش دى فسح الناس الزهقانة من الثقافات دى؟؟

بص أنت تزود زيارات لعمك فى شبرا :: ولاد بلد جدعان جدا :::

تنزل بولاق ، الكيت كات ، إمبابة ، وسط البلد ، فيصل ، العمرانية و غيرهم ... بس ما تنزلش لوحدك فى الأول على الأقل


::: بالنسبة للتاريخ بعد الكلام الحلو دا بإذن الله أعملك موضوع مخصوص لدروس التاريخ من أول الملك نارمر موحد القطرين :::


::: بالنسبة لموقف العربية و التعامل مع الناس التى لا تلتزم الذوق و التى تتمتع بقدر كافى من البرود :::

يبقى البس الوش الخشب و أرسم على وشك شوية قرف ههههههههههه

و كلامك يكون فيه حزم و استخدم كلمات مهذبة من غير صوت عالى حتى لا تعطى الفرصة للجدال معك

منتظرين الحلقة الجديدة ...................

[yascro]

لا جيبه ولا بنطلون
عاش سيد ملك البروتون

[osama.m]

لا جيبه ولا بنطلون
عاش سيد ملك البروتون

عاش عاش عاش


سيد .. موضوع السواقة بقى

[saadelden]

الحمدلله عربيتي بلا علامات :d
بس الي بيقعد عليها بتزعله :p

[tito_1980]

مش ممكن ... انا جالي هيستريا ضحك

[AhMeD EzZ]

سيد هي العلامة دي فين نااااااااااااااو :d

و مستني انجازاتك و بطولاتك قي تعلم السواقة d:

[2faster]

بص يا ابو السيييييييد

انا ممكن انغاضي عن الجيبة والبنطلون بتوع البنت

بس مش ممكن اتغاضي عن حلقة النهاردة

هيا فييييييييييييييييييييين

[elfashn]

ايه يا جماعه هو فين سيد؟ هو حلقه النهارده مش نازله ولا ايه

[sayed911]

سقوط علامة بروتون الجزء الثالث ..

(اول خبطة ليا في مصر )

انا من النوع اللي بيحب يوثق كل شئ بيحصل معاه في حياتوا امتى اول مرة اتكلمت في موبايل ايه اول عربية سوقتها في حياتي اول مرة طبخت اول مرة وهكذا .. والحقيقة وللأسف الحلقة دي في حاجات كتير طارت من دماغي منها ولكن انا شايف انكم لازم تسمعوها ..

والجزء ده كان عن اول خبطة ليا في مصر ...

الحقيقة انا مش فاكر الخبطة دي انا اتحبطتها امتى ولكن كانت بعد ان اخدذت ثقتي في نفسي ..

وثقتي في قيادتي .. كانت في ازدياد شديد للغاية

المهم انه اليوم ده كان بعد فترة من اول حلقة ..

وعلى ما اذكر انه يوم الحلقة دي انا كنت نازل عندي امتحان تحميل خرساني :D :D امتحان للدكتور المذكور في الجزء السابق .. واللي اعتقد كثير منكم عارفين قد ايـــــــــــــــــــــــــــــــــــــــــــه هوة بيحبني :D :D :D

فقعدت ازاكر طول الليل وعايز اوصل لخلطة توصلني لحمل 300 كيلو على الـ سم2 وفضلت اجرب بالحسابات كمية المياه وي وي وي وي وي وكان تقريبا كمان عندي اكثر من امتحان ... وعارف انه قدامي فرصتين للإمتحان الأحمال يا اما المحاضرة الأولى 8.30 يا امى المحاضرة الثانية 10.30 ولكن انا قلت ها اتوكل على الله ونمت حوالي الساعة 4 ساعات وزبطت منبهي على حوالي الساعة 6.30 قولت عشان برضوا الطالب المثالي يلحق يصحى يراجع على خلطته اللي ها يطبخها وربنا ها يسترها ان شاء الله اتخدمدت نمت زي الخروف بالزبط واخوكم بقا عامل لنفسه مجموعة الغام في البيت ليه بقا انا من الناس اللي نومي ثقيل جدا !!!! جدا! بمعنى الكلمة :D :D

انا عشان اصحى بزبط منبه الموبايل وبحطوا تحت المخدة عشان يطع في دماغي على طول ويصحيني

ومنبه كمان بيتحط بعيد عني عشان مقدرش اقوم اطفيه وارجع انام تاني وزابط التلفزيون انه يفتح على قناة الجزيرة وعلى Vol 100 عشان يرج البيت !!!!!!

وبرضه البعيد مش بيصحى :D :D :D

والله انا مرة صحابي واحنا مسافرين سوا افتكروا اني حصلي حاجة بسبب طريقة نومي :D :D وايه بقا وللا حركة ولا اي حاجة زي ما بنام زي ما بقوم :D :D

اصلي ماشي بنظام البرت اينيشتاين انك تنام 4 ساعات في اليوم ومتكونش متصلة وحاجة من اتنين يا تتعود عليها يا يجيلك انهيار عصبي :D

وانا الحمد لله معنديش انهيار عصبي ولكن ادت معايا آثار منيلة بستين نيلة :D :D يعني زي ايه

زي اني ابقى قاعد في انتظار موبينيل عشان ادفع الفاتورة والكاشير يجي يصحيني :D :D

يعني تنام على نفسك وانتا في وسط المحاضرة وتسمعلك كلمتين

يعني ممكن ساعات بتحصل اني انام وانا واقف ههههههههه ولكن دي لما ابقى خلاص ميت ميت يعني :D :D

المشكلة انه اينيشتاين لما عمل النظام ده كان قصده يزود بيه الإنتاجية بتاعته عشان يكرس نفسه مدام ها ينام اربع ساعات فقط يبقى ها يصح 20 ساعة في شغل وكد وعمل :D :D

اخوكم الحقيقة نايم 4 ساعات و5ساعات تهريج و 5 بدعي التركيز بين العمل والمذاكرة و5 ثقافة و5 غالبا بيبقوا تهريج برضوا :D :D

ادي يومي :D :D

يعني جد X جد X جد

وعليا النعمة ما انا نافع في حاجة ومقتع بكده تماما (كلمة الحاجة الله يمسيها بالخير ) ودائما يكون ردي عليها بكرة لما ابقى حاجة مهمة في البلد ويجي السكرتير بتاعي يقولي الحاجة واقفة برة !!! تصرفاتك دي ها تخليني اقوله يقولك اشربي القهوة عقبال ما يفضا ههههههههه والحقيقة رد فعلها بعد جملة زي دي يبقى كلمة بيعاقب عليها القانون :D

المـــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــهم عشان انا حاسس اني توهتكم معايا :D

زبطت المنبه واتقلبت نمت ... ومش ها اقولكم خروف نايم لالالا عارفين مثلا لو حد طلع في وسط الصحرا الغربية في عز الصيف في يوم درجة الحرارة فيه 41 ها تلاقي فيه جمل مفرهد كده :D

اهو انا مش زيه خالص بقا انا نايم مقلوووووووووووووووووووب عامل حادثة !!!

وعلى فكرة انا نسيت اقولكم اني حاطط نغمة المنبه على الموبايل

(انتبه السيارة ترجع الى الخلف )

ومحدش يسأل ليه مش عارف بحس انها ليها تأثير سيكوباتي على الاوعي عندي وبتصحيني في حين اي نغمة تانية ابقى بدحك على نفسي بيها :D

رن المنبه كزا مرة لحد ما صحيت بالعافية !! الله يخربيت اينشتاين على اليوم اللي سمعنا بنظرياته اللي بتبهدل اهالينا كل يوم !!! مش ممكن الراجل قد ايه احنا بنعيش في عواقب تفكيره المدمر لحد دلوقتي .. يالله الله يرحمه ويبشبشش الطوبة اللي تحت راسه ... (حد يشرح الجملة الأخيرة دي معناها ايه )

صحيت عملت سنوز للمنبه وقفلت التلفزيون وطفيت المنبه (شايفين انا وصلت لمرحلة من الوعي اني طفيت كل حاجة وراجع انام كمان شوية)

ولمن يمتلك بلاكبيري اكيد عارف انه زر اغلاق المنبه تحته زر تأجيل التنبيه !!!!!! والنضارة طبعا مبتتلبسش فالحقيقة مأخدتش بالي وطفيته !!!!!!!!

رجعت انام

حصل التالي لقيت نفسي واقف في المعمل

والدكتور اياه واقف فوق دماغي انا بس

وعملت خلطتي

وصبيتها في القالب المخصوص ليها

وبعد 15 يوم بنفك القالب

المكعب بقى تراب لوحده يعني محدش جه جنبوا ولا حتى حملناااااااااااه ومحدش يقول ايه المريض ده منتوا كلكم ياما شفتوا كوابيس ايام الثانوية العامة واللي قاعد في امتحان المحاسبة مش عارف يحل ولي ولي ولي

بس يالله !!!

ياريت كل واحد يقول ايه اسوء كابوس راوده كنوع من المشاركة :D :D

انا جاني كابوس مرة اني سقطت في امتحان الديناميكا ودخلت الملاحق وقاعد لوحدي في اللجنة وذاكرت كويس جدا !!! ومسكت ورقة الإمتحان !!! ولقيت نفسي عارف اجابة الـ 12 سؤال كلهم جابة كاملة وها انجح يا ربي اخيرا !!! بشغل الآلة الحاسبة بطاريتها فضيت :D :D :D :D

مش ها اقولكم بقيت ماشي بكام الالة حاسبة تيقنا لأنه اليوم ده ها يجي وانه دي الحاسة السادسة :D :D

المهم صحيت من النوم مفزوع وببص في الساعة يا نهار اسود الساعة 7.30 !!!!!!!!!!!!!!!!

نهاري مش فايت !!!!

ايه جـ..... نايم!!!

مفيش اي احساس بالمسؤولية !!!

اقوم اجري عشان البس

ولميت الاب توب والكشاكيل والعدة كلها ونازل جري على السلم ..

على فكرة ها ادمج صورة لعربيتي متغطية بالغطا الجديد ياريت حد يطلع فيه فين الغلطة :D :D :D (الموضوع ليس له علاقة بالحلقة دي ولكن كنوع من انواع الدعابة)

المهم نزل جري الباشمهندس سيد !!!!!!!!!!!!!!!!!!!!!!!!!!

راكن صف اول طبيعي وزي البني آدمين وطبعا ساعتها البواب مش فاكر كان فين !!!!

ولقيت قدامي مصيبتيــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ن

المصيبة الأولانية واحد راكن صف تاني وانا عارفه

والمصيبة التانية والأنيل انه فيه كلب قاعد فوق العربية !!!!!!!!!!!!!!!!!!!

وانا ايه بقا مع الكلاب اللهم صلي على النبي :D :D مفيش عشرة بينا خالـــــــــــص

زيهم زي الأطفال لا بيطقوني ولا انا بطيقهم !!! (سبحان الله الحج طول عمروا يقولي الأطفال بيشوفوا الشياطين !!! وعشان كده بيعيطوا لما بيشفوني دايما والله العظيم !!! يا ترى كان يقصد ايه !! يالله هوة ونيته بقا ) !!

ببص جنبي لقيت بنت جارنا طفلة عندها مش عارف كام بصراحة بس انا كنت ذاكر في الحلقة ساعتها وهية عارفاني يعني !!!! والحقيقة بتعزني معزة الأخ الأكبر !!!!!

انا:صباح الخير

هي صباح النور !!

انا عمال اقول للكلب

هـــــــــــــــــــــــــــــــــــــــــــــــــ ــــــــــــــــــش

مفيش

يالله يا حبيبي هـــــــــــــــــــــــــــــــــــش

مفيش

يا بوبي يا ابن الـ ... برضوا مفيش

يا جدع انتا هش الله يهدك ها تضيع مستقبلي !!!!!

مفيش

يا عم غور برضوا مفيش !!!!!!!!!!!!!!!!

لحد ما تدخلت البنت وقالتلي !!!!

سيد !!!!

انا:نعم

هي : (قالت حاجة الحقيقة انا مش فاكرها ولكن كانت بما معناه انا ها اهشهولك مقابل حاجة )

انا: يا امي الله يكرمك مستقبلي ها يضيع الله يخليكي سيبيني امشي واتصرفي معاه يا ابو العريف !!!

هية مجرد ما قربت للكلب يا عالم !!! قربتله بس وقالتله هش

الكلب ابن الـ.... جري وكأنوا شاف كلب هاسكي جاي من آخر الشارع !!!!!!!!!!!

الله طيب وايه لازمتها قلة القيمة يا كلب يا .... منا كنت ها ابوس رجلك بالإحترام ومرضيتش اشمعنا دي يعني !!!!

عالم متجيش الا بـ .... يالله

شلت الغطى وانا عيني على الساعة عمال اقول يا ربي ها الحق ولا مش ها الحق ها الحق ولا مش ها الحق ..

طيب المصيبة الأولى واتحلت !!!!!!

المصيبة التانية جاري !!!

والمصيبة اني عارف الراجل ده في العمارة صاحب كاس وصوتوا عالي جدا وراجل يعني ...... محبش اني احتك بيه خصوصا انه مثلا بيصى الظهرية وانا مصحيه من و الديك بيدن :D

طلعت جري على السلم !!!!!!!!!!!!!!!!!!!

ووقفت قدام باب الشقة واستجمعت قوايا ..

واجننت في عقلي ورحت رانن الجرس :D :D :D

فاكرين مسرحية العيال كبرت وسعيد صالح بيقول

الباب اتفتح لقيت باب تاني ...... ومسورة مية ضربت !!!! وميا دافياااااااااااااااااااااااااااااااااااااااااااااا ااااااا

هوة اسمو حسين

رنيت الجرس بتاع 3 او 4 مرات !! ( مش عارف ايه اللي خلاني اتجنن قوي كده ده الراجل ده صوتوا مايكريفون وعلى طول الصكلانص شغال ومشغلنا الإستريوا بتاع زوروا !!! )

واللهم صلي على النبي فاتح باب البيت بهدوم ........ مش ها اتكلم اكيد انتم عارفين انا بأواجه ايه !!!!!! محدش بيقرأ عن الإيتيكيت في مصر انه فيه حاجة اسمها روب تفتح بيه او تلبس حاجة عدلة تقابل بيها الناس :D :D

(طبعا فيه ناس ها يفتكروني عيل .... بالكلمتين دول ولكن والله انا اقصد افرضوا انو مش ولد اللي بيخبط انه بنت دي وجهة نظري بس ) ..

انا كل اللي شايفوا عينيه وهيا بتحاول تفتح وبتدور على مين اللي خبط !!!!!!

ده مش شايفني اصلا !!

وراح ساكت شوية وهازز دماغوا ....

وبكرة بقا ها اقولكم هوا قال ايه بالزبط :D :D :D :D

اللي عارفين ...هههههههههه يفكروني الله يكرمكم :D :D

[mhmdalsaadany]

الله ينور عليك يا ابو السييد
وفي انتظار الحلقه القادمه