الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

بسم الله الرحمن الرحيم

نتابع مع بعض المواقف الصعبة اللى بتقابل المبتدأين

الموقف ده حصل معايا اليوم

اثناء العبور فى تقاطع التجنيد قبل ميدان ابن الحكم

المهم انظروا إلى الصورة



الجمعة اللى فاتت دخلت على التقاطع ده بسرعة شوية

وقلت لنفسى ايه اللى انا بعمله ده

المرة دى دخلت بهدوء
ورجلى على الفرامل اتحكم فى سرعة السيارة
والرجل الثانية ضاغطة على الدبرياج

وحاولت الالتزام بالجانب الايمن
عشان فيه عربيات تتجه الى اليسار

ورغم ذلك
تجد ان فيه السيارات الخضراء متجهه الى الامام وملتزمة بالحارة التى على اليسار
يعنى ماشين فى الحارة اللى ممكن فى اى وقت تلاقى عربية داخلة شمال
ولو انت ماشى وراها وسرحان هاتخبط فيها
ولو موش سرحان هاتقف وتعطل اللى ماشى وراك

المهم
فى التقاطع يوجد "كشك شرطة عسكرية"
يحجب الرؤية
انك لا تستطيع مشاهدة القادم من اليمين

عشان كده دخلت براحة قوى زى ما قلتلكم
وفعلا سبحان الله
طلع لى عربية ريجاتا باللون الاحمر
داخل على الطريق الرئيسى بسرعة شوية

ولولا انى داخل رجلى على الفرامل .. ومتوقع انه يظهر لى اى حد بالشكل ده
على طول ضغط على الفرامل بالكامل فى منتهى الهدوء
وعشان الطريق الرئيسى بتاعى انا ... العربية الريجاتا الحمراء وقفت تماما
وعشان انا اصلا داخل التقاطع ورجلى ضاغطة على الدبرياج
نقلت الغيار على طول على الغيار الاول واستمريت فى السير بكل هدوء

طبعا ارجوا التصحيح فى التصرف اللى انا عملته من الاصدقاء لو كان هناك اى خطأ


نشوف الموقف الثانى
انظروا إلى الصورة دى


فى الموقف ده انا امامى سيارة ميكروباص واقفة فى نص الشارع بتحمل ركاب
وفى نفس الوقت جاى ورايا ميكروباص "منافس" وماشى بسرعة وعارف انه موش هايصبر على

ولو حاولت انى اعدى من الميكروباص اللى امامى احتمال انه يمشى ويخبطنى

انظروا إلى الصورة التالية


ببساطة فضلت انى اهدى من سرعتى
وانقل نفسى الى الحارة اليمين وراء الميكروباص الاول
وفعلا على ما حصلته ... صاحبنا جرى زى المجنون
والميكروباص التانى جرى واره زى المجنون

معرفش انا كده اتصرفت صح ولا لأ
انا شخصيا احب امشى بهدوء
وكان ممكان ادخل على الاولانى واضرب كلاكسات واعمل حركات
لكن فى الأول والآخر هاعرض عربيتى للخطر
عايز راى الاصدقاء فى الموضوع ده


نشوف الموقف التالى

فى الموقف ده انا ماشى فى طريق سريع
وظهر امامى اوتوبيس سياحى كبيرقوى

ببساطة قررت انى اهدى سرعتى لانى متوقع ان حجم الاوتوبيس هايكون كبير قوى
شوفوا الصورة التالية


حصل اللى انا توقعته ... ان الاوتوبيس حجمه كبير جدا وطويل جدا
وعندما بدأ فى الدوران قفل الحارتين

على طول قلت لنفسى لو انا انتقلت الى الحارة التانية ... خطر على عشان فيها عربيات ماشية بسرعة

مافيش داعى اركب دماغى واكسل وكبريائى يمنعنى انى اهدى من سرعتى
وانتظر دخول الاوتوبيس الاول
وعلى ما احصله ابدأ فى السير بسرعة تانى

هاتأخر نص دقيقة موش مشكلة
المهم انى لا اسبب مشاكل لى وللأخرين
عايز اسمع راى الاصدقاء فى الموقف ده مع مراعاة انى مبتدأ فى القيادة



نشوف الموقف دى لانى اتنرفزت فيه بجد

فى الصورة السيارة الزرقاء اللى انا راكبها وكنت عايز ادخل يمين
ومن بدرى اعطيت اشارة يمين
ورغم ذلك مرت من الناحية اليمين العربيات الصفراء
ولولا انى شايفهم فى المرايا .. كان حصل مشكلة
الاول هما المفروض يعبروا من على شمالى موش من على يمينى
ورغم ذلك
هديت العربية واجلت الانتقال الى الحارة اليمين .. واعطيت لهم الفرصة عشان يمروا لأنهم ماشيين بسرعة والطريق سريع اساسا

واول ما اقتربت من الملف اليمين
يظهر لى عربية تاكسى "السيارة الحمراء"
واضرب كلاكسات واعمل حركات وحاجة قلة ادب
وموش عايز يهدى شوية

المهم فضلت ملتزم الحارة بتاعتى
ودخلت الملف على واسع
انظر الى الصورة التالية

طبعا الشارع اللى احنا داخلين عليه شارع اضيق من الرئيسى السريع
دخلت الشارع على واسع ملتزم بنفس الحارة اللى انا كنت فيها
وصاحبنا عشان هخبول شوية دخل من على يمينى بشكل وحش قوى
وانا بمجرد ما دخلت يمين رحت موسع له ناحية الشمال ومشاور له بإيدى "اتفضل اجرى يا سيدى براحتك" ورينى هاتروح فيه
وهو عشان كان سلوكه سىء راح جارى وداخل اول يمين واختفى

طبعا لو كان الشارع اللى احنا داخلين فيه واسع لن نجد اى مشكله انا فى حارة وهو فى حارة وهاندخل احنا الانثين

لكن لما يكون الشارع ضيق
وانا اعطيت اشارة من بدرى قوى
وانت شايفها وممكن تنتظر شوية عشان ابعد عن العربيات اللى فى الطريق السريع

لاحظوا انى لازم اهدى وادخل بهدوء
وموش ممكن اهدى وانا ماشى فى منتصف الطريق السريع ... ممكن يكون ورايا فى نفس الحارة سيارة ماشية بسرعة

موش عارف انا اتصرف صح ولا لأ

اعتقد ان مافيش حاجة حصلت النهارده اكثر من كده


يا ريت اسمع راى استاذ محمد فوزى والاخ الكريم الاستاذ احمد
وجميع الاصدقاء فى المنتدى

مع اطيب التمنيات
اخوكم حسين غزالة