الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة haneen83

بجد يا جماعه اشكر كل شخص اضاف رد او رأى فى الموضوع ده و طبعا طبعا جزيل الشكر للاستاذ صاحب الموضوع

المشاركة الأصلية كتبت بواسطة haneen83

السلام عليكم ورحمة الله وبركاته

الاول احنا اللى بنشكرك على مشاركتك لنا فى موضوع مهم لكل المبتدأين فى تعلم القيادة ودائما فى انتظار مشاركاتك القيمة عشان نستفيد منها كلنا

و انا استفدت اوى من معلومه ان ندوس فرامل الاول و بعدين ديبرياج و استفدت جدا من معلومه انى ادوس دبرياج فى الملفات و التقاطعات

والله العظيم كل يوم ادعى لصاحبى اللى فهمنى الحكاية دى ... برغم ان فيه كثيير من الاصدقاء حتى الامس بيقولوا لى اقتراحات تانية ... لكن وجدت ان موضوع الدبرياج مع الضغط على الفرامل للتحكم فى سرعة العربية فى الملفات والتقاطعات والزحام افضل حاجة للمبتدأ ... اوعى تدخلى على تقاطع او ملف ورجلك موش على الفرامل تهدى بها العربية وتتركيها ماشية بدون توقف ولكن تدخل على الملف بهدوء جدا جدا او التقاطع ... ولو لا قدر الله حصل اى شىء على طول رجلى اساسا على الفرامل هاقف ... وفى اسوء الحالات هاقف خالص ... مافيش مشاكل لانى اصلا رجلى على الدبرياج وعمر العربية ما هاتقف منى ... وبسرعة هاختار الغيار المناسب وطبعا ما دامت ضاغط على الدبرياج اساسا من الاول ... هاكون اول واحد ناقل الغيار المناسب وهامشى على طول بدول ما اعطل اى حد خلفى.


لان الموضوع ده جه فى وقته .. انا باتعلم السواقه اليومين دول و محتاجه كل النصايح دى
بس انا عايزه اقول حاجه ... انا اخدت تلات حصص (تلات ساعات) لكن لسه جوايه رهبه

لازم يكون جواكى رهبة بسبب ... الاول انت راكبة عربيتك ... وطبعا خايفة عليها ... خصوصا لو كانت السيارة زيرو ... او اى سيارة عموما صاحبها هايكون خايف عليها جدا

وكمان اللى بيعلم فى الغالب عايز يخلص بسرعة المهم عنده اجتياز اختبار المرور ... ويقول لك مادمت انت بتعرف تنقل الغيار الاول والثانى والثالث والرابع ... بشكل تلقائى خلاص انت بقيت مية مية
ههههههههههههههههههههههههه ه
طبعا الإجابة لأ وستين لأ

بمجرد ما الواحد يمشى فى الشارع ويشوف العجب من سيارات بتعدى من اليمين والشمال ومن كل حتة .. ده شىء يخوف المبتدأ زى حالتنا
والكلاكسات اللى شغالة عمال على بطال
وقلة الزوق لما تحس ان اللى امامك جديد فى موضوع القيادة وعمال تعمل له حركات وكلاكسات
ده غير الإشارات والزحام
كلها حاجات بتخوف المبتدأ

صحيح قلت عن الاول .. بس مش باعرف اتصرف بسرعه فى المواقف .. الشخص اللى بيعلمنى بيقوللى ان فيه ناس بتوصل معاه للحصه الرابعه بتبقى متعلمه كويس اوى و مش محتاجين يكملوا الحصص
هو انا كده ابقى فاشله و الا ايه .. انا حسيت بالاحباط بجد النهارده .. لانى حاسه ان المعلومات فى بالى بس مش باعرف اطبق بسرعه .. و حاسه ان الراجل بدأ يزهق منى .. تفتكروا فيه امل منى

معلهش فى الاول كده ... وكمان كل واحد بيعلم مبتدأ لازم يقول له الكلمتين دول ... وعمر الواحد ما يتعلم فى اربع حصص ... ليه يعنى ماشى لوحدى ومافيش غيرى فى الشارع ... هو ده يبقى تعليم

ده صاحبى فضل معايا يومين على الاقل
عشان يعلمنى الف الدوران بهدوء ... وادوس الفرامل عشان اهدى العربية وانا داخل على الملف .. ورجلى على الدبرياج فى استعداد لاختيار الغيار المناسب ... يعنى لو العربية لسه بتتحرك خلاص هاختار الغيار الثانى بدون تردد .... ولو العربية وقفت خالص هاختار الغيار الاول

ويوم ثانى علمنى
ازاى انظر بطرف عينية على اللى جاى من التقاطع او الدوران ...
ازاى المحه بطرف عينينة من غير ما الف دماغى عشان انظر اليه
ازاى اركز على مقدمة العربية فى الملف "ماافضلش باصص على اللى جاى فى التقاطع ... لدرجة انى انسى العربية بتاعتى" ... ومرة واحد الاقى نفسى فى نص الشارع

وعلمنى انى لازم آخد الملف فى الحارة اللى انا ماشى فيها
يعنى لو بلف بجوار الرصيف ... خلاص عمرى ما اخرج من الحارة اللى بجوار الرصيف حتى انتهى من الملف والعربية تعدل نفسها

ولو كنت باخد الملف فى الحارة الثانية ... خصوصا فى "اليو تيرن" .... افضل ملتزم الحارة عشان ممكن يكون فيه سيارة تانية فى الحارة الاولى بتلف معايا

وطبعا اهم حاجة علمها لى انى لازم التزم بالحارة اللى انا ماشى فيها ... يعنى لا اسير على الخطوط بين الحارات ... ولا اسير بجوار الخطوط بين الحارات
لازم اكون ماشى فى وسط الحارة تماما
كده اللى عايز يعدى منى موش هايخاف من اى حاجة
وموش هايضرب لى كلاكسات لانى هاكون بعيد عنه

و عايزه حد يحكيلى عن اول مره طلع فيها على الشارع و هو بيتعلم حصل معاه ايه ؟؟ و كمان عايزه اعرف حضراتكم اخدتوا وقت اد ايه على بال ما بقيتوا فعلا بتعرفوا تسوقوا من غير كوارث و لا مواقف محرجه

معلهش لازم فى الاول حد يخرج معاكى وانت ماشية بالعربية
وده موش عيب انا ما زلت اخرج بالسيارة وفيه حد راكب بجوارى ... حتى ولو موش بيعرف يسوق

طبعا الافضل انك تمشى بالعربية يوم الجمعة صباحا الساعة مثلا 8 صباحا ... الشوارع فاضية ... الناس فى اجازة ... وجربى تنزلى المناطق المحتمل انك تمشى فيها بالعربية بتاعتك ... مثلا المناطق اللى فيها اقاربك ..المناطق اللى فيها عملك ... المناطق اللى فيها اصدقائك وهكذا
ووممكن فى البداية المناطق الهادئة السهلة البعيدة عن التقاطعات والزحام
تنزل لى الشارع حتى ولو هاتمشى لاول الشارع وترجعى تانى مافيش مشاكل
مع التكرار تبدأ الرهبة تروح

انا عن نفسى حتى الآن اخرج مع ام الاولاد ... يوم الجمعة فقط ... صباحا اروح السوق ههههههههههه اشترى شوية حاجات وارجع حوالى الساعة 10 صباحا بعيدا عن الزحام ... وهى بتقول لى انت احسن من الاول كتيير
لكن انا موش مستعجل

بالامس احد اصدقائى قال لى: انت موش معاك "عزيزة" خلاص قابلنى الساعة 8 ... رحت اقابله بالعربية ودى كانت اول مرة اخرج بها لوحدى
طبعا كل ما افكر انى هامشى لوحدى ... متخيل ان الشوارع ضيقة جامد ... متخيل ان العربية كبيرة على وفى حالة خوف
المهم بعد ما وصلت المكان اللى هاقبله فيه ههههههههههههههههههههههههه ه
لم اجده
اتصل بى بالتليفون وقال لى : المفاتيح جوه العربية والسايس غسل العربية وقفل على المفاتيح
هههههههههههههه
قال لى: تعالى خدنى من عند السوبر جيت
قلت لنفسى: يا خبر ابيض ده انا ما صدقت انى وصلت لحد هنا ... لسه هاروج السوبر جيت اجيبك من هناك ... يا الله خليها على الله ... رحت متوكل على الله ورايح جايبه

وجدت عربية راكنه امامى صف تانى ... فضلت واقف لحد ما سعادته ما يمشى موش عايز يمشى ... صاحبى قال لى: اطلع منه
قلت له ماشى : امرى لله
بصيت كويس فى المرايا
وتوكلت على الله ههههههههههههههههه
وعديت منه

رحت واقف امام محل "كاوتش"
وقلت له اكشف على الكاوتش
جيت امشى بالعربية ... لاقيت واحد واقف فى الحارة رقم 2 ونزلت المدام عشان تشترى حاجة
طيب الشارع كله 3 حارات
حارة امام المحلات
حارة رقم 2 وقف فيها الباشا عشان مكسل يقف بجوار الرصيف
حارة رقم 3 اللى فيها العربيات ماشية بسرعة

لثانى مرة
اعدى منه وطبعا بتبقى المواضيع دى فيها خطورة على المبتدأ

مافيش مشكلة المهم
ان فى الاول الخروج بيكون يوم الأجازة
وصباحا
والسرعة لا تزيد عن 60 كيلوا ... موش مطلوب اى سرعة خالص
والاتزام بالحارة اللى انت ماشية فيها
ولا تنتقلى الى اى حارة اخرى اللا بعد النظر فى المراية وببطء شديد عشان لو فيه حد بجوارك هايضرب لك كلاكس لو انت موش شايفاه
ولازم يكون فيه حد راكب جنبك فى الاول



معلش انا عارفه انه كده هاخرج عن الموضوع بس محتاجه تشجيع و الله لاحسن انا اكتأبت جدا النهارده

اكتأبتى من كلام اللى بيعلمك
ولا فيه حادث معين ضايقك وانتى بتتعلمى

شوفى كل مرة بتخرجى فيها هاتتعلمى حاجة جديدة وموقف جديد
مع تكرار المواقف هاتخدى خبرة كويسة والخوف هايقل

طبعا انا مازلت بخاف لكن موش بالشكل الاولانى
الاول انا كنت ادخل البيت ودماغى عماله تجيب فى "مية" هههههههههههههههههههه
واقول لهم ده من الحر
وفى البيت يضحكوا عليا
ويقول لى: ده انت عرقت من الخوف
هههههههههههههههههههه

لكن كل يوم بتعلم حاجة جديدة
مثلا امس رجعت البيت باليل الساعة 11 مساء ... ودى كانت اول مرة اخرج فيها مساء
اول ماقربت اركن بالسيارة ... فوجئت بواحد راح فاتح باب سيارته
طبعا قلت لنفسى انت اللى غلطان
كان لازم اضرب كلاكس بسيط عشان اصحصح اى حد ممكن يكون راكن وانا موش شايفه زى صاحبنا
النهارده كنت ماشى برده ورايح اركن لكن ضربت كلاكس سريع ... وسبحان الله كان فيه مدام كانت ناوية تنزل من عربية زوجها .. اول ماسمعت الكلاكس راحت قافلة باب العربية على طول
وطبعا انا من الاول بحاول انى لا اقترب من السيارات بشكل كبير .. لكن اتعلمت انى لازم استعمل الكلاكس فى المواقف الحساسة
واتعلمت انى لما افكر اركن السيارة انى انور "نور الانتظار" عشان اللى جاى ورايا يعرف انى فى اى وقت هاقف ... بمجرد انى الاقى مكان فاضى هاقف على طول ... عشان كده نورت نور الانتظار ... وكمان نورت الإشارة اليسار عشان هاركن شمال



النهاردة مثلا استفدت جدا من كلام استاذ محمد فوزى ... الله يكرمه يا رب ويسعد دنيا وآخرة
فى موضوع النظر فى المرايات بصفة مستمرة
وانا راجع مع ام الاولاد
ببص فى المرايا وجدت ورايا ميكروباص جاى بسرعة جدا ... وانا عارف انهم مجانين اصلا
وكان فيه امامى عربية نقل
حسبتها على ما اوصل للعربية النقل واحاول انى اعدى منها
ممكن سواق الميكروباص يكون حصلنى ويزنق عليا
قلت خلاص اهدى انا السرعة واكبر دماغى
وفعلا زى ما حسبت
مافيش ثوانى ... وسواق الميكروباس ... بمجرد ما شافنى انى هديت السرعة ... عشان هو يعدى ... راحل داخل امامى ومعدى من العربية النقل زى الصاروخ

طبعا لما اتعودت انى انظر فى المرايا باستمرار ... وجدت ايضا سيارات خلفى عايزة تجرى بسرعة ... وبدون تردد اخدت الحارة الاولى من الشارع عشان اللى عايز يجرى يجرى براحته
وفعلا الناس اللى ورايا كلهم ... راحوا ماشيين بسرعة من شمالى
بس اللى عجبنى انهم عدوا من ناحية الشمال بدون ما حد منهم يضرب لى كلاكس او يضايقنى
عشان كنت ملتزم بالحارة اللى انا ماشى فيها
وفى نفس الوقت اللى خلفى بيعرف انى شايفه كويس بدليل انى وسعت له عشان يعدى منى

طبعا لما اتعودت انى انظر فى المرايا زى ما علمنا استاذنا محمد فوزى ... بارك لله فيه
وجدت سيارات خلفى واصحبها مصممين يعدون من الناحية اليمين
قلت لام الاولاد: شوفى ورايا عربيتين جايين بسرعة جدا وهايعدوا من الناحية اليمين لى .. عشان كده انا المرة دى هالتزم بالحارة الوسطى اللى انا ماشى فيها
وفعلا ثوانى ... وعدوا من الناحية اليمين زى الصاروح برغم انى الحارة اليسار كانت فاضية وممكن يعدوا منها
لكن كل مرة الواحد يتعلم حاجة واحدة صغيرة لكن مهمة
موش لازم يتعلم كل حاجة فى ايام قليلة
طبعا لأ
وعمر اللى بيعرف يسوق فى 10 او 20 سنة
نعرف نسوق زيه
اهم حاجة اننا نتعلم
واننا ناخد وقت كفاية ... بلاش استعجال
وان اللى بيعملنا يكون فاهم ... للمرة الالف بقول لازم يكون فاهم الاصول صح

يعنى امبارح واحد صاحبى سألته: موش هاتعلمنى اركن بالعربية كويس
قال لى: الركنة هاتيجى بالتكرار والخبرة
قلت له: لأ معلهش انا كلمة الخبرة والتكرار دى موش بحبها
قال لى: ازاى
قلت له : انا عايز كلام علمى ... يعنى موش كل ما اركن اجرب طريقة لحد ما تيجى معايا
المهم: اختلفنا فى الموضوع ده ... وفضلنا نضحك مع بعض على الحكاية دى

لنا زميلة فى العمل
كانت بتقول لى: انا اول مرة خرجت بالسيارة كنت اخرج بيها مع البواب
قلت لها: والبواب بيعرف يسوق
قالت لى: لأ
ههههههههههههههههههههههههه هههههه
كان يخرج معايا الصبح لحد الشغل ... وبعدين ادفع له اجرة تاكسى يروح لوحده
ههههههههههههههههههه
لحد ما بطلت اخاف وخرجت لوحدى

بالأمس مثلا
رحت اتأكد من حالة الكاوتش
صاحب المحل قال لى: فرده الكاوتش دى منفوخة على 33 يعنى المفروض انها تكون على 30 بالكثيير .... دى حاجة اتعلمتها

كل ده اتعلمته من نفسى
لكن عملية الخروج لوحدى انا لسه موش مستعجل عليها
المهم انى امشى مع اى حد ... وشوية شوية نتعلم كل يوم حاجة جديد من الاصدقاء المنتدى الأوفياء ولو فيه اى استفسارات من حضرتك ممكن نعرفها ونستفيد من معرفة الإجابة عليها كلنا إن شاء الله

مع اطيب التمنيات
اخوكم حسين غزالة

المشاركة الأصلية كتبت بواسطة rabbat5

رأيي 1: المرايات و خصوصا المرايا اليمين ، لازم تبص فى المراية اليمين قبل ما تروح يمين و الشمال قبل ما تروح شمال ، و لو حبيت تهدي عشان مطب لازم تبص فى مراية الصالون قبل الفرملة عشان محدش يخبطك من ورا و لو لقيت مطب كبير و انت على سرعة استعمل فرملة اليد مع الفرملة العادية لو المسافة مش كفاية و نزلها بعد ما العربية تهدا سرعتها قبل ما تنزل من المطب يعني لا يفضل انك تاخد المطب و انت مفرمل عشان الصدمة و العفشة.

اولا شكرا لحضرتك على معلوماتك القيمة والغالية
بالنسبة للمرايا اليمين ... بعض الاصدقاء قالوا لى: انهم لا يستخدموا المرايا اليمين إلا فى ركن السيارة فقط لا غير ..
قلت لهم: طيب بتشوفوا العربيات اللى على اليمين ازاى
قالو لى: بنحرك مرايا الصالون يمين شوية .. بحيث تجيب اللى ورانا وكمان تجيب اللى على اليمين
والبعض بيستخدم مرايا صالون ممتازة رؤية عريضة وفى نفس الوقت لا تشوه الأبعاد ... يعنى ما تبعدش العربية اللى ورايا 10 متر وفى الحقيقة هى واريا بمسافة متر واحد

2_ لو على سرعة عالية فوق ال 120 و لا قدر لقيت مطب أو فى حاجة مش هينفع تفاديها أو مفيش وقت و هتفرمل استخدم الفرامل العادية على الآخر لغاية ما العربية سرعتها تقل شويةو بعدها مباشرة شد فرامل اليد و نفس الكلام لو هتخبط عربية لا قدر الله ما تنساش الهاند بريك مهم جدا جدا .

هههههههههههه ... أنا عن نفسى سرعتى لا تزيد عن 80 كيلوا واحيانا اقل
طبعا العربية ممكن تسرقنى فى ثوانى واجد السرعة هاتعدى 100 .. لكن بحاول اتحكم فى نفسى ورغبتها فى زيادة السرعة ... وانى اقلد الآخرين عشان احس انى سواق مية مية ههههههههههههه
ربنا يستر

3_ حافظ على مسافة بينك و بين العربية اللى قدامك

ده كلام عين العقل ... لكن احيانا يا اخى فيه ناس موش بيعجبها الحكاية دى وتفضل تضرب لك كلاكسات عشان "تلزق" فى الامامك ... لدرجة العربية النهارده بطلت فى الزحام .. وريحت "سنة" على اللى ورايا ... طبعا انا غلطان فى عملية "الترييح" دى ... لكن فى نفس الوقت هو "لازق لى" بعربيته ... اكنه لو ترك حتى نصف متر بينى وبينه هايتأخر على مشواره ههههههههههههههههه
اما فى السرعات العالية ... انا عن نفسى لازم اترك مسافة بينى وبينه اللى امامى ... وبرده فى ناس موش بيعجبها الحكاية دى ويفضلوا يعملوا "غرز" وحركات عشان يدخل امامى ... عشان كده بريح نفسى واحاول المشى على اتجاه واحد يمين او شمال على طول ... وخصوصا الشمال واترك باقى الشارع للى عايز يجرى براحته وبدون ازعاج



4_ احذر الفرملة المفاجئة خصوصا فى الملفات و حافظ على مسافة بينك و بين اللى جنبك فى الملف.

بالنسبة للمسافة بينى وبين اللى جنبى .... فعلا موضوع خطير جدا ... النهارده فيه واحد ست كانت ماشية جنبى ... هى عايزة تمشى للامام باى شكل وموش حاسة انها بتحدف على ... بس لما حسيت بكده ... هديت انا شوية عشان هى تمشى للامام وتبعد عنى ومافيش داعى انى اجرى جنبها ... من خاف سلم

والموقف التانى كان فيه ملف ناحية اليمين ... وافتكرت فعلا انى لازم التزم الحارة اللى انا بلف فيها عشان ممكن يكون فيه حد بيلف جنبى ... وفعلا ثوانى وظهر لى اكثر من عربية بتلف معايا فى الحارة التانية .. لان الملف كان واسع ... وربنا بيستر

الاول كان ممكن الف فى حارة ... ومرة واحد اروح الحارة التانية عشان عايز امشى جنب الرصيف ......... هههههههههههه
طبعا كان ممكن يحصل كوارث وربنا اللى بيستر .... لولا كلامكم ده اللى الواحد بيتعلموا منكم ... والله كلام مفيد جدا جدا جدا لكل مبتدأ فى القيادة بارك الله فيك



5_ التركييز التركيز و عدم استخدام الموبايل عند القيادة الا بالنسبة للمتمرس و لا يستخدم نهائيا مع السرعة العالية إلا إذا كان الطريق فاضي.

مرة واحدة فقط رن الموبايل ... وصاحبى قال لى: اقف على جنب ورد على الموبايل ده وماتتكلمش فيه وانت سايق .... خصوصا انى لسه بتعلم


6_ اذا كانت قدامك عربية حاجبة الرؤية زي النص نقل او الميكروباص أو العربيات العالية و كنت قريب منه و لقيته غير اتجاهه فجأة امشي وراه و غير اتجاهك معاه لأنه غالبا بيكون تفادى عربية بطيئة أو حفرة .

ودى معلومة جميلة قوى ... لأن فى الغالب العربية النقل عالية ... وكمان السواق ممكن يكون شايف الشارع احسن منى ولمسافات بعيدة
لكن فيه تحذير مهم
هى ان الواحد لازم يبتعد عن السيارات النقل المحملة بالزلط والرمال ...
من يومين كنت راجع مع واحد صاحبى من "الرحاب" ومرة واحدة زلطة صغيرة خبطت الزجاج الامامى ... راح رايح يمين بالعربية وقال لى: حرام ده انا لسه مغير الزجاج الامامى عشان زلطى زى دى الاسبوع اللى فات
هى الزلطة صغيرة جدا ولكن قوية جدا زى "الطلقة" والعياز بالله وربنا يسترها مع الجميع



8_ اذا كنت فى ملف زي ملفات طريق اسكندرية برضه و فى عربية قدامك فى الملف ما تطلعش من الملف و تاخد الحارة اليمين على سرعة لأنك ممكن تقابل عربية راكنه او عربية بتهدي و راحية الحارة اليمين و فى كلا الحالتين الاصطدام ممكن يحصل

7_ إذا كنت ملف زي الملفات الموجودة على طريق اسكندرية الصحراوي و قدامك عربية نقل تقيل امشى وراها و ما تفكرش تطلع منها عند الملف ..


ودى معلومة ممتازة جدا ... خصوصا للناس اللى بتسافر ... واكيد الواحد آجلا أو عاجلا هايسافر ...


9_ فى التقاطعات لازم تهدي قبل التقاطع و ما تكتفيش بالكلاكس و الفلاشر اذا كنت خايف على نفسك.

ودى برده معلومة ممتازة ... الله يكرمك يا شيخ
فعلا موش كفاية الكلكس والفلاشر ... كلام سليم فعلا ... ان الواحد عمره ما تسرقه العربية بسرعتها ... ويدخل على التقاطعات بالكلاكس والفلاشر فقط

اول امس ... كان فيه سواق تاكسى ماشى بالسيارة بسرعة
الشارع كان هادىء وواسع
وكان موش متوقع اى حاجة
ومرة واحد خرج له فى نص الشارع بالضبط عربية من شارع جانبى
واسمع احلى فرامل امريكانى
ده غير ان الباشا برغم انه سواق قديم كان بيجرى وكمان للاسف لا فيه كلاكس ولا فلاشر حتى

10_ و انت راجع بالعربية لورا عشان تركن لازم تبص وراك لأن ممكن عربية تجيلك من ورا و عربيتك مش على استقامتها و تخبطك أو أو تخبط فى الكاوتش و هو طالع لبره و دي حصلت معايا مرتين و محصلش حاجة للعربية و الحمدلله.

المشكلة دى بتبان فى عملية ركن السيارة
حتى الآن لا اعرف ركن السيارة إلا فى المساحات الواسعة
اما لو كان فيه مساحات ضيقة ... استحالة افكر اركن السيارة ... او حتى امشى بيها وارجع مالاقيش المكان ههههههههههههههه
ده غير ان فيه اتوبيسات سياحية "للسوبر جيت" بتمشى فى الشارع ودى عشان تمشى لازم توسع له الشارع كله
نفس اتعلم الركنة بأسلوب علمى موش بالتجربة والخطأ



لو عربيتك نوعها ممتاز و تهدي أكتر لو الكاوتش بتاعك قدم أو عدى ال 45 الف كم.
11_ فى الملفات الكبيرة على الطرق السريعة زي الدائري لازم تهدي شوية حتى

معظم الحوادث بسبب السرعة و قلة الاهتمام و التركيز.
12_ ما تدخلش أبدا مع أوتوبيس أو نقل تقيل فى ملف و تخلي عربيتك بينه و بين الرصيف _مع ان انت أسرع منه_ خليك على يمينه لو الملف شمال و العكس .

ودى معلومة ممتازة جدا ... الله يكرمك ويسعدك دنيا وآخرة ... لأن فعلا الدخول مع الاوتوبيس مشكلة كبيرة جدا خصوصا مع المبتدأين اللى زى حالاتنا


والله العظيم كل يوم افتح "التوبك" يمكن الاقى حد ابن حلال زى حضرتك او زى الاستاذ محمد فوزى او اى عضو كريم يكون كتب لنا اى حاجة ممكن نستفيد منها

شكرا لحضرتك جزيلا
واتمنى يا رب ما نتحرمش من عطائك انت واصدقاء المنتدى الاوفياء والمخلصين

مع اطيب التمنيات
اخوكم حسين غزالة

المشاركة الأصلية كتبت بواسطة haneen83

والله يا استاذ حسين انا مش عارفه اشكرك ازاى
تقريبا كده انت الوحيد اللى بتشجعنى على السواقه و بتحمسنى ربنا يكرمك يا رب
انا اسفه على تأخرى فى الرد بس انا ما توقعتش ان حد يرد عليا بصراحه و يهتم انه ينصحنى علشان كده ما دخلتش اشوف مين رد عليا فمتشكره جدا ليك بجد ردك حمسنى اكتر انى استمر فى التعلم

احنا مع بعض شوية شوية ... نعرف كل حاجة ... وموش شرط نعمل كل حاجة فى نفس اليوم
والله حضرتك انا مبتدأ زيك بالضبط يمكن عشان كده انا حاسس بحضرتك وموضوع الخوف من القيادة طبعا ما زال موجود عندى بيقل تدريجى


انا الحمد لله وصلت للحصه السادسه و بقيت احسن من الاول بكتير بس مشكلتى انى ساكنه فى الشيخ زايد و باتعلم فيها و هى اصلا شوارعها فاضيه خالص

الشوارع الفاضية فى الشيخ زايد ميزة كويسة موش عيب خصوصا للمبتدأين
انا عندى مثلا اختى الكبيرة .. فضلت اكثر من شهرين تمشى لوحدها فى شوارع 6 اكتوبر .. لحد ما فى يوم قررت تقوم بإحد الزيارات العائلية يوم جمعة وفى الصباح الباكر جدا
طبعا المواصلات كانت فاضية خالص ووصلت مصر الجديدة فى منتهى الهدوء وتمام التمام
وفى العودة رجعت تقريبا برده فى الصباح الباكر
مع كثر المشى بالسيارة ... ابتدأت الرهبة تروح ترديجيا ودلوقت احسن من الأول بكثيير


فخايفه اوى انى اكون كده باضيع وقت و لما اخرج بره زايد احس بالازمه
تفتكر انى لازم اخرج على المحور و الا لسه بدرى ؟؟ ...


بالنسبة للشوارع الفاضية زى ماقلت دى ميزة هائلة
يعنى ممكن تعلمى نفسك مثلا فى يوم ولوحدك خالص
على موضوع الملفات
ان الواحد يقرب من الملف بسرعة معقولة
ويتحكم فى سرعة العربية بالفرامل
ومافيش داعى يدخل الملف ورجله على البنزين خالص
ويحاول يلف فى الحارة اللى بجوار الرصيف
ويستمر فى التدريب على الموضوع ده بشكل جدى
لحد ما تشعرى ان موضوع الملف ده اصبح شىء عادى خالص وتلقائى وان العربية موش بتقف منك خالص فى الملف خصوصا طبعا انك هاتكونى زى عرفنا لازم تدوسى على الدبرياج وانت داخلة على الملف ورجلك التانية براحة قوى بتتحكم فى سرعة العربية
يعنى موش بدوس بنزين خالص تماما
المهم بعد كدة
تحاولى تشوفى شارع يكون فيه ملف فيه حركة شوية
ليه
عشان تمرنى نفسك انك تشوفى العربيات اللى فى الشارع الرئيسى اللى انتى عايزة تلفى فيه
يعنى تشوفى بطرف عينيك وبسرعة "تلمحى العربيات" اللى قاطعة الطريق عليكى ... لو فيه فرصة تدخلى الملف
ادخلى على طول وبسرعة هادئة وبجوار الرصيف
لو لمحتى عربيات جاية من الطريق الرئيسى ناحيتك
خلاص مافيش مشكلة انى ادوس فرامل بالكامل وطبعا عشان انت اصلا داخلة الملف ورجلك على الدبرياج موش مطلوب منك غير انك تنقلى الغيار الاول
وبرده تشوفى العربيات اللى جاية فى الشارع الرئيسى لو هى بعيد عنك خلاص امشى على طول وادخلى الملف بجوار الرصيف وبسرعة هادئة

لما تنتهى من المرحلة دى
تحاولى تتدربى على انك بمجرد ما العربية تاخد الملف وقبل ما العربية تعدل نفسها تحاولى بسرعة تنقلى الى السرعة الاعلى على طول
يعنى تدريب الغرض منه اخد الملف وكمان نقل الغيار بسرعة وبدون تردد

طبعا لو هالف ناحية الرصيف يبقى افضل ناحية الرصيف
لو هالف فى الحارة الثانية يبقى هافضل فى نفس الحارة
يعنى افضل ملتزم بنفس الحارة اللى بلف فيها
واوعى تغيرى الحارة اللى بتلفى فيها عشان ما يحصلش مشاكل


فيها تدريب مهم قوى قوى
ايه هو
تشوفى شارع مرتفع
وكمان يكون فيه ملف فى نفس الوقت
ههههههههههههههههههه
هنا تظهر الصعوبة
مطلوب انك تدخلى الملف
وتشوفى العربيات اللى جاية فى الشارع الرئيسى "بطرف عينيكى" وبسرعة تعدلى دماغك ههههههههه وتبصى على عربيتك من الامام ... يعنى اوعى تنسى نفسك وتفضلى تبصى على العربيات اللى جاية من الشارع الرئيسيى ليه ... هاتلاقى نفسك مرة واحد بدل ما كنتى بتلفى بالعربية بجوار الرصيف .... هاتلاقى العربية دخلت على نص الشارع الرئيسى .. طبعا خطر جدا

نرجع لموضوعنا ... تدخل الملف
لكن هاتلاحظى ان العربية فى "مطلع" يعنى ممكن ترجع للخلف وانت فى الملف
موضوع رخم شوية
لكن عايز تدريب
لو العربية داخلة الملف ومازالت بتتحرك مافيش اى مشاكل هاكمل الدخول
لكن لو العربية وقفت بسبب ان فيه عربيات جاية بسرعة فى الشارع الرئيسيى او فيه مشاة يبقى ايه الحل مع المبتدأ
الحل انك اساس زى ماقلنا رجلك على الدبرياج وهاتدوسى فرامل فقط
المشكلة انك عايزة تنقلى الغيار الاول للعربية
وخايفة العربية ترجع للخلف عشان انت ماشية على مطلع
ببساطة ارفعى فرامل اليد
وانقلى الغيار الاول
واول العربية لم تتهز وتترج منك نزلى فرامل اليد على طول هاتلاقى العربية مشيت للامام ولن ترجع للخلف

ده تدريب مهم جدا ومفيد ايضا فى الصعود على الكبارى ... يعنى لو طالع كبرى والعربية وقفت وخايف انها ترجع للخلف على طول ارفع فرامل اليد ... وانقل الغيار الاول ... ولما العربية تترج وتبدأ فى التحرك ... على طول انزل فرامل اليد هلاقى العربية مشيت على طول

طبعا ممكن الاقى عربيات ورايا عمالة تضرب كلاكسات وحركات .... موش مهم ... احسن ماالعربية ترجع للخلف وتخبط اللى واقف ورايا ههههههههههههههههههه



و يا ترى الناس المبتدئين اللى زيى لازم يمشوا على المحور علشان يروحوا الشغل كانوا بيسوقوا على سرعه كام اول ما بدأوا ؟؟

انا عن نفسى بحاول مرة او مرتين امشى على الدائرى عشان احافظ على شحن البطارية ... يعنى لازم امشى بالعربية مشوار بسيط كده بحيث العربية تشحن البطارية وفى نفسى الوقت تكون بتجرى بدون توقف
طبعا العربية ممكن تسرق الواحد والسرعة تزيد جامد وتوصل الى 100 كيلوا
لكن صاحبى نصحنى انى لا ازيد السرعة عن 60 كيلوا عشان انا مبتدأ
طبعا فى الطريق الدائرى كنت ازود السرعة شوية واخليها 70 كيلوا واحاول انى احافظ على السرعة دى
بشعر طبعا انى ماشى بطىء جدا بالمقارنة بالعربيات اللى ماشية على الطريق السريع
لكن موش مهم
المهم انى اشوف المرايا بشكل كويس جدا ... عشان لو فيه حد عايز يعدى منى ... اتركه يعدى واحافظ على الحارة اللى انا ماشى فيها ... وكمان عشان لا اشعر بالخوف
بحاول انى امشى فى الحارة اليمين بجوار الرصيف واترك باقى الشارع للى عايز يجرى
لكن لو شفت فيه حاجة من بعيد واقفة فى الطريق احاول انقل نفسى براحة للحارة رقم 2 ولما اعدى العربية اللى واقفة ... ارجع تانى للحارة رقم 1
اهم حاجة فى الموضوع ده
انى اترك مسافة بينى وبين العربيات اللى امامى
يعنى حوالى 20 متر على الاقل بينى وبين العربيات اللى امامى ... عشان لو حصل اى حاجة لا قدر الله الحق اقف براحتى
ولو فيه حد وقف امامى الحق اتحرك للحارة التانية واعدى منه
وطبعا قبل ما انقل نفسى من حارة الى حارة ... لازم ابص فى المرايا اللى فى النص وكمان ابص للمرايا الجانبية وكمان ابص من فوق كتفى نظرة سريعة جدا عشان العربيات اللى بتكون ماشية بجوار الباب الخلفى اللى الواحد مابيشوفهاش خالص فى المرايا

طبعا توقعى حاجات كثييرة فى الطريق السريع
يعنى مثلا
لو بصتى فى المرايا اللى فى النص
ممكن تلاقى فيه عربيات عايزة تعدى من الناحية اليمين
فى الحالة دى اثبت انا فى الحارة بتاعتى واتركه يعدى منى
وممكن الاقى عربيات عايزة تعدى من الناحية اليسار
نفس الشىء اثبت فى الحارة بتاعتى واتركه يعدى منى
المهم انى لا اسير على الخطوط الفاصلة بين الحارات
لازم امشى فى وسط الحارة تماما واحافظ على العربية انها ما تحدفش يمين او شمال تمشى فى خط مستقيم

لو فيه سيارة امامى متوقفة وموش عارف اعدى منها ... مافيش اى مشاكل هاقف انا كمان ولا احاول انى اعمل سواق مية مية ... واحاول انى اعدى منه واعمل مشاكل للعربيات اللى جاية من الخلف
يعنى عمرى ما هاعدى منه اللا اذا كنت واثق تماما ان مافيش حد جاى من ورايا بسرعة او ان العربيات اللى ورايا بعيد بمسافة كافية
واستعمل الاشارات على طول حتى ولو كنت عايز انقل نفسى من حارة الى حارة

ولو كنت شايف ان الشارع هايتوقف اكيد لاى سبب ... اضغط على مفتاح الانتظار ... عشان العربيات اللى جاية من ورايا تعمل حسابها انى هاقف بالعربية فى اى وقت

وطبعا لو كنت هادخل ملف يمين يبقى من بدرى احاول انقل نفسى للحارة اليمين
والعكس
لو كنت هادخل ملف يسار يبقى من بدرى احاول انقل نفسى للحارة اليسار
لو فيه فرصة يعنى لا استعجل فى نقل نفسى من حارة الى حارة

احد الاصدقاء قال لى: لو كنت ماشى فى شارع زحمة جدا وموش عارف تنقل نفسك لحارة تانية ... مافيش اى مشاكل ... خليك ماشى على طول لحد ماربنا يفرجها والزحمة تخف وترجع تانى للمكان اللى انت عايزه من اى طريق تانى
احسن لك بدلا ما تحاول نتقل نفسك من حارة لحارة فى الزحمة وتعمل مشاكل وتخبط العربية
يعنى موش عشان اوفر محطة ولا محطتين اخبط العربية عشان ادخل الملف بالعافية

طبعا من الاشياء المهمة كمان
لو فيه زحمة فى الطريق السريع موش مطلوب انى اضغط فرامل .. ممكن ارفع رجلى فقط من على البنزين لحد ماالسرعة تهدى شوية
ولو هاضغط على الفرامل "لا اضغط على الدبرياج" عشان العربية تقف بسرعة ولو العربية هديت تماما ممكن فى الحالة دى اضغط الدبرياج عشان اختار غيار مناسب مثلا الغيار الثانى

ده تقريبا كل اللى انا فاكره سواء من اصدقائى او اصدقاء المنتدى الاوفياء

وفى انتظار اسمع كل معلومة مفيدة
من استاتذتنا الكبار فى المنتدى
يا جماعة الله يكرمكم عايز مشاركات
فين استاذ محمد فوزى .. وحشنا ولعل المانع خير
نفسى اسمع كلام من استاذ سبعاوى
واسمع كلام من هيرو ومن اسلام
وكلا اصدقاء المنتدى

فى انتظار التواصل
مع اطيب التمنيات
اخوكم حسين غزالة