نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

**husseinoo** · 28-11-2014 10:06 PM

المشاركة الأصلية كتبت بواسطة عصير قصب

سلام عليكم
انا سجلت مخصوص فى المنتدى الممتاز ده عشان الموضوع الجميل ده
جزكم الله كل خير
وربنا يجعله فى ميزان حسناتكم لانه علم ينتفع به

انا لسه بتعلم السواقه ياجماعه مع مدربه
فاضل لى حصه واخلص الكورس
يعنى مستوايا معقول
عاوزة اتعلم منكم اكتر واكتر لحد ما ابقى محترفه سواقه

اهلا وسهلا بحضرتك
وشكرا على كلامك الجميل

بالنسبة لموضوع التعلم القيادة
هايحتاج وقت كبير
في فرق بين اتعلمت احرك السيارة
وبين انى اتعلمت مهارات القيادة فى المواقف المختلفة
هاتخافى شوية .... ده اكيد
وهاتلاقى رهبة من القيادة
كل ده هاينتهى آجلا او عاجلا
لكن
ينتهى بسرعة لما تتعلمى بأسلوب علمى
وتقرأى المشاركات
وتنقلى لنا تجاربك عشان نتعلم منها
وتنقلى لنا مشاكلك عشان نفكر فى حل لها

وكلنا تحت امرك فى اى وقت
فى انتظار مشاركاتك القيمة

مع اطيب التمنيات
اخوكم حسين غزالة

**husseinoo** · 29-11-2014 07:24 PM

المشاركة الأصلية كتبت بواسطة عصير قصب

ياجماعه الركنة العمودى على الرصيف
اعملها ازاى وش الربية للرصيف والعكس
واخرج منها ازاى
ياريت تقولوا لى اسهل طريقه

انا امنيه حياتى ابقى محترفة سواقه معرفش ازاى وانا بخاف بس اكيد الاحلام بتحقق إن شاء الله

ركن السيارة خطوة بخطوة
-------------------

انظر الى الصورة السابقة
لازم المسافة اللى هاتركن فيها تكون كافية
خصوصا للمبتدأين
يعنى صعب انك تكون مبتدأ وتحاول تقلد الناس اللى عندها خبرة وبتركن فى اماكن ضيقة
يبقى الاول تجرب فى مكان واسع نسبيا
يعنى لازم المسافة اللى هاتركن فيها تكون اكبر من سيارتك بنسبة 25% على الاقل
يعنى لو عربيتك طولها 4 متر .... يبقى هاتحتاج مكان طوله 5 متر عشان تركن فيه مرتاح

انظر الى الصورة السابقة
سيارتك هاتقف بجوار السيارة الامامية
الاكصدام موازى لاكصدام السيارة الامامية
المسافة بينكم حوالى 32 سم
بالتدريب هاتشعر بان المسافة بينكم مناسبة

انظر الى الصورة السابقة

اكسر الدركسيون خفيف
وارجع للخلف على مهلك
حتى ترى الفانوس الخلفى للسيارة الامامية
الفانوس االخلفى عليه دائرة حمراء
وفى نفس مستوى دركسيون سيارتك
يعنى تشعر انك جالس خلف اكصدام السيارة الامامية .. هههههههههه

انظر الى الصورة السابقة
فى اللحظة دى توقف تماما
يعنى ولا حركة
اكسر الدركسيون على الآخر .. عكس الرصيف
يعنى لو الرصيف مثلا على يمينك ... لف الدركسيون اتجاه اليسار
ارجع بهدوء

انظر الصورة السابق
ضع يدك على الكرسى المجاور
وانظر فوق كتفك على السيارة اللى فى الخلف
وارجع بهدوء

انظر الى الصورة السابقة
ارجع للخلف
حتى ترى دركسيون السيارة الخلفية

انظر الى الصورة السابقة
فى اللحظة دى
توقف بالسيارة تماما

انظر الى الصورة السابقة
الآن فقط
اكسر الدركسيون فى اتجاه الرصيف
يعنى لو الرصيف ناحية اليمين
اكسر الدركسيون يمين على الآخر

وانت راجع انظر امامك
وتأكد انك موش هانخبط اكصدام السيارة التى امامك
يعنى لو شعرت ان الاكصدام هايخبط بالاكصدام الامامى
تحرك للامام واعد الخطوات مرة ثانية

انظر الى الصورة السابقة
بعد ما تركن بنجاح
اتحرك الى الامام قليلا
عشان توسع شوية للسيارة التى فى الخلف
وعشان تقدر تخرج بعربيتك انت كمان

مع اطيب التمنيات
اخوكم حسين غزالة

**Ahmed Tarek 00** · 29-11-2014 11:09 PM

المشاركة الأصلية كتبت بواسطة husseinoo

خلاصة الكلام
عشان ماتتلخبطش
اهم حاحة انك تطلع المطب بهدوء
وتنزل من على المطب يهدوء
ولو الدنيا فاضية
وداخل على المطب لوحدك
والمطب كان حاد ... خصوصا المطبات ههههههههههه العمولة اللى بيعملها الاهالى
حاول تطلع المطب بزاوية
يعنى مثلا العجلة اليسرى الاول وبعد كده العجلة اليمنى
عشان تريح العربية من صدمة العجلتين مع المطب

لو المطب واسع ومريح
ممكن تطلع وتنزل على الغيار الثانى لكن بهدوء
لو العكس والمطب حاد
يبقى لازم اطلع وانزل على الغيار الاول

البعض بينقل الغيار الاول قبل ما يطلع المطب
والبعض يفضل يطلع المطب الاول
وهو نازل ينقل الغيار الاول .. او الثانى حسب سرعة السيارة

ملحوظة
ماتطلعش المطب ما دام فيه سيارة امامك
اصبر شوية
لما السيارة التى امام تبتعد قليلا عن المطب
ثم اطلع انت وانزل براحتك

لانك لو طلعت والعربية التى امامك ما زالت متوقفة
هاتسبب لك مشكلة
وهاتفضل واقف على المطب
لا عارف تدوس فرامل
ولا عارف تنقل غيار
وممكن تتلغبط

مع اطيب التمنيات
اخوكم حسين غزالة

معلومات جميلة أ/حسين غزالة
شكرا للإفادة

**عصير قصب** · 30-11-2014 07:47 AM

صباح الخير
عاملين ايه يا اخواتى الافاضل
موضوع جميل جدا
كل يوم اقرأ صفحتين ثلاثه
نفسى اسوق كويس واحترف بجد أمنيه لانى داخله تحدى مع جوزى
لانه بيقول مفيس ست بتسوق كويس الا ما رحم ربى فلتات كده
كمان انا حابه التعلم بس مشكلتى الخوف ورهبة الطريق خصصا الدايرى مع النقل والميكروباص
اعمل ايه عشان اتخلص من الرهبه دى يا جماعه
انا خلصت الكورس الاساسى شرح لكل القواعد ومشيت على الثالث واخدت الملفات والركنات
ناقص لى ممارسه
محتاجه بتاع كام حصه ممارسه كده
نقول عشرة ولا ايه؟؟؟؟؟؟؟؟؟؟؟؟

**husseinoo** · 30-11-2014 06:22 PM

المشاركة الأصلية كتبت بواسطة عصير قصب

صباح الخير
عاملين ايه يا اخواتى الافاضل
موضوع جميل جدا
كل يوم اقرأ صفحتين ثلاثه
نفسى اسوق كويس واحترف بجد أمنيه لانى داخله تحدى مع جوزى
لانه بيقول مفيس ست بتسوق كويس الا ما رحم ربى فلتات كده
كمان انا حابه التعلم بس مشكلتى الخوف ورهبة الطريق خصصا الدايرى مع النقل والميكروباص
اعمل ايه عشان اتخلص من الرهبه دى يا جماعه
انا خلصت الكورس الاساسى شرح لكل القواعد ومشيت على الثالث واخدت الملفات والركنات
ناقص لى ممارسه
محتاجه بتاع كام حصه ممارسه كده
نقول عشرة ولا ايه؟؟؟؟؟؟؟؟؟؟؟؟

اهلا وسهلا بحضرتك

بالنسبة لقيادة السيدات
انا من وجهة نظرى ان السيدات محترمين جدا فى قواعد القيادة
المشكلة فى باقى الناس اللى مافيش عندها صبر

بالنسبة لموضوع الخوف
هاينتهى لما تتعلمى بشكل علمى
يعنى مثلا
تحددى المهارة المطلوب التدريب عليها
ولما تنتهى من التدريب
ابدأى فى مهارة اخرى
لازم
يكون عندك "يؤرة" تركيز
وتكونى عارفة انت عايزة تدربى على ايه ؟

والمهارات كثيرة
وسيبك من اللى بيقول لك لما تمشى كثير هاتتعلمى
ممكن امشى كثير ... لكن بمشى وموش فاهم حاجة

مثال
لو انت دايما شايفة عجل السيارة التى امامك
فى اوقت
هاتكسرى الدركسيون على الآخر
هاتعدى من العربية بدون اى اصطدام
دى معلومة
هاتوفر لك وقت
وهاتخلصك من الخوف والارتباك فى الزحام
وكل تركيزى هايكون مع السيارات الاخرى
وهاتصرف بسرعة وبشكل بديهى لو السيارة التى امامى توقفت فجأة

كده كل حاجة عايزة تعليم وفهم ووقت

نصيحة اخيرة
اجلى السير على الطرق السريعة شوية
الطرق السريعة مشاكلها قليلة جدا
لكن خطيرة جدا جدا

امشى حوالين البيت
وامشى داخلى كثيير
وامش فى الصباح الباكر الساعة 6 او 7 الصبح
وخلى حد يركب بجوارك حتى ولو مابيعرفش يسوق
عشان ثقتك تزيد فى نفسك

ومافيش داعى للاستعجال
الموضوع عايز وقت

والانسان هايفضل يتعلم طول عمره

مع اطيب التمنيات
اخوكم حسين غزالة

**عصير قصب** · 02-12-2014 04:02 PM

محدش رد عليا انا مخاصماكم بجد
واشمعنا مبقاش حد ينشط الموضوع زى زماااااان
اشمعنا بقى
على حظى
المنحوس منحوس ياربى

**عصير قصب** · 02-12-2014 04:04 PM

أصل أنا ما صدقت لقيتكم
ومش هسيبكم أبدا
فأحسن لكم تيجوووو كلكم وتكملوا كلاااااااااااااام ونصايح والتركات
لحد ما ابقى محترفه زيكم

بدل ما اقعد اعمل دوشه وأزن وأخبط وأكسر فى التوبيك