الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة sara2001

السلام عليكم استاذ حسين

وعليكم السلام ورحمة الله وبركاته

انا بعتذر لحضرتك عن عدم المشاركه في الموضوع من فتره على الرغم من متابعتي له
العفو حضرتك تشرفينا فى اى وقت تحيبه

وبأكد لحضرتك استفادتي من كل ما يكتب فيه جزاك الله عنا كل خير
وده كلام بسعدنى جدا جدا جدا والأكثر دعاواتكم لى .... واسألكم الدعاء لى ولوالدى الله يرحمهم

انا مش شايفه ان حضرتك مبتدىء اطلاقاً
والله العظيم انا مبتدأ زيكم بالضبط ... لكن بعد ما نزلت الشارع .. حاولت افهم ما حاولتش احفظ ... حاولت اتعلم براحتى بدون استعجال ... وشعرت بالخوف ومازلت اشعر بالخوف قليلا وده شىء مطلوب .... ولكنى اكره الشعور بالخوف جدا ... وسألت نفسى سؤال: اكيد فيه ناس كتيير زيك مطلعين رخصة ونجحوا فى اختبار القيادة من خلال مدرسة المرور ولكن الاختبار الحقيقى هو التعليم داخل شوارع المحروسة .... والأفضل لنا اننا يكون لنا مشاركة شاملة "كائن حى" ... ينمى باستمرار عن طريق انضمام اعضاء جدد ومبتدأين فى القيادة والإستفادة القصوى من الأصدقاء ذوى الخبرة فى القيادة ... وتبادل المعرفة مع بعض .... يعنى ممكن فيه معلومات كثيير انا اكون عرفتها من اصدقائى لكن لم تسنح لى الفرصة لتطبيقها .. والافضل انى اتناقش معاكم فيها ... ويمكن الاقى اى صديق يصحح لنا المعلومات دى ونستفيد كلنا ... وربنا ييسر الاحوال للجميع إن شاء الله

كل الموضوع ضيق الوقت بسبب ضغط العمل مع بدء التدريب على السواقه

الله يكون فى عون حضرتك ويوفقك الى ما فيه الخير بإذن الله تعالى

انا قرأت تقريبا حلقتين من أساسيات القياده الدفاعيه الفتره الماضيه وبدأت في التكمله بس لازم اطبعها لأني (احوليت) من القراءه من على الكمبيوتر هههههههههههه

هو القراءة من على الكومبيوتر فعلا متعبة ... لان انا بحكم شغلى فعلا نظرى ضعف ... ولاول مرة اشعر انى موش بقدر اقرأ من قريب .. وبفكر اشترى شاشة ال سى دى ... يمكن تكون افضل من الشاشة اللى عندى "DELL " ... او حتى اشترى "لاب توب" .. عشان الواحد يتحرك براحته شوية حتى ولو حكمت يخرج فى اى حديقة وفى نفس الوقت يعمل اى شغل على خفيف لو لزم الامر.

والموضوع طويل جدا ومفصل جدا ودي حاجه بشكرك عليها

العفو حضرتك لا شكر على واجب ..... والله انا نفسى ما كنتش اعرف قبل كده ان الموضوع هايكون كبير بالشكل ده وانه فعلا من اهم المواضيع اللى بتمس ناس كثيير قوى مطلعين رخصة ومحتاجين كل تشجيع خصوصا للقضاء على الخوف ومحتاجين اى معلومة حتى القدام منهم محتاجين تجديد معلوماتهم واسلوبهم فى القيادة

وللأسف انا معنديش تجارب اضيفها حاليا لأن موضوع التعليم عندي يسير ببطء شديد لإعتمادي على آخرين وحسب اوقات فراغهم بنزل بالعربيه

وده شىء ممتاز جدا ...موش مهم ابدا الإستعجال ... والله العظيم انا لسه راجع النهاردة من مشوار لمدينة العبور هاحكى لكم عليه بعد الفاصل "ههههههههههههههههه" قصدى بعد شوية ... موش مهم الإستعجال ... المهم لما أنزل الشارع لا ارتكب اخطاء ... واضم الى رصيدى من التجارب "تجربة ناجحة جديدة" ... كده ثقتتى فى نفسى تزيد وده اهم حاجة

لأني لسه مش بنزل بيها لوحدي
وأنا حتى الآن عمرى ما نزلت بيها لوحدى غير مرة او مرتين ... وكل نزولى مع اخويا الكبير او صديق لى والآن لا انزل إلا مع "ملاكى الحارس" ههههههههههه قصدى ام الأولاد ربنا يبارك فيها ... هى كمان بتشجعنى وبتقول لى انت مستواك بيتحسن عن الأول ... لكن انا عارف إن لسه فاضل كثيير وموش مهم الإستعجال خالص

اكتر حاجه متكرره معي في التدريب وبتضايقني اللي بيلف من امامي علشان يدخل يمين وانا اتجاه سيري للأمام وطبعا علشان بكون ماشيه بطىء بقدر افرمل في الوقت المناسب لكن لو ماشيه عادي مش عارفه الموقف هيكون ازاي

برافو عليكى ... هو ده الكلام ... لازم ما دام فيه ازدحام ... تكون رجلك جاهزة على الفرامل وتتحكمى فى سرعة العربية بالفرامل ... ورجلك الثانية تكون ضاغطة على الدبرياج لو كنت ماشية فى الازدحام ... واول ما يظهر لك سيارة بتمر من امامك داخلة يمين داخلة شمال موش مهم ... كل المطلوب انى اهدى شوية بالفرامل ... ثم ارفع رجلى عن الفرامل ... واشوف السكة سالكة خلاص ... اضغط سنة بنزين ... وارجع احط رجلى على الفرامل واستعد مرة تانية ... يعنى ممكن احط رجلى على الفرامل بدون ما اضغط عليها ... لكن لو الدنيا زحمة اضغط عليها براحة بحيث اترك السيارة تستمر فى السير ... وإذا لزم الامر اتوقف تماما ... على اساس انى اصلا ضاغط برجلى التانية على الدبرياج ... واهقدر اختار الغيار المناسب بدون توقف وبدون مشاكل .... والاهم انى احافظ على المسافة بينى وبين السيارة اللى امامى عشان سرعة رد الفعل

والأفضل طبعا الإبتعاد عن الحارة اللى فيها اليوتيرن ... يعنى لو فيه ملف فى اليمين فى الحالة دى امسك الحارة اللى فى النص او اللى فى الشمال عشان ابعد عن الملف ... ومادام انا موش داخل يمين اعتقد والله اعلم يبقى الافضل انى اعطى اشارة شمال ... عشان يعرف انى هامشى على طول موش هادخل الملف اليمين ... ومادام السائق الآخر بيدخل امامك يبقى اكيد فهم وعارف انك لسه بتتعلمى عشان كده هو عايز يخطف الطريق من امامك ويدخل بسرعة قبلك ... مافيش مشاكل اهم حاجة ... انك اوعى تدخل على الزحمة ورجلك على البنزين ... اوعى تغيرى اتجاهك لو ظهر سائق امامك مرة واحد ... كل المطلوب هدى السرعة فقط .. وحاولى فى المرات التالية "تنظرى فوق كتفك او فى المراية" لانك بتفاجئى بظهور عربية موش ظاهرة اساسا فى المراية ... حاولى كده على خفيف لحد ما تتعودى ... لكن احترسى من النظر فى المراية لدرجة تنسى العربيات اللى امامك .... الاهم اولا للمبتدأ السيارات اللى امامه فى المقام الآول

المشاركة الأصلية كتبت بواسطة abeeron

سلام عليكم

وعليكم السلام ورحمة الله وبركاته

شكرا جزيلا يا ا. حسين

العفو حضرتك لا شكر على واجب احنا كلنا اخوات وانا سعيد جدا جدا النهاردة لوجودك معانا ... وبصراحة وجود حضرتك والاستاذة سارة والاستاذة لبنى ... كسر حاجز ضعف مشاركة القراء ... واتمنى من كل الاصدقاء الأوفياء المشاركة بجدية وبحماس عشان نستفيد كلنا بإذن الله ... ولاحظوا حجم "الإطلاع" على الموضوع كبير والحمد لله ... ده معناه ان الموضوع مهم لنا كلنا وربنا ييسر الاحوال

..كلام حضرتك مفيد ومشجع جدا للمبتدئين اللي زي حالاتي ..دي اول مرة اشارك في الموضوع رغم اني متابعاه وبادعي ربنا يجازي كل المشاركين فيه وكل اللي بينصحوني على هذا المنتدى كل خير..

اللهم آميين ... شكرا لحضرتك على الدعاء واسألكم الدعاء لى ولوالدى الله يرحمهم

لم اشارك بالتعليق او الرد لاني لسا فعلا ماعنديش تجربة مفيدة ..
انا معايا رخصة من سنة (بس حلجة كدا زي قلتا لانها من من خلال مدرسة تبع المحافظة) واخدت كورس تاني الصيف الماضي لكن بدون تدريب لاني لم اشتري العربية سوى من 3 شهور تقريبا ومن حوالي شهر بدات اتعلم تاني مع مدرب خاص

وده شىء ممتاز ... يعنى برغم حصول حضرتك على رخصة .. وبرغم انه سبق لك القيادة .. والتدريب فى الماضى ... لكنك فضلتى إعادة التدريب ... لإكتساب الخبرة وكسر حاجز الخوف ... ودى تجربة فى حد ذاتها لكل الأصدقاء ... ورسالة واضحة للجميع ... خصوصا اللى بيحبوا "يهزروا على طريقة قيادة السيدات" .... وده الافضل بدل من النزول والتخبيط فى عربيتك وعربيات الآخرين ... وده للأسف الشديد اللى بيعملوا كثيير من الناس ... عايز يعمل فيها "شجيع السينما" ... وانه ولد جرىء ومابيخافش من الآخرين وينزل يخبط عشان يتعلم ... والمشكلة يلاقى كثيير من الناس بتشجعه على كده .... لأ طبعا ... سلامتك وسلامة الآخرين اولا وأخيرا ... ولو موش خايف على نفسك ... لازم تخاف على عربيتك اللى تعبت فى شراءها ولا إيه
وفي حاجات كتير لسا مش عارفة اضبطها وبعت اسال على بعضها والناس هنا ربنا يكرمهم فعلا بيفيدوني ..لكن جربت انزل وحدي مرة الاسبوع اللي فات يوم اجازة تحرير سينا مشوار صغير جدا حوالين البيت والحمد لله حسيت ان الموضوع مش مستحيل او شديد الصعوبة كما كنت اتخيل..هو دا ملخص التجربة اللي اخشى انها لن تفيد احد

بالعكس ... دى تجربة مفيدة جدا .... واول حاجة لازم يعملها المبتدأ النزول الى الشارع فى الصباح الباكر وفى ايام الأجازات ... لكس حاجز الخوف والتدريب على الشوار اللى احتمال ينزل فيها لقضاء احتياجاته .. ده غير انه لما هايرجع هايحتاج يركن العربية وده تدريب آخر ... وقبل ما هايمشى بالعربية هايحتاج يكشف عليها "كاوتش واشارات وزيت ومياه ... الخ" وده تدريب آخر ...
يعنى ابسط حاجة جارتى سافرت "كندا" لكن "متنكده" ههههههههههه بسبب بسيط جدا .... لم تكشف على مستوى المياه فى الراديتير والموتور "ضرب" والعربية عطلانة فى الجراج محتاجة "جوان نش السلندر" والله اعلم هاتحتاج ايه تانى ... مع انها المفروض عنده خبرة موش وحشة فى موضوع القيادة ... يعنى خطأ زى ده عمله واحد قديم وماعملوش مبتدأ فى القيادة

لكن عموما انتم هنا بتحسسوني ان الدنيا لسا بخير وفي ناس عايزة تفيد وتساعد غيرها من غير هدف تاني ..

ده اكيد الدنيا لسه بخير والحمد لله ... وانتم هنا اولا واخير اخوات لنا ... نحترمكم ونرحب بكم فى اى وقت بين اصدقاء نايل موتورز الاوفياء ... وكلهم والحمد لله ناس محترمة وافاضل وعلى اتم الإستعداد لتقديم المساعدة بإذن الله

ربنا يجعله في ميزان حسناتكم جميعا ويوفقنا جميعا لقيادة لا تضر احد باذن الله

اللهم آميين ودى اجمل دعوه والله العظيم
شكرا لحضرتك مرة تانية وفى انتظار معرفة تجاربك فى القيادة

مع اطيب التمنيات
اخوكم حسين غزالة