الموضوع: النصابون في بيع المستعمل

المشاركة الأصلية كتبت بواسطة amatoallah

انا مش مصدقه انك عملت كده

بصراحه انت شكلك طيب جدا

بس نصيحه مني ماتتعملش مع الناس بطيبتك دي

المره دي ربنا ستر لكن المره الجايه الله اعلم و ما شاء الله ولاد الحرام كتير جدا :)

و الله فعلا هو ده اللي حصل بالتفصيل الممل

بس فعلا سبحان الله ربنا ستر, لأن ناس كتير قوي قالتلي خد بالك علشان ممكن يجي ياخد العربيه بالليل من تحت البيت و انا ما كنش في دماغي خالص.

بس الحمد لله المره ديه طلع الدنيا لسه بخير و مش كل الناس بتاكل بعضها.

و شكرا علي مرورك

يا نهااااااااااااار ابيييييض

ده الموضوع طلع كبير اوي

انا الايام دي برتب نفسي اني اجيب أكسنت

بس بعد الموضوع دا هفكر في موضوع التقسيط والزيرو أحسن

ولا تفتكرو ممكن الاقي عربية كويسة من غير نصب ؟

مع العلم اني كل خبرتي بالعربيات انها باربع عجلات بس
لكن عندي والدي خبرة ومهندس سيارات في شركة النصر يعني اعتقد انه صعب يتنصب عليه ,, مش عارف بصراحة اعمل ايه

احب اضيف تجربه خاصه بى فى هذا الموضوع الجميل
وهى انى كنت فى يوم من الايام سنه 2006 بدور على عربيه جولف دبه موديل 92 لاحد الاقارب وعرفت عن طريق زميل معايا فى الشغل ان ليه واحد صاحبه فاتح معرض عربيات فى القناطر اسمه محمد وشريكه اسمه حسن تقريبا مش فاكر بالضبط عنده عربيه زى اللى بندور عليها فقلتله اروح اشوفها .. وبالفعل روحنا علشان نشوف العربيه الصبح البيه يقولنا اصل شريكى طلع بيها مشوار وهايتأخر .. واحنا جايين من سفر وجايين مخصوص علشان نشوف العربيه . طيب نيجى امتى يا عم قالى تعالى بعد بكره .. كلمته فى اليوم المتفق عليه قالى تعالى بس على الساعه 9 بالليل قلت ماشى .. كل ده وانا مش واخد بالى من الترتيب اللى البيه مرتبله .. المهم روحت بصيت على العربيه .. العربيه واقفه زى الفل عروسه زى مابيقولوا ومتركبلها طقم جنوط اسبور شيك وطقم صوت وفظيع وشكمان ديفل ..الخ . المهم البيه راكن العربيه فى حته ضلمه قلتله عاوزين لمبه بلادوس علشان نبص على العربيه ودواخلها ونرفعها من تحت قالى لا انا معنديش بلادوس والعربيه زى الفل ومش محتاجه حاجه الى اخر كلام التجار اللى مابيخلصش قلتله وبحسن نيه شوف احنا هناخد العربيه بس اذا كان فيها حاجه هانرجعهالك قال ماشى .. وبالفعل اخدنا العربيه والراجل كان مبسوط بيها جدا وبعد كام يوم قال اما اخدها المغسله علشان تتغسل .. وكانت الصدمه !!!! العربيه بعد مارفعناها فى المغسله ضايعه من تحت وعامله حادثه جامده فى الجنب اليمين والقوايم اكتشفنا انها مرشوشه والعربيه كانت مقلوبه والسقف مليان معجون .. طبعا بما انى فى وش المدفع روحت للنصاب اللى اشترينا منه العربيه قعد يحلف ميت يمين (يمين غموس ) ان العربيه فابريكه وان حالتها ممتازه وان انا بكدب عليه وانه مش هايرجع الفلوس وانه ملوش دعوه بالعربيه ... وللاسف معرفناش نعمل معاه اى حاجه وطبعا تشائمنا من العربيه دى جدااا وعرضناها للبيع بعدها بأسبوع وجالها مشترى وعرفناه على اللى فيها وبص عليها كويس واتباعت بخساره 20 الف جنيه عما كنا شاريينها !!
يعنى 20 الف طاروا فى لحظه علشان واحد معندهوش لا دين ولا اخلاق ولاضمير ولا ذمه
خلاصه التجربه :
1 لاتثق فى اى حد فى مجال البيع والشراء حتى لوكان صاحبك الانتيم
2 عاين السياره جيداااااا وافرزها مائه مره وهات واحد واتنين وتلاته يكشفولك عليها
3 لا تهتم بالكماليات والاكسسوارات الاضافيه والتى قد تكون موجوده فى السياره لمحاوله اخفاء عيوب معينه واهتم اولا بأساسيات العربيه وحالتها الفنيه
4 ادعى على النصابين اللى مابيشبعوش من اكل الحرام والحلف زور

ربنا يستر

أرجو من إدارة المنتدى تثبيت هذا الموضوع لأهميته و فائدته لكل من يقبل على شراء سيارة مستعملة من السوق او من حد مايعرفوش - ربنا يحرسنا جميعا و يستر علينا من هؤلاء الجشعيين

ياجماعة انا لية رأى لأول فى موضوع النصب دة طيب مابدل ماندعى على النصابين ونتهم التجار بالجشع الى اخرة من الكلام اللى اتقال طيب مانحاسب نفسنا الأول على حسن النية المفرط دة الناس دية واضح ان دة اكل عيشها ولا فى دين ولا ضمير يعنى من الأخر كل واحد محللها لنفسة بطريقتة ولية دينة ومذهبة الخاص بعيد عن موضوع الذمة والضمير والأخلاق الى اخرة وانا نازل اشترى عربية مش اربى النصابين ولا الحرامية واعلمهم دين واخلاق وحتى لو عملت دة برضة مش هاينفع طيب اية الحل الحل ان يبقى فى اجراءات لشراء المستعمل اوعى تتنازل عنها او تدفع مليم مهما كانت حالة العربية او الكلام المعسول اللى بيقولوا البائع او تظبيطة لشكل العربية بجنوط وكاسيت ودهان لأنة زى ماشوفتوا بعد مابيمسك فلوسك يقولك انا ماعرفكش وانت ماشوفتنيش طيب الأجراءات
1- لازم تاخد معاك حد بيفهم كويس جداً فى العربيات ولو هاتديلة اجرة على كدة
2-خلاص اقتنعت واراجل اللى معاك قال اوكى روح اكشف على العربية وماتبخلش (زيادة تأكيد)لأن اى ماكان اللى هاتدفعة مش هايبقى قد الخسارة لو العربية فيها حاجة
3- العربية تمام بعد الكشف اشرط على البائع لو هوة جاد انك تدفع نصف المبلغ فقط وتجرب العربية اسبوع واى حاجة تبقى مسؤليتة واظن لو هو حسن النية مش هايمانع ومتستعجلش لأن خلى بالك النصاب دايماً بيلعب على الحتة دية ويعود يقولك العربية جايلها 1000 زبون لو ماخلصتيش دلوقتى انت حر ودة سلاح انصاب ياكل ودانك عشان يلغي عقلك وذغلل عنيك تقوم انت دافع ومخلص.

اعتقد بكدة تبقى انت مطمئن وبلاش نكون ساذجين ونلوم على النصابين اللى احنا اديناهم الفرصة ينصبوا علينا من الأصل
حاجة اخيرة لو مش هاتقدر تعمل الكلام دة وملكشى خبرة ومعندكش حد يقف جنبك اشترى زيرو ولو بالقسط وصدقنى نت الكسبان لأن اى مشكلة فى العربية عندك التوكيل هايروح منك فين واظن عمرك ماهتتعرض للنصب فى التوكيل الا فى الحاجات الخاصة بعيوب التقفيل والتوكيل غصب عنة بيعملها حتى لو تعبوك شوية اتمنى اسمع رأيكوا فى الكلام دة ولو حد عندة اضافة ياريت يفيد الناس