الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة a.saad

النصيحة التالية
لو هاتعدى مطب صناعى
لازم تكون ضاغط على الدبرياش والفرامل
وعن طريق الفرامل تتحكم فى سرعة العربية
واول ما عجل العربية الامامى يكون فوق المطب وهايبدأ ينزل
تكون اخترت الغيار المناسب "الغيار الاول او الغيار الثانى" حسب سرعة العربية
وطبعا ما دمت انت دايس على الدبرياج اساسا
خلاص هاتختار الغيار المناسب وهاتمشى على طول
لدرجة ان العربيات اللى خلف موش هاتحس انك مبتدأ
لازم تتدرب على الموضوع ده كثيير وتختار شارع يكون فيه مطب صناعى



النقطة دى غلط
ما تطلعش مطب بالفرامل خالص
اطلعه دبرياج بس
تفرمل قبله
واول ما العربية هتلمس المطب تشيل رجلك من الفرامل

والله كلام حضرتك سليم تماما
لكن اللى بيحصل فى مصر مختلف شوية ... يعنى ممكن تفاجأ بمطب صناعى طبعا موش هاقولك على موصفات المطب الصناعى هههههههههههه لكن هاقولك انك ممكن تكون موش شايفه اصلا ولا حتى عليه لون ابيض عشان الناس تشوفه وطبعا اغلب العربيات ارتفاعها بيكون منخفض والنتيجة انك ما بتلحقش تحدد السرعة المطلوبة للمطب خصوصا انك مبتدأ وشوية شوية الواحد يقدر يعدى المطب بدون الضغط على الفرامل زى ما حضرتك قلت بالضبط

المشاركة الأصلية كتبت بواسطة ainshouka

احب ابارك ليك على الرخصة وتعليم السواقة
والنقط كلها جميلة وكويس انك كتبتها عشان كلنا نعرفها لانى بعلم اختى السواقة برضه

الله يكرمك ويبارك فى حضرتك

واهلا بك سائق جديد لشوارعنا المصرية واحب ابشرك واقولك انك كلها كام اسبوع وحتلاقى حضرتك تركت فن الذوق والاخلاق وتنهل من التراث المصرى فى فن القيادة فى الشوارع

هى عملية الزوق والاخلاق دى ترجع لشخصية الانسان ... يعنى لو متربى على كده ممكن يتغير لكن موش بشكل كبير المؤدب طول عمره هايفضل مؤدب

التراث دا مش محتاج اكتب القواعد بتاعته لانها معروفة عند الكل
بس حضربلك مثال
1- قاعدة البوز بيز
2-وانت محود يمين او شمال حود الاول وبعدين ادى الاشارة (ا لو حبيت تسوق محترم) او متديش اى اشارة من اصله وطنش وخش ولو حد خبطك حيبقى من ورا وبكده روح اعمله محضر لانه خبطك من وراك

وبعدين تقول انا ايه اللى رمانى على المر دا
وتفضل تلعن فى السواقة على اللى سايقينها على اللى منيلينها
وبعدين تفكر تهاجر
ووو
وبس كفاية كده
ههههههههههههه والله كل اللى فى البيت ضحكوا من قلبهم على الكلام ده وللأسف كلام سليم ربنا يهدى الجميع
ملحوظة (انا بهزر طبعا )
وتقبل تحياتى

المشاركة الأصلية كتبت بواسطة aymansaad

انا بعلم زوجتى السواقة خلتها تقرا العناصر السابقة كلها

فى الأول لازم اللى بيعلمها يكون موش عصبى هههههههههههههههههههه
لان اغلب اللى بيعرف يسوق كويس بيكون عصبى من كونه راكب موش سايق
وموش لازم تتدرب على كل الكلام ده مرة واحدة
ممكن تتدرب كل مرة او كل اسبوع على حاجة
فى البداية بيكون كل التركيز على الرخصة واختبار الرخصة ... وبعد كده يظهر ان الواحد عمره ما اتعلم القيادة اساسا وطلع موضوع الرخصة ده اسهل حاجة
والاهم منه ان الواحد يتعلم القيادة بطريقة علمية وصحيحة وبعيدا عن الفهلوة
البركة فى حضرتك وربنا يوفق إن شاء الله

المشاركة الأصلية كتبت بواسطة nadeen

شكرا جدا على مجهودك ، اكيد افدتنا..

لا شكر على واجب
وإن شاء الله نبدأ نتعلم من اخواتنا فى المنتدى
وكل واحد عرف حاجة من شخص بيفهم
يحاول يقول لنا ويعلمنا
جزاك الله خير

المشاركة الأصلية كتبت بواسطة macdiv

مينفعشي مقلوشي انه مجهود رائع ،، و برده مينفعشي مقلوشي ان لو السواقه كده ممكن اعمل ذي عادل امام في فيلم امير الظلام و انا مطمن ان مفيش حاجه هتحصلي ... قاعده اخيره شافية و وافيه وهي ((( دائما توقع خطأ الغير ))) تسلم بإذن الله

موضوع توقع خطأ الغير
موضوع مهم جدا جدا جدا
ويمكن الواحد يوصل للمرحلة دى مع الوقت والخبرة
لكن فى البداية بالنسبة لى
الاساس هو عند الدخول على تقاطعات او طرق رئيسية او يوتيرن او زحمة
رجلك على طول على الفرامل والدبرياج وبسرعة هادئة
عشان لو حصل اى حاجة تلحق تقف
اما التوقع بخطأ الغير ... طبعا هايجى مع الوقت والتركيز وعدم الخوف وثبات الاعصاب
وطبعا ممكن اكون متوقع خطأ الغير
لكنى خالفت قاعدة الدخول الى التقاطعات يجب ان تكون بسرعة هادئة
يعنى متوقع خطأ الغير ولكنى لم استطيع وقف السيارة لتجنب هذا الخطأ
لانى داخل مثلا على التقاطع بسرعة عالية اكثر من اللازم

هو كل اللى بيحصل لى دلوقتى انى بلحق اقف بالعربية قبل حدوث اى مشكلة والتوقع طبعا بيكون محدود شوية وكل اعتمادى على انى داخل التقاطعات بسرعة هادئة

ربنا يسهل يا اخى والواحد يوصل للمرحلة دى ... شاكر افضالك

المشاركة الأصلية كتبت بواسطة maged_samy

الملف الشمال تمشى فى الناحية الشمال والملف اليمين تمشى فى الناحية اليمين عشان تقاوم القوة الطاردة المركزيه مع السرعة العاليه واللى ممكن تخلى العربية تخرج عن الطريق وتتقلب لو السرعة زيادة ولو الطريق مفيهوش ميل فى الجانب العكسى للملف .

احب اضيف الى كلام حضرتك الرائع
ان فى الملف لازم تلتزم بحارتك حتى بعد الانتهاء من الملف
لان ممكن يكون فيه عربية تانية بتلف معاك فى الحارة التانية
وما دام انت ملتزم بحارتك مافيش حد هايعمل لك كالاكس ولا هايشعر بالضيق منك او انك ترمى عليه يعنى تغير مسارك من الحارة اللى انت بتلف فيها الى الحارة الاخرى

المشاركة الأصلية كتبت بواسطة adelll13

الف مبروك على العربية والفين مبروك على تعلم القيادة والرخصة
نصيحتى لك انك تسمع كل الكلام اللى انت كتبته ده وتنفذه بحذافيره لان هى دى اخلاق واداب القيادة اللى هاتجنبك احراجات كتير جدا
فعلا صاحبى اكد لى انك لو ماشى بسرعة هادئة موش عيب
ومادمت ماشى بشكل عاقل وسليم ولا تسبب ازعاج للآخرين مافيش حد هايعمل لك كالاكس ويضايقك واللى عايز يعدى منك هايعدى بدون مشاكل وفى منتهى الهدوء

ثانيا اوعى تستعجل خد وقتك وبراحتك خالص على الاقل شهر كمان تدريب مع صاحبك فى اماكن هادية وبعدين هو اللى هايقولك انك هاتنزل فى وسط الزحمة دلوقتى
اكيد اول مرة بتبقى صعبة جدا ومليانة توتر لكن اوعى تنسى للحظة ان كلنا اتعلمنا بنفس الطريقة لكن اللى يفرق واحد عن واحد مدى التزامه باداب القيادة وده بتتعود عليه لما تبقى بتزيد فترة تدريبك

وده نفس الكلام اللى بقوله للناس اللى معايا ... انا موش مستعجل ... وعايز اخد وقتى .. ولما تيجى فرصة انزل مع حد بيفهم ... اركب معاه واتعلم ... مافيش اى مشاكل ... لحد لما الواحد يشعر فعلا انه اصبح تمام
بالنسبة لأداب القيادة ... والله الواحد بيلاقى ناس كثيير قوى افاضل ومحترمين وبيشعروا ان اللى راكب بيتعلم جديد وبيصبروا عليه ....
طبعا فيه العكس وهما دول الناس اللى بتسبب قلق للمتعلم الجديد ربنا يستر

لكن الناس اللى بتتعلم فى اسبوعين والسلام للاسف بينزلوا الشارع يعكو الدنيا وبعدين يتعودوا على العك ده وتبقى دى طريقتهم فى القياده لفترة طويلة اوى
انا كترت فى الكلام اوى بس انا مبسوطة انك بتتعلم صح وربنا يوفقك


للاسف ... فعلا ... طول ما انا ماشى بالعربية .. اشاهد سيارات جديدة ولكن متخبطة فى كل حتة .... طبعا معلهش "الفلوس بتجمد القلب" .... يعنى فيه ناس معاها فلوس وماعندهاش اى مشكلة انهم يركبوا عربية جديدة وتطلع الرخصة وينزل الشارع على طول يخبط فى اللى حواليه
ده غير ما فيش اى صبر .. يعنى يبقى شايف ان الشارع واقف وعمال يعمل حركات عشان يمشى مترين ولا ثلاثة فى الشارع
ممكن يكون الخوف للسائق الجديد سببه ان امكانياته بسيطة عشان كده ماشى وخايف على العربية هههههههههههههه
ربنا يستر مع الجميع ... وفى انتظار النصائح الغالية