الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

نصائح عامة

ملخص مهارات القيادة الدفاعية

19 نصيحة لتجنب ازعاج الآخرين

هل وجدت نفسك مرة سبب لإزعاج السائقين الآخرين على الطريق ؟
هل تشعر انك هدف للسائقين الآخرين
.. دائما تسمع كلاكسات لتنبيهك ... وترى اشارات ضوئية فى مرايتك ... وكل حاجة على مزاجك من اللى "بتغلس عليك"



الخلاصة: انت لا تستطيع التحدث مع كل سائق لشرح الموقف الذى انت فيه
لكنك تستطيع تنبيه السائق الآخر عما تنوى فعله



1- تحرك بالسيارة بشكل مستمر
مافيش داعى انك تجرى بسرعة ثم تتوقف مرة واحدة بدون داعى
مافيش داعى انى ادخل على اليوتيرن مثلا بسرعة ... والمرة التالية ادخل على اليوتيرن بطىء ... بالطريقة دى ممكن اللى ماشى وراك يتوقع انك هاتدخل على اليوتيرن بسرعة زى المرة اللى فاتت وتحصل مشكلة

سواء كنت تتميز بالجراءة فى قيادة السيارة
سواء كنت تتميز بأنك حريص عند قيادة السيارة
لازم السيارات التى حولك "تعرف انت ناوى تعمل ايه" ... يعنى تتوقع انت ناوى تعمل ايه فى الخطوة التالية.
يجب ان تدرك ان كل شىء يسير بشكل طبيعى وجميل جدا ... اذا كنت تسير بالسيارة بشكل انسيابى وبطريقة متوازنة مع تدفقات المرور

عندك مثلا ايه اللى يجعل القيادة فى المحروسة مزعج
العربيات ماشية تمام التمام
برغم الزحام لكن الجميع ملتزم بحارته ... ومحافظ على سرعته ... وكل شىء تمام
اول ما يظهر ميكروباس ... تظهر المشاكل ... يجرى بسرعة ويقف مرة واحدة ويحول اتجاهاته زى ما هو عايز ... يمين وشمال .. وده لوحده عايز له كتاب
اول ما يظهر سيارة نص نقل ... موش خايف على عربيته ويحشر نفسه زى ما هو عايز
اول مايظهر تاكسى ... عايز يعدى منك بأى شكل من على اليمين او الشمال
اول ما يظهر مينى باص "اخضر" .. لازم تخاف على نفسك
اول ما يظهر سائق شاب .... عايز يعيش فى دور "الواد الروش" .. وفاكر ان القيادة
بسرعة مرة وببطء مرة ... ويعمل حركات ... لزوم الروشنة
حاجات كثيير تسبب ازعاج للآخرين

بالأمس كنت راكب مينى باص ركاب "اخضر" ... والسائق بصراحة لم يترك شىء "سىء" إلا وعمله ... الدنيا زحمة وموش مستحملة ... وهو عمال على بطال لازق للعربيات الملاكى ... وفاكر نفسه راكب عربية صغيرة .. وعايز يحشر نفسه حتى ولو كان المكسب متر واحد هايمشيه بالعربية ... المهم جه وقت الدخول على اليوتيرن ... والشارع زحمة جدا جدا ... وموش عايز يلتزم بالسير خلف العربيات عشان يدخل اليوتيرن بأمان ... وعايز يدخل قبل العربيات كلها ... عايز يدخل من الحارة الثالثة ... ومرة واحدة يدخل قبلهم ... طبعا النتيجة ان فيه عربية 128 كانت ماشية على طول وموش داخل اساسا اليوتيرن .... الراجل فوجىء بالمينى باص داخل عليه ... قال خلاص ... ده ها يدمر لى العربية .. جرى بسرعة ... ومرة واحدة راح واقف وقال له "انت صحيح حته حمارة بن .... " ههههههههههههههههه
سائق المينى باص .. هو كمان راح واقف مرة واحدة ... انا افتكرت خبط حد هههههههههههه وراح قال لسائق الملاكى ... وانت "....... ابن ........ خد يا وله هنا .. تعالى يا بن الـ .......... " هههههههههههههههههه وحاجة قلة أدب وانا كان قلبى حاسس ان السائق ده موش هايجيبها لبر ....
نصيحة احترسوا من سائقى المينى باص "الاخضر"




2- لا تعوق حركة المرور


على سبيل المثال ... اذا كنت ماشى على طريق سريع نوعا ما ... مثلا الدائرى .. وماشى على سرعة 60 او 70 كيلوا ... مافيش داعى انك تمشى على الشمال من اساسه ... امشى فى الحارة الوسطى احسن لك

اما لو كنت فى مقدمة السيارات ... موش مطلوب منك انك تكون الزعيم .. اللى بيعدى من العربيات التانية وهما ماشيين وراك هههههههههههههههههه
موش مطلوب منك انك عشان تتخطى عربية اخرى .. تزيد من سرعتك وتتجاوز السرعة القانونية ... او حتى تتجاوز السرعة التى تحب السير عليها والتى تشعرك بالأمان.




3- اذا كنت تسير بطىء وتبحث عن عنوان او يوجد عطل لا قدر الله او اى شىء ...
حاول الالتزام بالحارة اليمين ... ومن وقت لأخر لو استطعت السماح للسيارة التى فى الخلف بالمرور .. يبقى عشرة على عشرة وممكن تستعمل نور الانتظار




4- دائما انظر الى المرايه لكشف المناطق العمياء ... خصوصا قبل تخطى اى سيارة ... وقبل تخطى اى عربية اخرى ... يجب ان تكون سرعتك اعلى من السيارة التى تقوم بتخطيها ... وبمجرد الانتهاء من عملية المرور من السيارة التى امامك ... على طول انقل نفسك مرة تانية "فى الحارة الوسطى" ........ واترك الحارة اليسرى للسيارات الاخرى الاكثر سرعة منك للمرور .




5- دائما استعمل الإشارات قبل اى تحرك للسيارة ... عايز تدخل يمين ... او شمال ... عايز تنقل نفسك من حارة الى حارة ... ناوى تمر من السيارة التى امامك ... الخ

والاحسن طبعا انك تستخدم الإشارة بدرى شوية ... يعنى موش معقولة استخدم الإشارة قبل ما اتحرك بالعربية بثانية واحدة ... ولما تحصل مشكلة ... اقول بصوت عالى .. "ما انت شايف يا اخى الإشارة" ههههههههههههه

مثلا: انت شايف سيارة متعطلة امامك ... استخدم الإشارة بدرى شوية ... كده اللى وراك هايعرف انك ناوى تغير اتجاهك ... وهايعمل حسابك ...
ماجيش قبل العربية المتعطلة ... ومرة واحد استخدم الإشارة ومرة واحد انقل نفسى من حارة الى حارة "مافيش داعى للمفاجآت"




تابع
فى انتظار التواصل


مع اطيب التمنيات

اخوكم حسين غزالة

نصائح عامة

ملخص مهارات القيادة الدفاعية

19 نصيحة لتجنب ازعاج الآخرين

6- إذا كنت ناوى تستخدم الفرامل .... ضع رجلك على الفرامل واضغط عليها "براحة" وفى منتهى الهدوء ...

مثال هام:
انت شايف امامك سيارة متعطلة ... او ازدحام مرورى ... او اى سبب سوف تتوقف عنده
مافيش داعى انى قبل العربية المتعطلة مثلا ... اتوقف مرة واحدة

او مثلا شايف ان فيه مطب صناعى
مافيش داعى انى قبل المطب الصناعى .. اتوقف مرة واحدة
اعطى فرصة للعربية التى فى الخلف تدرك وتعلم انك ناوى "تتوقف" ... اضغط على الفرامل من بدرى "خفيف" ... بالطريقة دى العربيات التى فى الخلف هى كمان هاتعمل حسابها .. وتضغط على فراملها هى كمان وتعمل لك حساب ...

طبعا افضل وقت عشان تضغط على الفرامل ... هو انك اول لما تشوف ان العربية التى "امام العربية التى امامك " نور فراملها "احمر" ... على طول تبدأ انت كمان التعامل مع الفرامل عندك .... لكن احترس ممكن يكون قائد العربية فى حالة سرحان ... وناسى نفسه .. او يكون شاب متهور ... الخ





7- زيادة السرعة لازم يكون لها سبب
مافيش داعى انك تضغظ على دواسة البنزين على الآخر ومرة واحدة ترفع رجلك من على البنزين ... زى المجنون وبدون داعى ...
خصوصا لما تشوف إن الإشارة خضراء
او انك اول عربية على الطريق وجه دورك للتوقف
عندما تقوم بتغيير حارتك ... حاول ان تتم العملية بسرعة موش ببطء ... يعنى لو ناوى اغير الحارة بتاعتى ... على طول انقل نفسى بسرعة لو نقلت نفسى ببطء امام السيارة التى فى الخلف ... طبعا هاسمع حاجات موش كويسة هههههههههههه
مافيش داعى انى اقلل من سرعتى ... إلا اذا كانت حركة المرور محتاجة كده ... يعنى لو الشارع سالك ... والعربيات ماشية كويس ... مافيش داعى انى امشى بطىء واسبب ازعاج للعربيات التى فى الخلف.
فى الحقيقة زيادة السرعة ... لازم تكون بحساب وعقل حسب حركة المرور التى امامك.





8- عندما تزيد سرعتك بدون داعى فى وسط مجموعة من السيارات ...
انت بالطريقة دى تسبب ازعاج للعربيات التى حولك
ولازم تعرف انك لو كنت عايز توصل بسرعة عربيتك الى 90 او 95 كيلوا .. هاتحتاج على الاقل 30 ثانية ... ده لو عربيتك مية مية هههههههههه ... يعنى هاتحتاج على الاقل كيلوا متر من المشى السريع عشان توصل للسرعة دى...
وانت ماشى فى وسط العربيات ... عمال تزود بنزين وترفع رجلك .. وتعمل حركات تضايق اللى حواليك.




9- توقف خلف الخطوط البيضاء
خصوصا اذا كنت ماشى داخل المدينة ...
اذا توقفت امام الخط الابيض ... زى ما بيقولوا "بيطلع ببوزه" ... هههههههههههه انت بالطريقة دى بتسبب ازعاج للآخرين ...
وهل السيارة توقفت بسبب ان الإشارة قفلت عليه ... ولا بسبب قلة الزوق
وانت اساسا عمرك ما هاتقدر تغير نور الإشارة حتى ولو وقفت امام الخطوط البيضاء ...
طبعا لو وقفت خلف الخطوط البيضاء هاتمشى متأخر شوية بسيطة ... لكنك هاتساعد اى عربية تانية داخلة نفس الشارع اللى انت فيه ... هاتدخل فى منتهى الهدوء وبدون مشاكل ومن غير ما يحصل اى تصادم

انما لو حضرتك متقدم بعربيتك زيادة عن اللزوم فى الشارع .. طيب العربيات اللى داخلة نفس الشارع تعمل ايه ... هانفضل نخبط فى بعض





10- اذا كانت داخل على يوتيرن
مرة تانية نفتكر مع بعض:
- الاول اعطى اشارة
- انقل نفسك للحارة الموجود فيها اليوتيرن
- هدى من سرعتك

اذا كان فيه اكثر من حارة داخلة على اليوتيرن ... اختار حارة والتزم السير فيها حتى بعد الإنتهاء من اليوتيرن ... يعنى اوعى تغير حارتك وانت داخل على اليوتيرن
اذا غيرت حارتك وانت داخل على اليوتيرن .. اكنك بتقول للعربيات التى حولك "والنبى انا عايز حد يخبطنى" هههههههههه ربنا يسترها مع الجميع





11 – حاول تسوق عربيتك فى حدود السرعة القانونية ... إلا إذا كانت هناك ظروف تمنع ذلك ... فيه مشاكل فى الطريق سيارة متعطلة .. الجو اتغير وفيه امطار مثلا.
ولو كان فيه اماكن عبور مشاة ... يبقى لازم امشى بنفس سرعة العربيات التى امامى ... إلا اذا كان هناك سبب مهم للسير بسرعة اقل من السيارات التى امامى ... مثلا "البحث عن عنوان" ... الافضل انى استخدم اشارة الانتظار وانى اوسع للعربيات التى فى الخلف على قدر المستطاع ... وهما كمان هايعرفوا انك بتفهم كويس .




من شوية كنت بسخن العربية
واول ما فتحت باب العربية ... كان فيه شاب راكب عربية حديثة راكن امامى وبيستعد للخروج ... وبجواره "البنت الامورة" .... وريح على عربيتى ههههههههههههههه ... واول ماشافنى "طار" بالعربية ههههههههههههه


المهم النصيحة كالتالى:
اذا كنت موش واثق ان المساحة التى امام عربيتك موش كفاية ... مافيش داعى انك تريح على العربية اللى وراك ... ممكن تكسر العجل وتطلع للامام ... ثم ترجع للخلف ... ثم تعود للتحرك للامام وتخرج فى سلام ... لا تخبط عربيتك ولا تخبط عربية غيرك عشان تخرج من الركنة بسلام ...
لكن هانقول ايه ...
النصيب ...
اهو الواحد ما تحركش من مكانه
لكن الواحد لازم ياخد بالاسباب
موش كده ولا ايه ؟


تابع
مع اطيب التمنيات
اخوكم حسين غزالة