الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة rzkaa829

والله شرح ممتاز جدا انا عن نفسى كتير قالو لى سوقى وانا متخيلة ان السواقة دى عايزة اعصاب وتحكم بس انتا خلتنى احس انها سهلة وبسيطة جدا وان مفيهاش اى مشكلة ربنا يسترها معاك دايما وينور طريقك وشكرا على الافادة وعلى مجهودك الرائع ربنا يكرمك ويباركلك

كلامك مضبوط جدا
فعلا السواقة دى دراسة وعلم قبل كل شىء
والاهم ان اللى بيعلم يكون فاهم
وكلامه منطقى

وطول ما كلامه منطفى ومضبوط ... الاعصاب هاتكون تمام التمام
وان شاء الله تكون السواقة اسهل بعد استكمال استاذنا الكريم مواضيعه ومشاركاته القيمة

المشاركة الأصلية كتبت بواسطة aboharf

بســــــــــــم الله الرحمـــــن الرحيم
عوده الى الدروس التعليميه
احنا اخر حاجه وصلنالها كانت كيفيه النطلاق بالعربيه باستخدام الدبرياش وتعرفنا على نقطه الاحتكاك وكيفيه الوصول اليها بالاضافه الى كيفيه الضغط على الدبرياش وتحريك السياره باستخدام الدبرياش فقط ودي طبعا بنسميها الانطلاقه البطئيه للسياره.......
اليوم هانتكلم عن موضوع الانطلاقه السريعه للسياره والطريقه الصحيحه لاستخدام دواسه البنزين......
ماهي الانطلاقه السريعه للسياره؟؟؟؟؟؟
هو استخدام البنزين لمساعده السياره على الانطلاق بسرعه من بعد التوقف .ودي طبعا الانطلاقه الطبيعيه اللي مفروض نستخدمها طول الوقت.....
كيف نستخدم بداله البنزين؟؟؟؟
يجب ان نعرف ان دواسه او بداله البنزين حساسه جدا والضغط عليها يختلف عن الضغط على بداله الفرامل او الدبرياش.....
كيف نضغط على دواسه البنزين ؟؟؟ عند الضغط على دواسه البنزين يجب ان نستخدم الرجل اليمنى و يكون كعب الرجل على ارضيه السياره ويكون الضغط على الدواسه باستخدام مشط القدم بخفه وحساسيه ولتظبيط الضغط على دواسه البنزين سوف نقوم بعمل التمرين التالي::::
اولا فاكرين عداد لفات المحرك الr p m ايوه اللي في التابلوه جنب عداد السرعه ،،، العداد ده فايدته ايه ؟؟؟ العداد ده بيحسب عدد لفات المحرك في الدقيقه الواحده يعني مؤشر العداد اذا كان موجود على الرقم 3 مثلا معنى كده ان المحرك بيلف 3000 لفه في الدقيقه ولذلك اذا نظرت في منتصف العداد هتلاقي مكتوب x1000 يعني شوف المؤشر فين واضرب الرقم في 1000 وهايديك عدد لفات المحرك في الدقيقه الواحده
وده طبعا بيفيدنا في معرفه ضغط المحرك وبيفيدنا في تغير نقلات الفتيس وهاتكلم في الموضوع ده في وقته......
طيب ماله بقى العداد ده ....
شوفوا بقى انظروا على عداد لفات المحرك قبل مانشغل العربيه هتلاقوه على الصفر ،،، دلوقتي
-نظبط جلستنا في العربيه، نمور الفتيس ونرفع فرامل اليد لاقصى مدى ممكن ، نشغل العربيه ، نظبط المرايات ، نربط حزام الامان ،

بمناسبة حزام الامان ... هههههههههههههه ... كنت خارج امس الجمعة فى الصباح الباكر امشى شوية بالسيارة الساعة 10 صباح تقريبا المهم دخلت البنزينة و"فولت العربية" وانا ماشى فى ميدان الاسماعيلية فى مصر الجديدة ... افتكرت موضوع الحزام وام الاولاد عايزة تشترى حاجة حلوة عشان الاولاد ... وانا مرة واحدة رحت مهدى وواقف على جنب .... قالت لى: انا موش شايفة اكشاك هنا نشترى منها حاجة ... قلت لها : أنا واقف عشان اربط الحزام ... بدل ما يجى لنا واحد يخبطنا 50 جنيه مخالفة على الفاضى للأسف احيانا كثيرة انسى اربطه ... خصوصا ان كل مشى بالسيارة داخل المدينة واكيد فى الزحام لا تتخطى السرعة 60 او 70 كيلوا وربنا يستر
وبرضه ننظر الى عداد لفات المحرك بعد ما نشغل العربيه هنلاقيه وصل لغايه رقم واحد ومعنى كده ان المحرك عامل الف لفه في الدقيقه تقريبا .ومعنى كده ان العربيه شغاله..
طيب نضغط على دواسه البنزين بالطريقه اللي ذكرت سابقا . هتلاقي ان المحرك صوته بقى عالي جدا !!!! ماتخافش ده طبيعي لان رجلك لسه تقيله ومش حساسه على دواسه البنزين.
دلوقتي اضغط على دواسه البنزين وبص على عداد لفات المحرك هتلاقي المؤشر ارتفع كتير ، ارفع رجلك من على الدواسه هتلاقي المؤشر نزل تاني ،،،،،،
حلو الكلام : دلوقت اضغط على الدواسه بحساسيه شويه وبص على العداد وحاول ان المؤشر يوصل لغايه رقم 2 وحاول انك تثبت قدمك على الوضع الحالي وحاول تثبت المؤشر على رقم 2 لمده عشر ثواني (يعني تعد 1001 1002 1003 1004 .... وهكذا).معلش رجلك هاتوجعك شويه بس استحمل لان بعد كده الامر هايبقى عادي جدا.... كمان مره اضغط زياده على دواسه البنزين وحاول توصل المؤشر للرقم 3 وبرضه ثبت المؤشر على رقم 3 لمده عشر ثواني ,, ارفع قدمك شويه من على دواسه البنزين ببطء شديد وخلي المؤشر ينزل للرقم 2.5 وثبت لمده عشر ثواني ، انزل كمان لغايه الرقم 2 وثبت عشر ثواني ، ارفع رجلك من على دواسه البنزين شويه صغيرين للرقم 1.5 وثبت المؤشر لمده عشر ثواني ،،، اضغط تاني على الدواسه وارفع المؤشر لفوق لرقم 3 وثبت وهكذا استمر في تثبيت المؤشر على الارقام الصغيره في عداد لفات المحرك الى ان تعلم قدمك الحساسيه على دواسه البنزين ،،، معلش هيا صعبه شويه بس خذ الموضوع على اساس انها لعبه واتحدى بيها نفسك....

والله انا ما عنديش عداد RPM لكن اتعودت انى اعتمد على عداد السرعة اللى امامى بحيث لما العربية توصل سرعتها تقريبا 40 كيلوا ... انقل الى الغيار الثالث ... ولما توصل سرعتها الى 60 كيلوا او اكثر قليلا .. انقل الى الغيار الرابع
او لما اسمع صوت الموتور بدأ يعلى فى الغيار الثانى ... انقل الغيار الثالث بدون ما انظر على عداد السرعة... وطبعا زى ما اتعلمنا من حضرتك انقل الغيار الثانى على طول بمجرد ما العربية اتحركت ... على اساس ان الغيار الاول معمول عشان تحريك جسم العربية فقط لا غير ... والله اعلم

سؤال
احيانا كثيرة جدا ... اجد انى لن الحق ان انقل الغيار الثالث لان الشارع سوف يتوقف بعد ثوانى ... والافضل انى امشى بالعربية "سلانسيه" لان كده كده العربية هاتقف ومافيش داعى انقل الثالث
لكن بالطريقة دى ممكن الاقى نفسى ماشى على الثانى مدة طويلة خصوصا ان الشوارع زحمة
عشان كده موش عارف كده صح ولا خطأ .... يعنى انقل الغيار الثالث حتى ولو موش هامشى عليه ثانيتين ... ولا الصح انى امور العربية وامشى على سرعتها فى الغيار الثانى لان كده كده هاقف

سؤال
فى ناس كانت بتنصحنى انى اريح العربية فى الغيارات
ايه المقصود بترييح العربية فى الغيارات

كيف ننطلق بالسياره باستخدام البنزين (الانطلاقه السريعه)
بعد ما اتعودنا على دواسه البنزين هانتعلم ازاي ننطلق باستخدام البنزين.....
- ارفع فرامل اليد الى اقصى درجه ممكنه
- اضغط دبرياش وحط عصايه الفتيس على الغيار الاول .
-دلوقت اضغط بنزين خفيف ووصل مؤشر العداد لرقم 2 وخليك مثبت على كده وماترفعش رجلك ابدا من على البنزين
-ارفع رجلك شويه شويه من على الدبرياش الى ان توصل الى نقطه الاحتكاك يعني ترفع دواسه الدبرياش لغايه النص بس ومترفعاش اكتر من كده ومتنساش انك برضه تكون لسه ضاغط على البنزين كما ذكر سابقا بص لمقدمه وكبوت السياره هتلاقيها ارتفعت لفوق شويه معنى كده ان السياره عايزه تنطلق ، متخافش العربيه مش هاتمشي للامام لانك رافع فرامل اليد وهاتمنعها من التقدم للامام.
-دلوقت اضغط دبرياش وارفع رجلك من على البنزين هتلاقي مقدمه السياره نزلت ورجعت لوضعها الطبيعي
-كمان مره خليك ضاغط دبرياش واضغط بنزين خفيف ، ارفع رجلك من على الدبرياش لحد النصف وبص لمقدمه السياره هتلاقيها برضه ارتفعت لفوق .
-استمر على الطريقه دي بانك تدوس الاول بنزين وترفع دبرياش للنصف يعني تفضل تدوس بنزين وترفع دبرياش وبالتالي هاترفع مقدمه السياره وتنزلها الى ان تتعود رجلك على الحركه دي وطبعا ماتنساش تستخدم الغيار الاول.
-يعني استمر في تعلم الحركه التبادليه دي بين رجلك اليمين والشمال وذلك بالضغط على البنزين برجلك اليمين الاول ثم ترفع رجلك الشمال من على الدبرياش لغايه النص.
هاقول على حاجه ظريفه ،،، ساعات وانت واقف في الاشاره بتلاقي شاب روش جه وقف بعربيته وعمال يرفع مقدمه السياره وينزلها كانه بينطط العربيه والموضوع باختصار انه بيعمل ايه هو رافع فرامل اليد ودايس بنزين ومثبت رجله على البنزين ورجله الشمال اللي على الدبرياش طالعه نازله يعني بس يرفع رجله الشمال لغايه النص (نقطه الاحتكاك ) ويدوس دبرياش تاني بسرعه فلما مقدمه السياره ترتفع يروح دايس دبرياش فتنزل تاني وهكذا . وبرضه تلاقي واحد عمال يرفع شنطه العربيه وينزلها ، برضه الموضوع بسيط احنا بس بدل مانحط الغيار الاول نحط غيار المارشيدير وندوس بنزين بشكل متواصل ونرفع ونخفض الدبرياش بسرعه هتلاقي الشنطه من ورا بتطنطط طبعا ماننساش نكون رافعين فرامل اليد ....ممكن احنا نجرب الموضوع ده بس مش هانعمله كتير اوي عشان مايبوظش اسطوانه الدبرياش .. وجربوها دي حركه لذيذه جدا وهاتعلمك ازاي تنطلق بعربيتك بسرعه....(بعلمكم شويه اجرام)ههههههههههههه


يا جامد هى دى الشعوذه هههههههههههههههههههه
مية مية


كيفيه الانطلاقه السريعه؟؟؟؟؟
الان هاندخل في الجد ،،،،،
خلي صاحبك اللي بيسوق ياخدلك العربيه الى مكان واسع وفسيح وطويل .
اركب عربيتك وشغلها وظبط الكرسي والمرايات وحط حزام الامان ، حط لنفسك هدف قصاد عينك يعني انظر الى الامام لمسافه 100 متر وحدد اي علامه قدامك.
-شغل العربيه ، دوس دبرياش ، حط النقله الاولى ، دوس بنزين خفيف(وانس عداد المحرك احنا كنا بنستخدمه للتمرين بس ومش محتاجينه في شئ تاني) خلاص انت اتعودت على البنزين من غير عدادات،،دوس بنزين خفيف ونزل فرامل اليد ،،، دلوقت ارفع رجلك من على الدبرياش ببطء شويه لغايه نص الدبرياش هتلاقي العربيه انطلقت بسرعه ومن غير رجرجه

-بس اهم حاجه انك ماترفعش رجلك بسرعه من على الدبرياش ومش مره واحده ،، ارفعها شويه شويه ولما تنطلق العربيه تماما او تتحرك ارفع رجلك بشكل كامل من على الدبرياش.

ودى معلومة مهمة جدا جدا ... اشكرك عليها الله يبارك فيك
لان اخويا كان بيشتكى منى فعلا ويقول لى ارفع رجلك براحة وموش عايز احس بأن العربية "بتنتش" فى النقل بين الغيارات
عشان تحافظ على تروس الفتيس
لكن
لما برفع رجلى براحة من على الدبرياج ... اشعر انى بطىء فى النقل وانى موش بستغل سرعة العربية فى النقل ورا بعض بسرعة
لكن فى نفس الوقت
اشعر انى بريح العربية اثناء نقل الفتيس ... يعنى بضغط الدبرياج بالكامل وانقل الفتيس "براحة" بدون عنف على الغيار المطلوب وارفع رجلى ببطىء عشان العربية ما "تنتش" ...
هل كده صح

-دلوقت لما نيجي نوقف العربيه اعمل ايه؟؟؟؟
-دوس فرامل خفيفه تهدي بيها سرعه العربيه وبعدها بلحظه الحقها بضغطه دبرياش كامله واضغط على الاتنين مع بعض الى الاخر الى ان تتوقف العربيه.
-طبعا حد يقولي طيب انت في الدرس السابق قلت دبرياش الاول ،، اه فعلا بس عشان كنا في البدايه وماكناش انطلقنا ببنزين بس الصح دلوقت اني لما اوقف العربيه اضغط فرامل تدريجيه الاول وبعدين الحقها مباشره بالضغط على الدبرياش واضغط الاتنين في نفس لقت للاخر.
-طيب فايدتها ايه؟؟؟دي فايدتها انك لو ماشي على سرعه عاليه وحبيت توقف العربيه ودوست دبرياش الاول معنى كده انك هاتفصل االحركه يعني اسطوانه الدبرياش عن اسطوانه المحرك وبالتالي هتلاقي العربيه جريت شويه لقدام ومش هاتلحق تسيطر عليها وخاصه لو كانت كانت العربيه اللي قدامك قريبه منك جدا...
-يعني انا لما اوقف العربيه ادوس فرامل الاول وبعدين دبرياش ودي لازم اتعود عليها من البدايه عشان ما اتعبش منها

ودى يا جماعة معلومة مهمة جدا جدا جدا وكلام اسمعوه من الاستاذ لانه بيكلم كلام بالنسبة للمبتدأين اللى زى حالتنا لازم ناخد بالنا منه كويس قوى قوى
عشان حصلى موقف امس وانا ماشى بالعربية فى روكسى ... سواق تاكسى كان "لازق لى" وماشى ورايا وموش عايز يعدى منى كل اللى بيعمله يضرب لى كلاكس مع ان الشارع فاضى على شمالى ... المهم جريت شوية عشان ابعد عنه وكان فيه "يو تيرن" ضغط على الدبرياش وضغط على الفرامل وبرغم ذلك العربية دخلت على "اليو تيرن" موش بالسرعة البطيئة اللى انا عايزها وكمان حسيت ان الفرامل موش جامدة قوى ... بعد شوية تفكير ... سألت فى الموضوع ده ... واخيرا استاذا الكريم وضح لنا سبب فى منتهى الاهمية ان العربية عشان تقف وتمسك كويس وتحس ان فيها فرامل ..... لازم ندوس الفرامل الاول وهى متعشقة وقبل ما تهدى ندوس الدبرياج ... الله يكرمك يا استاذنا ويبارك فى حضرتك ...
السؤال هل الموضوع ده فيه خطورة على تروس الفتيس ... يعنى فيه تحميل على تورس الفتيس


بعدين......
طيب دلوقت بعد ما وقفت ،،بص كويس على المرايات وبص كويس وراك واتاكد ان مافيش حد ودوس دبرياش وحط الغيار على المارشيدير واضغط بنزين الاول وارفع رجلك من على الدبرياش شويه شويهودوس بنزين شويه كمان وارجع للخلف في خط مستقيم برضه
- لما تحاول تقف دوس فرامل تدريجيه الاول وبعدين الحقها بدبرياش كامل واضغط الاتنين مع بعض ووقف العربيه...
-استمر بالتدريب بالانطلاق بسرعه للامام وللخلف وخليك على الوضع ده لغايه ما تتعلم الانطلاقه السريعه والتوقف التدريجي.
من الدرس اللي فات اتعلمنا الاتي:
-استخدام دواسه البنزين
-الانطلاقه السريعه باستخدام البنزين
-التقدم الى الامام والرجوع للخلف باستخدام الانطلاقه السريعه
-استخدام الفرامل اولا عند محاوله ايقاف السياره
والى اللقاء قريبا في الدرس القادم وسوف يكون عن طريقه استخدام الدريكسيون واللف يمين ويسار بطريقه سليمه
وشكرا

واحنا فى الإنتظار بشغف كبير عشان نتعلم من حضرتك كل جديد
شاكرين افضالك

المشاركة الأصلية كتبت بواسطة aboharf

كلام حضرتك سليم ،، وال r p m مالهوش اهميه قوي والموضوع كله هايبقى بالخبره والممارسه وحساسيه الرجل.
بالنسبه لموضوع نقل الغيار لو انت ماشي في حته مش زحمه ممكن تستخدم الغيار الاول للسرعه من 0 الى 20 والغيار التاني من 20الى 40 والغيار التالت من 40 الى 60 والرابع من 60 الى 80 والخامس من 80 الى فوووووق..
بالنسبه للتغير حسب صوت المحرك ...
فكرتك صح 100 100 وكده حضرتك حطيت رجلك على اول سلم الاحتراف..
الغيار الاول ممكن امشي عليه فتره في الزحمه شديده البطء وانا في نفس الوقت معتمد على الدبرياش
يعنى تقصد حضرتك انى امشى من

بس المهم انك ماتمشيش عليه بسرعه ولفتره طويله جدا ولو حصل كده هنلاقي صوت المحرك عالي جدا والعربيه مكتومه وبطيئه...سؤال
احيانا كثيرة جدا ... اجد انى لن الحق ان انقل الغيار الثالث لان الشارع سوف يتوقف بعد ثوانى ... والافضل انى امشى بالعربية "سلانسيه" لان كده كده العربية هاتقف ومافيش داعى انقل الثالث
لكن بالطريقة دى ممكن الاقى نفسى ماشى على الثانى مدة طويلة خصوصا ان الشوارع زحمة
عشان كده موش عارف كده صح ولا خطأ .... يعنى انقل الغيار الثالث حتى ولو موش هامشى عليه ثانيتين ... ولا الصح انى امور العربية وامشى على سرعتها فى الغيار الثانى لان كده كده هاقف
عادي جدا خليك ماشي على التاني زي ما انت عايز،،،، وخاصه لو كنت ماشي مثلا في شوارع جانبيه او حواري لان في الشوارع دي وبسبب الضيق الشديد فيها مش هاتقدر تمشي اكتر من الاول او التاني.
يعني وانت على التاني معاك السرعه ممكن تكون من 15 ل 20 ل 25 ل30 ل35 ل40 ل45 وده اعلى حد ممكن للغيار التاني وممكن تمشي عليه حاليه(في حالات تسارع تانيه ممكن نوصل العربيه لل 60 وهيا على الغيار التاني وده هاتكلم عليه بعدين) ولو انت في زحمه خليك على التاني ومافيش داعي للتالت لان التالت محتاج منك سرعه عاليه شويه...
اهم شئ ان حضرتك لما تكون ماشي على التاني وفوجئت بان العربيات اللي قدوامك وقفت فجأه ، او كنت عايز تدخل من شارع فرعي لشارع رئيسي مثلا وهاتضر انك تقف لحد ماتلاقي فرصه انك تتحرك وتدخل الشارع الرئيسي....
كل ماعليك فعله هو وانت ماشي على الغيار التاني وهاتقف اضغط فرامل الاول تدريجيا وقبل ما العربيه تقف تقريبا اضغط دبرياش على الاخر مع الفرامل ووقف العربيه وبعد كده مباشره وتلقائيا حط الغيار على الاول وانطلق من جديد وهكذا ،،،، امشي الاول في التاني ولما تقف اقف على الغيار التاني وانقل على الغيارالاول واتحرك...
يعني ماتغلطش غلط معظم المبتدئين واللي لما يكونوا عايزين يقفوا بيغروا من التاني للاول والعربيه ماشيه وبالتالي بتلاقي العربيه بتتنطط فجاه وصوت المحرك بيعلى بدون داعي وتحس برجرجه جامده...
الخلاصه وانت ماشي على الغيار التاني وحبيت تقف مثلا على راس الشارع الفرعي لكي تدخل شارع رئيسي عشان تتاكد ان مافيش عربيات جايه فكل ما عليك هو انك تهدي بالفرامل الاول ولما تحس ان العربيه هاتقف تماما الحقها بدبرياش مع اكمال الضغط على الفرامل وقف العربيه ومباشره انقل على الغيار الاول بعد ماتقف تماما .يعني جرب كده تقف على الغيار التاني ولما تيجي تنطلق انطلق على الغيار الاول...
اما لو حبيت تنقل على الاول وانت ماشي فلازم يكون لده سبب يعني هاتاخد مطب مثلا ،،،
كل اللي عليك قبل المطب طبعا انت بتهدي السرعه وذلك بالضغط على الفرامل لغايه ماتحس ان العربيه هدت سرعتها على الاخر يعني ماتوقفش العربيه وبعد كده دوس دبرياش وانقل للاول وانت قبل المطب بلحظات قليله او ممكن وانت فوق المطب إلا حته هههههه وخليك دايس على الفرامل ضغطه متوسطه مش خفيفه يعني ممشي العربيه وفي نفس الوقت مش موقفها,,وبعد كده وانت فوق او نازل من على المطب ارفع نص رفعه دبرياش (نقطه الاحتكاك يعني)هتلاقي العربيه لاهاتطفي ولا هاترج وبعد ماتنزل العجلتين الخلفيتين من على المطب دوس بنزين خفيف وانطلق رافعا رجلك من على الدبرياش وبعد كده غير للتاني..سؤال
فى ناس كانت بتنصحنى انى اريح العربية فى الغيارات
ايه المقصود بترييح العربية فى الغيارات
يعني ادي لكل غيار السرعه الناسبه له ,,, بمعن اخر ماتقرص على الغيارات ،،، او ماتمشيش على الغيار باكثر من السرعه المناسبه له كما ذكر سابقا!!!! مثلا ماتمشيش على التاني لاكتر من 40 لغايه ما المحرك يزعق...
ودى معلومة مهمة جدا جدا ... اشكرك عليها الله يبارك فيك
لان اخويا كان بيشتكى منى فعلا ويقول لى ارفع رجلك براحة وموش عايز احس بأن العربية "بتنتش" فى النقل بين الغيارات
عشان تحافظ على تروس الفتيس
لكن
لما برفع رجلى براحة من على الدبرياج ... اشعر انى بطىء فى النقل وانى موش بستغل سرعة العربية فى النقل ورا بعض بسرعة
لكن فى نفس الوقت
اشعر انى بريح العربية اثناء نقل الفتيس ... يعنى بضغط الدبرياج بالكامل وانقل الفتيس "براحة" بدون عنف على الغيار المطلوب وارفع رجلى ببطىء عشان العربية ما "تنتش" ...
هل كده صح
صح ومش صح !!!!!!!!!
يعني بالنسبه لرفع الرجل من على الدبرياش انت بتعملها ميه ميه بس......
ماتنساش حاجه انك في حاله في حاله تسارع يعني لما تبتدي على الغيار الاول بتعمل ايه ،، بدوس بنزين وبترفع رجلك من على الدبرياش بالراحه هتلاقي العربيه اتحركت من 0 لغايه 20 مثلا وبعد كده هاننقل للتاني فاهنرفع من على البنزين وندوس دبرياش وننقل للتاني (وفي اثناء ما برفع دبرياش لازم اكون في نفس الوقت ابتديت ادوس بنزين )يعني حركه تبادليه وانا برفع رجلي من على الدبرياش اكون في نفس الوقت تماما بدوس بنزين عشان اعوض فرق السرعه...وهكذا مع كل غيار بنقله وماتنساش انك في حاله تسارع....
يعني هاقول لحضرتك ايه اللي بيحصل معاك !!
حضرتك بعد ما بتتحرك بالعربيه على الاول وتمشي وبعد كده تنقل على التاني حضرتك بترفع رجلك من على الدبرياش بالراحه وللاخر وبتستنى شويه قبل ماتدوس بنزين فبتحس ان العربيه بتنتش معاك بالرغم من ان حضرتك رافع دبرياش بالراحه .
فبالتالي لازم تدوس بنزين في نفس الوقت اللي حضرتك بترفع فيه رجلك من على الدبرياش ومش لازم يكون بنزين جامد يعني بنزين خفيف تعوض بيه فرق السرعه ..والموضوع ده محتاج شويه تدريب لغايه ماتوصل للحساسيه في استخدام البنزين اثناء سحب الرجل من على الدبرياش،، وجرب حضرتك التسارع من الاول للتاني ومن التاني للتالت ومن التالت للرابع وهكذا ،،،،،السؤال هل الموضوع ده فيه خطورة على تروس الفتيس ... يعنى فيه تحميل على تورس الفتيس
ماتخافش على ترووس الفتيس ومافيش حاجه اسمها تحميل على التروس ،، في حضرتك حاجه اسمها التحميل على اسطوانه الدبرياش زي مثلا ماتكون حضرتك بتشد عربيه نقل كبيره ومحمله بعربيتك بواسطه حبل ده طبعا بيكون زي الطفل اللي بيشد عملاق فبالتالي ممكن اسطوانه الدبرياش تلف على الفاضي وبالتالي تتمسح تماما وتشم ريحه زي احتراق كوتش عربيه نتيجه للاحتكاك العالي باسطوانه المحرك...
او تكون حضرتك محمل العربيه بحمل كبير جدا وطالع بيها مطلع عالي او كوبري وانت قارص على الغيار في الحاله دي ممكن تحرق اسطوانه الدبرياش ...
اما تروس الفتيس فما بتخربش الا في حالتين
1- ان الفتيس يكون مافهوش زيت وفاضي وده ممكن يخلي التروس تاكل بعضيها
2-انك وانت ماشي على الخامس او على اي سرعه وحطيت مثلا على غيار المارشدير بالعافيه وتكون قاصد ففي الحاله دي بتكسر تروس الفتيس ... يعني تكون العربيه ماشيه لقدام وفجاه تديها غيار عشان ترجع ورا....
اما بالنسبه لتهدئه السياره فلازم اهدي بفرامل الاول لغايه ما اصل للسرعه المناسبه وبعدين ادوس دبرياش وانقل غيارات الفتيس للنقله الابطأ

واحنا فى الإنتظار بشغف كبير عشان نتعلم من حضرتك كل جديد
شاكرين افضالك
الفضل يعود لحضرتك ولكل اعضاء المنتدى المحترمين..
وكلي امل ان تكون الدروس السابقه والدروس القادمه فيها افاده لكم وما يعود بالنفع عليكم وشكرا ...........محمد فوزي