الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة hesham90

تحياتى للاستاذ حسين
ودائما سباق بالمعلومات الغزيرة والمفيدة والرد على استفسارات الاعزاء اعضاء وعضوات المنتدى
الكرام وكل عام وحضراتكم بخير
اسئلة اليوم
1-عند عبور المطب وخد بالك من عبور ومدى تخيلك لحالة المطب بكون مدى فرامل خفيف لكن زى ماقلت السحب بيقبى عالى فالعربية بتجرى والسؤال ينفع استمر دايس على الفرامل خفيف برضه لحد ماطلع المطب ولا افرمل قبل المطب واسيب العربية تطلع وفى الحالة دى لازم تسمع تحت

والله فيه ناس كثير فى المنتدى تؤيد اقتراح عدم ضغط الفرامل على المطب الصناعى ... لكن بالنسبة لأن عربيتى ارتفاعها منخفض .. احيانا لو شعرت ان سرعتى ما زالت عالية ... فى الحالة دى فأنا مجبر اضغط على الفرامل ... يعنى موش معقولة هاخد المطب وانا ماشى بسرعة
لو شعرت ان سرعتى مناسبة ومعقولة ... خلاص بطلع المطب عادى وكل تركيزى انى انقل الغيار المناسب اول ما عجل العربية الامامى يبدأ فى النزول من فوق المطب ... يعنى لو العربية ما زالت بتتحرك هاختار الغيار التانى واستمر فى السير
اما لو شعرت ان العربية هاتتوقف فوق المطب او هاتبدأ فى التريح للخلف او هاتنزل المطب لكن هاتتوقف يعنى شبه متوقفة ... فى الحالة دى هاختار الغيار الأول عشان العربية "ماتصقفش" وتسمع اصوات موش كويسة داخل الموتور ... والله اعلم
يعنى لو فيه شوية تدريب على اى مكان فيه مطب صناعى ... وتقدر تتحكم فى سرعة العربية وتختار السرعة المناسبة وتطلع بهدوء وتختار الغيار المناسب قبل النزول من على المطب ... هايكون تدريب هايل جدا ... وسوف يساعد على المحافظة على العربية خصوصا لو كنت "محمل" ركاب آخرين فى العربية ... وده طبعا له تأثير على السيارة ... سوف تجد انها انخفضت اكثر واحتمال احتكاكها بالمطب من اسفل كبيرة نتيجة اى سرعة زيادة .. او توتر من سيارة ماشية فى الخلف .. او المفاجأة بالمطب فى مكان جديد انت نزلت فيه ... الخ

نصيحة:
لو نزلت اى مكان جديد ... دائما تنظر الى الامام بقدر المستطاع على العربيات التى امامك ... وما تسرحش ... عشان لو فيه اى مطب صناعى ... طبعا العربيات هاتتوقف عشان تعدى من فوقيه ... وانت هاتشوفهم وتعمل حسابك ...
لان المشكلة فى المطبات ... ان الخطوط البيضاء اللى عليها بتتمسح .. ولو كنت ماشى بسرعة بتفاجأ بالمطب امامك ...

اما لو كنت ماشى فى شوارع جانبية ... فى الحالة دى كل المطبات بدون مواصفات ... ههههههههه مطبات "عمولة" .......... وفيه مطبات من إنتاج أهالى المنطقة ههههههههههه ودى اخطر انواع المطبات ........ وفيه المطبات "الدعائية" .... ههههههه يعنى موش شركة الاهرام للاعلان اللى عملاها .. لأ المقصود يعنى أن واحد مثلا ميكانيكى ... عايز العربيات تهدى امام ورشته ... يقوم يعمل مطب امام الورشة وهكذا .......
فى الحقيقة المطب الصناعى محتاج مسلسل رمضانى


2-اتكلمنا على طلوع الكبارى والتحكم فى البنزين والدبرياج والهاند بريك لاكن ماتكلمناش على نزول الكبارى والاشارة بعد الكوبرى واقفة او الكوبرى مزدحم والعربيات واقفة والسؤال كيفية التحكم فى العربية قى النزول من الكوبرى والكوبرى واقف*

نزول الكوبرى سهل جدا .. لكن فى منتهى الخطورة
احد الاصدقاء كان راكب عربية بتاعته جديدة ... لكن عمل عشر رجالة وركب العربية بدون اى تدريب
وهو نازل من فوق الكوبرى ... مرة واحدة غير الحارة بتاعته بدون داعى
وكان فيه راجل غلبان ماشى فى الشارع الجانبى اسفل الكوبرى وراكب "فيسبا"
خبط الراجل الغلبان ووقعه فى الشارع ... لكن ربنا ستر والحمد لله

نزول الكوبرى موش محتاج منك غير انك تعطى غيار مثلا الثانى ... ورجلك تكون جاهزة على الفرامل
لو شعرت ان الطريق اسفل الكوبرى مزدحم
على طول هدى العربية بالتدريج
ونظرك الى الامام على قدر المستطاع
وماتجريش زى باقى العربيات اللى نازلة من على الكوبرى
لأن اغلبهم مافيش اى خبرة

اسفل الكوبرى ممكن تلاقى إشارة
وممكن تفاجأ بعربيات تقطع الطريق فى الإشارة
وممكن تلاقى ناس بتعبر الطريق عشان تلحق اتوبيس او ميكروباس

انا فى احد المرات وجدت راجل بيتفاوض مع التاكسى فى منتصف الشارع اسفل الكوبرى

يعنى وانت نازل من على الكوبرى والمفروض بسرعة ... تلاقى تاكسى متوقف فى منتصف الشارع وكمان "زبون" واقف بجوار التاكسى بيتفاوض معاه

طيب التفاوض خلص
طيب الراجل ده هايرجع بظهره لو فشل التفاوض هههه وهايطلع فوق الرصيف تانى
ولا هايركب التاكسى وهايفتح باب التاكسى على الطريق من الناحية العكسية
ولا التاكسى هاينزل ناس على الطريق

ولا فيه عربيات ماشية اسفل الكوبرى فى الشوارع الجانبية
ممكن العربيات دى تدخل على الحارة اللى فيها الكوبرى
او عربيات اوتوبيس او نقل من شارع جانبى تدخل على حارة الكوبرى

او عربية عايزة تغير الإتجاه وهى ماشية فوق الكوبرى ... وده ممنوع اساسا ... لأنك هاتلاحظ ان فوق الكوبرى فى الغالب يعنى بيتعمل خط ابيض متصل ... ومعناه ممنوع التخطى ... يعنى تقضل ماشى فى حارتك حتى تنتهى من نزول الكوبرى

ولو كنت غريب عن المنطقة ممكن تفاجأ بأن فتحة النزول من على الكوبرى "عدت" منك ... فى الحالة دى النصيحة انك تستمر فى السير ولا تتوقف بشكل مفاجىء عشان تلحق تدخل فى الفتحة دى
للأسف فيه ناس كثيير بتعمل كده والنتيجة تصادمات من الخلف او اصطدام بجسم الكوبرى
الافضل الاستمرار فى السير والعودة من اى طريق تانى حتى ولو كان بعيد

وطبعا الناس اللى بتحب تتخطى سيارة اخرى اثناء السير على الكوبرى وكمان فى منحنى الكوبرى
يعنى الكوبرى مثلا "بيلف"
يظهر فى الوقت ده "الذكى" اللى عايز يمر منك اثناء الملف ... وده لازم تعمله الف حساب ... لأنك مرة واحدة تتوقع ان صاحبنا ينزل من فوق "الترابزين" بتاع الكوبرى اختصارا للوقت هههههههه ربنا يسترها مع الجميع

او وجود ملف على الكوبرى لكن فى نفس الوقت "درجة ميل الكوبرى" غير مناسبة
والنتيجة ان العربيات تسقط من فوق الكوبرى

لو كل العربيات اللى حواليك بتجرى وهى نازلة من على الكوبرى ... مافيش داعى انك تسير زيهم
انا موش بقول لك انك تمشى زى "البطة" هههههههه لأ انا قصدى عينك على عداد السرعة وانزل بالسرعة الى مثلا 60 كيلوا ورجلك جاهزة فوق الفرامل وعينك على الرصيف وعلى المشاة
واضرب كلاكس للناس اللى ماشية فى الشارع عشان يصحصحوا معاك ... واضرب الكلاكس من بعيد عشان ما "يتخدوش" ... ويعمل حسابه

وطبعا حافظ على المسافة بينك وبين العربية التى امامك ... لان العربية التى امامك لو توقفت فجأة وانت نازل الكوبرى ... فى الحالة دى موش هاتلحق تتوقف بسرعة لأنك هاتكون نازل مندفع

وعينك على إشارات العربيات التى امامك بمسافة كبيرة
وانت نازل لو وجدت ان إشارات العربيات "مضيئة" يبقى اكيد العربيات دى بتهدى ولازم انت تهدى اكثر من الأول

ولو شعرت ان اكيد اكيد هاتتوقف اسفل الكوبرى فى الإشارة مثلا ... خلاص بدون تردد لو كانت سرعتك هادئة اساسا
مور العربية واتركها تنزل بهدوء الشوية اللى فاضلين حتى تتوقف فى منتهى الهدوء
وطبعا لازم تضغط على الفرامل خفيف
عشان العربيات اللى وراك وهى نازلة تعمل حسابها
يعنى يبقى شايف نور الفرامل بتاع عربيتك بينور ويطفى اكثر من مرة على فترات ويعمل حسابه انك ايضا بتتوقف
ومافيش داعى للتوقف المفاجىء القوى

ومافيش داعى انى اضغط بنزين اثناء النزول من على الكوبرى بشكل جامد ... لأ خفيف خفيف ... عشان اى عربية اثناء النزول حتى ولو كانت انتاج 1964 هاتنزل بسرعة كبيرة زيها زى اى عربية تانية وفى وقت قياسى

اوعى تمور الفتيس اثناء النزول إلا إذا شعرت ان العربية تحت السيطرة وأن سرعتها هادئة جدا وسوف تتوقف فى اى وقت
لازم تكون معشق العربية اثناء النزول ورجلك فوق الفرامل عشان تتحكم فى سرعتها
وتتوقع اى شىء من اسفل الكوبرى او فى التقاطع او ناس فى الشارع او ناس فوق الرصيف ... الخ

3-لما كنت بتعلم فى مدرسة القيادة اياها اللى كلمتكم عنها قبل كده وماتعلمتش فيها حاجة المدرب قالى (ويشكر على العموم )بعد نقل الغيار سيب رجلك خالص والسؤال دلوقتى لما بجرب الحكاية دى وغير الفتيس على التالت مثلا واسيب رجلى خالص وماكانش بيقولى ازود بنزين ولا اسيب الدبرياج سنه سنه بلاقى العربية فيها رجرجة جامدة لانى بسيب رجلى من على الدبرياج خالص زى ماقالى ارجوا التوضيح*


الموضوع ده خطر جدا ... ومهم جدا للمبتدأين فى القيادة .. اوعى ترفع رجلك من على الدبرياج بسرعة ... خلاصة الكلام ان موتور العربية بيتأثر والفتيس كمان ... لازم ترفع رجلك من على الدبرياج بالتدريج ... وطبعا فى نفس الوقت رجلك التانية متثبتة على البنزين ... يعنى تضغط ضغطة معقولة على البنزين وتثبت رجلك عليها ... ورجلك التانية تترفع عن الدبرياج بالتدريج ... وبعد كده طبعا ترفعها بالكامل

اما لو كنت ماشى على سرعة عالية ونقلت الغيار الثالث او الرابع مثلا ... مافيش مشاكل انك ترفع رجلك اسرع من الاول ... لان العربية اصلا بتجرى وموش هاتشعر بأى حاجة

يعنى موش عشان انت مركز على الطريق ... تنسى موضوع الدبرياج ... انا حتى وقت قريب اخويا كان بيشتكى منى .. وهو عنده حق ...
لكن طبعا الحمد لله بمشى موش لدرجة ان العربية تترج
بحاول ارفع رجلى من على الدبرياج خفيف واضغط بنزين خفيف
ولا ازيد الضغط على البنزين إلا بعد الشعور بأن العربية بتستجيب وبتسحب وبتمشى بشكل جيد

يعنى موش العربية بتكون لسه بتقول "يا هادى" وانا اضغط لها بنزين زيادة عن اللزوم ... طبعا كله استهلاك وبدون داعى
وحمل زائد على الموتور

لازم اشعر بالعربية اكنها حتة منى هههههههه حلوة حتة منى دى



4- للاستاذة عبير افتكر الاستاذ حسين رد على تساؤلاتك بكل اسهاب ( واوعى تقولقيلى يعنى ايه اسهاب) بهزرررررر*
5-فى الزحام الشديد الافضل امشى على الاول على طول ولنفترض ان الزحام حوالى كيلو متر او اتنين زى شارع رمسيس من عبد المنعم رياض لحد جامع الفتح ولو كنت على التانى ففيه احتمال كبير العربية تفضل تبطل كتير لان الوقوف متكرر*
6-واما بكون داخل الشارع بتاعنا قدام البيت علشان اركن والمسافة من الشارع الرئيسى لحد البيت حوالى 444 متر (شوفت الدقة وتقدير المسافات) بكون على الاول على طول تحسبا لاى شيئ مطب ومااكثرها مطبات او اطفال صغيرة او نشء بيلعب وعلشان كمان اعرف اركن بالعربية براحتى خالص والسؤال ده غلط ولاصح وهل له اى تأثير على المحرك*


ما دام العربية اتحركت لازم تنقل الغيار التانى على طول عشان تحافظ على اسطوانة الدبرياج
لكن لو انت ماشى فى إشارة مرور والحركة ضغيفة جدا جدا
اكيد طبعا هامشى على الغيار الاول وهامور العربية بعد ثوانى قليلة لان العربيات هاتتوقف تانى

مع الممارسة
بتتعامل مع العربية اكنها "اوتوماتيك"
هههههههه
يعنى انت حاسس ان الشارع ده استحالة سرعتى توصل للغيار الثالث .... خلاص بمشى على الثانى وامرى لله وافضل مقصيها بنزين وفرامل فقط لا غير مثل العربيات الاوتوماتيك




7- بالنسبة للعضو الكريم Dr mim نصيحتى التدريب اولا واخيرا زى ماقال الاستاذ حسين على عربية المدرسة بشرط تكون مدرسة محترمة ومدرب عنده ضمير وفاهم يوصلك المعلومة صح*
8- اسيبكم بقى* تلحقوا تفطروا والسلام عليكم ورحمة الله وبركاته*


وعليم السلام ورحمة الله وبركاته
فى رعاية الله

مع اطيب التمنيات
اخوكم حسين غزالة

بسم الله الرحمن الرحيم

اللهم صل على محمد وعلى آله وصحبه أجمعين




المرشد الاساسى

فى مهارات قيادة السيارة

الكثير منا عندما يرغب فى تعلم القيادة ... ينزل مع سائق قديم ... او يتوجه الى مدرسة قيادة ... او ينزل مع احد الأصدقاء ... الكثير من المعلمين والمدربين عندهم خبرة كبيرة جدا ... لكن القليل منهم إللى عنده القدرة على التوصيل .. او تقدر تقول تحديدا مافيش عنده منهج محدد عشان يعلمك بناء عليه ... اقصى حاجة فى دماغه انك تمشى فى الزحمة وانك تطلع كوبرى والعربية ما تريح على اللى وراك


عشان كده انا جمعت تقريبا منهج او مهارات المفروض ان اى سائق يكون ملم بها جيدا ... اما بالنسبة للمبتدأين فلازم عليهم كلهم بما فيهم انا إعادة ترتيب اوراقنا ... واعادة النظر فى كل اللى اتعلمناه



ونشوف هل هو كافى ولا لازم اتمرن على مهارات اخرى بشكل جيد



الاختبارات او التدريبات دى ياجماعة هى اللى المفروض يتعلمها المبتدأين الراغبين فى الحصول على رخصة قيادة ...وفى المقام الآول يكونوا على مستوى عالى جدا جدا من المهارة



طبعا احنا كل تركيزنا على اختبار المرور "اجتياز الاقماع" .. مع الواسطة الحلوة هههههههههه وكله يبقى تمام والكل يعتقد انه اصبح سواق عشرة على عشرة ... وينزل يجرب فى الناس ههههههههههه



و يقول لك: انزل وخد خبرة فى خلق الله ههههههههههه ربنا يسترها مع الجميع

طبعا لأ

ومن الآخر الآخر اللى يقدر يجتاز الاختبارات دى بنجاح ... نقدر نقول عليه عنده استعداد كويس جدا ... المهم انا فكرت اننا نستفيد كلنا منها

ونقدر نعتبرها منهج للراغبين فى التدريب على قيادة السيارة وكمان مافيش فى دماغهم منهج معين للتدريب ... او اختبارات محددة عشان نقول اننا مستوانا كويس ومطمئن جدا



حتى ولو نزلت مع اى سائق او مدرب فى احدى مدارس القيادة ... لازم انت تكون عارف ايه المطلوب تتعلمه وتتدرب عليه ... يعنى يبقى فى دماغك منهج ومهارات انت لازم تتعلمها وتطلب من المعلم انه يلتزم بتعليمك المهارات دى ... لو كان المعلم مافيش فى دماغه خطة ... خلاص انت لازم تنزل معاه وفى دماغك خطة للتدريب ... عشان لا اضيع وقتكم فى الكلام خلينا نبدأ مع بعض


... نشوف مع بعض الاختبارات دى :





الاختبار الاول: التوقف عن الخط النهائى

وفيه يتم السير بالسيارة ثم التوقف قبل خط نهائى ... والمهارة هنا انك تتوقف قبل الخط بمسافة 30 سم تقريبا ... وغير مسموح بلمس الخط النهائى ... او تجاوز الخط النهائى او ههههههههه بالنظر من خلال الشباك الجانبى ...



طبعا التدريب ده موش لعب عيال ... برغم بساطه .. إلا أن الكثير مننا لا يستطيع التحكم فى المسافة بينه وبين السيارة التى امامه ... والكثير مننا يخبط فى العربية التى امامه او يجتاز الخطوط البيضاء فى الإشارة اويخبط فى العربية التى امامه اثناء الركنه .. او العربية تندفع منه بشكل جامد




لو انت مبتدأ لازم تبدأ تتدرب كويس جدا على التمرين ده

الاختبار الثانى: الدخول فى الملفات

وفيه يتم الرجوع للخلف والدخول فى ملف بزاوية 90 سم ... يتم الدخول فى شارع جانبى ... مع مراعاة عدم استخدام المرايه نهائى ... وعدم لمس اى حدود للإختبار ... يعنى لو كان فيه اقماع .. وخبط قمع او لمسته .. خلاص "باى باى" ... ترجع تتدرب تانى ... او مثلا لو نزلنا احنا بنفسنا الشارع وحبينا نتعلم بنفسنا ... لو رجعت بالسيارة للخلف ولمست الرصيف او طلعت عليه خلاص تعتبر نفسك "بلاطة" هههههههه وترجع تتعلم من تانى



وطبعا بمجرد الوصول بالسيارة الى الخط النهائى .. لازم تكون المسافة بين الخط النهائى وبين سيارتك حوالى 2 قدم او 30 سم تقريبا ... وعدم الخروج من الحارة المحددة لسير السيارة



وبمجرد الإنتهاء من الرجوع للخلف بنجاح ... تبدأ فى العوده بوجه العربية والدخول فى الناحية اليمين .. طبعا لازم تحاول انك لا تلمس اى خط او قمع اورصيف مثلا سواء انت راجع بظهر العربية او ذاهب بوجه العربية



اختبار جميل جدا جدا جدا

ترجع بظهرك شمال

وتذهب بوجه العربية يمين

طبعا التمرين ده مهم جدا جدا جدا
وإذا كنت لا تستطيع اجتياز هذا التمرين ... يبقى مافيش داعى انك تكمل اى قراءة تانية ... ووفر وقتك ومجهودك وريح نفسك وريحنا احنا كمان ههههههههههههه
بالنسبة لى إن شاء الله سوف اعيد ترتيب اوراقى ... لكن مستنى لما موجة الحر دى تخف شوية لان التمرين والعربية بتمشى بطىء ... المشى البطىء بيسخنها جامد ... وانا رأفة بها هانتظر شوية ... لكن انا معاكم إن شاء الله فى تواصل وهاضيف كل جديد فى الموضوع ده


فى انتظار التواصل


تابــــع


مع اطيب التمنيات
اخوكم حسين غزالة