الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة husseinoo

بسم الله الرحمن الرحيم
اللهم صل على محمد وعلى آله وصحبه أجمعين

قررت افكر نفسى والزملاء بمعلومات مهمة جدا فهمتها لما قريت للمرة الثانية هذه المشاركة للاستاذ حسين

وقلت قبل ما اخرج اروح "افول التانك" .... وفعلا "البنزينة" كانت رايقة .... وانا متعود انى افول التانك قبل ما يوصل المؤشر الى المنتصف ... حتى ولو كنت هاحط 10 لتر فقط ... المهم ان العربية ما تسحبش بنزين من "آخر التانك" ... عشان التانك فى آخره البنزين بيكون كله اتربة وممكن يسبب مشاكل فى السيارة.

اليوم اتعلمت حاجات جميلة قوى
وفيه بعض الملاحظات مثل :
لما اتعودت انظر فى المرايه خصوصا المرايه اللى فى المنتصف ... اشاهد سيارات اصحابها بتكسل تعدى من اليسار ... واتعودت على كده ... وطبعا لما اشعر ان صاحبنا ناوى يعدى من اليمين .. على طول بحاول انى احتفظ بمكانى فى الحارة بتاعتى ... ولا اغير اتجاهى ابدا.




من المشاكل الغبية جدا
لما تجد عربية عايزة تعدى منك اثناء الملفات وعلى إيه ... على الكوبرى او داخل نفق
طبعا الموضوع ده حصل معايا
وعشان كنت انظر فى المراية باستمرار
على طول حسيت ان اللى ماشى واريا موش فاهم حاجة
وممكن يعمل فيها ناصح ويعدى منى اثناء الملف "فى المنحنى" وده اكبر غلط ... المفروض يعدى لما يكون الشارع مستقيم
المهم الحل إيه
انى هديت شوية عشان صاحبنا سورى "الغبى" يعدى وربنا يستر

اما اثناء السير على الكوبرى ... حاولت الإلتزام بالحارة التى اسيرعليها ... وفعلا ده سهل مرور العرببات التانية فى الحارة الأخرى على الكوبرى ... ويعطى شعور بالأمان للعربيات التانية انها تعدى منك وهى واثقة انك ملتزم بالحارة اللى انت ماشى فيها


اتعلمت اليوم حاجة مهمة قوى من الكلام السابق
انك لازم تنظر للامام بشكل كافى قوى
المرة دى شفت العربيات بتهدى .. وعرفت ان فيه مطب صناعى
المرة اللى فاتت اكلت المطب ده مية مية هههههههههههههه
المرة دى عملت حسابى
ضغط على الفرامل اكثر من مرة خفيف .. خفيف .. عشان اللى ماشى ورايا يعمل حسابه
والله يا جماعة العملية دى مهمة جدا جدا جدا
العربيات ماشية وراك بسرعة جدا
وممكن موش شايفين ان فيه مطب صناعى
لما تضغط على الفرامل خفيف خفيف اكثر من مرة ومن مسافة بعيدة ... يعمل حسابه ان فيه حاجة ويصحصح معاك ده اسمه ايه "التواصل مع الآخرين" زى ما عرفنا مع بعض قبل كده


كل شىء كان ماشى تمام
لحد ما حبيت اطلع شارع "مطلع جامد قوى" بجوار البيت
المرة دى .. اتعلمت خلاص ... "ونقلت الغيار الأول" ... لانى كنت ماشى بطىء وطالع بالعربية المطلع الجامد جدا ده
طبعا الحمد لله العربية طلعت بدون مشاكل ... اى غيار تانى العربية "هاتصقف معاك" يعنى من الآخر غلط على العربية.

روحت اشترى حاجات من السوبر ماركت والشارع هو هو
كان نازل جامد جدا
وجدت ان مافيش داعى انى انقل اى غيار
واكتفيت انى اضع رجلى على الفرامل واترك العربية تنزل لوحدها
ولما وقفت بالعربية امام السوبر ماركت
بطلت العربية
ثم رفعت الهاند بريك
ثم نقلت الغيار العكسى " نقلت الفتيس اكنى هارجع للخلف"
ده للحرص موش اكثر ... لان الاطفال الصغيرين راكبين فى العربية ... وللامان عشان مافيش حد يضمن الفرامل فى المنزل الجامد ده
لكن الحاجة اللى فاضل انى كنت اعملها عشان اكون صح الصح وفى السليم قوى هى اللى ظاهرة فى الصورة دى


لاحظ التالى
الصورة اللى على اليمين ... ده وضع العجل لو كنت على شارع نازل ... يعنى فى منزل
على اساس لو حصل اى حاجة لا قدر الله للفرامل .. مافيش مشاكل العربية اصلا متجهه للرصيف وعمرها ما هاتنزل للاسفل
معلومة قوية جدا اول مرة اعرفها

والصورة على اليسار
ده لو ركنت العربية على شارع وكان الشارع مطلع

طبعا الكلام ده كله هاتحتاجه خصوصا لو كنت هاتصيف فى اسكندرية .. وانتم عارفين الشوارع اللى بجوار الكورنيش عاملة ازاى ...

طبعا احيانا لم الاقى عربية نقل ماشية واريا .. لا اشعر بالراحة
وهى دى الحالة اللى تجعلنى اجرى شوية ... يعنى ممكن اوصل بالسرعة الى 90 او اكثر لكن موش على طول ... المهم انى اهرب منه ... يعنى واحد منه لله ... لازق لك .. هاتعمل معاه ايه ... واى فرامل خطر عليك


اتعلمت كمان حاجة مهمة جدا جدا جدا
من الكلام اللى فات وكتبناه
ان العربيات بتمشى فى مجموعات والأفضل انك تمشى خلف المجموعة ... يعنى اوعى تحشر نفسك مع العربيات والموضوع ده هانتكلم عنه بالتفصيل بعد كده

طبعا لما تنظر للامام زى ماقلنا بشكل كافى قوى
وجدت عربية نص نقل متوقفة على الجانب الأيسر للطريق
وعربيتين واقفين وراه ضاربين لخمة ... لانهم لازقين وراه وموش سايبين اى مسافة بينهم
الحمد لله هديت لكن تدريجى
وزى ما قلنا ضغط الفرامل اكثر من مرة خفيف خفيف وبعد كده لازم اهدى نفسى جامد
عشان اللى ورايا ياخد باله
وبعدين اشارة يمين
وتبص فى المرايا
ولما تشعر ان اللى وراك واخد باله
خلاص انزل يمين بسرعة وخلص نفسك
المنظر ده عادى جدا فى شوارعنا ربنا يهدى السواقين على الغلابة امثالنا

وطبعا اتعلمت كمان
ان لو فيه عربية واقفة بالشكل ده
اول ما تعدى منها امشى امامها على طول بدون خوف عشان توسع الطريق
يعنى اترك الحارة اللى انت ماشى فيها
وانقل نفسك للحارة اللى العربية متوقفة فيها مافيش اى مشاكل
واستكمل مشيك على مهلك
وفى نفس الوقت توسع للآخرين


فيه كمان حاجة مهمة جدا جدا جدا
انك اوعى تمشى بجوار سيارة على نفس السرعة
اوعى تحاصر نفسك من كل اتجاه ... الموضوع ده هانكلم عليه بعدين
انظر الى الصورة التالية على الطريق السريع



فى الصورة انا ماشى على الطريق السريع بالعربية الزرقاء
وامامى مجموعة من السيارات
وورايا عربيات بتجرى اسرع من 80 كيلوا ... صواريخ
وانا موش عايز احشر نفسى مع المجموعة الحمراء
ببساطة هديت نفسى شوية
ولما المسافة وسعت امامى
العربيات اللى ورايا ... طلعت امامى بسهولة جدا وبسرعة ... وانضموا الى المجمعوعة الحمراء
وده كان افضل وضع للعربيات اللى ورايا "اتخلصت منها واعطيت لهم فرصة يجروا زى ما هما عيازين
وكمان ابتعدت عن الحصار الموجود امامى
وكمان مشيت خلف المجموعة موش حاشر نفسى معاهم
وده افضل للمبتدأ وهانتكلم على الموضوع ده فى المستقبل إن شاء الله

عشان الموضوع كبير قوى
هاكمل معاكم بعدين عشان ما تزهقوش منى

وارجوا التصحيح لو فيه اى خطأ

فى انتظار التواصل
مع اطيب التمنيات
اخوكم حسين غزالة

كلام ممتاز جدا و دايما اراجع هذه المشاركات عشان منساش

(والاخطر من كده لما تلاقى عربيات نقل او اوتويس ماشى بسرعة جدا
والاخطر والاروع من كده لما تلاقى عربية "شاحنة حاوية" العربيات النقل الطويلة جدا وماشى بسرعة اكثر من 80 كيلوا ... تخيلوا عربية بالشكل ده وبتعدى من جنبك

هههههههههههه
سواء انت ماشى على اليمين او الشمال ... هو عايز يعدى يعنى يعدى
والأفضل انك ترفع رجلك عن البنزين)
[color="purple"]هنا السؤال هل ممكن امشى مسافة بدون الضغط على اى دواسة و بعدين ارجع ادوس بنزين ؟ و لم ينفع المسافة دى تكون اد ايه ؟ عايزة افهم يا جماعة !!!![/color]

المشاركة الأصلية كتبت بواسطة a.saad

هنا السير بيعتمد على القصور الذاتى

ممكن انك تمشى من غير بنزين
الطريقة دى ممكن تستعمليها بدل الفرامل لو عايزة تهدى شوية
بس يكون امامك مسافة كافية
ومش هتدوسى اى دواسة
واما تحبى تفرملى ممكن تفرملى
او تحبى تتسارعى تدوسى بنزين تانى
وممكن تنقلى غيار اقل برده
بس تراعى انك
ما تموريش العربية
وتراعى السرعة والغيار اللى العربية عليه يعنى مش تكونى على الخامس وتسيبى العربية لحد سرعة 50 لان ده مش صح على الموتور

المسافة اللى ممكن تمشى بيها تعتمد على
سرعة السيارة
الغيار : كل ما يكون الغيار اعلى تكون المسافة اطول
الاحتكاك بين الكاوتش والاسفلت
الطريق منزل او مطلع

ااعتقد فهمت و ممكن اجربها طالما مش غلط على العربية
انا نفسى مرة انزل اقضى مشوار مهم و البلد تبقى رايقة شوية الزحمة مملة و انا للاسف لسة رجلى تقيلة ع البنزين و خاصة مع الغيار الاول لما احب امشى و اقف فى الزحمة باضغ بنزين جامد غصب عنى مش عارفة احل المشكلة دى مع نفسى ازاى ؟
اشكرك على التوضيح و الرد جزاك الله عنا خير ا/ A.saad
و يارب يكون سؤالى مفيد للاخرين الجدد امثالى

الاخوة الاعزاء عاملين ايه فى البرد ...وبعد
عايزة اعرف ازاى اقلل استهلاكى للبنزين يعنى طريقة السواقة و لا ضبط حاجة فى العربية و لا ايه بالضبط
اخيرا اتمنى ان يستمر هذا الموضوع نشط بالردود و التجاوب بين الاعضاء ...و اشكركم

المشاركة الأصلية كتبت بواسطة samar abdo

الاخوة الاعزاء عاملين ايه فى البرد ...وبعد
عايزة اعرف ازاى اقلل استهلاكى للبنزين يعنى طريقة السواقة و لا ضبط حاجة فى العربية و لا ايه بالضبط
اخيرا اتمنى ان يستمر هذا الموضوع نشط بالردود و التجاوب بين الاعضاء ...و اشكركم

تقليل استهلاك البنزين له كذا طريقة

1- نقل الغيارات بدري سنة بسيطة .. يعني لو انتي على التاني و عايزة تطلعي التالت تنقلي عند 2000 او بالكتير 2500 rpm عشان حتى تخففي الحمل على الموتور و عشان الحركة دي بتقلل الاستهلاك نسبيا

2- ما تحاوليش تفضي التانك للآخر عشان الجزء الفاضي من التانك مليان هواء و البنزين بيتبخر في درجة الحرارة العادية .. حاولي كل ما تلاقي فرصة حطي بنزين

3- ضغط الكاوتش لازم يكون مضبوط ( قدام 32 و ورا 29 ) و دا حسب المكتوب على قايم باب السواق و دا عشان تقليل نسبة الاحتكاك و بالتالي تقليل استهلاك البنزين و لو كان نيتروجين فبيكون افضل عشان ضغطه مش بيتأثر بحرارة الجو زي الهواء العادي

4- اعلى توفير في البنزين بيكون عند سرعة 95 - 100 كم و ماتحاوليش تجري عن كدا لأن مقاومة الهواء بتزود استهلاك البنزين بمعدل كبير

5- بلاش تقرصي على دواسة البنزين مرة واحدة .. و بردو بلاش تفرملي مرة واحدة - التسارع يكون بالتدريج و الفرملة بردو بالتدريج الا لو لا قدر الله و ظهر قدامك عائق مفاجئ

6- العربيات الجديدة ( حقن الوقود الالكتروني ) مش بتحتاج فترة تسخين طويلة .. بالكتير دقيقة و تتحركي

7- لو عربية حضرتك مانيوال .. و انتي بتطلعي بالعربية اول طلعة بلاش تيجي ناحية دواسة البنزين خالص .. ارفعي من عالدبرياج سنة سنة العربية هتتحرك لوحدها باستهلاك بنزين بسيط قوي مقارنة بأول ضغطة على دواسة البنزين

8- اثناء السير : لو انتي نازلة من على منحدر .. ارفعي رجلك من عالبنزين و موري الفتيس العربية هتمشي اطول مسافة ممكنة بدون استهلاك بنزين

9- السير بالقصور الذاتي : و دا بمعنى انك ممكن تكوني ماشية على طريق مستوي و في نهايته مطلع .. بتضغطي بنزين لحد اقصى سرعة ممكنة و عند بداية المطلع ارفعي رجلك من عالبنزين و موري الفتيس .. العربية هتطلع بقوة القصور الذاتي و بأقل مقاومة ممكنة

10- لو ماشية في زحمة و فترات التوقف بتزيد عن دقيقة .. بطلي العربية و دوريها لما الطريق يتحرك - دا بيوفر كتير في البنزين

11- تقليل الاحمال قدر الامكان

12- عدم السير في طرق مكسرة او غير ممهدة

ملاحظة : للحفاظ على البطارية و اطالة عمرها الافتراضي .. يفضل فصل جميع الانوار و الكاسيت قبل الدوارة لتقليل الحمل على البطارية لأن المارش بيقوم عليها لوحدها و بعد ما العربية تدور نشغل الانوار و الكاسيت زي ما احنا عاوزين لأن كل دا بيقوم على الدينامو و ليس البطارية

ااشكر حضرتك جدا لأن كان فى معلومات اول مرة اعرفها
انا دايما سايبة الراديو شغال و دى حسب ما عرفت غلط ع البطارية
عندى مشكلة بالنسبة لتحريك السيارة برفع رجلى من ع الدبرياج سنة سنة حاولت اكثر من مرة و متحركتش لازم ادوس بنزين و هى لوجان 2015 و حتى فى الرجوع لازم ادوس بنزين حتى لو المسافة بسيطة كده العيب فين ؟